Ta Iehova Apinga Oronga Mai e Vaerua Tapu

“Mei teaa ra te maata atu ta te Metua i te rangi ka oronga i te vaerua tapu ki te aronga te pati atu ra kiaia!”​—LUKA 11:13, NW.

1, 2. (a) Eaa te taputou ta Iesu i akakite no runga i te vaerua tapu, eaa teia i riro ei ei akapumaanaanga tika tikai? (e) Eaa te vaerua tapu?

I TE tuanga openga o te mataiti 32 T.N. ia Iesu te tutu aereanga i te tuatua meitaki i Iudea, kua tuatua atu aia i to Iehova tu oronga ua, ki tana au pipi ra. Kua taiku atu aia i etai akatutu anga pakari e kua oronga katoa atu i tetai taputou meitaki tikai, i te na ko anga: “Me te kite na kotou i te oronga apinga meitaki ki ta kotou tamariki, e kino ua rai kotou, mei teaa ra te maata atu ta te Metua i te rangi ka oronga i te vaerua tapu ki te aronga te pati atu ra kiaia!”​—Luka 11:13, NW.

² E pumaana tikai tera au tuatua! Ia tatou e akakoromaki nei i te au tu kino o te tuatau openga o teianei ao, e te aro atu anga i te riri o Satani e tana au temoni, e te maroanga i to tatou uaorai au manako tau kore ra, e akamaana ngakau tikai kia kite e ka akamaroiroi mai te Atua ia tatou na tona vaerua tapu. E tika rai, kare e rauka te akakoromaki anga tiratiratu me kare te reira turu anga. Kua kite ainei koe i te mana o teia vaerua, koia to te Atua uaorai mana rave angaanga? Te kite meitaki ra ainei koe akapeea te maata ta te reira ka rauka kia tauturu ia koe? Te akono ra ainei koe kia tae ki tona ki katoa?

Te Mana o te Vaerua Tapu

3, 4. Akatutuia mai te mana o te vaerua tapu ra.

³ E akamanako na mua i te mana o te vaerua tapu. E tamanako ki muri ki te mataiti 1954. I reira i akaaruruiaʼi tetai pomu ki runga ake i tetai Motu ko Bikini i te tuanga Tonga o te Patipika. I muri poto ake i te aruru anga taua pomu ra, kua koropiniia taua motu manea ra ki roto i tetai pooro ai maata e kua reruia e tetai aruru anga tei aite atu tona ririnui ki to te aruru anga o te 15 mirioni tane TNT. Noea mai te reira mana ririnui no te akapou anga katoa ra? Ko te tupuanga ia no te tauianga i tetai tuanga rikiriki ua o te ririnui o te iureiniamu (uranium) e te aitorotene (hydrogen) koia a rotopu o taua pomu ra. Inara, ka peea, me ka rauka i te aronga kite i te rave kia tuke i ta ratou i rave ra ki Bikini? Penei me ka rauka ia ratou kia mou mai i taua ai ririnui katoa ra e ka taui ei kia tokoiti ua paunu iureiniamu e te aitorotene. Mei teaa ra te maata te reira rave anga! Inara, kua rave a Iehova i tetai apinga mei te reira te tu mari ra e maata rava atu i reira “i [te] akamataanga kua anga iora [aia] i te au rangi e te enua” ra.​—Genese 1:1, NW.

⁴ E mamaata ta Iehova au vairanga no tona ririnui. (Isaia 40:26) I te au mea i angaia ra, e mea tau kua akanoonoo aia i etai o taua ririnui ra i tana anga mai anga i te au apinga tei akatupuia maira te ao katoa e pini ua ake. Eaa tana i taangaanga i te anga mai anga i te au mea katoa ra? Ko te vaerua tapu. Ka tatau tatou: “Na te tuatua a Iehova i oti ei te au rangi: e to ratou katoa ra nuku i te aʼo [vaerua] o tona vaa.” (Salamo 33:6) Te tatauia ra i te tataanga ia Genese no te anga mai anga e: “Kua taoriori te mana rave angaanga [te vaerua tapu] o te Atua ra ki rungao i te au vai ra.” (Genese 1:2, NW) E mana ririnui tikai te vaerua tapu ra!

