Pene 30

Pauanga i Tei Akaapa Iaia Ra

I TE akaapa anga te au arataki o te akonoanga ngati Iuda ra ia Iesu no te aatianga i te ture o te Tapati, kua pau atura aia: “Te angaanga ua nei rai toku Metua, ka angaanga katoa oki au.”

Noatu ra te akaapa anga a te au Pharisea ra, kare ta Iesu angaanga i te tu o tei kore ra i akatikaia i te ture o te Tapati. Ko tana angaanga tutu aere anga e te akaoraanga e akauenga no ko mai i te Atua ra, e i te aru anga i ta te Atua ra akatauanga, ka rave ua atu rai aia i te reira i te au ra tatakitai. Inara, kua tere atu te riri o te ngati Iuda ra i tana pauanga, e kua kimi ravenga ratou e ta iaia. No teaa ra?

No te mea e kare ko to ratou irinaki anake e te aati ra a Iesu i te ture o te Tapati mari ra kua akamanako katoa ratou no tana tuatua e e Tamaiti tikai aia na te Atua e e akakino i te Atua te reira. Inara, kare a Iesu i mataku e kua pau akaou atura ia ratou no tona pirianga akaperepereia ma te Atua ra. “E akaperepere rai oki te Metua i te Tamaiti,” e nana ei, “e akakite mairai oki kiaia i te au mea katoa tana tikai e rave ra.”

Kua tuatua ua atura a Iesu: “Mei te Metua oki e akaora, e e akatu mai i tei mate ra ki runga: e akaora katoa oki te Tamaiti i tana e anoano ra.” E tika oki, te akatu ra te Tamaiti i tei mate i te mataara no te pae vaerua! “Ko te kite i taku tuatua, e kua akarongo iaia i tei tono mai iaku nei,” ta Iesu i karanga, “mei te mate mai aia, e tei te ora atura.” Ae, kua tuatua ua atura aia: “Kua vaitata, e teianei rai, te ora, e akarongo ei tei mate i te reo o te Tamaiti a te Atua: e tei akarongo ra, ka ora ïa.”

Noatu rai e kare e tataanga e i akatu mai a Iesu i tetai tangata mei te mate mai i mua akera, kua akakite atura aia ki te aronga akaapa iaia ra e ka tupu rai te tuakaouanga tikai no tei mate ra. Kua karanga aia: “Auraka e poitirere i teia, no te mea te aere mai nei te ora e akarongo ei te aronga katoa i roto i te au menema akamaara anga i tona reo e ka aere mai ki vao.”​—⁠NW.

Tae roa mai ki te reira tuatau ra, kare a Iesu i akakite atea ki te katoatoa i tona taoonga puapinga maata i roto i ta te Atua ra akakoroanga na te tu taka meitaki e te papu. Inara e maata atu ta tei akaapa ra ia Iesu i tana uaorai i akakite atura no teia au mea nei. Kua akamaara atura a Iesu kia ratou: “Kotou uaorai oki tei tono i te karere kia Ioane ra, e kua akakite mai aia i te tuatua-mou.”

E rua ua mataiti i mua akera, i akakite ei a Ioane Papetito ki teia au arataki o te akonoanga ngati Iuda ra no runga i te Okotai ka aere mai i muri ake iaia. Kua akamaaraara atura ia ratou i to ratou manako maata no Ioane tei tapekaia ra i teianei, kua na ko atura a Iesu: “Rekareka poto ua atura kotou i tona mārama.” Kia akamaaraara atura a Iesu i te reira ki to ratou manako i te manakonakoanga kia tauturu, ae, kia akaora, ia ratou. Inara kare aia i irinaki anake i ta Ioane akakite anga.

“Ko taua angaanga tini taku e rave nei [kapiti katoa te semeio tana i rave akenei], ko te akatika mai iaku nei e, na te Metua au i tono mai.” Inara kapiti atu ki te reira, kua tuatua atura a Iesu: “Ko te Metua oki i tono mai iaku nei, kua akatika mai aia uaorai iaku nei.” Kua akakite mai te Atua ia Iesu, ei akaraanga, i tona papetito angaia, i te na ko anga: “Taku Tamaiti akaperepere teia.”

Kare takiri e kotoe anga no taua aronga akaapa ra ia Iesu kia kopae ke iaia. Na te au Tuatua Tapu tikai ta ratou e karanga ra te kimi ra ratou ko te reira te akakite maira iaia! “Naringa oki kotou i akarongo ia Mose, kua akarongo mai ïa kotou iaku nei,” kua akaoti atura a Iesu, “i tata oki aia i te tuatua noku. Kare kotou i akarongo i tana i tata ra, eaa oki kotou ka akarongo mai ei i taku nei tuatua?” Ioane 5:​17-47; 1:​19-27; Mataio 3:17.

▪ Eaa ta Iesu angaanga i rave i kore ei i aati i te ture o te Tapati ra?

▪ Akapeea ta Iesu akataka anga i tona taoonga puapinga maata i roto i ta te Atua ra akakoroanga?

▪ Ei akapapu anga e ko ia te Tamaiti a te Atua ra, ko taai akatika anga ta Iesu i tou atura?