Pene 7

Ta Tatou i Kite Mei ta te Atua Tuku Ua Anga i te Kino

1. (a) Naringa a Iehova i rave vave i te akapou i nga tangata meameaau i Edene ra, eaa ta te reira e akatupu kia tatou? (e) Inara, eaa te apinga aroa ta Iehova i oronga mai no tatou?

NOATU rai eaa te au tu ngata tei tupu i to tatou oraanga, kare i te tika kore no to te Atua ra tuanga to tatou nei anau mai anga. I akatupu aia i te tu apa kore ua ki nga tangata mua ra e kua oronga atu ia Parataito ei kainga no raua. Naringa aia i tamate atu ia raua i muri ua ake i ta raua meameaau, kare i reira e uanga tangata mei ta tatou e kite nei ma to ratou tu i te maki, te putaua e te rave kino. Inara, na te aroa ua o Iehova kua akatika aia ia Adamu e Eva kia anau i tetai uanga no raua i mua ake i te mate anga, noatu rai e ka akatuangaia ratou ki te tu apa ua. Kua oronga aia i te puapinga na roto ia Karaiti no te au uanga o Adamu tei taangaanga i te akarongo kia raukaʼi ia ratou te apinga i ngaro ra ia Adamu​—koia te ora mutu kore i raro ake i te au tu te ka rauka te akatupu i te rekareka maata rava no te oraanga.​—Deu. 32:4, 5; Ioane 10:10.

2. I raveia ainei te reira au mea ravarai no to tatou uaorai ora?

² E maata roa te puapinga o teia no tatou tatakitai. Inara mei te tataanga no te Puka Tapu ka kite tatou e te o maira tetai apinga maata roa atu te puapinga i to tatou uaorai oraanga nei.

No Tona Ingoa Maata

3. Eaa te mea akara anga kino tei piri atu ki te tupu anga o ta Iehova akakoroanga no te enua e te au tangata?

³ Kua kapiti katoaia ki roto i te tupu anga o tana akakoroanga no runga i te enua e te au tangata katoa, te ingoa o Iehova, tona rongonui ei Ngateitei no te Ao Katoa e Pini Ua Ake e te Atua mou. No to Iehova turanga, te umuumuia ra e te tu au e te tu mako meitaki o te ao katoa e pini ua ake e kia orongaia te akangateitei anga tei tau ra no tona ingoa e kia akarongo te katoatoa rava iaia.

4. Eaa tikai tei kapitiia atu ki te reira akakoroanga?

⁴ I muri ake i te anga anga ia Adamu raua ko Eva, kua oronga aia i te angaanga na raua ei akatupu. Kua akataka papu aia e kare tana akakoro anga kia akavi anake ua i te enua katoa, i te akatotoaanga i te au kotinga o te Parataito, mari ra e akaki i te reira ki te au uanga o te tane e te vaine mua ra, koia a Adamu raua ko Eva. (Ge. 1:28) Ka puapinga kore ua ainei te reira akakoroanga i te mea kua ara raua, e tupu maira te akakino anga ki te ingoa o te Atua?

5. (a) Kia tau ki ta Genese 2:17, aea e mate ei tetai no te kaianga i to te rakau no te kite i te meitaki e te kino? (e) Akapeea ta Iehova ra akatupu anga i te reira, ma te akangateiteianga i tana akakoroanga no te akaki i te enua nei?

⁵ Kua akamatakite a Iehova ia Adamu e me ka akarongo kore aia e ka kai i to te rakau e kite ei i te meitaki e te kino ka mate ia aia “i te rā” e kai ei aia. (Ge. 2:17) Tano tikai ki te tuatua a te Atua, i te ra tikai o ta Adamu rave anga i te ara kua akaapaia e Iehova nga tangata rave ara ra e kua tuku i te tika no te mate. Kare i rauka te akakore i te utunga. I te akava­anga, mei to te Atua ra manako, kua mate a Adamu raua ko Eva i te reira ra. (Akaaiteia atu kia Luka 20:​37, 38.) Inara no te akatupu anga i tana uaorai akakoroanga no runga i te akakianga i te enua, kua akatika a Iehova kia anau tamariki raua i mua ake i to raua mate anga tika tikai. Tera ra, mei to te Atua ra manako anga i te akaraanga e ra okotai te 1,000 mataiti, i te mate anga a Adamu e 930 mataiti, i roto rai ia i te “rā” okotai. (Ge. 5:​3-5; akaaiteia atu kia Salamo 90:4; 2 Petero 3:8.) No reira kua mou to Iehova tuatua anga i te tika no te tuatau i raveiaʼi te utunga, e kare i kore tana akakoroanga kia akaki i te enua ki te uanga o Adamu. Inara tera te aite anga e, kua akatikaia te au tangata ara kia ora, no tetai tuatau.