Au Angaanga Temeio

5. Eaa te au tu teitei te raveia ra e te vaerua tapu?

⁵ Te rave tamou ra te vaerua tapu na roto i te au tu teitei. Te arataki ra ia e te akaaere ra i ta Iehova akaaerenga i te rangi. (Ezekiela 1:20, 21) Mei te ririnui tei tukuia maira e te pomu aitorotene ka rauka katoa ia kia taangaangaia ei akapou i te rave anga i te akautunga anga i te au enemi o Iehova ra, inara te rave katoa ra ia i etai atu au tu te akatupu ra i te manako vavaria.​—Isaia 11:15; 30:27, 28; 40:7, 8; 2 Tesalonia 2:8.

6. Akapeea ta te vaerua tapu turu anga ia Mose e te tamariki o Iseraela i ta ratou au ravenga ma to Aiphiti ra?

⁶ Ei akaraanga, vaitata i te 1513 M.T.N., kua tono atu ra a Iehova ia Mose kia aere ki mua ia Pharao o Aiphiti kia pati atu kia tuku uaia te au tamariki o Iseraela kia aere. No te 40 mataiti i mua akera, e tiaki mamoe a Mose i Midiana, e no reira eaa a Pharao ka akarongo ei ki tetai tiaki mamoe? No te mea i aere mai a Mose i roto i te ingoa o te Atua mou anake ra, koia a Iehova. Ei akapapu anga i te reira, kua oronga atu ra a Iehova i te mana nona kia rave i te au temeio. No te taka meitaki te reira kua opara katoaia te au taunga o Aiphiti ra kia akatika e: “Ko te rima teia no te Atua”!a (Exodo 8:19) Kua apai mai a Iehova e tai ngauru mate ki runga ia Aiphiti, ua te mea openga i akakeu ia Pharao kia tuku i te iti tangata o te Atua ra kia akaruke ia Aiphiti. I te aru anga marokiakia a Pharao ia ratou ma tana nuku vaeau, kua ora atu to Iseraela i te akatuera angaia te mataara na roto atu i te Tai Muramura na te tu temeio. Kua arumaki atu ra te nuku o Aiphiti ia ratou e kua maremo atura ki roto i te tai.​—Isaia 63:11-14; Hagai 2:4, 5.

7. (a) Eaa etai tumu i rave ei te vaerua tapu i te au temeio ra? (e) Noatu rai e kare e tupu akaou ana te au temeio a te vaerua tapu ra, eaa i riro ei te tataanga no te reira i te Puka Tapu ra ei akapumaanaanga?

⁷ Ae, kua rave a Iehova i te au temeio ririnui no to Iseraela i te tuatau ia Mose ra, e i etai atu au taime katoa na roto i tona vaerua ra. Eaa te akakoroanga o taua au temeio ra? Kua akatere atu i ta Iehova ra au akakoroanga, kua akakite katoa oki i tona ingoa, e kua akakite katoa i tona mana. E i etai tuatau, mei to Mose rai, kua akapapu mai ratou e te turu ra a Iehova i te reira tangata. (Exodo 4:1-9; 9:14-16) Inara, e taki tai ua ake te au temeio tei akatupuia mai e te vaerua tapu ra i roto i te tuatua enua katoa.b Penei, ko te maataanga o te au tangata tataki tai tei ora ra i te tuatau o te Puka Tapu kare i kite ana i tetai, e i teia tuatau nei kare e tupu akaou ana. Tera ra, ia tatou e kukumi nei i te au manamanata tei akaraanga e kare e rauka kia na runga atu, kare ainei i te mea pumaana kia kite e me ka pati tatou ia Iehova ma te akarongo, ka oronga mai aia i taua vaerua rai tei turu ra ia Mose i mua ia Pharao ra e tei akatuera ra i te mataara no to Iseraela kia aere na roto i te Tai Muramura?​—Mataio 17:20.

Au Tataanga Akauruia Ra

8. Eaa te tuanga a te vaerua tapu i te oronga anga mai i nga Akauenga e Tai Ngauru ra?

⁸ I muri ake i to ratou akaora angaia mei Aiphiti ra, kua taki atu a Mose i to Iseraela ki Maunga Sinai, i reira kua papau a Iehova i tetai koreromotu ma ratou katoa ra e kua oronga atu i tana Ture kia ratou. Ko te tuanga o rotopu i taua Ture i orongaia atura na roto ia Mose ko nga Akauenga Tai Ngauru ra, e ko te au tataanga mua o teia kua taraiia ki runga i nga papa toka. Akapeea ra? Na te vaerua tapu. Te akakite maira te Puka Tapu: “E oti akera tana tuatua anga kia Mose ki runga i te maunga ra ko Sinai, kua tuku maira aia i nga papa kite ra kiaia; e papa toka, i tataia e te rima o te Atua ra.”​—Exodo 31:18; 34:1.

