Pene 8

‘Kukumianga i te Au Vaerua Kikino’

1. Eaa ra tatou ka manako maataʼi no runga i te angaanga a te au vaerua kikino ra?

PENEI ka aviri te au tangata manako i te au apinga kopapa anake ua, i te manako anga no te au vaerua kikino ra. Inara kare te reira i te tumu no te katakataanga. Noatu me te irinaki ra ratou e me kare ua, te rave pakariia maira te taomi anga a te au temoni ki runga i te au tangata ravarai. Kare te aronga akamori ia Iehova i atea ke i te reira. Ko te tika, ko ratou tikai te takete mua. Te akamatakite maira te apotetoro ko Paulo ia tatou no te reira tamaki anga, i te na ko anga: “Kare oki te tangata anake ta tatou e kukumi nei, ko te au ariki katoa ra [kare ra ratou i te ngai no te toto e te kiko], e te aronga mana, e te au tutara o teianei ao poiri, e te au vaerua kikino i te reva nei.” (Ephe. 6:12) Kua tae te taomi anga i to tatou tuatau nei ki te take teitei rava no te mea kua uriia mai a Satani ki vao i te rangi e e maata te riri, i te kiteanga e tuatau poto ua tona.​—Apo. 12:12.

2. Akapeea ra i raukaʼi ia tatou kia autu i te kukumi anga i te au vaerua ririnui atura i te tangata nei?

² Akapeea e raukaʼi i tetai o tatou nei kia autu i te maro anga i te au vaerua kikino e ririnui ua atura i te tangata? Na te irinaki papu anake ua ia Iehova. Ka tau tatou kia akarongo kiaia e kia kauraro i tana Tuatua. Na te raveanga i te reira, ka atea tatou i te kino te tupu ra ki te aronga i raro ake i ta Satani akatereanga, i te pae kopapa, te tika, te manako ngakau e te kino i te manako.​—Ephe. 6:11; Iakobo 4:7.

Au Tutara o Teianei ao i te Reva Nei

3. Eaa e koai ta Satani e patoi pakari ra?

³ Te akataka ketaketa maira a Iehova kia tatou i te turanga o teianei ao iaia e akara maira mei tona ngai teitei i te au rangi ra. Kua oronga aia i te orama ki te apotetoro ko Ioane te akatutu maira ia Satani mei tetai “taae maata muramura” kua teateamamao iaia no te apuku i te Patireia a te Atua no te Mesia, me ka rauka, i muri ua ake i te anau mai anga o te reira i te rangi i te 1914 T.N. I te koreanga e rauka te reira, kua tukunaia mai e Satani te vai puke patoi anga riri maata ki runga i te aronga mono o te reira Patireia, koia te tuanga rua o te uanga o te “vaine” a te Atua ra.​—Apo. 12:​3, 4, 13, 17.

4. (a) Te akamatakite maira te Puka Tapu ia tatou i teea tika no runga i te tumu e te mana o te au kavamani a tangata nei? (e) Te akaputuia ra te au tutara poritiki ravarai ki teaa i teianei, e koai ma te rave ra i te reira?

⁴ Kua akaari papuia mai te tumu o te reira mana e te mana taoonga o te au kavamani a te tangata, i te reira akakite anga kia Ioane. Kua akakiteia kiaia tetai puaka taae, e 7 ona mimiti e e 10 tara, e puaka nona ra te mana ki rungao “i te au kopu katoa, e te au reo, e i te pa enua.” Kare te reira i akatutu ua mai i te kavamani okotai, mari ra i te akatereanga poritiki o te ao katoa nei. Kua akakiteia atu kia Ioane e “kua oronga maira te taae [a Satani te Tiaporo] i tona uaorai maroiroi, e tona uaorai terono, e te mana maata nona. (Apokalupo 13:​1, 2, 7; akaaiteia atu kia Luka 4:5, 6.) Noatu rai e te karanga ra etai o te au tutara poritiki e e akonoanga ta ratou, kare e okotai o te au mema o te au enua ke ke o te “puaka” ra tei kauraro ana i te mana ngateitei o Iehova e ki tana Ariki i akataoonga ra, koia a Iesu Karaiti. Te tauta ra ratou ravarai i te mou i to ratou uaorai mana ngateitei. I teia tuatau, mei ta Apokalupo e akaari maira e, te akaputuputu ra te “au vaerua demoni” ia ratou katoatoa ki “te tamaki i taua rā maata o te Atua mana, katoatoa ra” i Aramakito. (Apokalupo 16:​13, 14, 16) E tika rai, mei ta te apotetoro ko Paulo i tata ra, kare “te au tutara o teianei ao” i te tangata ua nei mari ra e “au vaerua kikino i te reva nei.” (Ephe. 6:12) E mea tau, no te aronga katoatoa te anoano ra i te akapapu ia ratou uaorai e e aronga akamori ia Iehova, kia mou i te aiteanga tika tikai o te reira.