6, 7. (a) Eaa te tumu tei akakiteia mai ia Exodo 9:​15, 16 i akatikaʼi a Iehova kia vai mai te aronga rave kino no tetai tuatau? (e) I to Pharao turanga, i akapeea te akaari anga i to Iehova ra mana e i akapeea te akakite anga i Tona ra ingoa? (ng) No reira eaa te akaotinga a te openga o teia akatereanga kino?

⁶ Te akakite katoa maira ta Iehova i tuatua atura ki te tutara o Aiphiti i te tuatau ia Mose ra e eaa te Atua i akatikaʼi i te aronga rave kino ra kia vai mai no tetai tuatau. I ta Pharao arai anga kia kore te tamariki o Iseraela e akaruke ia Aiphiti, kare a Iehova i ta atu iaia i reira tikai. E tai ngauru au mate tei tukuna ki runga i te enua, ei akakiteanga i to Iehova mana na roto i te au mataara umere e te tuke tuke. I te akamatakiteanga i te itu, kua tuatua atu a Iehova kia Pharao e e mea ngoie ua nana te takore atu ia Pharao e tona iti tangata i te enua nei. Kua tuatua a Iehova e, “no reira tika rai oki au i vaoo ei ia koe, ei akakite anga atu ia koe i toku nei mana, e kia akakiteia toku ingoa e pini ua ake te ao katoa nei.”​—Exodo 9:​15, 16.

⁷ I ta Iehova akaora anga ia Iseraela ra, kua tae ki te atea te kitea angaia tona ingoa. I teia tuatau, te vaitata nei ki te 3,500 mataiti i muri mai, kare i ngaropoinaia tana i rave i reira ra. Kare ko te akakite anake anga i te ingoa o Iehova uaorai mari ra ko te akakite katoa anga i te tuatua mou no Tei tapaia i te reira ingoa. Na te reira i akanoo i te tika e ko Iehova e Atua te rave ra i tana au koreromotu e te akono ra i tona ra au tavini. Kua akakite mai te reira e no tona ra mana katoatoa kare e apinga e rauka i te arai i tona akakoroanga. Ka maata roa atu oki te manakoanga no te akapou anga i te katoa anga o te akatereanga kino, te ngai akara mataia e te ngai kare e akara mataia. Kare rava e ngaropoinaia i roto i te tuatua enua o te ao katoa te reira akaari anga i te mana katoatoa e te kaka ta te reira i apai mai no to Iehova ra ingoa. Kare e openga o tona puapinga!​—Ezeki. 38:23; Apokalupo 19:1, 2.

‘Aue te Oonu o to te Atua Pakari!’

8. Eaa etai atu tumu ta Paulo i raurau mai ia tatou kia akamanako?

⁸ Kua akatu mai te apotetoro ko Paulo i te uianga i roto i tana reta ki to Roma e: “E tuatua-tika kore aina ta te Atua?” E kua pau mai aia na te akaketaketa mai anga i to te Atua ra aroa ua e na te taikuanga i ta Iehova i tuatua kia Pharao. Kua akamaaraara katoa mai aia i te tika e te aite ra tatou te tangata nei ki te karakaraea i roto i nga rima o te potera ra. Te akaapa ra ainei te karakaraea no te angaanga tei akonoia nana kia rave? Kua kapiti katoa mai a Paulo e: “Eaa oki te Atua, kia anoano i te akakite i tona riri, e kia kitea tona mana, i te akakoromaki anga roa i te au āriki no te riri i akatauia no te mate ra; E kia anoano oki aia i te akakite i te maata anga o tona meitaki, i te au āriki o te aroa i akatau takereia e ia no te ao; Koia oki tatou nei, ko tei tuatuaia mai e ia, auraka ko to te ngati Iuda anake ra, ko te etene katoa nei ra?”​—Roma 9:​14-24.

9. (a) Koai ma te “au āriki no te riri i akatauia no te mate ra”? (e) Eaa ra a Iehova i akaari mai ei i te akakoromakianga maata i te aro atu i ta ratou au ravenga kino, e akapeea ra e riro ei te openga ei meitaki no te aronga te inangaro ra iaia?