9, 10. Eaa te angaanga a te vaerua tapu i te tataanga i te Au Tuatua Tapu Epera ra, e akapeea te akakite anga i te reira mei te au tuatua tei taikuia ra e te au pipi a Iesu?

⁹ Kapiti katoa ki taua nga Akauenga Tai Ngauru ra, kua oronga katoa a Iehova ki to Iseraela ra e au anere ua atu ture e te au akauenga na roto i tona vaerua ei arataki i te au oraanga o te au tane e te au vaine tiratiratu ra. E maata atu ka aru mai. I etai anere mataiti i muri ake i te tuatau ia Mose ra, kua akakite a Nehemia na roto i tana pure kia Iehova i te ngai tangata ra: “E manganui rai toou mataiti i te akakoromaki anga ia ratou, e te ako anga oki ia ratou i te Vaerua noou i te au peroveta naau ra.” (Nehemia 9:30) E manganui te au totou tei tuatuaia e taua au peroveta ra kua oti te tataia. Pera katoa oki, kua akakeuia te au tangata tiratiratu ra e te vaerua tapu kia tata i te au tuatua enua tapu ra e te au imene akapaapaa tei akaputa ra i te ngakau.

¹⁰ Te tuatua ra a Paulo no teia au tataanga katoatoa iaia i karanga ra: “Te au tuatua tapu katoa i tataia ra, e mea akauruia mai e te Atua.” (2 Timoteo 3:16; 2 Samuela 23:2; 2 Petero 1:20, 21) E tika, i te taikuanga i teia au tuatua tapu, e putuputu te au pipi a Iesu o te anere mataiti mua ra i te taiku anga i te au tuatua mei te “Vaerua Tapu i tuatua mai na roto i te vaa o Davida,” ra e “tuatua tika ta te Vaerua Tapu ia Isaia peroveta,” me kare “mei ta te Vaerua Tapu i tuatua maira.” (Angaanga 1:16; 4:25; 28:25, 26; Ebera 3:7) E akameitakianga tikai ta taua vaerua tapu rai tei mana ra ki rungao i te tataanga i te Au Tuatua Tapu e kua akavai mai i te reira kia raukai ia ratou i te arataki e te akapumaana ia tatou i teia tuatau nei!​—1 Petero 1:25.

Irinaki Anga i te Vaerua Tapu

11. Eaa te angaanga a te vaerua tapu tei kiteia i te akatuanga i te puakapa ra?

¹¹ I to Iseraela e noo puakapa ra ki raro ake i te Maunga ra ia Sinai, kua akaue atura Iehova ia ratou kia akatu i tetai puakapa ei ngai no te akamori anga mou ra. Akapeea ka oti ei ia ratou te reira? “Kua karanga atura Mose ki te tamariki a Iseraela, I na, kua tuatua akenei a Iehova i te tamaiti a Uri te tamaiti a Hura, no te kopu o Iuda, i tona ingoa, ia Bezaleela; E kua akaki aia iaia ki te Vaerua o te Atua, i te karape, te pakari, e te kite i te angaanga tini ravarai ra.” (Exodo 35:30, 31) Na te vaerua tapu i akamaroiroi atu i to Bezaleela uaorai kite karape ra, e kua rauka iaia i te akaaere kia meitaki te akatu anga i taua puakapa umere roa ra.

12. Akapeea ta te vaerua tapu akamaroiroi anga i te au tangata tataki tai na te au mataara takake i muri ake i te tuatau ia Mose ra?