5. Eaa ra i tau ei kia matakite kia kore ei e takiia atu ki roto i te turuanga i ta Satani akatereanga?

⁵ I te au ra tatakitai te piri maira ki to tatou au oraanga te au maro anga te akatataka ke ra i te uanga tangata nei. E mea matauia no te au tangata kia akataka ia ratou, na te tuatuaanga me kare na tetai mataara ke, e no tetai pa enua, tetai kopu, tetai pupu reo ke me kare tetai pupu e tuanga ra ratou no te reira. Noatu rai me kare to ratou tuanga o te totaiete i piri tikai ki roto i tetai maro anga te raveia ra, penei ka kite ratou ia ratou uaorai te akatika ra i tetai ki runga ake i tetai. Inara noatu e eaa te pekapeka, e noatu koai te tangata me kare eaa te tumu ta ratou ka akatika, eaa tikai ta ratou e turu ra? Te akakite marama maira te Puka Tapu e “te vai ua nei rai to te ao ravarai i raro ake i taua vaerua kino ra.” (1 Ioane 5:19) Akapeea ra i reira, e raukaʼi i tetai tangata i te kopae kia kore aia e taki keia atu ma te katoa anga o te au tangata nei? Na te oronga anake ua i te turu anga i te Patireia o te Atua e te tamouanga papu i te tu takake i te au maro anga i rotopu i te au tuanga aere o teianei ao.​—Ioane 17:​15, 16.

Te au Ravenga Kikite a te Vaerua Kino Ra

6. Eaa te kapipitiia atura ki roto i te au ravenga ta Satani e akono ra ei akaariu ke i te au tangata mei te akamori anga tika?

⁶ I te au tuatau ravarai o te tuatua enua kua akono a Satani na te tuatua e te takinokino anga o te kopapa i te akaariu ke i te au tangata tatakitai i te akamori anga tika. Inara kua akono katoa aia i tetai au ravenga tere atu te karape​—te au angaanga kite e te au ravenga kikite.

7. Akapeea te akaari anga i to Satani tu kikite i tana taangaanga i te akonoanga pikikaa?

⁷ Kua tapu pakari aia i tetai tuanga maata o te au tangata ki roto i te poiri na roto i te au akonoanga pikikaa, na te akariroanga kia manako ratou, me ka anoano ratou, e te tavini ra ratou i te Atua. I te mea te ngere ra i te inangaro tikai no te tuatua mou, penei ka akavareia ratou e te au angaanga poiri ma te akakeu i te manako o te au akonoanga ra me kare ka umere i te au angaanga manamana. (2 Tesa. 2:9, 10) Inara te akamatakiteia maira tatou e, te vaira etai no roto mai i te aronga tei piri ana ki te akamori anga tika “e akaruke ei tetai papaki . . . i te akono anga atu i te au vaerua pikikaa, e te tuatua o te au demoni ra.” (1 Timo. 4:1) Akapeea e tupu ei te reira?

8. I naea ta Satani maunu anga i tetai papaki o te aronga tei akamori ana ia Iehova ra, kia o atu ki roto i te akonoanga pikikaa?

