Pene 10

Au Tere ki Ierusalema

KUA tae mai te tuatau tupu anga rau. E kua tae ki te tuatau no te ngutuare o Iosepha, ma tona au oa e te kopu tangata katoa kia aere atu i to ratou tere mataiti ki Ierusalema i te tuatau tupu anga rau ki te oroa o te Pasa. Ia ratou i akaruke ei no taua tere e vaitata ra i te 100 kiro mita te mamao, te tupu ra te rekareka. E 12 mataiti a Iesu i teianei, e te tapapa atura aia ma te manako maata i taua oroa ra.

Kare te Pasa i te apinga e ra okotai ua na Iesu e tona ngutuare tangata. Ka noo katoa ratou ki reira no nga ra e itu i muri mai no te Oroa Areto Akaopue Koreia ra, ko ta ratou i akamanako ra e e tuanga ia no te tuatau o te Pasa katoa. No reira, ko taua tere katoa ra mei to ratou kainga atu i Nazareta, kapiti katoa te noo anga ki Ierusalema kua pou e vaitata i te rua epetoma. Inara i teia mataiti, no tetai apinga tei o atu a Iesu, kua roa atu ia.

Kua kitea te manamanata i te oki anga mei Ierusalema mai. Te manako ra a Iosepha raua ko Maria e tera a Iesu i roto i te pupu o te kopu tangata e te au oa te aere kapiti ra. Inara kare aia i kitea i to ratou tapu anga no taua po ra, e kua kimi aere raua iaia i rotopu i te au taeake o taua tere ra. Kare rava aia i kiteaia. No reira kua oki atu a Iosepha raua ko Maria tae roa ki Ierusalema e kimi iaia.

No tetai ra roa raua i kimi ei, kare e puapinga. I te rua o te ra kare katoa i kiteaia e raua. No te toru o te ra, kua aere atura raua ki te iero. I reira i roto i tetai pia, kua kite atura raua ia Iesu te noo ra i rotopu i te au orometua ngati Iuda, te akarongo atura ia ratou e te ui atura i tana au uianga.

“E tama, eaa koe i pera mai ei kia maua?” Ko ta Maria ia i ui atu. “I na, i kimi ua ana au ma toou metua tane ia koe ma te aue.”

Kua poitirere a Iesu e kare raua i kite i te ngai e kiteaʼi aia. “Eaa korua i kimi ei iaku?” tana i ui atu. “Kare korua i kite e, ei roto rai au i te are o taku Metua e tau ei?”

Kare a Iesu i marama eaa tona nga metua i kore ei i kite i te reira. Ei reira, kua oki atura Iesu ki te kainga ma tona nga metua e kua kauraro ua atura kia raua. Kua tupu ua atura tona pakari e te kopapa katoa ma te akaperepereia e te Atua e te tangata katoa oki. Ae, mei tona tamaiti iti anga mai, kua akanoo a Iesu i te akaraanga meitaki kare i te kimi anga anake ua i te apinga vaerua mari katoa ra i te akaarianga i te akangateitei i tona nga metua. Luka 2:​40-52; 22:⁠7.

▪ Eaa te tere putuputu o Iesu e tona ngutuare e aere ana i te tuatau tupu anga rau ra, e eaa te mamao o te reira?

▪ Eaa tei tupu i to ratou tere ia Iesu e 12 ra ona mataiti?

▪ Eaa te akaraanga ta Iesu i akanoo no te au mapu i teia tuatau nei?