Ripoti a te Aronga Tutu Patireia

‘Kokotianga’ i Venetuera

I tetai atianga kua akaaiteia e Iesu te angaanga tutu aereanga ki te kokoti anga i te mataiti. (Mataio 9:36-38) Ko te Atua ko Iehova te Pu o te kokoti, e e maata tikai te kokoti anga takapini i te ao katoa. E kua kapiti atu teia i te au ngai kare e angaanga putuputuia ana i Venetuera.

Kua ripoti te opati manga o te Totaiete Punanga Tiaki i Venetuera i tei tupu tetai pupu o te Au Kite tei angaanga i te ngai o te Sabana Grande, Guárico State. Kua akakite atu te Au Kite: “E ngai meitaki te are ta matou e noo ra no te au uipaanga, no reira kua akamata matou i te reira taime i te pati i te au tangata kia aere mai ki te au uipaanga i reira. Kare te au tangata i kite i te Au Kite o Iehova. Noatu e e a pupu evangeria i te reira taoni, kua inangaro te au tangata kia apii i te Puka Tapu.

“Kua angaanga matou e toru ora i te popongi e e toru ora i te aiai, te atoroanga i tetai are i tetai are no te pati atu i te au tangata kia aere mai ki te uipaanga i tera mai po. Kare o matou nooanga, no reira kua pati atu matou kia apai mai i to ratou au nooanga. I te vaitata anga te ora no te akamata i te uipaanga, kua akamata te tangata i te aere mai, e kua apai mai i to ratou nooanga tataki tai. Te akaoti anga te uipaanga, kua tuatua atu matou kia ratou e ka inangaro matou i te tata i te ingoa o te aronga ka inangaro i tetai apii Puka Tapu kare e tutaki. Kua inangaro te katoa o te 29 tei putuputu mai i te tuku i to ratou ingoa ki runga i te akapapa anga.

“Ia matou e tapiri ra i te pa i muri ake i te manuiri openga, kua kite atu matou e toru tangata i te tu anga i te akoko o te are. Kua vaitata atu i te ora iva, kua papa matou i te noo ki raro no te kaikai kua topapa mai ratou ki runga i te ngutupa. Kua ui mai ratou i tetai au uianga mei te: ‘Eaa teia angaanga tutu aereanga ta kotou e rave nei i roto i teia taoni? No teaa ra te tumu no kotou i rave ei i tetai uipaanga i konei i teia po?’

“Kua ui atu matou e me te aati nei matou i tetai ture. Kare i na ratou ei e kua karanga ra e ko ratou te au orometua o nga akonoanga evangeria e toru i te reira taoni. E manga riri rai to ratou no te mea kare to ratou are pure i ki i te reira po. Kua pati atu matou ia ratou kia aere mai ki roto e kua akamarama atu i ta matou angaanga. Kua tuku katoa oki matou i tetai puka na ratou e kua pati atu ia ratou kia oki mai i tera mai Paraparau.

“I te Paraparau i muri mai kua oki akaou mai te orometua ma tetai 22 au tangata tei inangaro i te akarongo i ta matou ka tuatua. Kua manako te orometua e, no te mea e vaine matou, e kare matou e aite atu ia ratou no te tuatua anga. Noatu rai, kua manuia te uipaanga i to matou au manako. I te akaotianga kua akamarama atu matou e te rave ra matou i tetai akapapa anga no te au tangata ka inangaro i te apii i te Puka Tapu. Tetai au oa o te orometua kua inangaro i to ratou ingoa kia tuku ki runga i te akapapa anga, e kua karanga katoa tetai pae e ka inangaro ratou i te aru ia matou ki vao i te angaanga tutu aere!

“Kua akamarama atu matou ia ratou e i mua ake i te kapitianga ia matou i te angaanga tutu aere ka anoano ratou i tetai kite e tetai apiianga o te Puka Tapu. I te au ra katoatoa, kua aere mai te au tangata ki te kainga, no te pati ia matou kia akamarama atu i te Puka Tapu kia ratou. I tetai au taime, e pukapuka ana matou e tae ua atu ki te roa anga po, kua pati atu matou ia ratou kia oki ki te kainga. I to matou tuatau no te akaruke i teia ngai, kua maromaroa ratou e kua akakite mai e me oki akaou atu matou, ka aere kapiti matou i te angaanga tutu aere. Kua taputou ratou e a te reira taime ka rauka ia ratou i te rave i tei anoanoia kia tere roa atu.”

I te akarukeanga te Au Kite i te reira ngai, e 40 au tangata tei inangaro i te apii i te Puka Tapu. Kua orongaia atu te au ingoa o te aronga tei inangaro ki tetai putuputu anga i vaitata mai, mei te 50 kiro mita te mamao. No te reira taime e ki teia nei, kua neke atu tetai Au Kite no tetai oire ki teia taoni, e kua akaputuputu i tetai pupu aronga maroiroi no te akakitekite i te tuatua meitaki.