⁸ Na te tu kikite ta te Tiaporo akono anga ki runga i to tetai tangata ra au tu apikepike. Te vaira ainei tona tu mataku i te tangata? Me te pera ra, penei ka tuku ua aia i te taomi anga a tona kopu tangata me kare tona au tangata tupu kia o atu ki roto i te au ravenga no te au akonoanga pikikaa te akamata anga mai. E tangata akaparau ainei aia? Penei ka riri aia me akoia atu me kare kia kore e arikiia te au manako te akakiteia ra e ia. (Maseli 29:25; 15:10; 1 Timo. 6:3, 4) Peea me kare na te aroa i akakeu tana rave anga i te tutu aere? Penei kare na te akatikatikaanga i tona manako kia tau ki te akaraanga a Karaiti, mari ra ka aru atu i te aronga ‘akanavenave i tona nga taringa’ i te na ko anga e kua rava ua te tatauanga i te Puka Tapu e te akonoanga i te “oraanga meitaki.” (2 Timo. 4:3) Kare i te mea maata kia Satani kia piri atu aia ki tetai pupu akonoanga ke me kare ka mou ua i tana uaorai akonoanga, tera ua kia kore e akamori ia Iehova i te mataara ta te Atua e arataki ra na roto i tana Tuatua e tana akaaerenga ra.

9. Na roto i te ravenga kikite akapeea ta Satani taangaanga anga i te ainga ei akatupu i tona akakoroanga?

⁹ Te rave kikite katoa ra a Satani i te au tangata kia akamerengo i te anoano tei matauia ra no te au ravenga tarevake. Kua rave aia i te reira ma te anoano no te au pirianga no te ainga. Na te kopaeanga i te tika no te Puka Tapu, e manganui to teianei ao te manako ra e ko te pirianga no te ainga i rotopu i nga tangata kare i akaipoipoia e e rekareka anga tika ia me kare ei mataara akapapuanga e kua pakari mai ratou. E ka akapeea te aronga tei akaipoipoia ra? E mea matauia no te aronga o teianei ao tei o ki roto i te au pekapeka no te akaipoipoanga kia kopae i te tokorua e ka akaipoipo akaou ei me kare ka akatatakake e ka noo uaʼi ma tetai atu tokorua ke. Me akara tatou i te reira tu oraanga, te manako ra ainei tatou e te ngere ra tatou i tetai apinga, e e ketaketa roa te mataara no te Kerititiano? Ko ta Satani ravenga e akariro kia manako te tangata e te arai ra a Iehova i tetai mea meitaki. Te raurau ra aia ia tatou kia manako i te marekaanga te ka rauka ia tatou i teianei​—kare ko te meitaki no tatou e etai atu no te tuatau roa, e e mea papu kare no to tatou piri anga kia Iehova e tana Tamaiti.​—Gala. 6:7, 8; 1 Kori. 6:9, 10.

10. Na teea au ravenga ta Satani tauta anga i te akariro ke i to tatou tu manako no runga i te ta ua?

¹⁰ Ko tetai atu anoano no te tamataora ia. Me e meitaki, ka rauka te akaangaroi anga no te kopapa, te manako e te akava ngakau. Inara eaa to tatou tu manako me ka rave kikite a Satani i te au atianga no te tamataora ei tauta i te akatatakake i to tatou manako mei to te Atua? Ei akaraanga kua kite tatou e, te makitakita ra a Iehova i te aronga inangaro i te ta ua. (Sa. 11:5) Inara me te akaariia maira te reira i te teata o te tivi me kare i te are teata, ka noo ua ainei tatou ma te tauru i te reira ki roto i te manako? Me kare kia akakiteia mai na roto i te tarekareka, ka ariki ua ainei tatou e penei ka maeva ua i te akamaroiroi atu i te aronga e tarere ra?​—Akaaiteia atu kia Genese 6:13.

11. Na teea au mataara e mou ei ki roto i te ereere, te tangata tei kite ra i te tuatua mou no runga i te purepure, me kare aia e matakite?

¹¹ Te kite katoa ra tatou e ko te aronga rave i te purepure​—te tauraatua, te makutu me kare tei ui ki tei mate ra—​e “aronga viivii ïa na Iehova.” Kare ra tatou e manako i te aere ki te taunga purepure e e mea papu rava kare tatou e turou atu ia ratou ki roto i to tatou ngutuare kia rave i ta ratou au peu temoni ra. Inara ka akarongorongo ainei tatou e ka matakitaki umere ua ia ratou i te tivi me ka akaariia mai i reira? Noatu me kare tatou e akatika kia rapakau te taunga purepure ia tatou, ka tapeka ainei tatou i te taura ki te rima o ta tatou pepe anau ou ma te manako anga e na te reira paa e paruru i te reira tamaiti kia kore e rokoia e te kino? Me kare, te kite ra e te akaapa ra te Puka Tapu ‘i te ravenga kepere,’ ka akatika ainei tatou i te tangata rave i te kepere kia akatere i to tatou manako noatu rai no te tuatau poto ua?​—Deu. 18:​10-12; Gala. 5:​19-21.