¹² I tetai tuatau i muri iora, na roto i te tu aiteite, kua angaanga te vaerua o Iehova ki rungao ia Samasona ra, kua oronga atu i te maroiroi tere atu i to te tangata nei kia rauka iaia te akaora i to Iseraela mei to Philiseti mai ra. (Au Akava 14:5-7, 9; 15:14-16; 16:28-30) I muri akera, kua orongaia kia Solomona te pakari taka ke ei ariki no te iti tangata ikiia o te Atua ra. (2 Paraleipomeno 1:12, 13) I raro ake iaia, kua puapinga maataia to Iseraela kare i aiteia i mua ana, e ko tona tu rekareka kua riro mai ei akaraanga no te au akameitakianga te ka rekarekaia e te iti tangata o te Atua i raro ake i te Tutara anga no te Tauatini Mataiti koia a Iesu Karaiti te Solomona Maata atu.​—1 Ariki 4:20, 25, 29-34; Isaia 2:3, 4; 11:1, 2; Mataio 12:42.

13. Akapeea te akamaroiroi anga ia tatou i teia tuatau a te tataanga no te akamaroiroianga a te vaerua ia Bezaleela, ia Samasona, e ia Solomona oki?

¹³ Mei teaa rai te akameitakianga e kua oronga katoa mai a Iehova i taua vaerua rai kia tatou nei! Me ka manako ngakau tatou e kare tatou i tau no te rave i tetai angaanga me kare rave i te angaanga tutu aereanga, ka rauka ia tatou i te pati kia Iehova kia oronga mai i te vaerua kia tatou mei tana i oronga kia Bezaleela ra. Me ka rokoia tatou e te maki me kare ka akakoromaki i te takinga kinoanga, na taua vaerua rai tei oronga atura i te maroiroi maata roa kia Samasona ra na te reira e akamaroiroi mai ia tatou nei​—tera ra, kare ma tetai temeio. E kia aro atu tatou i etai manamanata ngata roa me kare ka tuku i etai tikai puapinga maata, ka tau tatou kia pati ia Iehova, nana ra i oronga kia Solomona i te pakari maata roa, ei tauturu ia tatou kia rave pakari. Mei ia Paulo rai, ka rauka ia tatou kia tuatua: “No te au mea ravarai tei iaku te maroiroi na roto mai iaia tei oronga maira i te mana kiaku nei.” (Philipi 4:13, NW) E ka tau rai kia tatou ta Iakobo i taputou maira: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana.”​—Iakobo 1:5.

14. Koai ma, i te tuatau taito ra e i teia tuatau katoa oki, tei turuia e te vaerua tapu ra?

¹⁴ I runga katoa oki ia Mose te vaerua o Iehova i tana angaanga akavaanga i te iti tangata ra. I te akamana anga i etai atu ei tauturu ia Mose ra, kua na ko maira Iehova: “E rave oki au i ta te Vaerua i rungao ia koe, ka tuku ei ki runga ia ratou: e ei runga katoa ia ratou taua apainga ra o te au tangata nei, auraka ei runga ia koe anake ra.” (Numero 11:17) E no reira, kare taua au tangata ra i rave i te angaanga na to ratou uaorai maroiroi. Na te vaerua tapu i turu ia ratou. Tatau ana tatou i etai atianga i muri iora tei runga katoa oki te vaerua o Iehova i etai ke atu. (Au Akava 3:10, 11; 11:29) I ta Samuela akatainu anga ia Davida ei ariki no Iseraela i muri akera, te karanga ra te tataanga: “Kua rave iorā Samuela i taua āriki manongi ra, e kua akatainu atura iaia i rotopu i tona ai tuakana ra: e mei taua rā maira te Vaerua o Iehova i te tae anga mai ki runga ia Davida.” (1 Samuela 16:13) Te aronga katoa i teia tuatau nei e apainga teiaa ta ratou​—i te ngutuare tangata, te putuputuanga, me kare te akaaerenga—​ka rauka kia pumaana i te kite anga e te vaira te vaerua o te Atua ei turu i tona au tavini ia ratou e akono ra i ta ratou au apainga.

15. Na teea mataara ta te vaerua tapu akamaroiroi anga i te akaaerenga a Iehova (a) i te tuatau ia Hagai raua ko Zecharia ra? e (e) i teia tuatau nei?

