E Tavini Tiratiratu ia Iehova

“Te tangata tiratiratu ra, e tiratiratu katoa taau [e Iehova].”​—2 SAMUELA 22:26.

1. Eaa ta Iehova ra ravenga i te aronga tiratiratu ra kiaia?

KARE e rauka kia tutakiia a Iehova no tana au apinga ravarai e rave ra no tona au tangata. (Salamo 116:12) E umere tikai tana au apinga oronga mai i te pae vaerua e te pae kopapa e tona aroa ua katoa oki! Kua kite te Ariki ko Davida o Iseraela i taito ra e te rave katoa ra te Atua i te tiratiratu i te aronga tiratiratu kiaia ra. Kua tuatua akapera a Davida i tana imene i akapapa ra “i te rā i aka­oraiaʼi aia e Iehova i te rima o tona katoa ra au enemi, e te rima o [te Ariki ko] Saula ra.”​—2 Samuela 22:1.

2. Eaa etai tumu te orongaia maira i ta Davida imene tei tataia ia 2 Samuela pene 22?

² Kua akamata a Davida i tana imene (tei tau ra kia Salamo 18) na te akapaapaaanga ia Iehova ko te “Punanga, e toku nei ora” i te pauanga i te pure. (2 Samuela 22:2-7, NW) Mei tona nao i te rangi ra, kua rave te Atua i te akaora i tona tavini tiratiratu i te au enemi ririnui ra. (2 Samuela 22 Au irava 8-19) E kua tutakiia a Davida no te aruanga i te arataa tika e te mouanga i to Iehova ra au aerenga. (2 Samuela 22 Au irava 20-27) Kua taikuia mai i muri akera te au angaanga i raveia e te ririnui o te Atua ra. (2 Samuela 22 Au irava 28-43) I te openga, kua akakite maira Davida i te akaora anga i te aronga kimi apa ra i te ngutuare e mei te au enemi no etai atu pa enua e kua akameitaki atura ia Iehova “koia te punanga ora i tona ariki; e te akakite maira i te aroa ki tei akamainuia e ia.” (2 Samuela 22 Au irava 44-51) Ka rauka katoa oki ia Iehova te akaora ia tatou nei me ka aru tatou i te arataa tika e ka irinaki iaia no te ririnui.

Eaa te Aiteanga e Kia Tiratiratu

3. Mei tetai tumu mai no te Tuatua Tapu ra, eaa te aiteanga e kia tiratiratu?

³ Te oronga maira ta Davida imene no te akaora anga i te akapapu anga pumaana: “Te tangata tiratiratu ra, e tiratiratu katoa taau [e Iehova].” (2 Samuela 22:26) Ko te tuatua Epera te akataka ra e cha·sidhʹ te akakite ra e ko “te tangata tiratiratu,” me kare “e tangata aroa takinga meitaki.” (Salamo 18:25, tataanga i raro ake) Tei roto i te tuatua nauna cheʹsedh te manako no te takinga meitaki te kapiti aroa atura iaia uaorai ki tetai apinga tae roa kia tupu tana akakoroanga no te reira. Te akakite maira a Iehova i tera tu takinga meitaki no tona au tavini, mei ta ratou katoa oki e akakite atura i te reira kiaia. Ko tei tiratiratu tapu e te tuatua tika te uriia ra e “aroa takinga meitaki” e e “aroa tiratiratu” oki. (Genese 20:13, NW; Genese 21:23, NW) I roto i te Au Tuatua Tapu Ereni, te rave ra te “tiratiratu” i te manako no te tapu e te akatapu anga, te akakiteia maira i te nauna ho·si·oʹtes e te tuatua akataka ra hoʹsi·os. Ko tera tiratiratu te kapiti ra i te pikikaa kore, e te akamori mou, tona aiteanga e ngakau tae e te matakite i te raveanga i te au angaanga katoatoa i te Atua ra. Te aiteanga o te tiratiratu kia Iehova e piri mou tikai kiaia ma te akamori anga ketaketa te ka akono kia aite ki tetai apinga pipiri ririnui ra.

