Ephesia

2 E KOTOU oki tei akaoraia e ia, ko tei mate i te ara e te kino;

2 Ko to kotou ïa aerenga i muatangana ra ta to teianei ao ra, ta te ariki mana o te reva ua nei, te vaerua e angaanga ririnui nei i roto i te aronga akarongo kore;

3 Ko tatou katoa oki te kapiti katoa anga i roto ia ratou i muatangana i te anoano o te kopapa nei, i te akatupu anga i ta te kopapa e ta te ngakau i inangaro ra; e mei te tangata ravarai nei oki, i anau mai ei tamariki ririia.

4 Kareka te Atua, no te aroa maata ona, e no te anoano maata tana i anoano mai ia tatou nei,

5 Mate uaorai tatou i te ara, akaora akenei aia ia tatou ma te Mesia katoa, (i ora kotou i te aroa ua;)

6 E kua akatu oki ia tatou ma ia katoa ki runga, e kua akanoo oki ia tatou katoa i te ao i te Mesia ra ia Iesu:

7 Ei akakite anga nana i te au uki a muri atu i te maata ua anga o tona aroa ua, i tona takinga-meitaki anga mai ia tatou nei ia Iesu Mesia ra.

8 I ora oki kotou i te aroa ua i te akarongo; e kare oki taua akarongo ra i to kotou uaorai: e mea orongaia mai ïa e te Atua:

9 Kare oki to te angaanga, ko te akatietie aea tetai.

10 Ko tatou oki tana angaanga, i angaia e Iesu Mesia ra ei rave i te tuatua meitaki, i tei akatau takereia e te Atua ei akonoanga na tatou.

11 E tenana e akamaara kotou e, e etene kotou i muatangana i te kopapa, i tapaia i te peritome kore e te aronga i tuatuaia ra i te peritome kopapa i raveia e te rima nei:

12 E te taka ke ra kotou i te Mesia i reira, e te tangata ke ke oki i te kapitianga a Iseraela, e te piritanga kore i te au koreromotu i tuatuaia maira, e manakoanga kore, e te Atua kore i te ao nei:

13 I teianei ra, ia Iesu Mesia nei, ko kotou ko te aronga i atea ke i muatangana ra, kua akavaitataia mai ïa i te toto o te Mesia nei.

14 Koia oki to tatou au, ko tei akariro ia tatou ei okotai, ko tei uri ki raro i te patu akataka ke i rotopu.

15 Kua akakore oki i te mea i enemi ei ra i tona kopapa, koia te ture akauenga no te au oroa ra; kia riro taua rua ra ei tangata ou okotai iaia uaorai, ka au atu ei;

16 E ei akaongi ia raua ravarai i te kapitianga okotai i te Atua i te satauro ra, i mate ei oki te mea i enemi ei ra;

17 E kua aere maira oki e kua tutu maira i te tuatua meitaki o te au kia kotou to te atea ke, e kia ratou i tei vaitata.

18 Nona oki tatou ravarai nei i tae atu ei ki te Metua ra i te Vaerua okotai.

19 E teianei kare atura kotou i te tangata ke e te tuitarere, okotai rai o kotou oire e te aronga tapu ra, no te ngutuare oki o te Atua;

20 Kua patuia oki ki runga i te tango o te au aposetolo e te au peroveta ra, ko Iesu Mesia uaorai te toka tiavā;

21 Nona oki te are katoa i te piri meitaki anga iaia ra, i riro ei oki ei nao tapu no te Atu ra:

22 E kua patu katoaia kotou e ia kia riro ei nooanga no te Atua i te Vaerua.