Ko Iehova, e Atua tei ‘Tika i te Akakore Mai i te Ara’

“Te meitaki ra oki koe, e te Atu e kua tika ia koe i te akakore mai i te ara nei.”​—SALAMO 86:5.

1. Eaa te apainga teiaa ta te Ariki ko Davida i rave, e i akapeea i kiteaʼi e ia te akapumaana no tona ngakau taitaia?

KUA kite te Ariki ko Davida o Iseraela i taito ra i te teiaa o te apainga no tetai akava ngakau apa ra. Kua tata aia: “Kua na runga taku nei ara i toku mimiti: mei te apainga teimaa kare e maranga iaku nei. Kua apikepike au, kua paruparu roa au; te kakaoa ua nei au i te ngarepurepu anga o toku ngakau.” (Salamo 38:4, 8) Inara, kua kitea e Davida te akapumaana anga no tona ngakau taitaia. Kua kite aia e noatu te makitakita ra Iehova i te ara, kare ra aia e makitakita i tei ara ra​—me ka tataraara tikai taua tangata i ara ra e ka kopae ke i tona aerenga rave ara. (Salamo 32:5; 103:3) Ma te akarongo ki katoa i to Iehova ra mareka anga kia oronga i te aroa ua ki te aronga tataraara ra, kua tuatua a Davida: “Te meitaki ra oki koe, e te Atu, e kua tika ia koe i te akakore mai i te ara nei.”​—Salamo 86:5.

2, 3. (a) Me rave ara tatou, penei eaa te apainga teiaa ta tatou ka rave ei tetai tupu anga, e eaa ra teia ka riro ei ei meitaki? (e) Eaa te tu kino te vaira no te riroanga kia “apuku uaia” e te ngakau apa? (ng) Eaa te akapapu anga ta te Pipiria e oronga maira kia tatou no to Iehova mareka anga kia akakore i te ara?

² Me rave ara tatou, penei ka apai katoa tatou i te apainga teiaa akaparuparuanga no tetai akava ngakau mamae ei tupu anga. E mea matauia teianei manako ngakau mii, ei mea puapinga katoa oki. Ka rauka i te reira kia akakeu ia tatou kia rave i te au takainga papu kia akatikatika i to tatou au tarevake ra. Inara, ko tetai papaki Kerititiano, kua riro kia tapokiia e te manako i te apa ra. Penei ka manono to ratou ngakau akaapa ia ratou uaorai e kare te Atua e akakore takiri i ta ratou ara, noatu rai e akapeea to ratou tu tataraara. “E manako ngakau kino rava ia me kia manako koe e penei kare a Iehova e aroa akaou mai ia koe,” ta tetai tuaine i tuatua, i te akaataanga ki runga i tetai tarevake tana i rave. Noatu rai i muri ake i tana tataraara anga e te ariki anga i te ako anga tauturu a te aronga pakari o te putuputuanga ra, kua manako ngakau ua e tau kore aia no ta te Atua ra akakore anga ara. Kua akataka mai aia: “Kare e ra i topa kia kore au e pati ia Iehova no tana akakore anga ara.” Me ka “apuku uaia” tatou na te manako i te apa, penei ka tauta a Satani kia unui tatou ki muri, kia manako ngakau e kare tatou i tau no te tavinianga ia Iehova.​—2 Korinetia 2:5-7, 11.

³ Inara kare te reira i to Iehova ra manako tikai i te au tumu ra! Te akapapu maira tana Tuatua kia tatou e me ka akakite tatou i te tataraara no te ngakau tikai, te mareka ra a Iehova, ae te papa ra, kia akakore i ta tatou ara. (Maseli 28:13) E no reira, me ka akara anga rauka koreia ta te Atua ra akakore anga ara ia koe, penei ko te mea umuumuia ko te kiteanga meitaki e eaa ra e akapeea oki aia i te akakore anga ara.

Eaa ra a Iehova tei ‘Tika i te Akakore Mai i te Ara’?

