Ta te Au Mea Ora “Pakari” ka Apii Mai ia Tatou

TE RAVENGA akaanuanu anga, te ravenga kia kore e akatoka, te ravenga akapae anga i te miti mei te vai, e te ravenga tangi anga e au kimikimi anga tei kite maataia mai e te tangata i te 20 anere mataiti. Inara, kua tupu te reira i roto i te au animara e au tauatini mataiti i mua ana. Ae, ka puapinga te tangata nei na te apiianga i teia au mea ora ma te “pakari.” (Maseli 30:24-28; Iobu 12:7-9) Te akara anga, kua riro mai tetai au animara ei apii tuatua kore i te tangata nei, e ka kite tatou i te reka maata i roto i te akara matatio anga ia ratou.

Ka puapinga ainei tatou mei te uriuri manako anga i te au tu o tetai au animara? I na, kua akaaite a Iesu Karaiti i tana au pipi ki te au mamoe, te au ovi, te au kukupa, pera katoa te au tapaki. Eaa tana i manako i tona akaaite anga i tana au pipi ki teia au mea ora? Ka akara ana tatou.

“Ka Akarongo Mai Taku Mamoe i Toku Reo”

Te taikuia ra te au mamoe i roto i te Pipiria e tere atu i te 200 taime. Mei ta Smith’s Bible Dictionary e akataka ra, i “te mamoe ei akairo no te tu maru, te akakoromaki, e te kauraro.” Ia Isaia pene 53, kia tau ki te totou kua akaaiteia a Iesu uaorai ki tetai mamoe. Mei teaa atura i te mea tau i reira kia akaaite aia i tana au pipi ki taua animara rai! Inara ko teea au tu tikai o te mamoe ta Iesu i manako ra?

‘Ka akarongo mai taku mamoe i toku reo, kua kite oki au ia ratou, e ka aru mai oki ratou iaku,’ i na Iesu ei. (Ioane 10:27) I reira kua akakite mai aia i te tu maru o tana au pipi e to ratou tu aruaru i te aru iaia. E akarongo ana te au mamoe tikai i to ratou tiaki e ka aru puareinga ua iaia. Pera katoa te tiaki e pirianga vaitata tona ki tana anana.

Penei ka totoa tetai anana i roto i tetai ngai ngangaere e ngaungau aere ra, inara ka noo ua tetai mamoe ma te pupu katoa ra. No reira, me kite te au animara i te tinamou kore me kore e manga matakutaku, “ka rauka viviki ua ia ratou i te akaputuputu ki te ngai okotai,” i akakite ei te puka Alles für das Schaf (Te Au Mea Ravarai no te Mamoe). Me ora atu te au mamoe mei te tumatetenga ra, ka rave ratou i te reira ma te anana okotai, te tapuanga i tetai au taime no te akara akaou i te turanga. “Te oro tapupu anga ka tuku taime ratou no te au pepe mamoe e te au animara paruparu kia aru mai. Pera katoa ka oronga te anana i te paruru anga takake kia ratou.” Eaa ta tatou ka apii mai mei teia tu ra?

Kare te au Kerititiano mou o teia tuatau e totoa ana i rotopu i te au tuanga e te au akapupu anga o Kerititome. Mari ra, te akaputuputuia ra ratou ki roto i te anana okotai. Te kite ra te Kerititiano takitai i tetai pirianga uaorai ki teia anana a te Atua, e te akatupu atura teia ki te taokotai anga o te akaaerenga a te Au Kite o Iehova. Me ka tupu ake tetai tumatetenga​—noatu e maki anga pakari te reira, e tamaki anga, me kore e tumatetenga anga natura—​ka kimi te tangata akamori takitai i te arataki anga e te paruru anga kiea? I roto i te akaaerenga a Iehova, tei oronga mai i te tinamou i te pae vaerua.