⁹ Mei ta Iehova papau anga mai i te totouanga tei tataia ia Genese 3:15 ra, kua akariroia a Satani e tona uanga katoa ei “au āriki no te riri i akatauia no te mate ra.” Mei te reira tuatau mai rai to Iehova akakoromakianga. Kua akaapa te aronga kino i tona ra au mataara; kua takinokino ratou i tona au tavini, e kua tamate katoa oki i tana Tamaiti. Mari ra kua akaari mai a Iehova i te akakoromaki maata, ei puapinga mutu kore no tona au tavini. Kua rauka i te au mea ravarai tei angaia ra te tuatau kia kite i te au tupuanga kikino no te meameaau i te Atua ra. I te reira tuatau katoa oki, kua orongaia e to Iesu matenga te apinga ei ‘akakore i te angaanga a te diabolo ra.’​—1 Ioane 3:8; Ebera 2:​14, 15.

10. Eaa ra a Iehova i tamou ei i te akakoromaki i te aronga rave kino i te tuatau e 1,900 mataiti i topa?

¹⁰ Mei te tuatau e tere atu i te 1,900 mataiti mei to Iesu ra tuakaouanga kua akakoromaki akaou atu rai a Iehova i te “au āriki no te riri,” ma te tapuanga i te akapou anga no ratou. No teaa ra? No te mea no te akateateamamao ana aia i te tuanga rua o te uanga o te vaine ra, koia te aronga te ka kapitiia atu kia Iesu Karaiti i tona Patireia i te rangi. (Gala. 3:29) Ko teia aronga, e 144,000 te numero, ko ratou te “au āriki o te aroa” tei tuatuaia ra e te apotetoro ko Paulo. Te tuanga mua, ko te aronga tatakitai no roto mai i te ngati Iuda tei patiia no teia pupu. I muri ake kua kapitiia atu to Samaria tei peritomeia ra e, te openga, ko te aronga no te Kenitara ra. Na roto i te akakoromakianga maata ta Iehova akatere anga i tana akakoroanga, kare aia i opara i tetai kia tavini iaia, mari ra kua oronga aia i te au akameitakianga maata ki runga i te aronga tei ariki rekareka i tana au apinga aroa ra. I teianei kua vaitata i te akaotiia te teateamamao anga o te reira pupu no te rangi ra.

11. Eaa tetai atu pupu tei puapingaia mei to Iehova ra aka­koro­maki­anga roa i teianei?

¹¹ Inara ka akapeea i reira te aronga ei noo i te enua nei? Kia tae ki ta te Atua ra tuatau tau e au pirioni ua atu te ka akatuakaouia mai ei au tangata no raro ake i te Patireia ki runga i te enua nei. Pera katoa oki, mei te 1935 T.N. mai no to Iehova ra akakoromakianga roa kua rauka i te akaputuputu mai i te “urupu maata” no te pa enua ravarai ma te manako anga i te ora no ratou.​—Apo. 7:9, 10; Ioane 10:16.

12. (a) Eaa ta tatou i kite no runga ia Iehova uaorai, na te reira tupu anga? (e) Akapeea to tatou manako no ta Iehova akono anga i te reira au tumu?

¹² E tika kore ainei tetai i roto i teia au mea ravarai nei? Kare rava ia! Me ka tapu te Atua kia roa atu te akapou anga o te aronga kino, koia te “au āriki no te riri ra,” kia raukaʼi iaia te akaari i te aroa ki etai atu kia tau ki tona akakoroanga, akapeea e raukaʼi i tetai te akaapa anga tika? Mari ra, ia tatou e akara nei i te eeuanga o tana akakoroanga, e maata ta tatou ka kite no runga ia Iehova uaorai. Te umere ra tatou i tona au tu tukeke te maramaia maira​—tona tu tika, tona aroa ua, tona akakoromakianga roa, e tona pakari tuke tuke te aite anga. Ka tamouia ta Iehova akonoanga pakari i te maro anga e tuatau ua atu ei akakiteanga i te tika e ko tana mataara no te tutaraanga te mea meitaki ia. Ka tuatua katoa tatou ma te apotetoro ko Paulo ra e: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e!”​—Roma 11:33.

Tuatau no te Akaari i to Tatou tu Akono

13. (a) Me o atu tatou tatakitai ki roto i te mamaeanga eaa te au ravenga te orongaia maira no tatou? (e) Eaa te ka tauturu ia tatou kia rave ma te pakari?