4. Eaa ta Iehova e manako maira no to tatou tu, e eaa te akatupu anga a teia i te tu o tana akono mai ia tatou?

⁴ Ka tatau tatou: “Mei te itinga o te rā e taka ke i te openga o te rā ra, ko tana ïa akataka ke anga i ta tatou au ara ia tatou nei. Mei te aroa o te metua ki tana ra au tamariki, ko to Iehova ïa aroa ki te aronga i mataku iaia ra.” Eaa ra a Iehova i papaʼi kia akaari i te aroa? Te pau ra te irava aru maira: “Kua kite oki aia i to tatou tu; te manako ra aia e, e one tatou nei.” (Salamo 103:12-14) Ae, kare e ngaropoina ia Iehova e, e au mea ora tatou nei no te one maira, e au tu apikepike to tatou, me kare e au tu paruparu, no te tu apa ua. Ko te takiota tuatua e kua kite oki aia “i to tatou tu” te akamaara maira ia tatou e te akaarite maira te Pipiria ia Iehova ki tetai potera e ko tatou tana au kapu i maani mai.a (Ieremia 18:2-6) Te akono ra tetai potera i tana au apinga karakaraea ma te mou anga ngaueue kore inara ma te maru oki, ma te manako anga i to ratou tu. Mei te reira katoa oki, a Iehova, koia te Potera Maata ra, te akamaru maira i tana ra akonoanga ia tatou kia tau ki to tatou tu apikepike e te ara oki.​—Akaaite ia 2 Korinetia 4:7.

5. Akapeea te akataka anga a te puka ki to Roma ra i te mou anga ririnui o te ara ki runga i to tatou kopapa tu apa ua nei?

⁵ Kua kite a Iehova i te ririnui o te ara. Te akataka maira te au Tuatua Tapu i te ara ei tetai mana ririnui te mou ra i te tangata ki roto i te tu ketaketa. Mei teaa ra ta te ara ra mou anga? I roto i te puka ki to Roma, kua akataka mai te apotetoro akauruia ko Paulo i teia tu na roto i te au tuatua taka meitaki: “Te vai ara ua nei” tatou, mei te au vaeau i raro ake i to ratou rangatira vaeau ra (Roma 3:9); kua “tutara” ia ki rungao i te au tangata mei tetai ariki ra (Roma 5:21, NW); te “vai” nei i roto ia tatou (Roma 7:17, 20); te angaanga tamou ra tana “ture” i roto ia tatou, te tauta ra kia akatere i to tatou aerenga. (Roma 7:23, 25) Mei teaa ra tetai tamaki anga ngata ta tatou kia patoi atu i te mou anga ririnui o te ara ki runga i to tatou kopapa tu apa ua nei!​—Roma 7:21, 24.

6. Akapeea to Iehova manako i te aronga tei kimi ra i tona aroa ma te ngakau tataraara?

⁶ No reira, te kite nei to tatou Atua aroa e kare e rauka ia tatou kia akarongo ma te apa kore ua, noatu akapeea te anoano to tatou ngakau kia oronga i te reira kiaia ra. (1 Ariki 8:46) Te akapapu aroa ua maira aia kia tatou e me kimi tatou i tona aroa metua ma te ngakau tataraara, ka oronga maira aia i te akakoreanga ara. Kua tuatua te tata taramo ko Davida: “Ko ta te Atua atinga ra, ko te ngakau paruparu ïa, ko te ngakau paruparu, e te aue ra, kare ua te Atua e akavaavaa i te reira.” (Salamo 51:17) Kare rava a Iehova e kopae ke, me kare e akaariu ke, i tetai ngakau tei aue ra e tei paruparu oki na te apainga teiaa no te apa. Mei teaa ra te manea ta te reira akataka anga i to Iehova ra papa anga kia akakore i te ara!

7. Eaa tatou ka kore ei e tau kia manako ua atu ki runga i to te Atua ra aroa?

⁷ Inara, te riro ra ainei te aiteanga o teia e ka rauka ia tatou kia manako atu i to te Atua ra aroa na te akariroanga i to tatou tu ara ei tetai kotoe anga kia rave ara? Kare rava ia! Kare a Iehova e aratakiia e te manako ngakau ua. E au kotinga to tona ra aroa. Kare rava aia e akakore i te ara a te aronga rave kino ma te ngakau ketaketa, te ara akakoroia ma te kore e tataraara. (Ebera 10:26-31) I tetai pae, me kite aia i te “ngakau paruparu, e te aue ra,” tei ‘tika iaia i te akakore mai i te ara.’ (Maseli 17:3) E akamanako tatou i etai au tuatua taikuia i te Pipiria ei akataka anga i te oti takiri anga i te tu-Atua te akakore anga ara ra.

Akapeea te Oti Takiri Anga ta Iehova Akakore Anga Ara?

8. Eaa tikai ta Iehova te ka rave, me akakore aia i ta tatou au ara, e eaa te tupu anga tau no teianei ki runga ia tatou?

