Pene 11

Na Ioane i Teateamamao te Mataara

KUA topa e tai ngauru ma itu mataiti i muri ake i to Iesu uiuianga ki te au orometua i te iero iaia e tamaiti e 12 mataiti ra. Kua tae ki te tuatau tupu anga rau o te 29 T.N., e i te akaraanga, te tuatua ra te au tangata ravarai, no te katini o Iesu koia a Ioane, te tutu aere ra aia i te enua katoa takapini i te Kauvai i Ioridana.

E tangata manako maataia a Ioane, i tona tu tei akaraia e tana tuatua katoa oki. Ko tona kakau e uruuru kamera, kua tatuaia tona taukupu ki te kiri puaka. E tapaki e te meri ngangaere tana kai. E ko tana tuatua? “E tataraara te vaitata mai nei oki te patireia o te au rangi ra.”​—⁠NW.

Kua rekareka te aronga tei akarongo atu i tana tuatua. E manganui tei kite i te umuumu anga no ratou kia tataraara, koia oki, kia taui i to ratou tu manako e kia kopae ke atu i to ratou oraanga o mua ana ei mea inangaro koreia. E mei te au ngai katoa takapini ia Ioridana mai, e pera katoa mei Ierusalema maira, kua aere katoatoa maira te au tangata kia Ioane e manganui ratou, e kua papetito atu aia ia ratou, na te tarukuanga ia ratou ki raro i te au vai o Ioridana. No teaa ra?

Kua papetito a Ioane i te au tangata ei akatutu anga, me kare ei akakite anga, i to ratou tataraara mei to ratou ngakau mai no te au ara tei raveia ki te Ture koreromotu ki te Atua ra. E no reira, i te aere mai anga te au Pharisea e te au Sadukea ki Ioridana, kua akaapa atura Ioane ia ratou. “E te anaunga vipera e,” e nana ei. “E tenana ka tuku mai na i te akonoanga e tau i te tataraara: Auraka e manako i roto ia kotou uaorai e, E metua to matou ko Aberahama; e karanga atu oki au kia kotou, Ka tika i te Atua i te akatupu i te tamariki na Aberahama no roto i teianei au toka. Te vai nei rai te tarapa i te tumu rakau i teianei; e te rakau katoa kare i ua mai i te ua meitaki ra, ka tipuia ïa, e titiriia atu ki roto i te ai.”

No te maata i te manako anga tei tukuia ra kia Ioane, kua tono atura te ngati Iuda i te kau taunga e te ngati Levi kiaia ra. Kua ui atura teia aronga: “Koai koe?”

“Kare au te Mesia,” ta Ioane i aaki ua atura.

“Koai oki?” ta ratou ia i ui. “Ko Elia ainei koe?”

“Kare au,” tana i karanga atu.

“Ko taua peroveta ra ainei koe?”

“Kare”!

E no reira kua manono atura ratou: “Koai koe? ei tuatua anga na matou ki te aronga i tono mai ia matou: eaa ua taau tuatua ia koe uaorai?”

Kua akataka atura Ioane: “Ko te reo au no tetai e kapiki aere ki te medebara ra e, Ka akatika ua i te mataara no te Atu [o Iehova], ko tei karangaia mai e Isaia peroveta ra.”

Kua inangaro ratou kia kite e, “Eaa oki koe i bapetizo ei, kare koe i te Mesia, kare oki a Elia, kare oki i taua peroveta ra?”

“I bapetizo au ki te vai,” ko tana ia i pau atu. “Te tu ua nei ra tetai i rotopu ia kotou, kare kotou i kite iaia. Koia teia, i miringao aia iaku i te aere anga mai.”

Te teateamamao ra Ioane i te mataara na te akono anga kia tika te tu ngakau o te au tangata kia ariki atu i te Mesia, koia te ka riro ei Ariki. Kua tuatua a Ioane Nona ra: “Tei ka aere mai i muri iaku nei, e maata tona mana i toku, kare au e tau kia apai i tona tamaka.” Ko te tika ra e, kua tuatua a Ioane: “Ko te aere mai i muringao iaku nei, kua riro ïa ki mua iaku; ko mua oki aia iaku.”

E no reira ko te tuatua a Ioane e: “kua vaitata te patireia o te au rangi ra.” (NW) Te akakite ra ki te au tangata e ko te angaanga a te Ariki tei akataoongaia e Iehova, koia a Iesu Mesia, te vaitata ra i te akamataia. Ioane 1:​6-9, 15-28; Mataio 3:​1-12; Luka 3:​1-18; Angaanga 19:⁠4.

▪ Eaa to Ioane ra tu ei tangata?

▪ Eaa a Ioane i papetito ei i te au tangata?

▪ Eaa i tau ei a Ioane kia tuatua e te vaitata ra te Patireia?