¹³ Te vaira etai au tu te kapiti ra i te mamaeanga tikai no tetai no te mea kare te Atua i akapou atu i te aronga kino e te akatupu mai i te akaoraanga tei totouia ra no te au tangata nei. Eaa to tatou manako no te reira? Te kite ra ainei tatou i etai tuatau i reira no te piri atu i te akaatea i te akakino anga i to Iehova ra ingoa e te akapapu anga e e pikikaa te Tiaporo? Ka rauka ia tatou te akamaroiroi anga maata no te rave i te reira na te tamouanga ki te manako i te ako e: “E taku tamaiti, kia pakari koe, kia rekareka toku ­ngakau, kia tika iaku kia patoi atu i tei akakino mai iaku nei.” (Maseli 27:11) Kua karanga a Satani, koia tei akakino ra ia Iehova e, me ka ngere te au tangata i te apinga me kare ka tamamaeia te kopapa ka akaapa ratou i te Atua, e ka akakino katoa oki iaia. (Iobu 1:​9-11; 2:4, 5) Ka akatupu tatou i te rekareka ki to Iehova ra ngakau me, ka tiratiratu tatou ki te Atua noatu te turanga ngata, ka akakite rai tatou e kare te reira tuatua i te tika i to tatou turanga. Te papu meitaki ra to tatou irinakianga e e inangaro tikai to Iehova i tona au tavini e, mei ia Iobu rai, te vaira te tuatau e tutaki maoraoraʼi a Iehova ia tatou me ka akapapu tatou i te tiratiratu.​—Ia. 5:11; Iobu 42:​10-16.

14. Me ka irinaki tatou kia Iehova ia tatou e timataia ra, eaa etai atu puapinga te ka rauka mai no tatou?

¹⁴ Me ka irinaki papu tikai tatou ia Iehova ia tatou e timataia ra na te tamamae anga, ka rauka ia tatou te au tu meitaki rava. Ei tupu anga no te au mate i rokoia kia Iesu ra, kua “kite aia i te akamoraro” na tetai mataara tei kore aia i kite ana i mua ana. Ka rauka katoa oki ia tatou, kia kite​—i te akatupu i te akakoromaki roa, te tapu marie e te manako ariki oonu i to Iehova ra arataa no te tuatua tika. Ka ariki ainei tatou i te reira aka­matau­anga ma te akakoromaki?​—Ebera 5:8, 9; 12:11; Iakobo 1:​2-4.

15. Ia tatou e tapu marie ra i te akakoromaki i te au ravenga ngata, akapeea e puapingaiaʼi etai atu?

¹⁵ Ka akara rai etai atu i ta tatou e rave ra. No te mea te tamamaeia ra tatou no runga i to tatou inangaro i te tuatua tika, penei ka manako ariki tetai papaki i o ratou, e koai ma te “au taeake” o Karaiti i teia tuatau, e na te kapitianga ma tona “au taeake” i te akamori anga ka rauka ia ratou i te akatikatika no te au akameitakianga no te oraanga mutu kore. (Mata. 25:​34-36, 40, 46) Te anoano ra a Iehova e tana Tamaiti kia rauka ia ratou te reira akameitakianga. Te akapera nei ainei tatou? Te rekareka nei ainei tatou kia o atu ki te rave anga ngata kia raukaʼi te reira?

16. Akapeea to tatou manako no te reira rave anga tatakitai i te ravenga ngata i piri atu ei ki te tumu no te taokotai anga?

¹⁶ Mei teaa ra te meitaki me ka manako tatou mei te reira e, noatu te au tu ngata o te oraanga e tuatau meitaki no te akaari i to tatou kauraro kia Iehova pera katoa oki te piri atu ki te akatupu i tona anoano! Na te raveanga i te reira e raukaʼi ia tatou te akakite e te aere atu ra tatou ki te taokotai anga ma te Atua e Karaiti ta Iesu ia i pure ra no te au Kerititiano mou katoatoa.​—Ioane 17:​20, 21.

Uriuri Akaou Anga

● Noatu rai e te tuku ua ra i te kino, akapeea ta Iehova akaari anga tika i te akangateitei anga maata no tona uaorai ingoa?

● Akapeea i raukaʼi i ta te Atua ra akakoromakianga i te “au āriki no te riri ra” kia itae roa mai tona aroa ua kia tatou nei?

● Eaa ta tatou ka tau kia tauta i te kite i roto i te au tu te o maira te mamaeanga tei tupu kia tatou uaorai?