12. (a) Akapeea te rave anga i te akatangi anga imene i te akonoangaia ei akavare ia tatou kia ariki i ta tatou i kite ra e e tarevake? (e) Akapeea te kakau o te tangata, te iri i te rauru me kare te tu o te tuatua, i te akakite anga mai i to ratou manako ariki i te aronga kare ra a Iehova e mareka ana i to ratou tu oraanga? (ng) Eaa te umuumuia ra no tatou me ka kopae ke tatou i te topaanga ki te mate o ta Satani au ravenga kikite?

¹² Kua tatau ana tatou i roto i te au Tuatua Tapu e ‘auraka rava te akaturi e te au tuatua viivii ravarai e tuatuaia ma te manako taukore i rotopu ia tatou.’ (Ephe. 5:​3-5) Inara peea me te reira au tumu tuatua kua tauru karapeia mai na roto i te akatangi anga imene tei rekaia no te akarongorongo anga, e tukituki marekaia e te tamouia? Penei ka rave manako kore ua tatou i te taokiokianga i te au tuatua te akakaka ra i te pirianga no te ainga noatu kare i akaipoipoia, te rave apinga akakona no te tamataora e te vai atura? Me kare, noatu te kite ra tatou e kare e tau kia aru tatou i te tu oraanga o te aronga te rave ra i te reira au apinga, te akono ra ainei tatou i te akataka ia tatou uaorai kia aite atu kia ratou na te tu o to ratou kakau, i te tu o ta ratou iri i te rauru ra me kare te tu o ta ratou e tuatua ra? Mei teaa ra te kikite ia Satani! Mei teaa ra te pikikaa kino o tana au ravenga ei akavare i te au tangata kia aru atu i tona uaorai manako viivii ra! (2 Kori. 4:3, 4) E kore ei tatou e riro kia topa ki roto i tana au ravenga kikite ra, ka tau tatou kia kopae ke i te panu ua atu anga ma to teianei ao. Ka tau tatou kia tamou ki roto i to tatou manako e koai ma “te au tutara o teianei ao poiri” e e rave pakari i te kukumianga atu i to ratou mana.​—Ephe. 6:12; 1 Pe. 5:8.

Kia Papa ei Aronga te ka Autu

13. Akapeea e raukaʼi ia tatou nei, ma to tatou au tu apa ua, kia re i teianei ao ko Satani ra te tutara?

¹³ I mua ake i to Iesu matenga kua tuatua atu aia ki tana au apotetoro: “Ka akamaroiroi ra, kua riro te re o teianei ao iaku.” No reira katoa oki, ka rauka te re ia ratou; e e tere atu i te 60 mataiti i muri mai kua tataia e te apotetoro ko Ioane e: “Koai te tangata i vi ei teianei ao iaia, mari ra ko tei akarongo e, ko Iesu te Tamaiti a te Atua?” (Ioane 16:33; 1 Ioane 5:5) Te akaariia maira te reira akarongo na te akarongoanga i ta Iesu au akauenga e te irinakianga i te Tuatua a te Atua, mei tana i rave ra. Eaa atu te umuumuia ra? Kia vai piri tikai tatou ki te putuputuanga koia ra te upoko. Me ka topa tatou, e mea tau kia tataraara akatenga tatou e kia kimi i ta te Atua akakore anga ara na runga i te tumuanga o to Iesu ra atinga. Na teia mataara, noatu to tatou au tu apa ua, ka rauka kia riro ia tatou te re.

14. (a) E tatau ia Ephesia 6:​13-18. (e) E uriuri i te au uianga e te au tuatua tapu tei orongaia maira ei tumuanga no te uriurianga i te au puapinga no te au tuanga tatakitai o te rakei o te vaerua ra.