¹⁵ E vaitata e tauatini mataiti i muri ake i te tuatau ia Mose ra, kua oki atu te aronga tiratiratu no rotopu i te tamariki o Iseraela ki Ierusalema mei Babulonia atu ma te akauenga kia patu akaou i te iero. (Ezera 1:1-4; Ieremia 25:12; 29:14) Kua tupu mai etai arai anga ngata, e kua akaapikepikeia ratou no etai mataiti e manganui. I te openga, kua akatu mai a Iehova i nga peroveta ia Hagai raua ko Zecharia kia akamaroiroi i te ngati Iuda kia kore e irinaki i to ratou uaorai ririnui. Inara ka akapeea e oti ei taua angaanga ra? “‘Kare na tetai nuku vaeau, e kare na te mana, mari ra na taku vaerua,’ te tuatua maira a Iehova Sabaota.” (Zekaria 4:6, NW) E ma te turu anga a te vaerua o te Atua ra, kua akatuia te iero ra. I teia tuatau nei e maata katoa oki tei oti i te au tangata o te Atua ra. Kua totoa te tutuanga i te tuatua meitaki kia kako rava ake i teianei ao. E au mirioni ua atu te aronga te apiiia ra i te tuatua mou e te tuatua tika. Te akapapaia ra te au uruoaanga. Te akatuia ra te Au Are Uipaanga Patireia e te au opati manga katoa oki. E maata te reira kua raveia i roto i te au patoianga pakari. Inara kare i rauka te Au Kite o Iehova ei maromaroa, ma te kite e ko te au apinga tataki tai ravarai tei oti ia ratou ra, kare na tetai nuku vaeau, e kare na te mana tangata, mari ra na te vaerua o te Atua ra.

Te Vaerua o te Atua i te Anere Mataiti Mua Ra

16. Eaa te tupuanga ki te au tavini o Iehova i mua ake i te tuatau Kerititiano ra ma te angaanga a te vaerua o te Atua ra?

¹⁶ Mei ta tatou i kite akenei, kua kite meitaki te au tavini o te Atua i mua ake i te tuatau Kerititiano ra i te mana o te vaerua o te Atua. Kua irinaki ratou i te reira ei tauturu ia ratou i te akatupu i te au apainga teiaa ra e te akaoti i to te Atua ra anoano. Kua kite katoa ratou e ko te Ture e etai atu tataanga tapu e mea akauruia anake, i tataia i raro ake i te mana o te vaerua o Iehova, e no reira e ‘Tuatua katoa ia na te Atua.’ (Salamo 119:105) Peea, i reira, to te tuatau Kerititiano nei?

17, 18. Eaa etai akakitekite anga temeio a te vaerua i te tuatau Kerititiano ra, e eaa ta te reira akakoroanga i akatupu?

¹⁷ Kua kitea katoaia i te anere mataiti mua o to tatou Tuatau Noa Nei te au angaanga umere a te vaerua o te Atua ra. E au totouanga akauruia e te vaerua etai. (1 Korinetia 14:1, 3) I te akatupu anga i ta Iesu taputou e ka akamaaraara te vaerua tapu i tana au pipi i te au mea ravarai tana i tuatua ra e ka apii katoa ia ratou i etai atu tuanga o te tuatua mou ra, e manganui te au puka i tataia i raro ake i te mana o te vaerua tapu ra. (Ioane 14:26; 15:26, 27; 16:12, 13) E au temeio etai, mei ta tatou ka uiriuri manako meitaki i ta tatou tumu tuatua i muri akenei. E tika, kua akamataia mai te anere mataiti mua ra ma tetai temeio umere roa. Vaitata i te mataiti 2 M.T.N., e pepe taka ke tetai kua anauia mai, e ko te akairo, ko tona metua vaine ou e paretenia ia. Akapeea e raukai te reira? Na te vaerua tapu. Te karanga ra te tataanga: “Ko te tu oki teia o te anau anga o Iesu Mesia: Kua momokia tona metua vaine ko Maria na Iosepha, kare ra raua i moe i nui ei aia i te Vaerua Tapu.”​—Mataio 1:18; Luka 1:35, 36.