Akapeea e rauka mai ei te ako anga Pipiria? Na roto i te au makatini mei Te Punanga Tiaki e tona tokorua tianara, te Awake! Ka oronga mai teia au makatini e te au uipaanga Kerititiano i te tauturu takake ki te aronga tei anoano ra i te akono anga maata atu, mei te au pepe mamoe e te au mamoe paruparu ra i roto i tetai anana. Ei akaraanga, ka orongaia te tauturu ki te au metua takaua e te aronga te mamae ra i te tu taitaia. Mei teaa atura i te pakari, i reira, no te tatau i te makatini takitai, kia aere ki te au uipaanga ravarai a te putuputuanga, e kia taangaanga i ta tatou e apii ra! I reira te akaari ra tatou i te tu maru e tetai pirianga ketaketa ki te anana a te Atua.​—1 Petero 5:2.

‘Kia Pakari Mei te Ovi, e te Apa Kore Mei te Kukupa Ra’

Te akakite ra ta Smith’s Bible Dictionary e: “I te Itinga katoatoa kua taangaangaia te ovi ei akairo o te kaveinga kikino ra, o te vaerua akarongo kore ra.” I tetai tua, “taku kukupa” e tuatua akaperepere te reira. (Imene a Solomona 5:2) Eaa ta Iesu i manako, i reira, i tona akamaroiroi anga i tana au pipi ‘kia pakari mei te ovi, e te apa kore mei te kukupa ra’?​—Mataio 10:16.

Te oronga ra a Iesu i te au ikuiku anga no te tutu aereanga e te apiianga. Ka tapapa atu tana au pipi i tetai ariki anga tukeke. E meangiti ua te ka akaari mai e te inangaro ra, inara ka patoi tetai atu i te tuatua meitaki. Pera katoa ka takinokino etai pae i teia au tavini mou o te Atua. (Mataio 10:17-23) Akapeea te au pipi i te ariu anga atu ki te takinokino anga?

I roto i te Das Evangelium des Matthäus (Te Evangeria a Mataio), kua karanga a Fritz Rienecker no runga ia Mataio 10:16: “Te tu kikite . . . kia kapitiia te reira ma te tu tika, te ngakau tae, e te tu titika, te openga e tupu mai tetai mea te ka oronga ki te au enemi te tumu tau no te akaapa. Tei rotopu te au komono o Iesu i te aronga patoi kino ra, tei akaari ra i te tu manako kore e tei tamaki ra i te au apotetoro ma te tu akaroa kore ma te kore tetai ua atu tuatau. No reira, e mea anoanoia​—mei tetai ovi ra—​kia akono i tetai mata matakite i te aronga patoi, e kia akarakara i te turanga ma te au mata e te au tu matakite ra; kia akatere i te turanga ma te kore te tu kanga me kore te akavare, kia ma e te tika tikai i te tuatua e te angaanga i reira ratou uaorai e riro ei mei te kukupa rai.”

Eaa te ka rauka i te au tavini o te Atua i teia tuatau i te apii mai mei te au tuatua a Iesu tei kitea ia Mataio 10:16? I teia tuatau, te aite ra to te au tangata ariu anga mai ki te tuatua meitaki mei to te aronga i te anere mataiti mua rai. Me aroia e te takinokino anga, ka anoano te au Kerititiano mou i te kapiti i te tu kikite pakari o te ovi ki te tu ma o te kukupa. Kare rava te au Kerititiano e rave i te tu akavare me kore te tu tika kore inara e kino kore ratou, e ngakau tae, e te tiratiratu i te akakiteanga i te tuatua Patireia ki tetai atu.

Ei akatutu anga: Te au oa i te ngai angaanga, te au mapu ou i te apii, me kore pera katoa te au mema o toou uaorai pamiri penei ka rave ratou i te au tuatua akakino e te mamae no runga i taau au irinaki anga ei Kite no Iehova. Penei ko te tu viviki no te ariu atu kia pera atu rai tatou na te akakino anga atu i to ratou akarongo. Inara e apa kore ainei te reira? Kare roa. Me akaari koe ki toou aronga akaapa e kare ta ratou au tuatua i akatuke ana i toou tu maru, penei ka taui mai ratou ki te meitaki. I reira kua riro mai koe ei tangata kikite pakari e te apa kore​—te ‘pakari mei te ovi, e te apa kore mei te kukupa ra.’

