TUMATETENGAIA TEIANEI AO

1 | Paruru i Toou Kopapa

E PUAPINGA TE REIRA

Ka takino tetai manamanata e te tumatetenga i te oraanga kopapa o tetai tangata.

Ka akatupu te au tumatetenga i te manako apiapi ki te tangata, e me tupu ua te reira, ka rokoia ratou e te maki.
Ka takino katoa te au tumatetenga i te au ngai rapakau anga e ka akaiti te reira i te au tauturu e te au vairakau.
No teia au tumatetenga e ngata i te tangata i te oko mai i te au kai memeitaki e te tutaki i te taote.

Taau ka Anoanoia Kia Kite

E me tupu te maki kino e te manako apiapi, ka ngata ia koe te tuku i te au ikianga meitaki, e kare koe e akono i toou kopapa. E ka kino atu toou maki.
Me kare koe e aere ki te taote, ka maata atu toou maki e ka takake atu koe.
Me oraora toou kopapa, kua papa koe te tuku i te au ikianga meitaki noatu te au tumatetenga.
Noatu te putaua me kore apinganui, ka rauka ia koe te paruru i toou kopapa.

Taau ka Rave i Teianei

Ka akara te tangata kite i te au kino ka tupu e ka paruru iaia uaorai. Pera te oraanga pae kopapa. Te maata anga o te taime ka rauka ia koe te akaiti i te maki kino e te pakari o te reira, na te vai ma ua anga. E meitaki atu kia paruru i te rapakau.

“Me mā tatou e te ngai e noo ra tatou, ka akaiti te reira i te moni ka pou no te taote e kia rauka te vairakau.”—Andreas.a

a Taui te au ingoa i roto i teia makatini.

KIA AUTU—Tauturu Tau

I te au tuatau tumatetenga, e paruru i toou kopapa ma te aru i teia au takainga

KIA VAI MĀ UA

Kia vai mā ua

Karanga te Pipiria: “E kite mamao te tangata pakari i te kino, e kua pipini iora.” (Maseli 22:3) Akamanako i te au mea te ka takino i toou kopapa.

Orei putuputu i toou rima ki te puʼa e te vai, i mua ake ka amiri ei i te kai e me aere ki te are repo.
Tamā putuputu e kia vairakau i toou kainga, te au ngai tei amiri putuputuia.
Me ka rauka, auraka e piri atu ki te aronga e maki totoa to ratou.

KAI I TE KAI MEMEITAKI

Kai i te kai memeitaki

Karanga te Pipiria: “Kare ua e tangata e makitakita i tona uaorai kopapa . . . kareka e angai e te akaperepere marie.” (Ephesia 5:29) Ka akaperepere tatou i to tatou kopapa me matakite tatou i ta tatou ka kai.

Inu maata i te vai.
Kai i te ua rakau e te kai raurau tukeke.
Akaiti i te kai matu, te miti, e te tuka.
Akaruke i te kai avaava, te kona kava e te kai apinga akakona.

“Kia kore maua e makiia, ka kai maua i te au kai memeitaki; te openga, e pou ua ta maua moni ki runga i te taote e te vairakau. Ka oko maua i te au kai memeitaki.”—Carlos.

AKAETAETA I TE KOPAPA E TE AKANGAROI

Akaetaeta i te kopapa

Karanga te Pipiria: “E ngari ake te rima, okotai kia ki i te manga ma te au i nga rima katoa e rua kia ki ma te pekapeka e te kai i te matangi ra.” (Koheleta 4:6) Ka anoanoia tatou kia angaanga inara e akangaroi.

E akaetaeta i te kopapa. E aere aere putuputu. Ka meitaki atu toou oraanga kopapa me akaetaeta koe i toou kopapa noatu te pakarikari, te pirikoki, e te maki kino.
Akangaroi

Akangaroi. Me rava kore te moe, no tetai tuatau poto, ka kino atu te apiapi e ka kore te manako. Me roa te reira, ka tupu te maki kino.
E moe i te ora tau, e aru i te reira. E moe e e ara mai i taua taime i te au rā ravarai.
Auraka e akara TV e te au apinga apaipai i runga i te roi.
Auraka e kaikai maata, te caffeine, e te inu kava i mua ake ka moe ei.

“Ka akameitaki te moe i toku oraanga kopapa. Me rava kore taku moe, ka mamae ua toku mimiti e toku kopapa. Me maata ra taku moe, oraora toku kopapa! Maata toku maroiroi, e kare au e maki uaia.”—Justin.