Salamo

90 E TE Atu, ko koe to matou akapuanga i tera uki i tera uki.

2 Kare ua te au maunga nei i anau, kare oki te enua e te ao katoa nei i angaia e koe ra, ko koe rai koe, e te Atua, mei tupua roa mai e tuatau ua atu.

3 Te akariro nei koe i te tangata ei one; te tuatua ra koe, E oki, e te tamariki a te tangata na.

4 Ia koe ra oki, okotai tausani ua atu i te mataiti, e tau ïa ki te rā okotai i topa ra; e mei te araanga i te po ra.

5 Te riro nei ratou ia koe mei te riro vai puke ra; mei te varea moe ra ratou: i te popongi ra, mei te ngangaere e tupu ra ratou;

6 Ko tei kao, e tei tupu i te popongi ra; i te aiai ra, kua tipuia, e kua mae atura.

7 Koia teia kua pou matou i toou riri, e kua ngarangara matou i toou makitakita.

8 Kua tuku koe i ta matou ara ki mua ia koe; ta matou apa ngaro i roto i te mārama o to mata ra.

9 Kua topa akenei to matou au rā katoa i toou ra riri: Kua pou to matou au mataiti mei te manako ra:

10 Te au rā o to matou au mataiti, e itu ïa ngauru i te mataiti; e kia tae ki te varu i te ngauru i te mataiti i te maroiroi, e riro ra taua maroiroi ra ei roiroi e ei taitaia anga; kare oki e mamia, motu ke atura, rere atura matou.

11 Koai ra tei kite i te vivikianga o toou ra riri, e toou ra makitakita, mei te mataku e tau ia koe ra?

12 E apii mai ia matou i te tatau i to matou puke rā, kia riro to matou ngakau ki te pakari.

13 E ariu mai koe, e Iehova, aea ra ïa? e akaongi mai koe i to au tavini nei.

14 E akamataora vave mai koe ia matou i toou ra aroa, kia mareka matou, e kia pereperekavana, i to matou katoa nei au rā toe.

15 E akarekareka mai ia matou e kia aite ki te au rā i tumatetengaʼi matou ra; te au mataiti i akakoromaki ei matou i te kino ra.

16 E akakite mai i taau ra angaanga ki to au tavini nei, e toou ra kakā ki ta ratou ra tamariki.

17 Kia vai mairai te akaperepere o to matou nei Atua, o Iehova, ki runga ia matou nei, e te angaanga a to matou nei rima, e akatinamou koe ki runga ia matou; koia ïa, te angaanga a to matou rima, e akatinamou koe i te reira.