⁸ Kua tuatua te ariki tataraara ko Davida e: “Kua aaki atura au i taku ara kia koe ra; e kare au i uuna i taku nei apa: i tuatua akera oki au e, E aaki au i taku ara kia Iehova ra; e kua akakore mai koe i te kino o taua ara naku ra.” (Salamo 32:5) Te tuatua “akakore mai” te uri ra i tetai tuatua Epera tona aiteanga tumu tikai kia “tāki ki runga,” “apai, kia apai atu.” Ko te taiku anga i te reira i ko nei te akataka ra e ‘kia apai ke atu i te apa, te ara, te kino.’ No reira mei te mea rai e kua taki ki runga e kua apai ke atu ra Iehova i te au ara a Davida. (Akaaite ia Levitiku 16:20-22.) Kare e ekoko anga e kua akamama mai teia i te manako ngakau apa ta Davida ra i apai aere ana. (Akaaite ia Salamo 32:3.) Ka rauka katoa oki ia tatou te irinaki anga i te Atua tei akakore maira i te au ara a te aronga te kimi ra i tana akakore anga ara na te akatumu anga i to ratou akarongo ki te atinga oko o Iesu Karaiti ra. (Mataio 20:28; akaaite ia Isaia 53:12.) Ko te ara a te aronga ta Iehova tei taki ra ki runga e kua apai ke atu kare e tau kia apai tamou i te apainga teiaa no te manako ngakau apa no te au ara kua topa ra.

9. Eaa te aiteanga o ta Iesu au tuatua: “E akakore mai i ta matou ara”?

⁹ Kua taangaanga a Iesu i te pirianga no te aronga ou e te aronga kaiou ra ei akatutu anga e akapeea ta Iehova ra akakore anga ara. Ei akatauanga, kua raurau mai a Iesu ia tatou kia pure: “E akakore mai i ta matou ara.” (Mataio 6:12) Kua akaaite maira Iesu i te “ara” ki te “kaiou.” (Luka 11:4) Me rave tatou i te ara, kua riro tatou ei “aronga kaiou” kia Iehova. Ko te verepa Ereni tei uriia ra e “akakore mai” te tau ra tona aiteanga “kia tukuia atu, kia akakoreia, tetai kaiou, na te kore anga e pati akaue i te reira.” I tetai tu, me akakore a Iehova i te ara, ka akakore aia i te kaiou te tau ra kia tukuia ki runga i ta tatou pira. E no reira ka pumaana te aronga rave ara tei tataraara ra. Kare rava a Iehova e pati akaue akaou i tetai tutaki anga no te kaiou tana i akakore atura!​—Salamo 32:1, 2; akaaite ia Mataio 18:23-35.

10, 11. (a) Eaa te akatutu anga te akakiteia maira e te takiota tuatua “kia taparaia,” te kitea ra ia Angaanga 3:19? (e) Akapeea te oti takiri o ta Iehova ra akakore anga ara i te akatutuia mai?

¹⁰ Ia Angaanga 3:19, kua taiku te Pipiria i tetai atu tuatua akatutu anga ei akataka i to te Atua ra akakore anga ara: “E teianei, e tataraara kotou, e e ariu mai, kia taparaia ta kotou ara.” Te takiota tuatua “kia taparaia” te uri ra i tetai verepa Ereni e, me tuatua akaariteia, ka tau tona aite anga e “kia takore atu, kia ngaro takiri, kia akakore me kare kia akapouia.” Kia tau ki ta etai aronga apiiia ra, ko te manako akakiteia maira e kia takore takiri atu i te tataanga rima ra. Akapeea teia e raukaʼi? Te inika matauia tei taangaangaia i te tuatau i taito ra kua maaniia no tetai kairo anga tei kapiti ra i te carbon, e kamu, e te vai oki. I muri poto ake i te tataanga ma taua inika ra, ka rauka i tetai tangata kia rave i tetai apinga ngote mauu e ka tama atu ei i taua tataanga ra.

¹¹ Ko te reira tetai akatutu anga manea no te oti takiri anga ta Iehova ra akakore anga i te ara. Me akakore aia i ta tatou ara, mei te mea rai e kua rave aia i tetai apinga ngote e kua tama takiri atu i ta tatou ara. Kare tatou e tau kia mataku e ka mou ra aia i taua au ara ra no tatou i te tuatau ki mua, no te mea te akakite maira te Pipiria i tetai atu apinga no to Iehova ra aroa e mea umere tika tikai: Me akakore aia i te ara, ka akangaropoina aia i te reira!

