Te Rekareka ra Ainei Koe i te Apii Naau Uaorai?

KA REKAREKA ua tetai tavini irinaki o te Atua i te oronga i tetai tuatau maata ki te apii anga Puka Tapu nana uaorai. (Salamo 1:1, 2) Inara, te kiteanga i te au maro anga maata no runga i to ratou taime e te maroiroi, e manganui te kite ra i te rave anga ngata no te akapou i tetai ua atu tuatau e te maroiroi i runga i te apii na ratou uaorai ia ratou e inangaro ra.

Inara, e raukaʼi te rave ua atu ei au tavini maroiroi no te Atua, ka anoano ia te katoatoa kia rauka to ratou rekareka e to ratou maroiroi i te akaouia mei tera ra ki tera ra na te kimianga i te au tu ou me kare i etai atu au tu oonu i te tuatua mou o te Tuatua a te Atua. Ko te tuatua mou Puka Tapu tei akakeu oonu ia koe i te au mataiti i topa ra penei kare e akakeu maata ana ia koe i teianei. No reira, e mea meitaki, e te puapinga, kia maani tatou i tetai manako tauta anga e te putuputu kia rauka te marama ou i roto i te tuatua mou kia tamou i te akakeu ia tatou uaorai i te pae vaerua.

Akapeea te au tangata akarongo i taito ra i te maani anga ia ratou uaorai kia ketaketa i te pae vaerua na roto i te apii na ratou uaorai i te Tuatua a te Atua? Akapeea etai au tavini o Iehova i teia tuatau i te maani anga i ta ratou apii kia rekarekaia e pera katoa kia uua? Akapeea ra ratou i te tutakiia anga no to ratou au maroiroi?

Kua Akaou Ratou i to Ratou Maroiroi na Roto i te Apii na Ratou Uaorai

Kua akatupu te Ariki o Iuda ko Iosia i tana oroanga patoi i te itoro ma te maroiroi maata i muri i te tatauangaia ‘te buka ture tikai a Iehova i te rima o Mose ra’ kiaia. Kare e ekoko anga e kare ko te reira te taime mua i tamanako ei aia i teia tuanga o te Tuatua a te Atua; inara na te akarongo anga i te tuatua akakite mei ko mai i te tataanga mua i akakeu iaia i roto i tana tamaki no te akamori anga ma.​—2 Paraleipomeno 34:14-19.

Kua kimi meitaki te peroveta ko Daniela i te ‘te rainga i te au mataiti i te tanea anga o Ierusalema e ope ei’ e to te reira papu anga kare ua e mei ko mai i te puka a Ieremia mari ra mei ko mai i tetai i “te au puka.” I te maata anga o te taime te kapiti maira teia i te au puka mei ia Levitiku (26:34, 35), Isaia (44:26-28), Hosea (14:4-7), e Amosa (9:13-15). Tana i akapapu tikai na roto i tana apii anga pakari o te au puka Puka Tapu i arataki ei i teia tangata akono i te kimi i te Atua na roto i te pure maroiroi anga. Kua pauia tana patianga akatenga ma tetai atu au akakite anga e te akapapu anga no runga i te oire o Ierusalema e pera katoa tona iti tangata.​—Daniela, pene 9.

Kare a Iosia, tei rave “i te mea tika ki mua i te aroaro o Iehova,” e Daniela, koia tetai “mea kua akaperepere maataia” ki mua i te aroaro o te Atua, e tuke ana mei ia tatou i teia tuatau. (2 Ariki 22:2; Daniela 9:23) Kua arataki ta raua uaorai tauta anga ma te akakeu anga tei orongaia ki te apii i te au Tuatua Tapu tei rauka ra i te reira taime ki te maata anga i te pae vaerua e kua tauturu ia raua kia rekareka i tetai pirianga ketaketa ma te Atua. Ka aiteite te reira kia tuatuaia no te manganui o etai au tavini taito o Iehova, mei ia Iepheta, te tata taramo o te are o Asapha, ko Nehemia, e Setephano. Kua oronga pouroa teia aronga i te kite no te apii uaorai ma te mako o te tuanga o te Puka Tapu te rauka ra i to ratou tuatau.​—Akava 11:14-27; Salamo 79, 80; Nehemia 1:8-10; 8:9-12; 13:29-31; Angaanga 6:15–​7:53.

