Orongaanga i te Marama i Namipia
EIA au reo taau i akarongo ana i te tuatua “Kare au i kite”? “Hi nokuzuva,” i karangaʼi te vaine Erero, i roto i tona pona tupuna roroa e tetai tapoki upoko mei te pu rai. “Nghi udite ko,” i pau mai ei te tamaine Kuaniama, ma tetai kata. “Kandi uvite ko,” i pau mai ei te tangata Notonga, ma te takirikiri anga i tona nga pakuivi. “Kapi na kuzuvha,” i tuatuaʼi tetai tangata Kuangari akono puakanio.
Kua karanga pouroa teia au tangata e, “Kare au i kite.” Mei teaa atura ta teia e akatutu maira te aro anga atu te Au Kite o Iehova i Namipia i te au manamanata maata o te reo i to ratou tauta anga i te itae i te au tangata e 1,370,000 i roto i teia ngai maata o te 824,000 koea kiro mita!
Mei teaa atura te umere. Kare ko te au tangata Erero e te Nama anake ua, mari katoa ra ko te au tangata Ovamapo, Kavango, Teuana, Kapirivi, Imipa, Ngangaere, e te Tamara o Namipia e au reo rai to ratou. Ei tuke anga kua papa anake ua te Au Kite ma te au puka Puka Tapu i te reo Engarani e te Aperikana anake ua. Te papu ra, e e maramaiaʼi te tuatua mou e te maata anga o te au tangata, kua anoano maataia te angaanga uri anga. Kua akamata teia i te manganui o te au mataiti i topa na roto i tetai mataara meangiti tikai i Windhoek, ko te oire maata o Aperika Apatonga Opunga i te reira taime.
“I Windhoek, kua tupu tetai patoi anga pakari ki ta matou angaanga tutu aere mei te akonoanga e te akava,” i maara ei ia Dick Waldron. Ma tana vaine, ko Coralie, kua aere mai aia ki teia enua i te 1953 ei karatuati no te Apii Puka Tapu Punanga Tiaki o Gileada. “Kare matou i akatikaia ki roto i te au ngai tei nooia e te au tangata kerekere, e i etai au taime kua tamanamanataia matou me kiteaia e te tuatua ra matou ki te au tangata kerekere. I te openga kua kiteaia e matou tetai ngai tei kore matou i tamanamanataia—te papa maro o te Kauvai Gammans! Tei vao ua ake teia i te taoni. Ma te uunaia i raro ake i te au ngangaere akaitia, kua rave matou i ta matou au apii Puka Tapu.”
I reira rai te au puka Punanga Tiaki i uriiaʼi na mua ki roto i te au reo o te reira ngai. Kua kapiti mai etai au aenga pepa i roto i te reo Kuaniama e te puka riki “This Good News of the Kingdom” i te reo Nama. Kua maara i te Taeake ko Waldron tetai kite anga reka tei piri atu ki teia puka riki, koia oki na tetai tangata tei inangaro ra i tauturu mai i te uri. I te reo Nama kare e kitea te tu aiteite o te aerenga tuatua, “E tangata tiama a Adamu.” No reira kua karanga te tangata tei inangaro ra e: “E tata ua e mei tetai piiti para rai a Adamu. Ka marama ua te au tangata Nama e e tiama aia.” Akapeia i reira, i tupu ei tetai akamata anga no te oronga i te marama o te au Tuatua Tapu ki te manganui i roto i te au tangata tumu o Namipia.—Akaaiteia atu kia Daniela 11:33.
Itaeanga i Tetai Rave Anga Puapinga
Kua itaeia tetai rave anga puapinga i te akamata anga o te au mataiti 1970 te uri angaia te puka Te Tuatua Mou te Ka Arataki ki te Ora Mutukore ki roto i te reo Notonga e te Kuaniama. Ko teia te ngai reo maata tei tuatuaia e te maata anga o te au tangata Namipia i Ovamboland, mei te 700 kiro mita te tua tokerau o Windhoek. Kua akatumuia tetai kainga painia i Onitangava, e manga ngai noo anga i Ovamboland. Ei tauturu i te au tangata tei inangaro i roto i teia ngai kia puapinga mei te uriurianga Puka Tapu o te epetoma tei akatumuia ki runga i te Te Punanga Tiaki, kua tukuia te au painia takake te tavini ra i Ovamboland kia uri i tetai tuatua anga poto ua o te au atikara apii Engarani ki roto i te reo Notonga e te Kuaniama.
Te “opati” uri anga e kona araiia te reira o tetai karati te ngai i neneiiaʼi te au kopi tei uriia o te Punanga Tiaki ki runga i tetai matini kopianga. Kare i te mea ngoie no te manako ua ki runga i teia angaanga maata, i te mea e e manga tuke rai te au turanga e kua averiti te reva maana i rotopu i te 38 e te 44 tikiri (degree) Tearatieti (Celsius). Pera katoa, i konei rai te au poroutia ou e te puka Ka Rauka ia Koe te Ora Mutukore i Paradaiso i te Enua Nei i uriiaʼi.
I te au putuputuanga e akatupuia ra i Ovamboland e i tetai atu au ngai i Namipia, no tei maata tei inangaro ra kua anoanoia tetai atu au ngai meitaki. Ei kapiti atu, kua anoanoia tetai ngai i rotopu tikai e raukaʼi te au anoano o tetai atu au ngai o te enua i te akonoia. I te reira taime rai, kua meangiti mai te au tu iriiri i ta tatou angaanga tutu aere i te Patireia. No reira kua rauka mai te tika anga no te akamata i te akatuanga i tetai ki runga i tetai enua maata tei oronga uaia mai e tetai o te Au Kite o Iehova in Windhoek. Kare i roa ana, e tere atu i te 40 aronga angaanga tei oronga ua ia ratou tei noo ki runga i te ngai akatuanga, e i roto ia Titema 1990 kua oti te au opati uri anga.
I teianei, i roto i te au opati tau e te au pia moe i roto i teia are ou, te tupu maata ra te angaanga o te apaianga i te marama ki te manganui. Te uri tamouia ra te au puka ou ki roto i te reo Erero e te Kuangari. I te reo taki rua ko te Notonga e te Kuaniama, e nenei anga marama ma te kara ta ratou i teianei o Te Punanga Tiaki. Tei roto i reira te au atikara apii pouroa e pera katoa tetai atu au tataanga. E tikai, e mea tuke tikai teia mei te akamata anga meangiti i raro i te papa maro o te kauvai i te manganui o te au mataiti i topa.
“Kare au i kite” e meangiti ua teia i te rongoia i teianei. I tetai tua, e tere atu i te 600 Au Kite o Iehova in Namipia te rekareka tikai i to ratou Metua i te rangi, e ka rauka ia ratou i te tuatua i teianei e: “Tei te eeu anga o taau ra tuatua e māramaʼi, e kite ei te tangata kamakura ra.”—Salamo 119:130.
[Au Tutu i te kapi 25]
Akakitekiteanga i te tuatua meitaki i rotopu i te au tangata Erero
Urianga i te au puka Kerititiano kia puapinga te au tangata o Namipia
Au opati uri anga i Namipia