4. Akapeea te akaari anga i to Iehova ra tiratiratu?

⁴ E manganui te au tu akaari anga mai i to Iehova uaorai tu tiratiratu. Ei akatauanga, ka rave aia i te akavaanga i te aronga rave kino no te aroa tiratiratu i tona au tangata e tona tiratiratu i te tuatua tau e te tuatua tika. (Apokalupo 15:3, 4; 16:5) No tona tiratiratu ki tana koreromotu kia Aberahama i akakeu iaia kia akakoromaki roa i to Iseraela ra. (2 Ariki 13:23) Ka rauka i te aronga tiratiratu ki te Atua ra i te irinaki i tana tauturu e tae roa ki te openga o ta ratou angaanga tiratiratu e ka papu ia ratou e ka maara mai aia ia ratou ra. (Salamo 37:27, 28; 97:10) Kua akamaroiroiia a Iesu e te kite e ei “tei tiratiratu” maata na te Atua ra, kare tona meta e akarukeia ki Teoro.​—Salamo 16:10, NW; Angaanga 2:25, 27.

5. I te mea e tiratiratu a Iehova, eaa tana e umuumu maira i tona au tavini, e eaa te uianga te tau ra kia akamanako atu?

⁵ I te mea e tiratiratu te Atua a Iehova, te umuumu katoa ra aia kia tiratiratu tona au tavini. (Ephesia 4:24) Ei akatauanga, e mea tika kia tiratiratu te au tangata e tau ei kia akataoongaia ei aronga pakari i te putuputuanga. (Tito 1:8) Eaa te au tika te ka tau ei akakeu i te au tangata o Iehova ra kia tavini tiratiratu iaia ra?

Ariki Anga i te Au Mea i Apiiia

6. Eaa te manako tau no tatou no runga i te au apinga o te Tuatua Tapu ta tatou i apii ana, e eaa ta tatou ka tau kia maara no taua kite ra?

⁶ Ka tau te ngakau akameitaki no te au apinga o te Tuatua Tapu ta tatou i apii ana kia akakeu ia tatou kia tavini tiratiratu ia Iehova. Kua raurau atura a Paulo ia Timoteo: “Kia mou marie ra koe i taau i apii ra, i tei tukuia atu ia koe ra, kua kite oki koe i toou kite i kite ei koe ra; E mei to tamariki anga mairai toou kite i te tuatua tapu i tataia ra, ko te tuatua ïa i pakari ei koe e tae ua atu ki te ora i te akarongo i te Mesia ra ia Iesu.” (2 Timoteo 3:14, 15) Kia maara ra e ko taua kite ra no ko mai i te Atua ra na roto mai i “te tavini akono meitaki e te pakari.”​—Mataio 24:45-47.

7. Eaa te manako ngakau tika no te aronga pakari no te kaikai vaerua tei orongaia maira e te Atua na roto i te tavini akono meitaki?

⁷ E mea tau oki kia maata te ariki anga a te aronga pakari akataoongaia ra i te kaikai vaerua no te akamaroiroianga te orongaia maira e te Atua na roto i te tavini akono meitaki. I te au mataiti i topa e tokoiti etai o te aronga pakari tei ngere i te reira ariki anga. Kua akakite maira tetai kite e ko taua au tangata ra “kua akaapa i te au atikara i roto i Te Punanga Tiaki, kare i anoano kia ariki i te reira ei . . . ara aerenga mai no te tuatua mou a te Atua ra, kua rave tamou i te tataanga kia riro atu etai ke ra ki ta ratou manako anga.” Inara, kare te aronga pakari tiratiratu e tamata kia akariro ia etai ke ra kia kopae ke i tetai ua atu kaikai vaerua na te Atua ra i oronga mai na roto i te tavini akono meitaki.

