Au Uianga a te Aronga Tatau

◼ Te akamatakite ra ainei a Iesu ia tatou mei ia Mataio 10:21 e, e manganui te au taeake i roto te putuputu anga ka patoi i to ratou au taeake i te pae vaerua?

Kare e ko te reira te tumu manako o to Iesu akamatakiteanga, tei tatau maira e: “Ei reira te tuakana e tuku atu ei i te taeake kia mate, e te metua i te tamaiti; e tu mai oki te au tamariki ki runga e tamate i to ratou au metua.”​—Mataio 10:21.

Kua akaari mai te akapapaanga i reira e kua tuatua a Iesu i teia ki te ngauru ma rua ua apotetoro tei akaue atu aia i tetai tere tutu aereanga i Iseraela. E maata tana i karanga atu, e aiteanga tikai no tana au apotetoro. Ei akatauanga, kua karanga aia e, kua akaririnuiia ratou kia rave i te au semeio rapakau, te akaatea atu i te au temoni, e pera katoa te au tuakaou anga. (Mataio 10:1, 8; 11:1) Kua akapapu maira te tuatua enua e, kare te katoa anga o te au Kerititiano i rauka ia ratou te au mana kia rave i te au semeio, te akapapuanga i reira e, te tuatua ra a Iesu ki tetai pupu akarongo tikai​—ko tana au apotetoro.

Inara, ko etai o ta Iesu i tuatua kua aere mamao atu i te tere tutu aereanga o te au apotetoro. Kua tuatua atu aia kia ratou e: “Kia matakite ra ia kotou i te tangata, . . . e noku nei e taki naiaʼi kotou ki mua i te aroaro o te au tutara, e te ui ariki, ei kite no ratou, e no te au etene.” (Mataio 10:17, 18) I te reira tere, kua aro atu te 12 i te patoi anga, inara kare e tika i kitea e kua tukuia ratou “ki mua i te aroaro o te au tutara, e te ui ariki” kia oronga i te akakite anga ki te “au etene.”a I te au mataiti i muri ake, kua aere te au apotetoro ki mua i te au tutara, koia oki te au Ariki ra ko Heroda Ageripa I e te II, Serio Paulo, Galio, e pera katoa i te Ariki ko Nero. (Angaanga 12:1, 2; 13:6, 7; 18:12; 25:8-12, 21; 26:1-3) E no reira, te aiteanga o ta Iesu au tuatua e no tetai tuatau i muri mai.

Kua aere atura te ako anga a Iesu ma te akamatakiteanga: “Ei reira te tuakana e tuku atu ei i te taeake kia mate.” I tana tuatua tei aru mai i roto i te Mataio 10 irava 21, kare aia e tuatua ra no te au taeake i te pae vaerua e te au metua tane i te pae vaerua me kore te tamariki: “E [tuku atu] te metua i te tamaiti; e tu mai oki te au tamariki ki runga e tamate i to ratou au metua.” Ta Iesu aiteanga i reira e ka tapapa atu te au apotetoro i te takinokino anga me kore te patoi anga no ko mai i to ratou au kopu tangata.​—Mataio 10:35, 36

Kua anoano te au apotetoro i te akakoromaki anga i te reira tere tutu aereanga. Kua tuatua a Iesu e, “E e makitakitaia kotou e te tangata katoatoa i toku nei ingoa; ko te tāpu marie ra e kia tae ki te openga, koia te ka ora.”​—Mataio 10:22.

Tetai o ta Iesu i tuatua i te reira atianga e puapinga tikai no te au Kite o Iehova i teia tuatau. Te tumu maata i ta tatou tutu aereanga ko te Patireia. Ka rave i ta tatou angaanga orometua ma te tutaki kore e kia kimi i te aronga tei inangaro me kore tei marikonga i te tuatua akakite. Kia raveia te matakiteanga tau. E manganui te aronga patoi. I tetai taime te kopu tangata, te tangata tupu, me kore te au taeake angaanga ka akatupuia i te au manamanata kino rava, te aronga ngakau tae tikai te akamata ra i te aruaru i te mataara o te akonoanga Kerititiano tika tikai. Kua akaoki akaouia e Iesu te akamatakiteanga no te reira patoianga i te akatutuanga i “te akairo” o tona taenga mai. (Mataio 24:3, 9, 10; Luka 21:16, 17) Kua tuatua akaou aia no to tatou anoano kia ‘akakoromaki e tae ua atu ki te openga ra, ka ora ia.’ Ae, ka anoano tatou kia tae ki te openga ra o to tatou oraanga nei me kore e tae ua atu ki te openga ra o teia akatereanga e ka tomo atu ei ki roto i te ao ou.—Mataio 24:13.

[Au Tataanga Rikiriki i Raro]