E Akariro i te Angaanga Orometua ei Akakeu Anga

Te maata anga o te au tavini o Iehova i teia tuatau tei tavini ana iaia no etai au mataiti e manganui e akapapa anga ta ratou no te apii na ratou uaorai i te Puka Tapu. Kua kiteaia teia e ratou ei mea puapinga kia vai araara ua e te rave i ta ratou au apainga ei Kerititiano. Noatu rai, e manganui ia ratou kua akatika e kare e ngoie ana i te akaaiteite i te tuatau te akapou ia ra e te maroiroi i rotopu i te apii e tetai atu au mea tau kare e tau kia kopaeia.

Noatu rai, e mea puapinga i te noo araara ua i te pae vaerua na roto i te apii naau uaorai i te tauta pakari anga i te rave i te au anoano i roto i te angaanga orometua Kerititiano i teia angaanga tutu aereanga Patireia i teianei ao e tere ua atura ki mua. Ko te aronga te rekareka ra i te au marama ou e te oonu i roto i te Tuatua a te Atua ka rauka i te aravei atu i te akaaoanga no te akakeuanga i te au tangata. Te tika nei teia me ka akatakaia tetai i te ngai opu anga maata i te mataara o te ravakaianga i te pae vaerua me kare te aruaru ra tetai i roto i te au ngai angaanga putuputuia e te vaira rai te tu tukeke.

E Kai Putuputu i te Tuatua a te Atua

Penei ka oronga atu ta tetai e rave ra i te au manako kia koe e akapeea koe me rekareka ma te maata atu i taau apii akanooia me kare akapeea koe e toou pamiri i te akariro anga kia puapinga ia tikai te tuatau no te apii. I roto i te au mea ta tetai tavini o te Atua kare e inangaro kia ngaropoina koia oki ko te tatau putuputu anga i te Tuatua tikai a te Atua. E manganui kua tuku i tetai akakoro anga kia tatau e toru ki te a au pene o te Puka Tapu i te epetoma tataki tai. Te inangaro ra ainei koe i te tatau i te katoaanga o te Puka Tapu i roto i te mataiti okotai? I reira ka mataora koe i te akapou i tetai atu taime i te tatauanga i te reira, penei e apa ora i te ra okotai.

Kua tatau ana ainei koe i te Puka Tapu e maata atu i te taime okotai? Eaa i kore ei e akanoo i tetai akakoro anga ou a tetai taime? Ei tauianga, kua tatau tetai vaine Kerititiano i te au puka Puka Tapu kia tau ki te akapapaanga i tataiaʼi ratou. Kua opuia eia te au tuatua e manganui, tei akatumuia i runga i te papaanga ngai i aere mai ei, tana i kore i kite i mua ana. Kua tatau ana tetai vaine Kerititiano i te Puka Tapu mei tetai kapi ki tetai kapi e rima au taime tere atu i te rima mataiti i topa, i te au taime takitai mei tetai akara anga manako tukeke. Te taime mua, kua tatau aia mei ia Genese kia Apokalupo. I te tuatau o te rua o te tatauanga, kua tata poto ua aia i te papaanga o te pene tataki tai i roto i te tai me kare e rua raini i roto i tetai puka tata. Mei te toru o te mataiti e tere atura, kua taui aia ki tetai tataanga akapapaanga maatamaata, te mea mua na te ikinga i te akara i te au irava i te pae mai e oti te oronga anga i te akaraanga matatio ki te tata i raro ake e pera katoa ki te tuatua akakite o te apenetiki. Te rima o te taime, kua taangaanga aia i te au mapu o te Puka Tapu ei akamaata i te marama mei te akaraanga ngai enua. Kua tuatua aia e: “Kia aku, kua riro te tatauanga Puka Tapu ei mea rekareka atu i te kai anga i te kai.”

