Pene 12

To Iesu Papetito Angaia

VAITATA e ono marama i muri ake i to Ioane akamata anga i te tutu aere, kua 30 mataiti a Iesu i reira, kua aere atura aia kia Ioane i Ioridana. Eaa ra te tumu? No te aravei ua ainei? Te manako ua ra ainei a Iesu e te akapeea ra te tupu anga o ta Ioane angaanga? Kare, kua pati atura Iesu ia Ioane kia papetito iaia.

I reira tikai kua akakore atura Ioane: “Ko au oki taau e bapetizo e tikaʼi, e e aere mai oki koe kiaku nei?” Kua kite a Ioane e ko tona katini ko Iesu e Tamaiti takake aia na te Atua. Eaa oki, i rere ana a Ioane i roto i te kopu o tona metua vaine no te rekareka i to Maria aravei anga ia raua, iaia e to ra ia Iesu! Kare e ekoko anga e kua akakite atu te metua vaine o Ioane koia a Elisabeta kiaia i teia apinga. E kua akakite katoa aia kiaia i te akakiteanga a te angera ra i to Iesu anau anga e te mama mai anga te au angera ki te au tiaki mamoe i te po i anauiaʼi a Iesu.

No reira kare a Iesu i te tangata ke kia Ioane ra. E kua kite katoa oki a Ioane e kare tana papetito anga i tau no Iesu. No te aronga tataraara i ta ratou au ara, inara ko Iesu kare ona ara. Inara, noatu ta Ioane akakore anga, kua manono atura Iesu: “Ka tuku ua mai na: e pera oki tatou i te akatika i te au tuatua-tika katoa e tau ei.”

Eaa ra i tikai no Iesu kia papetitoia? No te mea e akatutuanga to Iesu papetito anga, kare no te tataraara i te au ara, mari ra no te orongaanga iaia uaorai kia rave i te anoano o tona Metua ra. E kamuta a Iesu, inara i teianei kua tae te tuatau nona kia akamata i te angaanga i ta te Atua ko Iehova i tono mai ei iaia ki te enua nei kia raveia. I toou manako e kua manakonako a Ioane kia tupu tetai apinga tuke iaia e papetito ra ia Iesu?

Kua akakite mairai a Ioane i muri akera: “Tei tono mai iaku e bapetizo ki te vai nei, i karanga mai kiaku nei e, Ko taau e akara i te Vaerua i te eke anga mai, e te noo anga ki runga iaia, koia ïa, ko te ka bapetizo ïa ki te Vaerua Tapu.” No reira te tapapa ra a Ioane i te vaerua o te Atua kia eke mai ki rungao i tetai o tana ka papetito atu. Penei, kare aia i poitirere roa, i to Iesu kake anga mai mei raro i te vai ra, e kua kite a Ioane “i te Vaerua o te Atua i te eke anga mai mei te kukupa, e te to anga mai ki rungao iaia.”

Inara e maata atu tei tupu ia Iesu i papetitoia ra. Kua ‘veveteia akera te au rangi ra’ kiaia. E eaa te aite anga o te reira? Te akara anga ko tona aite anga e iaia e papetitoia ra, kua oki akaou mai tona manako no tona oraanga i mua ake ka riro ei aia ei tangata. E no reira, kua kite papu a Iesu i reira e kua maara aia i tona oraanga ei tamaiti vaerua na te Atua ko Iehova, kapiti katoa oki te au mea ravarai ta te Atua i tuatua kiaia i te rangi ra i tona oraanga i mua ake ka akatangataiaʼi.

Kapiti katoa ki te reira, i te tuatau o tona papetito angaia, e reo tetai no te rangi mai tei akakite maira: “Taku Tamaiti akaperepere teia, kua mareka rava au iaia.” Noai te reira reo? No Iesu uaorai ainei ia reo? Kare rava ia! No te Atua ra ia. Te taka meitaki ra e, e Tamaiti a Iesu na te Atua, kare aia i te Atua uaorai, mei ta tetai papaki e tuatua nei.

Inara, ko Iesu e tamaiti tangata ia na te Atua, mei te tangata mua rai, koia a Adamu. Kua tata te pipi ko Luka, i muri ake i tana akatakaanga i to Iesu ra papetito angaia, e: “Kua tae paa ki te toru o te ngauru anga o to Iesu mataiti, i rave ei aia i tana taoonga, i manakoia ra oki, e tamaiti aia na Iosepha, na Eli, . . . na Davida, . . . na Aberahama, . . . na Noa, . . . na Adamu, na te Atua.”

Mei ia Adamu rai e tangata e “tamaiti na te Atua,” mei te reira katoa oki a Iesu. Ko Iesu te tangata e tangata meitaki rava tei ora ana, te papu ra me akara matatio tatou i to Iesu oraanga. Inara, i tona papetito angaia, kua o atu a Iesu ki roto i te pirianga ou ma te Atua ra, kua riro aia ei Tamaiti vaerua na te Atua. Mei te mea rai e kua kapikiia atu aia e te Atua i teianei ki te rangi, na te akamataanga i te aerenga nona te ka taki atu iaia kia tuku i tona oraanga tangata ki raro e tuatau ua atu ei atinga no te au tangata katoa tei akaapaia ra. Mataio 3:​13-17; Luka 3:​21-38; 1:​34-36, 44; 2:​10-14; Ioane 1:​32-34; Ebera 10:​5-9.

▪ Eaa ra a Iesu i kore ei i te tangata ke kia Ioane ra?

▪ I te mea kare aia i rave i te ara, eaa ra a Iesu i papetitoiaʼi?

▪ I te manako anga i ta Ioane i kite no Iesu ra, eaa ra aia i kore ei i poitirere i te to mai anga te vaerua o te Atua ki rungao ia Iesu ra?