¹⁸ I to Iesu tupu anga ake, kua tuaru aia i te au temoni, kua akaora te maki, kua akatu i tei mate ra na te mana o te vaerua tapu ra. Kua rave katoa tetai papaki o tana au pipi i te au temeio e te au angaanga ririnui ra. Ko teia au ravenga taka ke ra e apinga oronga mai na te vaerua tapu. Eaa to ratou akakoroanga? Mei ta te au temeio mua rai i rave ra, kua akatere atu ratou i ta te Atua ra au akakoroanga e kua akakite oki i tona mana. Pera katoa oki, kua akakite ratou i te tika tikai ta Iesu i karanga e i tonokia mai aia e te Atua ra; e i muri akera, kua akapapu mai ratou e ko te putuputuanga Kerititiano o te anere mataiti mua ra ko te iti tangata ikiia ia o te Atua.​—Mataio 11:2-6; Ioane 16:8; Angaanga 2:22; 1 Korinetia 12:4-11; Ebera 2:4; 1 Petero 2:9.

19. Akapeea te akamaroiroi anga i to tatou akarongo a te tataanga i te Puka Tapu ra i te au temeio a Iesu e tana au apotetoro i rave ra?

¹⁹ Inara, kua akakite mai te apotetoro ko Paulo e, ko te reira au akakiteanga temeio a te vaerua ra no te tamariki anga ia o te putuputuanga e ka kore atu, e no reira kare tatou e kite i te reira au temeio i te akatupu angaia e te vaerua tapu i teia tuatau nei. (1 Korinetia 13:8-11) Inara, e maata atu i te mea manakoia no te tuatua enua taua au temeio tei raveia e Iesu e tana au apotetoro ra. Te akamaroiroi maira ratou i to tatou akarongo i te au taputou a te Atua ra e kare e ngai no te maki e te mate i raro ake i ta Iesu tutaraanga i te ao ou.​—Isaia 25:6-8; 33:24; 65:20-24.

Puapinga Mei te Vaerua Tapu Mai o te Atua

20, 21. Akapeea e raukaʼi ia tatou te au puapinga no te vaerua tapu mai ra?

²⁰ Mei teaa ra te mana ririnui i teia vaerua nei! Inara akapeea te reira e raukai i te au Kerititiano no ratou uaorai i teia tuatau nei? Te mea mua, kua karanga a Iesu ka tau tatou kia pati no te reira, e no reira eaa i kore e rave i te reira? E pure kia Iehova kia oronga mai i teia apinga aroa meitaki kia koe kare i te au tuatau taitaia anake ua mari ra i te au atianga ravarai. Kapiti katoa oki e tatau i te Puka Tapu kia raukai i te vaerua tapu i te tuatua mai kia koe. (Akaaiteia atu kia Ebera 3:7) E akamaaraara i taau i tatau ana e ka rave ei kia riro te vaerua tapu ei mana ki rungao i toou oraanga. (Salamo 1:1-3) E taokotai atu​—ki tetai me kare ki roto i te au putuputuanga e i te au uipaanga—​ma etai ke atu tei irinaki ra i te vaerua o te Atua. Mei teaa ra te akamatutu anga apinganui a te vaerua tapu i te aronga tei akameitaki ra i to ratou Atua “i te au pupu te putuputu ra”!​—Salamo 68:26, NW.

²¹ Kare ainei a Iehova i te Atua oronga ua? Kua karanga aia e kia pati ua tatou no te vaerua tapu e nana e oronga mai te reira kia tatou. E neneva tikai kia irinaki tatou i to tatou uaorai pakari e to tatou maroiroi i te mea te vai maira tera tauturu ririnui no tatou! Inara, te vaira etai atu tumu no te rave ma te vaerua o te Atua te piri maira kia tatou ei au Kerititiano, e ka uriuri manakoia te reira au tumu i roto i te tumu tuatua i muri akenei.

[Au Tataanga Rikiriki i Raro]

Ka Rauka Ainei ia Koe i te Pau te Au Uianga te Aru Mai Nei?

◻ Akapeea ta Iehova ra anga mai anga i te au mea ravarai i te ao katoa e pini ua ake?

◻ Eaa etai mataara rave angaanga a te vaerua tapu i mua ake i te tuatau Kerititiano ra?

◻ Akapeea te akapumaana anga ia tatou i teia tuatau nei, i te kite anga i ta te vaerua tapu i akatupu i te tuatau taito ra?

◻ Akapeea ka raukai ia tatou te au apinga puapinga no te vaerua tapu mai?

[Tutu i te kapi 10]

Ka rauka i te vaerua, tei oronga ra i te maroiroi maata atu i to te tangata nei kia Samasona, kia oronga katoa mai i te mana no tatou no te au mea ravarai