8. Ka peea me kare tatou e ariki tikai i etai tumu no te Tuatua Tapu tei orongaia maira e te tavini akono meitaki e te pakari?

⁸ Ei Au Kite akatapuia no Iehova, ka tau rai tatou kia tiratiratu kiaia e ki tana akaaerenga. Auraka roa tatou e manako i te tapae keanga mei te marama umere a te Atua ra e kia aru atu i tetai mataara akaruke i te akonoanga mou te ka taki atu ki te mate i te pae vaerua i teianei e te openga ki te akapouanga. (Ieremia 17:13) Inara ka peea me e ngata no tatou kia ariki i etai tumu Tuatua Tapu tei orongaia maira e te tavini akono meitaki? E akatika taakaaka ua tatou i reira e no ea mai tatou i kite ei i te tuatua mou ra e ka pure ei no te pakari kia akono atu i teia timata anga tae roa ki tona openga ma etai akataka anga mai i te au tumu i tataia.​—Iakobo 1:5-8.

E Ariki i te Taeake Anga Kerititiano

9. Akapeea ta 1 Ioane 1:3-6 akaari mai anga e ka tau te vaerua pirianga oa no te au Kerititiano ra?

⁹ Na te ariki anga manako ngakau no te vaerua o te pirianga oa te vaira i roto i to tatou taeakeanga Kerititiano e akatupu i tetai atu mana akakeu anga kia tavini tiratiratu atu ia Iehova. Ko te tika, kare e maroiroi i te pae vaerua to tatou pirianga ma te Atua ra e Karaiti katoa me kare te reira vaerua ia tatou. Kua tuatua te apotetoro ko Ioane ki te au Kerititiano akatainuia ra: “Ta matou i akara, e ta matou i akarongo ra, ko ta matou ïa e akakite atu kia kotou na, kia tau [“kapiti,” Diaglott] katoa mai kotou kia matou nei, e tei te Metua mou ra to matou tau anga, e tei tana Tamaiti, tei ia Iesu Mesia ra. . . . Kia karanga tatou e, te tau nei tatou iaia, aere uaʼi tatou na te poiri, kua pikikaa tatou, e kare i akono i te tuatua-mou.” (1 Ioane 1:3-6) Te mana nei teia kaveinga ki te au Kerititiano ravarai, me no te rangi to ratou manakonakoanga e me no te enua oki.

10. Noatu rai i rave anga ngata no Euodia raua ko Sunetuke i te akakore atu i to raua pekapeka tei manakoia ra, i akapeea to Paulo ra manako no eia nga vaine?

¹⁰ Te umuumuia ra te tautaanga kia tamou marie i te vaerua no te pirianga oa. Ei akatauanga, kua kite nga vaine Kerititiano ko Euodia raua ko Sunetuke i te tu ngata kia akakore i tetai manamanata i rotopu ia raua. E no reira kua akamaroiroi atura a Paulo ia raua “kia okotai rai o raua ngakau i te Atu nei.” Kua tuatua katoa aia: “E tuatua katoa taku ia koe, e taku oa mou, e turu atu koe i nga vaine i rave katoa i te angaanga a te evangelia nei, ko Kalemeno, e tetai papaki oa rave angaanga noku ra, ko tei tataia to ratou ingoa ki roto i te buka ora ra.” (Philipi 4:2, 3) Kua rave kapiti eia nga vaine akono i te Atua ra i te pae ia Paulo e etai katoa ra “i te evangelia nei” e kua papu iaia e ko raua etai i rotopu i te aronga “tei tataia to ratou ingoa ki roto i te buka ora ra.”

11. Me ka aravei atu tetai Kerititiano tiratiratu i tetai manamanata i te pae vaerua, eaa te mea tau kia tamouia ki te manako ra?

