Ka Aaere Tamou Ainei Koe i Roto i te Tuatua Mou

“KIA kite au e, te aere ra taku au tamariki na te tuatua-mou, kare oku e rekareka anga maata atu.” (3 Ioane 4) Ta te apotetoro ko Ioane oki teia i tuatua i te openga o tona oraanga roa. Te akakoromaki ua atu rai o ‘tana au tamariki,’ te aronga tana i arataki atu ki “te tuatua-mou,” kua apai mai te reira i te rekareka anga maata nona. Ka rekareka katoa a Iehova me noo tamou rai tona aronga akamori i roto i te te tuatua mou Mei teaa atura tona mataora i teia tuatau i te akaraanga mai mei tona terono i te rangi e te tupu nei te akaaereanga maata, tei tae te tareanga ki roto i te mirioni, i te aru anga i tana mataara pakari ra!​—Maseli 27:11.

Inara, i to te Atua iti tangata i te katoa anga i noo ngaueue kore anga ki te tuatua mou, etai au Kerititiano tatakitai kua akamarie mai me kare kua akaruke i te akamori tika. E mea maromaroa teia, kare ra oki e kare e tupu, no te mea i tupu ana oki teia i te anere mataiti mua. (2 Timoteo 4:10; Ebera 2:1) Noatu rai ra, i te mea e kua akamarie mai etai kua akapapu mai te reira e ka anoanoia te katoatoa kia akaraia tona uaorai turanga i te pae vaerua. Kua akamaroiroi a Paulo i te au Kerititiano e: “E akara matariki ia kotou uaorai.” (2 Korinetia 13:5) E tau te Kerititiano tatakitai kia ui ki aia uaorai: ‘Akapeea e papu ei iaku e ka aaere ua atu rai au i roto i te tuatua mou?’

E manga ua oki tei akamarie mai me kare tei akamotu takiri i te aere i roto i te tuatua mou no te mea kua taitaia ratou​—penei no te au manata kopapa makimaki, me kare te au patoianga o te tu tangata. Tetai papaki kua akamarie mai no te mea kua tatipakeia. Kua anoano ratou kia rekareka i te au ua a teia akatereanga i te tuatau e vai nei. Ka akapeea ra tatou e kore ei e akamarie mai? Te pauanga, e akara tatou i te akaraanga ta Iesu i akaruke mai no tatou.

Aru i to Iesu Akaraanga

E manganui oki te au turanga teimaa tei o ana a Iesu. I kite ana oki aia i te au manata o te tu tangata i rotopu i tana au pipi, e pera katoa kua akakoromaki i te makitakita e te aviri a tona au enemi. Kua rauka iaia i te kopae i te au timataanga o teianei ao. E tika rava oki e kua orongaia ana te tu apinganui e te turanga teitei tei kore ana tetai i kite ana. (Mataio 4:8-11; Ioane 6:14, 15) Inara, kua titau a Iesu i te aaere i roto i te tuatua mou. Eaa ra te tauturu i raukaʼi iaia i te rave i te reira?

Na te apotetoro ko Paulo i akakite mai kia tatou kua tata e: “Kia oro tatou ma te tamou marie i teia oroanga tei tukuia ki mua ia tatou, ia tatou e akara tamou ra kia Iesu te Tumu o te Ora e te Akaoti o to tatou akarongo. No te mataora i tukuia ki mua iaia kua akakoromaki aia i te pou patia tamamae, kare i akono i te akama, e kua noo i te rima katau i te terono o te Atua.” (Ebera 12:1, 2, NW) I to Iesu, turanga te vai anga te manako, i te “mataora i tukuia ki mua iaia,” te tutaki anga teitei te tapapa maira iaia, kua tauturu te reira iaia te aaereanga i roto i te tuatua mou. Ko teia “mataora i tukuia ki mua iaia” kua maata atu te reira i te au taitaia poto ua me kare te au tatipake anga tana oki i aro ana.