‘Te Au Tāpaki, Mei te Oroenua ïa i Akamaneaia no te Tamaki Ra’

Kua ripoti te makatini GEO i te 1784 e, kua u a Aperika Apatonga i “te urupu [tapaki] maatamaata rava atu tei retitaia i roto i te tuatua enua papaia.” Kua tapoki te urupu i tetai 5,200 koea kiro mita ngai, koia oki e rima taime te maata o Ongo Konga. Te karanga ra ta Smith’s Bible Dictionary no te au tapaki e “e rave ana i te au takino anga kino rava ki runga i te aua kai i te au enua ta te reira ka aere.”

I roto i tana akakite anga o te au mea tei orongaia mai e te Atua te ka tupu i te tuatau o “te rā o te Atu ra,” kua taangaanga a Iesu i tetai orama o tetai urupu tapaki. No runga ia ratou kua karangaia e: “E te tu o taua au tāpaki ra, mei te oroenua ïa i akamaneaia no te tamaki ra.” (Apokalupo 1:1, 10; 9:3-7) Eaa te aite anga o teia rave anga akairo?

Kua marama takere te Au Kite o Iehova e te akatutu ra te au tapaki o Apokalupo pene 9 i te au tavini akatainuia o te Atua i te enua nei i teia anere mataiti.a Kua tukuia teia au Kerititiano kia rave i tetai angaanga tikai​—kia tutu aere i te tuatua Patireia i te enua katoa e kia apii i te au pipi. (Mataio 24:14; 28:19, 20) Te anoanoia ra ratou kia autu atu i te au manamanata e kia aruaru i ta ratou angaanga. Eaa te mea meitaki atu i te akatutu i teia i te tapaki tapupu koreia?

Noatu e i raro ua ake i te rima teni mita te roa, e rere aere ana te tapaki mei te 100 ki te 200 kiro mita te ra. Te tapaki o te metepara ka tere atu teia i te 1,000 kiro mita. Te akataka ra te GEO i “tona au peau e e tairiiri ana mei te 18 taime i te tekoni okotai e e tere atu i te 17 ora i te ra​—e mea kare rava e rauka i tetai atu manumanu i te rave.” Mei teaa atura i te angaanga maata no teia mea ora meangiti ua!

Ei pupu, te maroiroi ra te Au Kite o Iehova i te akatotoa i te tuatua meitaki o te Patireia. Te tutu aere ra ratou i teianei i roto i te 230 au enua e tere atu. Te autu ra teia au tavini o te Atua i te au manamanata e manganui e raukaʼi i te piri ki roto i te raveanga i te angaanga. Eaa te au tu manamanata ta ratou e aro atura? Tetai ua ra ko te tu iriiri, te au arairai anga ture enua, te maki, te tu akamaroiroi kore, e te patoi anga a te au kopu tangata. Inara kare e mea i rauka ake i te tapu i to ratou tere anga ki mua. Te piri vaitata ra ratou ki ta ratou angaanga tei orongaia mai e te Atua.

E Akaari Ua Rai i te Au Tu Kerititiano

Ae, kua akaaite a Iesu i tana au pipi ki te au mamoe, te au ovi, te au kukupa, e te au tapaki. E mea tau tikai teia no to tatou tuatau. Eaa ra? No te mea te vaitata tika maira te openga o teia akatereanga o te au mea, e te maata ua maira te au manamanata.

Te akamanako anga i ta Iesu au tuatua akatutu anga, ka piri vaitata te au Kerititiano mou ki te anana a te Atua e ka ariki maru i te ako anga mei te akaaerenga a Iehova. Ka tiaki tamou ratou e ka matakite i te au turanga te ka tapupu i ta ratou au angaanga Kerititiano, koi vai meitaki uaʼi ratou i roto i te au mea ravarai. Pera katoa, ka aruaru ratou i te rave i to te Atua anoano noatu te au manamanata ra. E ka tamou ua atu ratou i te apii mei etai au mea ora “pakari” ra.

[Tataanga Rikiriki i Raro]