¹⁴ E autu ei, ka tau tatou kia kakau “i te rakei katoa a te Atua ra,” auraka e kopae ke i tetai ngai o te reira. E eeu i taau Puka Tapu ia Ephesia 6:​13-18 e ka tatau ei i tana akataka anga i te rakei, ine. Na te pau anga i te au uianga i raro akenei, e akamanako ana e akapeea koe e pua­pinga­iaʼi mei te paruru anga te ka rauka i te au potonga tatakitai o te reira rakei.

“Tatuaia to kotou taukupu i te tuatua-mou”

Noatu rai e kua kite tatou i te tuatua mou, ka akapeea te apii putuputu, te akamaaraara anga i te au tuatua mou no te Puka Tapu e te aere anga ki te au uipaanga i te paruru anga ia tatou? (Philipi 3:1; 4:8, 9; 1 Kori. 10:​12, 13; 2 Kori. 13:5; 1 Pe. 1:13, Kingdom Inter­linear)

“Tapoki-umauma ra ko te tuatua tika”

Ko taai turanga no te tuatua tika teia? (Apokalupo 15:3)

E akatutu mai e akapeea e raukaʼi i te akarongo kore ki ta Iehova au akauenga, te akaaravei i tetai ki te kino maata i te pae vaerua, no te kore e akatupu i te inangaro no tona au mataara. (E akara ia 1 Samuela 15:​22, 23; Deuteronomi 7:3, 4.)

“Akatamakaia to kotou vaevae i te teateamamao o te evangelia o te au ra”

Akapeea te aaere anga putuputu to tatou nga vaevae i te apai ia tatou kia tuatua ki te au tangata no runga i ta te Atua ra au akapapaanga no te au, i riro ei ei paruru ia tatou? (Roma 10:15; Sa. 73:2, 3; 1 Timo. 5:13)

“Te paruru ra i te akarongo”

Me e akarongo to tatou te ngaueue kore ra te akamou anga, ka akapeea to tatou manako me ka akaaraveiia atu ki te au tautaanga tei akapapaia ei akaekoko e te akamataku ia tatou? Akaaiteia atu kia 2 Timoteo 1:12; 2 Ariki 6:​15-17.)

“Pare ra i te ora”

Akapeea te manakonakoanga o te ora i riro ei ei tauturu i tetai kia kopae ke i te ereere e te manako maata no te au apinga no te kopapa nei? (1 Timo. 6:​7-10, 19)

“Koke a te Vaerua ra”

Eaa ta tatou ka tau kia irinaki tamou atu i te tamakianga atu i te au maroanga kia tatou i te pae vaerua me kare i to etai ke atu? (Sa. 119:98; Maseli 3:5, 6; akaaiteia atu kia Mataio 4:3, 4)

Kia rotai atu ki te reira, ia Ephesia 6:​18, 19, ra, eaa atu tetai apinga te akakiteia maira ei puapinga no te autu i te tamakianga i te pae vaerua? Eaa te putuputu o te rave i te reira? Ka raveia noai ma?

15. (a) E tamaki ua ainei i te pae vaerua na te tangata taki tai ua ta tatou katoatoa e rave nei? (e) Akapeea e raukaʼi ia tatou te tamaki atu i roto i te reira tamaki anga?

¹⁵ Ei vaeau Kerititiano e tuanga tatou no te nuku maata te rave ra i te tamakianga i te pae vaerua. Me ka matakite tatou e ka taangaanga meitaki i te rakei katoa mei ko mai i te Atua ra, kare rava tatou e riro kia mate i te reira tamaki. Mari ra, ka riro tatou ei tauturu akamaroiroi i te au taeake tavini no te Atua ra. Ka papa meitaki tatou ma te inangaro i te rave i te tamakianga, na te akatotoa anga i te tuatua meitaki o to te Atua Patireia no te Mesia ra, koia te kavamani te patoi pakariia ra e Satani.

Uriuri Akaou Anga

● Eaa ra te aronga akamori ia Iehova ka tauta pakari ei kia kore takiri e o atu ki roto i te au maroanga i rotopu i te au tuanga o teianei ao?

● Eaa etai au ravenga kikite te akonoia ra e Satani ei apai atu i te au Kerititiano ki te mate i te pae vaerua?

● Akapeea te rakei tei orongaia mai e te Atua ra, i te paruru anga ia tatou i te au tu rave anga ngata i roto i teia tamakianga i te pae vaerua?