Porokaramu Ou no te Akaputuputuanga Kotinga

Te inangaro nei teianei ao kia irinaki tatou e ka vai ua rai teia akatereanga o te au mea nei e tuatau ua atu. Inara, e apinga ke ta te Tuatua a te Atua e akakite maira. (1 Ioane 2:15-17) Te tauturu ra te reira ia tatou kia marama e te ‘akaputuanga i te apinga i teianei ao’ e aruaruanga puapinga kore ua te reira. Kia akaketaketa i te iti tangata o te Atua, ka akatupu te porokaramu no te akaputuputuanga kotinga no te 2007 mataiti tavinianga i te tumu maata e “Akaputu . . . i te Apinga . . . ki Runga i te Rangi.”—Mata. 6:19, 20.

Te kapitiia maira te manakoanga tu materia i tei taikuia ia Ephesia 2:2 e ko “te ariki mana o te reva ua nei, te vaerua e angaanga ririnui nei i roto i te aronga akarongo kore.” Mei te reva rai e tei te au ngai ravarai te reira, tei rauka ua i te akaeaia, te takapini nei “te vaerua o teianei ao” i teia akatereanga o te au mea nei. (1 Kori. 2:12, NW) Mei te mea e e kino tikai to te reira akakeuanga, kua karangaia e e “mana” to te reira. Ka tauturu te porokaramu no te akaputuputuanga ou ia tatou kia kopae i te manakoanga tu materia o te ao nei e kia akamou meitaki e eaa ta tatou au mea puapinga maata. (Mata. 6:33) Kapiti katoa mai, ka tauturu te porokaramu ia tatou kia irinaki ki runga ia Iehova ia tatou e rave ra i ta tatou angaanga orometua noatu te au taomianga e te au timataanga ta tatou paa ka aro atu.

E akapapu e kia tae koe ki nga ra e rua e kia “akamaata tikai i te akono.” (Ebera 2:1) E akono i te au tataanga poto ua i runga i te au manako ka rauka ia koe tikai i te akono i roto i toou oraanga e i roto i taau angaanga orometua. Na te tae atu anga ki reira mei te akamataanga mai tikai ki te taopengaanga tikai o teia porokaramu puapinga maata i te pae vaerua, ka akamaroiroiia koe e ka akaketaketaia kia tamou ua atu rai i te ‘akaputu i te apinga i runga i te rangi’!