¹¹ Kare te au Kerititiano e mou i tetai akairo ei akaari e eaa ta ratou i akataoongaia kia rave i roto i te akaaerenga a Iehova e akapeea ta ratou ra tavini anga tiratiratu iaia. Me e pekapeka to ratou i te pae vaerua, mei teaa ra te aroa kore kia manako kore ua i to ratou au mataiti i tavini tiratiratu ei ia Iehova ra! I te akaraanga, ko tei karangaia ra e “oa mou” e taeake tiratiratu tei inangaro ra i te tauturu ia etai ke ra. Me ko koe tetai e tangata pakari, e “oa mou” ainei koe, tei papa ra i te tauturu na roto i te tu tangi? E akamanako tatou ravarai i te meitaki tei raveia e to au oa akarongo ra, mei ta te Atua e rave ra, e ka tauturu aroa atu ia ratou kia rauka ta ratou au apainga.​—Galatia 6:2; Ebera 6:10.

Kare e Ngai Ke kia Aere

12. I te akariro anga ta Iesu ra au tuatua kia ‘oki atu tana au pipi e manganui ki te au apinga tei akarukeia ra ki muri,’ eaa te turanga ta Petero i rave?

¹² Ka akakeuia tatou kia tavini tiratiratu atu ia Iehova ma tana akaaerenga me ka maara tatou e kare e ngai ke kia aere no te ora mutu kore. I te akariro anga ta Iesu ra au tuatua kia ‘oki atu tana au pipi e manganui ki te au apinga i akarukeia ra ki muri,’ kua ui atura aia ki tana au apotetoro: “Ka aere katoa ainei kotou?” Kua karanga atura a Petero: “E te Atu, ka aere atu matou kiaai? Tei ia koe na te au tuatua no te ora mutu kore; e kua irinaki matou e kua kitea mai e ko koe Tei Tapu a te Atua ra.”​—Ioane 6:66-69, NW.

13, 14. (a) Eaa ra te akonoanga ngati Iuda o te anere mataiti mua ra i ngere ei i te akaperepere anga a te atua? (e) Eaa ta tetai Kite no Iehova no te tuatau roa ra i tuatua no runga i te Atua akaaerenga akara mataia ra?

¹³ Kare i kitea “te au tuatua no te ora mutu kore” i roto i te akonoanga ngati Iuda i te anere mataiti mua o te T.N. Ko tana ara maata ko te kopae anga ia Iesu ei te Mesia ra. Kare te akonoanga ngati Iuda ra i akatumu takiriia i tona au tu katoa ki runga i te Au Tuatua Tapu Epera ra. Kare te au Sadukea i irinaki e te vaira te au angera e kare katoa oki i irinaki e akatuakaouanga tetai. E Noatu rai kare te au Pharisea i akatika i ta ratou i te reira au tu, kua akariro apa ua ratou i te Tuatua a te Atua ei puapinga kore no ta ratou au peu tau kore i te tuatua tapu ra. (Mataio 15:1-11; Angaanga 23:6-9) Kua akatuikaa teianei au peu i te au ngati Iuda ra e kua akariro kia ngata no te aronga e manganui kia ariki ia Iesu Karaiti. (Kolosa 2:8) No tona maroiroi i te rave i ‘te au peu a tona ai tupuna ra’ kua rave a Saula (Paulo) i te takinga kino pakari i te au pipi a Karaiti no tona kite kore.​—Galatia 1:13, 14, 23.

¹⁴ Kua ngere te akonoanga ngati Iuda i te akaperepere a te Atua ra, inara kua akameitaki a Iehova i te akaaerenga o te au pipi a tana Tamaiti ra—‘ei aronga tangata maroiroi no te au angaanga memeitaki ra.’ (Tito 2:14) Te vai nei te reira akaaerenga, e no runga i te reira kua tuatua maira tetai Kite kua roa no Iehova e: “Me e apinga tetai tei puapinga maata kiaku nei, ko te piri vaitata anga ia ki ta Iehova ra akaaerenga akara mataia. Kua apii mai toku kiteanga mua iaku nei i te tau kore o te irinaki anga i te manako tangata. I te akapapu anga toku manako i te reira tumu, kua akatinamou au i toku manako kia piri tau atu ki te akaaerenga akono meitaki ra. Akapeea atu oki e raukai i tetai ta Iehova akaperepereanga e tana akameitakianga?” Kare atu e ngai ke no te aere kia rauka te akaperepere na te Atua e te ora mutu kore oki.

