No Tona Akarongo Kua Tamaki Atu Aia

E TORU mataiti i topa ake nei, ko Caridad Bazán Listán, ko tetai o te Au Kite o Iehova i Cádiz, Paniora, kua anoano ngakoikoi aia i tetai vai. Te akatupu ra te au toka kora i te piva e te poitini ra i tona aerenga toto. I tona apaina angaia ki te are maki o te reira ngai, kua akamarama aia i tona turanga tei akatumuia ki runga i te Puka Tapu no te patoianga i te ariki i tetai pamu anga toto. Kua akatika te au taote i te rave i te vai ma te kore e toto. Inara, i mua ua ake ka apainaiaʼi aia ki roto i te pia vavai anga, kua pati te au taote kiaia kia taina i tetai pepa. Te akakite ra te reira e te anoano ra ratou i te akangateitei i tana tuku anga no runga i te toto inara me ka tupu ake tetai tumatetenga, kua inangaro ratou i tana tika anga kia oronga i tetai ua atu rapakau anga te ka anoanoia i te reira taime.

I runga i te are maki i te reira taime ko tetai tangata pakari o te putuputuanga e te tamaiti a Caridad, e Kite katoa, kua akamatakite atu ia Caridad i te au mea ka tupu me tainaia te reira pepa. Ka riro tona ingoa tainaia ei akamana i te au taote kia pamu i te toto i roto i te rave anga i tetai tumatetenga. I te aere anga mai te aronga rapakau i te apai iaia ki roto i te pia vavai anga, kua akamarama atu aia e kare aia e taina i te pepa. Kua akaoki potoia atu aia ki tona pia e kua tukunaia ki raro ake i tetai taomi anga pakari no te taui i tona manako.

I muri ake i te au pukapuka anga maata kua manako ratou i te kapiki i te akavanui o te ture kia rauka i te akakeu iaia, inara kare i rauka ana. Kua akamarama a Caridad e kua manako aia e ka apa aia i mua i te Atua me akatika aia ia ratou kia oronga i te toto kiaia. Kua tuatua aia e i raro ake i te Ture a Mose, me tauatiia tetai vaine, kare aia e manakoia e kua apa me kua patoi aia na te avaanga no te tauturu. (Deuteronomi 22:23-27) “Te kopae ra te au taote i toku au anoano e te tauta ra i te takino i toku akava ngakau,” i nana ei, “no reira ka patoi au mei te mea rai e te tauati ra ratou iaku.”

E manganui te au ora tei topa, i te openga kua akatika te au taote i te vai iaia ma te kore e toto. I roto i te pia vavai anga, kua pati a Caridad no tetai tuatau i te pure kia Iehova. Kua rave aia i te reira, e kua manuia atura te vai.

Inara, i muri mai kua kinokino mai to Caridad turanga, e kua manako te au taote i te kopae i tona au anoano e te maro atu i tetai pamu anga toto ki runga iaia. No reira, kua akapapa tetai taote e tetai neti i te oronga i tetai pamu anga kiaia. Noatu tona turanga apikepike, kua patoi a Caridad ma tona maroiroi katoatoa. Kua rauka katoa iaia i te kakati i te kiri tei na roto maira i reira te toto e aere mai ei. I te openga, kua akama tikai te taote i ta raua e rave ra kua akamutu aia. “Kare e rauka iaku i te na roto atu i teia. Ka tuku au i te au!” i nana ei.

Kua ora mai a Caridad i te tumatetenga e kua meitaki mai ma te kore e au manamanata atu. Kare te nga taote e te au neti i autu kore ana i te umere oonuia no tona akarongo e te mataku kore. Kua tupu pouroa teia i to Caridad 94 mataiti anga.