Na te akamou anga i te tutaki ki roto i te manako e tauturu ia tatou kia akakoromaki, mei ia Iesu katoa ra oki. (Apokalupo 22:12) Ei akamaramaanga, e manako ana i tetai tangata aere mamao te aaere nei i runga i tetai mataara ngata i runga i te maunga. Kua roiroi aia e kua taitaia. E ngata tikai te takaianga takitai, e kare takiri e openga o teia mataara. I reira kua tae aia ki te take o tetai ngai teitei e kite atura i te ngai mamao o te oire tana e aere atu nei. Kare i roa kua mama mai te aere anga. Te vai anga marama ua o te ngai tana e aere nei kua tauturu te reira iaia kia ngaropoina tona tu roiroi. Ka na reira katoa te Kerititiano i te kite anga e ka ngoie ua te aaereanga i roto i te tuatua mou me vai marama ua teia i roto i te manako.

Aru i te Apotetoro ko Paulo

Tetai tei maata ana i te akakoromaki e naringa kare kua paruparu rai koia oki ko te apotetoro ko Paulo. Kua rauka iaia i te kopae i te au keanga e te tu manako patoi i roto i te au taeake, e pera katoa i te akakoromaki anga i te manata o te maki kopapa, te takinga kino, te ngata i te oraanga, e te au manamanata e pera katoa te patoi anga i roto i te au putuputuanga. (1 Korinetia 1:10; 2 Korinetia 10:7-12; 11:21-29; 12:7-10) Eaa ra a Paulo i kore ei e akaparuparu e tae ua atu ei kia akaoti ua? Kua akamarama aia e: “E mea tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) Kare oki aia i timata i te apai i tana apainga iaia anake ra. Mari ra, kua akara a Paulo kia Iehova kia tauturu iaia.​—Salamo 55:22.

Te puna o tona maroiroi na te Atua te reira, ta Paulo oki ia i kapiki ei tauturu iaia kia akakoromaki e te vai katoa ra ia i teia tuatau. Kua tuatua te Puka Tapu e: “Te oronga nei [a Iehova] i te maroiroi no tei paruparu e akamaata nei aia i te maroiroi no tei apikepike. E potopoto te aʼo o te aronga mapu, e mate oki i te roiroi, e te au tangata ou, e inga takiri roa ia ki raro. Ko te aronga ra e tapapa ia Iehova, e rauka ia te maroiroi ou, e rere ratou ki runga i te peau mei to te au aeto ra, e oro ratou e kare e roiroi, e aere atu rai oki ratou, e kare ia e potopoto te aʼo.” (Isaia 40:29-31) Me ka akara tatou kia Iehova te ngai e rauka mai ei te maroiroi na roto i te apii, kia tae ki te uipaanga, te maroiroi i te angaanga Kerititiano, e​—koia tika ra—​te pure, ka rauka ia tatou i te akakoromaki i te au timataanga e te au akaparuparuanga te ka tupu mai i te au taime katoa.​—Salamo 1:1-3; Roma 10:10; 1 Tesalonia 5:16, 17; Ebera 10:23-25.

Au Mirioni te Teateamamao Nei te Noo i Roto i te Parataito

Ko Satani oki te atua o teia akatereanga o te au mea nei, ko te au Kerititiano ra e aronga ke ratou, aronga tuitarere ua. (2 Korinetia 4:4) No reira, auraka tatou e poitirere me ka tupu mai tetai au akaparuparuanga me kare tetai au tamanamanata anga. Kua tata oki a Paulo i roto i te puka Ebera e: “Kare oki o tatou e oire e mou i ko nei, te umuumu nei ra tatou i tana oire ra no a muri atu.” (Ebera 13:14) Me maaraara tatou e ko to tatou manakonako anga kare ia e no teia ao taito mari ra no te ka aere mai ka tauturu te reira ia tatou auraka kia akamarie mai.