15. Eaa i tau ei kia taokotai atu ma te akaaerenga akara mataia a Iehova ra e ma te aronga katoa oki e rave ra i te apainga i roto i reira?

¹⁵ Ka tau to tatou au ngakau kia akakeu ia tatou kia taokotai atu ma te akaaerenga a Iehova no te mea te kite ra tatou e ko te reira anake ua te aratakiia ra e tona vaerua e te akakitekite ra i tona ingoa e tana au akakoroanga katoa oki. Inara, ko te aronga te rave ra i te au apainga i reira e aronga apa ua ratou. (Roma 5:12) Inara “kua tupu akera te riri o Iehova ia raua” ia Aarona raua ko Miriama i to raua akaapa anga ia Mose e kua akangaropoina e koia, kare ko raua, tei orongaia atura ta te Atua ra apainga. (Numero 12:7-9) I teia tuatau nei, te taokotai ra te au Kerititiano tiratiratu “i to [ratou] au arataki” no te mea ko te reira ta Iehova e anoano ra. (Ebera 13:7, 17) Ko te akakite anga i to tatou tiratiratu te kapiti ra i te aere anga putuputu ki te au uipaanga Kerititiano e te pauanga i te au uianga e “akamaroiroi atu ei kia maata te aroa, e i te angaanga memeitaki ra.”​—Ebera 10:24, 25.

E Rave i te Tamaata Anga

16. Na te anoano kia rave i teaa no etai ke ra te ka tau kia akakeu ia tatou kia tavini tiratiratu atu ia Iehova ra?

¹⁶ Ko te anoano kia rave i te tamaata anga ia etai ke ra ka tau katoa kia akakeu ia tatou kia tavini tiratiratu atu ia Iehova ra. Kua tata a Paulo e: “E akaparau anga tei te kite, kareka te aroa, e tamaata ïa.” (1 Korinetia 8:1) I te mea ko tetai tu kite ka akariro kia akaparau tei kite ra, te aite anga o ta Paulo tuatua e te tamaata katoa ra te aroa i te aronga te akaari ra i te reira tu. Te tuatua ra tetai puka na nga Poropeta ko Weiss raua ko English e: “Ko te tangata te rauka ra iaia i te akono i te aroa e mea matauia kia aroa katoaia mai aia ra. Te akono anga kia oronga i te anoano meitaki e te akamanakoanga ki roto i te au tu katoa o te oraanga ra . . . e akatupu anga maata tana ki runga i te tangata te oronga maira i te reira tu manako ngakau e pera katoa oki ki runga i te tangata tei rauka ra iaia te reira e ka apai mai ia i te mareka anga ki nga tua e rua ra.” Na te akaarianga i te aroa, ka tamaata tatou ia etai ke ra e ia tatou uaorai oki, mei tei akakiteia maira i ta Iesu au tuatua ra: “E mea meitaki i te oronga atu i te rave mai.”​—Angaanga 20:35.