Kua kiteaia e tetai au aronga apii aruaru o te Puka Tapu te puapinga kia rauka tetai kopi o te Puka Tapu tei taangaanga anakeia no ta ratou uaorai apii, i te tataanga poto ua i te pae mai i te au au tuatua reka, te au akatutuanga akakeu i te manako, me kare te au numero o te kapi o tetai au puka ta ratou ka taiku i muri ake. Kua irinaki tetai orometua tamou ei mea rekareka i te openga o te au marama tataki tai i te tata i roto i tana kopi apii i te au manako tuatua ou tana i apii ana i taua marama ra. “I te akara anga ki mua ki teia au ora puapinga nei noku,” i tuatua ei aia, “te tauturu ra iaku kia rauka vave etai atu au akakoro anga no te marama.”

Tetai Au Manako Karape

Te manako ra ainei koe e te ki ra taau akapapaanga i te au mea anoanoia no te ra e te epetoma e te inangaro ra koe i tetai au ravenga no te taangaanga meitaki i toou taime tei kotingaia? Ina, e apai kia koe i taau e anoano ra i te tatau, e e taangaanga meitaki i toou tuatau va. I te kainga me kare i te ngai e apii ua ana koe, te ka rauka maata te akapapa i te au puka e tetai atu au apinga no te apii kia ngoie ua ratou i te itaeia. E maani i toou ngai apii anga kia reka inara auraka e kia reka roa e ka varea koe e te moe. E tuku anga angaanga ainei taau? E tatau i te au tuatua te rauka ra, i reira e tuku i te au manako kia aere mai kia koe ia koe e akaangaroi ra me kare e rave ra i tetai au angaanga tukeke.

Penei ka taokotai mai tetai kia koe i te taangaanga meitaki anga i te taime no te akapuapinga anga. Ei akatauanga, penei ka tatau maata mai tetai i te au mea ngoie ua te ka marama kia koe ia koe e rave ra i tetai au angaanga me kare te oronga anga i te ti ki toou tangata meitaki e tatau ra. Akapeea me akatika te katoatoa i roto i te are ki tetai taime muteki no te apii nana uaorai? “Eaa taau e rekareka nei i te tatau?” I tetai au taime penei ka rauka ia koe i te kite e eaa ta toou au oa i kite na te akamataanga i tetai pukapuka anga na teia mataara.

Te inangaro ra ainei koe i te oronga atu i tetai au manako ou ki taau porokarama apii? Ka rauka ia koe i te akono i tetai tuatau akakoro anga no te apii i te tu e akono ra te manganui i tetai tuatau akakoro anga no te tuatuaanga i te Puka Tapu ki tetai papaki. Ka akanoo tetai papuritia tamou (painia) i tetai akakoro anga meangiti no te marama no te au ora apii e te rekareka ra iaia e kite ra i tana tiati akakoro anga te ki anga. Te kotinga ra tetai papaki i te taime no te akara tivi e na teia matara te akapapu ra i te taime no te apii. E manganui te iki ra i tetai tumu manako no te apii ta ratou e aruaru ra no etai taime, mei te au ua o te vaerua, te ngai i aere mai ei te au puka Puka Tapu, me kare te tu karape no te apiianga. Te rekareka ra tetai papaki i te maani i tetai au tiati papaanga, mei tetai ra te akari ra i te piri anga i rotopu i te au ariki Iseraela e te au perovetaa me kare te au Angaanga a te au Apotetoro e te au reta a Paulo.

E te au mapu, te inangaro ra ainei koe i te akarongo ketaketa atu? Eaa i koreʼi e mou mai i tetai puka ei apii meitaki i te tuatau o te orote a taau apii ka aru mai? Kua iki tetai tamaine apii teitei i te Mankind’s Search for God, e puka tei neneiia e te Totaiete Punanga Tiaki. Mei tetai pene ki tetai pene, kua maani aia i tetai au tuatua poto ua i roto i tetai puka no tana i apii. E akaaoanga tikai e kua maata atu te taime i pou i tana i manako. Inara, i te pou anga iaia i te katoa anga o te puka, kua umere tikai aia i te tika anga tikai o te tuatua a te Puka Tapu.