I roto i tetai au mataara, te au Kerititiano mei te au tuitarere rai tei akaruke i to ratou enua anauanga i te kimi i tetai oraanga meitaki atu i te ngai ke. No tetai ture tau ua, e takaianga ngata teia kia raveia. Ka o mai oki te akapapaanga me kare te akaatea anga i tona au apinga ngutuare e te oronga aroa atu anga ki toou kainga ngutuare, pera katoa ki te au taeake e te au kopu tangata. Ka o katoa oki te aere anga ki tetai enua tuke rai, te noo anga i rotopu i tetai iti tangata penei kare i ariki tikai iaia, te apii anga i tetai reo ou e te kite kore i te tu o te oraanga. Inara, e manganui tei rave i te reira mataara mari ra te manakonako anga kia meitaki atu to ratou nooanga i roto i teia ao.

Ko teia aronga tei aere atu ki te enua ke, mei te mea atura e, mei teia akatereanga taito o te au mea nei e kua riro mai e tuanga no to te Atua iti tangata aiteite rai te au tauta anga. Kua rauka oki ia ratou i te taui i te tu oraanga kia noo kia aru i te tu ma o ta te Atua Tuatua, e kua apii ratou i te “reo viivii kore” o te tuatua mou. (Zephania 3:9; 1 Korinetia 6:9-11) Te angaanga maroiroi nei ratou, pera katoa, kia tavini i te Ariki maata o te Patireia o te Atua, ko Iesu Mesia. Tetai katoa, e manganui to ratou kopu tangata e te au oa taito tei tipu ke ia ratou, e no reira ra oki, ka aroa atu aia ia ratou.

Inara ra e maata atu ta te au Kerititiano ka rauka i taua aronga tei aere atu ki tetai enua ke no te tumu kimi puapinga. Tetai ravenga, kua aere mai ratou ki roto i tetai nooanga tangata tei aroa e tei akono ia ratou. (Luka 18:29, 30) Tei maata atu, kua aere mai ratou ki roto i tetai pirianga vaitata kia Iehova, te Atua o te ao katoa e pini ua ake. Kua rauka ia ratou te tu manako au e te papu i te tuatau ki mua i ta ratou akara anga atu ki mua i te tupuanga o ta te Atua au taputou anga. (Philipi 4:8, 9) Ko te aronga te ariki ra i teia au tika, kare rava ratou e tuku i te au tamanamanata me kare te au akaparuparu anga kia akamarie ua atu rai ia ratou. Kare oki ratou e anga mei te mataara kokota te aere atu ra ki te ora.​—Mataio 7:13, 14; 1 Ioane 2:15-17.

Akono no Toou Oraanga Pae Vaerua

Me akono tatou i to tatou oraanga kopapa i te au taime katoa, ka meitaki atu i reira ta tatou ravenga no te araianga i te maki. E me ka maki ake tatou, ka viviki rai tatou kia meitaki mai. Me akaaiteiteia atu, mei te mea e ka akono tatou i to tatou oraanga pae vaerua, i te mou anga i te akaraanga marama o te au akameitakianga te rekareka nei tatou i teianei e ta tatou katoa e tiaki nei, e me apii tatou i te irinaki ki runga i to Iehova maroiroi e auraka i to tatou uaorai, tei roto tatou i reira i te turanga meitaki kia aravei i te au manamanata ka tupu mai. Kare oki e rauka i te akakore katoatoa i te au arairaianga me kare te au ravenga akaparuparuanga. Inara mei te mea e kua akono meitaki tatou i to tatou oraanga pae vaerua i mua rava atu, kare i reira te reira au mea e apuku ia tatou.

E akamaara katoa, ka rekareka a Iehova me akakoromaki tona aronga akamori. No reira e apai tatou i te rekareka ki tona ngakau na roto i te aaere anga i roto i te tuatua mou.