17. Akapeea ta te aroa tamaata anga, e eaa ta te reira ka arai kia kore tatou e rave?

¹⁷ Ia 1 Korinetia 8:1 kua taiku a Paulo i te tuatua Ereni a·gaʹpe, te akataka maira i te aroa atingaia. Ka tamaata ia, no te mea e akakoromaki anga roa e te takinga meitaki, e akakoromaki i te au mea katoa, kare ua e kore. Ka takore atu teia aroa i te au manako ngakau akakino, mei te akaparau e te vareae ra. (1 Korinetia 13:4-8) Na te reira e arai ia tatou kia kore e akaapa ua i to tatou au taeake, e tu apa ua ra oki to ratou mei ia tatou nei rai. Na te reira e arai ia tatou kia kore e riro kia aite atu ki te “au tangata akono kore i te Atua ra” tei “o atura ki roto” i te au Kerititiano mou o te anere mataiti mua ra. Ko te reira au tangata kua “manako kore atu i te au atu e kua tuatua akakino atura i te aronga kaka,” e mea papu kua akakino atu i te aronga akaaere e au Kerititiano akatainuia ra ko ratou tei orongaia ra te tu kaka kia ratou. (Iuda 3, 4, 8, NW) Ei tiratiratu anga kia Iehova, auraka tatou kia tuku ua ki te timata anga kia rave i te apinga mei te reira rai.

E Patoi atu i te Tiaporo

18. Eaa ta Satani ka inangaro kia rave ki to Iehova ra au tangata, inara eaa ka kore ei e rauka iaia i te rave te reira?

¹⁸ Na te kite e te anoano ra a Satani kia akapou i to tatou taokotai anga ei au tangata no te Atua ka tau ia kia akamaata atu i to tatou manako anga kia tavini tiratiratu ia Iehova ra. Ka rekareka a Satani kia takore takiri atu i te au tangata ravarai o te Atua, e i etai tuatau te tamate ra te au tavini o te Tiaporo i runga i te enua nei i te aronga akamori mou ra. Inara kare te Atua e tuku kia takore atu a Satani ia ratou ravarai. Kua mate a Iesu ei “akangere atu iaia nona te mate ra, koia oki te diabolo.” (Ebera 2:14) E maata atu oki i teianei i te kotingaia to Satani ra ngai no te akonoanga i tona mana i tona uriia mai anga mei te rangi i muri ake i to Karaiti riro anga ei Ariki i te 1914 mairai. Ei to Iehova ra tuatau tau, ka akapou atu a Iesu ia Satani ma tana akaaerenga katoa oki.

19. (a) Eaa te akamatakiteanga no runga i te au tautaanga a Satani ta teia makatini i oronga mai i te au mataiti kua topa ki muri? (e) Ei kopae ke i ta Satani au ereere, eaa te tu matakite ta tatou ka rave i te akonoanga i te au oa akarongo ra?

¹⁹ Kua akamatakite mai teia makatini i tetai tuatau e: “Me ka rauka ia Satani te tiaporo ra i te akatupu oripu ua i rotopu i te au tangata o te Atua, ka akatupu katoa oki i te taumaroanga e te tamakianga i rotopu ia ratou uaorai, me kare ka akakite e te akatupu i tetai tu akono noinoi te ka taki atu ki te akapouanga i te aroa no te au taeake ra, ka autu katoa aia i te apukuanga ia ratou.” (Te Punanga Tiaki, Engarani, Me 1, 1921, kapi 134) Auraka tatou e tuku i te Tiaporo kia akapou i to tatou taokotai anga, penei na te akavareanga ia tatou kia tuatua akakino me kare kia tamaki atu tetai i tetai. (Levitiku 19:16) Kia kore rava a Satani e autu ki rungao ia tatou na tetai mataara te ka akariro kia akakino atu tatou uaorai i te aronga te tavini tiratiratu ra ia Iehova me kare kia akariro i te oraanga kia ngata no ratou ra. (Akaaiteia atu kia 2 Korinetia 2:10, 11.) Kareka ra, e akono tatou i ta Petero au tuatua ra: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra i te kimi anga i te tangata e pou iaia: Ko tei patoi atu ïa ma te akarongo turori kore.” (1 Petero 5:8, 9) Na te tu patoi atu ia Satani ma te turori kore, ka rauka ia tatou i te akatinamou i to tatou taokotai anga meitaki ei au tangata no Iehova ra.​—Salamo 133:1-3.