E Aruaru Ua Atu i te Apii

E manganui ua atu te au tavini tiratiratu i teia tuatau o Iehova e “maata nei te rave anga i te angaanga a te Atu.” (1 Korinetia 15:58) Noatu ma te akapapa anga taoki ua e te aruaru anga akatenga, ko te mea matauia taau e aru ra i roto i tetai epetoma ua nei penei kare ia e taui maata roa. Inara, te aruaru anga puapinga ki toou tuanga kia rauka tetai marama oonu atu i te tuatau mou e te akono ia koe uaorai kia rotai atu ki te au anoano o Iehova te akatuera ra ia e te maani ra i te tuke.

E akamaroiroianga i te akarongo i te au akameitaki anga o te aronga tei akamako i ta ratou akanoo anga apii. I te kite anga tetai tangata Kerititiano e te ngere ra aia i te tu manako papu tikai ki tana kimianga i tetai marama oonu o te tuatua mou, kua akapapa i tona oraanga kia rauka iaia i te oronga i te maata anga o tona au tuatau va ki te apii nana uaorai. “Kua apai mai i te rekareka anga kiaku tei kore au i kite ana i mua ana,” i tuatuaʼi aia. “Ma te tupuanga i te irinaki i roto i te tata tu-Atua o te Puka Tapu, kua kite au e ka rauka iaku i te tuatua ki etai ke no runga i toku akarongo ma te oraora. Te manako nei au e kua ngakiia au, te meitaki ra i te pae vaerua, e te merengo ra i te openga o te au ra takitai.”

Kua akataka mai tetai akaaere tutaka o te Au Kite o Iehova, tei atoro ana i te au putuputuanga e manganui, no etai atu puapinga na teia tu: “Ko te aronga te maroiroi ra i te apii na ratou uaorai te mea matauia te oraora ra e te ketaketa ra i roto i ta ratou au akakite anga. Te piri ua ra ratou ma tetai papaki e kare ratou e tapae ngoie uaia ana e te au manako papu kore mei tetai papaki. I roto i te angaanga orometua, te akatanotano ra ratou e te araara katoa ra ki te au mea tei anoanoia e te tangata ta ratou e aravei ra.”

Kua kapiti mai aia i tetai tuatua, penei ka inangaro tetai papaki i te akamanako atu ia ratou e akara matatio ra i ta ratou uaorai akanoo anga apii. “Iko i te au uipaanga no te au uriuri anga i runga i te Tuatua Tapu, e manganui te tatau ra i ta ratou pauanga mei roto mai i te kapi neneiia. Ka puapinga maataia atu ratou me manakonako ratou e akapeea te tuatua i te pirianga ki ta ratou i apii i mua ana me kare ki to ratou uaorai oraanga.” Toou manako e ka rauka ia koe i te akamako i roto i teia tu?

I muri ake e tere atu i te 90 mataiti o te oraanga kare te peroveta ko Daniela i manako e kua rava tona marama no runga i te au arataa o Iehova. I roto i tona au mataiti openga ra, kua pati aia no tetai mea kare i opu meitaki ravaia ana e ia: “E te Atu, eaa ra te openga i teianei au mea?” (Daniela 12:8) Kare e ekokoanga na teia aruaru anga taui kore i te apii maata atu i te tuatua mou a te Atua ko te taviri ia ki tona tiratiratu meitaki tikai i roto i te au tupuanga o tona oraanga.​—Daniela 7:8, 16, 19, 20.

E apainga aiteite katoa te pakari ta te au tavini o Iehova kia tu ngaueue kore ei Au Kite Nona. Kia aruaru i te apii i te akono ia koe uaorai kia ketaketa i te pae vaerua. E tauta i te kapiti e tai me kare e rua au mea ou ki taau akapapa anga apii naau uaorai i te epetoma, i te marama, me kare i te mataiti. E akara e akapeaa te Atua i te akameitaki anga i etai ua atu tauta anga meangiti taau e rave ra. Ae, e rekareka i taau apii Puka Tapu naau uaorai e te au tupuanga ta te reira e apai maira.​—Salamo 107:43.

[Au Tataanga Rikiriki i Raro]