Pene 31

Uutianga Ua i te Tapati

KARE i roa ana kua akaruke maira a Iesu e tana au pipi ia Ierusalema e kua oki atura ki Galilea. E tuatau tupu anga rau ia, e i te au koro titona te tupu ra te ua i runga i te titona. Te pongi ra te au pipi. E kua uuti iora ratou i te ua titona, kai iora. Inara i te mea e Tapati, kua akaraia maira ta ratou angaanga.

Koi oti ua akera te kimi anga a te au arataki o te akonoanga atua ia Iesu i Ierusalema e ta iaia no te akono kore i te Tapati. Kua akaapa maira te au Pharisea. “I na, te rave nei taau aronga pipi i te mea tau kore i te ture kia rave i te sabati.”

Kua karanga te au Pharisea e ko te uuti i te ua e te ukui anga i te reira i roto i nga rima e ka kai e kokotianga te reira e te papaanga. Inara na ta ratou akatakaanga ketaketa i tei manakoia e e angaanga na te reira i akariro i te Tapati ei apainga teiaa, inara i manakoia te reira ei tuatau rekareka, e te akamatutuanga i te pae vaerua. No reira kua pau atura a Iesu ma te au akaraanga no te Tuatua Tapu ei akakite e kare te Atua ko Iehova i akakoro i te reira tu tau kore no te akono anga ketaketa i Tana Ture Tapati.

Kua karanga a Iesu e i te pongi anga a Davida e tona au tavini, kua tapae ratou ki te puakapa e kua kai i te au manga no te aroaro ra. Kua oti te reira au manga i te akatakakeia mei mua i te aroaro o Iehova e kua monoia ki te au manga ou, e kua vaio uaia ei kai na te kau taunga ra. Inara, i raro ake i te reira au turanga, kare a Davida e tona au tavini i akaapaia no te kaianga i te reira.

I te orongaanga i tetai atu akaraanga, kua karanga atura a Iesu: “E kare kotou i tatau i tei roto i te Ture ra, e te akanoa nei te kau taunga i te sabati i roto i te iero i nga rā sabati katoa e kare e ara?” Ae, i te Tapati kua ta te kau taunga i te manu e kua rave i etai atu angaanga i te iero e te teateamamaoanga i te au atinga manu! “Te karanga atura oki au kia kotou,” e na Iesu ei, “Tei ko nei tetai, e maata aia i te iero.”

I tana ako atu anga i te au Pharisea ra, kua tuatua atura a Iesu: “Naringa kotou i kite i te ariteanga o te manga tuatua ra e ‘Ko te aroa taku i anoano auraka te atinga,’ kare kotou e akaapa mai i te aronga ara kore.” Ei reira kua ta openga atura aia: “Ko te Tamaiti oki a te tangata nei, ko te Atu rai ïa o te sabati.” Eaa te aiteanga o ta Iesu i tuatua ra? Te taiku ra a Iesu no tona tutaraanga ponuiaau i te Patireia no te okotai tauatini mataiti.

No te 6,000 mataiti i teianei, kua tamamaeia te au tangata i raro ake i ta Satani te Tiaporo ra angaanga i te tuikaa anga, ma te ta ua e te tamaki e te ikuiku anga i te au ra katoa. I tetai pae, ko te tutaraanga o te Mesia no te Tapati maata ra ka riro ei tuatau akaangaroianga mei te reira au tu mamaeanga e te taomianga katoa. Mataio 12:​1-8; Levitiku 24:​5-9; 1 Samuela 21:​1-6; Numero 28:9; Hosea 6:6.

▪ Eaa te akaapaanga tei akaapaia ra te au pipi a Iesu, e i akapeea ta Iesu pau anga i te reira?

▪ Eaa te tarevake o te au Pharisea ta Iesu i akataka atura?

▪ Na teea tu a Iesu ka riro ei ei “Atu rai ïa o te Sabati”?