E Irinaki i te Atua ma te Pure

20, 21. Eaa te pirianga o te irinaki anga ma te pure kia Iehova e te tavinianga tiratiratu iaia?

²⁰ Na te irinaki anga i te Atua ma te pure ka tauturu ia tatou kia tamou marie i te tavinianga tiratiratu ia Iehova. Me kite tatou e te pau maira aia i ta tatou au pure, kua akavaitata roa atu tatou kiaia. Kua raurauia mai te irinaki anga ki te Atua ra kia Iehova ma te pure i ta te apotetoro ko Paulo tata anga: “Ko toku ïa anoano i te au tane ra, kia pure i te au ngai katoa ra, ma te apai i te rima viivii kore ki runga, ma te riri kore e te māro kore.” (1 Timoteo 2:8) Ei akatauanga, mei teaa ra te puapinga maata kia irinaki te aronga pakari i te Atua ra ma te pure! Na te reira akakite anga i te tiratiratu kia Iehova i ta ratou uipaanga uriuri anga i te au tumu manako no te putuputuanga ka tauturu ia kia akakore atu i te au maro anga e pera katoa oki te au tupuanga o te riri.

²¹ Na te irinaki anga i te Atua ra ia Iehova e tauturu ia tatou i te akono i te au apainga i tana angaanga ra. Kua rauka i tetai tangata tei tavini tiratiratu ra ia Iehova no etai raungauru mataiti kia tuatua: “Na to tatou ariki anga rekareka i tetai ua atu angaanga tei orongaia mai kia tatou i roto i ta te Atua ra akaaerenga i teianei ao katoa, e to tatou vai tamouanga i ta tatou angaanga, ma te ngaueue kore, ka apai mai i te katakata mareka o te Atua no ta tatou tautaanga pakari. E noatu me e akaraanga meangiti ua te angaanga, e putuputu te riro e me kare te reira e rave meitakiia kare e oti etai atu au angaanga maata i te raveia. E no reira me e taakaaka tatou e te manako tika ra i te akakakaanga i te ingoa o Iehova e eiaa to tatou uaorai, ei reira e papu ei ia tatou e ka vai tamou ra to tatou ‘maroiroi, ngaueue kore, ma te maata te angaanga na Iehova ra.’”​—1 Korinetia 15:58.

22. Eaa te akatupu anga tau no te au akameitakianga e manganui na Iehova ki to tatou tu tiratiratu ra?

²² Inara, noatu eaa ta tatou ka rave i ta Iehova ra angaanga, kare e rauka ia tatou i te tutaki atu no tana i rave mai no tatou. Mei teaa ra to tatou tu tinamou i roto i ta te Atua akaaerenga, koropiniia e te aronga e oa nona ra! (Iakobo 2:23) Kua akameitaki a Iehova ia tatou ma te taokotai anga tei tupu mai no te aroa taeake tei aka oonuia e kare e rauka ia Satani uaorai i te kiriti tumu i te reira. E no reira e akapiri atu tatou ki to tatou Metua tiratiratu i te rangi ra e ka angaanga kapipiti ei ei au tangata nona ra. I teianei, e no te tuatau mutu kore katoa, e tavini tiratiratu tatou ia Iehova.

Akapeea Koe me Pau?

◻ Eaa te aite anga e kia tiratiratu?

◻ Eaa etai au tumu te ka tau kia akakeu ia tatou kia tavini tiratiratu ia Iehova ra?

◻ Eaa ra i tikai kia patoi tatou i te Tiaporo?

◻ Eaa ka raukai i te pure te tauturu mai ia tatou kia riro ei au tavini tiratiratu no Iehova?

[Tutu i te kapi 23]

Kare te au tavini tiratiratu o Iehova e tuku i to ratou Enemi mei te riona rai te tu, koia te Tiaporo, kia tamanata i to ratou taokotai anga