Eaa Tei Tupu ki te Tu Tika?

E TERE atu i te tai anere mataiti i topa, te oki anga a Barney Barnato ki Engarani no Aperika Tonga mai, e tangata rave angaanga taimana tei tarotokakaia. I tona tae anga kare aia i reka ana i tetai tua nutipepa tei tataia no runga iaia. No reira kua oronga aia i tetai au pepa tata rimaia no te rua o te atikara, “te akatikatikaanga i te au mea,” ma te tieki moni maata.

Kua titiri te etita, ko J. K. Jerome, i te au pepa ki roto i te kete tita e kua akaoki i te tieki. Ma te poitirere, kua viviki a Barnato i te takirua i te tutaki anga. Kua patoi katoaia te reira. “Eia aau ka inangaro?” i ui ei aia. Te maara anga i te tupu anga, kua karanga a Jerome: “Kua akamarama au kiaia e kare te reira e raveia ana​—kare i London nei.” Kare roa tona tu tika ei etita e tau kia okoia.

Te aiteanga o te “tu tika” ko te “tu akono tau ma te tika; te tu akono meitaki.” Ka tau tetai tangata tu tika kia irinakiia. Inara i teia tuatau, te tika kore​—te ngere anga o te tu tika​—te takino ra i te au tu oraanga katoatoa.

I Peritane kua akamaata te ngai akakitekite anga i te tuatua “sleaze” ei akatutu i te kore anga o te tu akono tau ma te tika. Mei ta te nutipepa The Independent i tuatua, te kapi ra te sleaze “i te au mea ravarai mei te au pirianga akainangaro e te ravenga pikikaa a tetai kavamani e aere ua atu ki te au moni akaokiia no te au apinga maata tei akauia.” Te tupu ra te au ngai ravarai o te oraanga.

Te Topaanga o te Au Turanga Tika

E tikai, kare te aiteanga o te tu tika, e kia apa kore, mari ra te akaata ra te reira i tetai tu tumu i roto i tetai tangata. I roto i to tatou ao rave viviki kia apinganui, penei ka kiteaia te tu tika ei tapupu anga, kare ei turanga akono tau. Ei akaraanga, te tupu ua atura ta te aronga apii taangaanga anga i te au apinga ou no te pikikaa i te au tarere, e e ngata tikai teia au apinga ou i te kiteaia. Kua karanga tetai poropeta apii teitei i Peritane e tere atu i te apa o te aronga apii katoatoa i Peritane kua pikikaa, e kare ko Peritane anake ua.

Auraka e akangaropoina i te ka tupu ki te au tangata apa kore me pikikaa te au tangata irinaki koreia e e akavare. Ka akara ana i te akaraanga o te taoni Initia o Bhopal, i te 1984, kua tamate te kati poitini e tere atu i te 2,500 au tangata, vaine, e te tamariki e kua kinokino e au anere o te au tauatini maata atu. Kua ripoti The Sunday Times: “Te au akapapa anga apinga ei tauturu i te au tangata kua taii ki roto i te pikikaa. . . . Te angaanga o te iri anga i te au turanga tau kua akaoripuia e te au tauatini ua atu au koi anga pikikaa tei maroia, te au pepa pikikaa e te au akakite anga pikikaa.” Tei tupu, e tai ngauru mataiti i muri mai i raro ake i te $3,500,000 o tetai $470,000,000 au moni tutaki tei orongaia ki te aronga tei anoano i te tauturu.

Akapeea te akonoanga? Eaa tona turanga i teia tu tika? Ma te maromaroa, te aite atura tona au turanga ki to te ao nei. Ka akara ana i te akaraanga o te epitekopo Katorika Roma ko Eamon Casey, tei aaki ra e e metua tane aia no tetai tamaiti metua kore, i teianei e mapu ou. To Casey turanga, mei ta te nutipepa Guardian Peritane i akakite, e “mea matau uaia.” Tei aite atu ki te reira, kua ripoti The Times: “Te tika no runga i to Epitekopo Casey taakama angaia kare e no tana angaanga tau kore i rave, mari ra na te pikikaa anga i tana tia kia kore e piri ainga e kare ia i te mea ou e kare katoa i te mea tupu meangiti ua.” Te turuanga i teia tauetono anga, kua karanga The Glasgow Herald, o Tekotia, e 2 patene ua au orometua i te Unaite Teite tei kopae i te nga pirianga tane vaine e te tane tane. Me e numero tika teia e me kare, te akakite maira te reira i te tu o te au orometua Katorika i te pae o te tu akono tau.

Me akaraia teia au akaraanga, ka rauka ainei i tetai tangata i te akono i te tu akono tau ma te tika? Ka pauna ainei te taime? Eaa ta te reira ka umuumu, e eaa te au tutaki no te raveanga i te reira?