“Kare Au e Manako Akaou i to Ratou Kino”

12. I ta te Pipiria tuatua anga e kare a Iehova e manako akaou i ta tatou ara, te riro ra ainei te aite anga e kare e rauka iaia kia maara akaou i te reira, e eaa ra ka pau akaperaʼi koe?

¹² Na roto mai i te peroveta ko Ieremia, kua taputou a Iehova no te aronga i roto i te koreromotu ou: “E akakore oki au i ta ratou ara, e kare au e manako akaou i to ratou kino.” (Ieremia 31:34) Te riro ra ainei te aiteanga o teia e me akakore a Iehova i te ara kare e rauka iaia kia maara akaou i taua au ara ra? Kare e tau e ko te reira te tu. Te akakite maira te Pipiria kia tatou i te au ara a te aronga tataki tai e manganui ta Iehova i akakore ra i ta ratou ara, kapiti katoa ia Davida ra. (2 Samuela 11:1-17; 12:1-13) I te akara anga te maara ua ra a Iehova i ta ratou ara i rave, e ka tau katoa oki kia maara tatou. Te tataanga no ta ratou ara, pera katoa oki to ratou tataraara anga e ta te Atua ra akakore anga i taua au ara ra, kua akarukeia mai ei puapinga no tatou. (Roma 15:4) Eaa, i reira, te aite anga o ta te Pipiria i tana tuatua anga e kare a Iehova e “manako akaou” i te au ara a te aronga tana i akakore atura i ta ratou ara?

13. (a) Eaa te kapitiia ra ki te aiteanga o te verepa Epera tei uriia ra “e manako akaou”? (e) I ta Iehova ra tuatua anga e “kare au e manako akaou i to ratou kino,” eaa tana e akapapu maira kia tatou?

¹³ Te verepa Epera tei uriia ra “e manako akaou” e tere atu tona aiteanga i to te maara akaou anga i te au apinga kua topa. Kia tau ki ta te Theological Wordbook of the Old Testament, te kapiti ra ia i “te raveanga tau kia tapiriia ki te reira ra.” No reira i teianei tu, kia “manako” i te ara te kapiti ra i te raveanga i te angaanga tau no te aronga rave ara ra. I to te peroveta ko Hosea ra tuatua anga no to Iseraela tei rave tarevake ra, “E akamaara aia [a Iehova] i to ratou kino,” tera te aite anga o ta te peroveta ra tuatua e ka rave a Iehova i te tutaki anga ia ratou no to ratou kore e tataraara. E no reira, kua tuatua mai te openga o taua irava ra e: “E tutaki mai aia i ta ratou ara.” (Hosea 9:9) I tetai pae, i ta Iehova ra tuatua anga, “E kare au e manako akaou i to ratou kino,” te akapapu maira aia kia tatou e me ka akakore aia i te ara a tetai tei tataraara ra, kare aia e tutaki iaia no tana au ara ra i tetai tuatau ki mua ra. (Ezekiela 18:21, 22) No reira ka akangaropoina aia na te tu e kare aia e akamaaraara akaou mai i ta tatou au ara kia akaapa me kare kia akautunga akaou ia tatou. No reira kua akanoo mai a Iehova i tetai akatauanga meitaki na tatou kia aru i ta tatou akonoanga ma etai ke ra. Me tu mai te au tapepe anga, e mea meitaki eiaa e akamaaraara i te au kino kua topa taau i akatika i mua ana kia akakore atu.

Akapeea te Au Tupu Anga?

14. Eaa te akakore anga ara i kore ei e riro te aite anga e ka atea takiri tei tataraara ra i tana ara e te au tupu anga ravarai no tana raveanga tarevake ra?

¹⁴ Ka riro ainei to Iehova ra papa anga kia akakore i te ara e kare e au tupu anga e rokoia ki tei tataraara no tana raveanga tarevake ra? Kare rava. Kare e rauka kia rave ara tatou ma te kore e kino e tupu mai. Kua tata a Paulo: “Ko ta te tangata e ruru ra, ko tana ra ïa e kokoti.” (Galatia 6:7) Penei ka aro atu tatou i etai au tupu anga no ta tatou au angaanga me kare au manamanata, inara i muri ake i te orongaanga akakore anga ara, kare a Iehova e akariro kia tupu te kino kia tatou. Me tu mai te au taitaia, kare e tau kia manako tetai Kerititiano e, ‘Penei te akautunga ra Iehova iaku no te au ara kua topa ra.’ (Akaaite ia Iakobo 1:13.) I tetai pae, kare a Iehova e akakore atu i te au tupu anga katoatoa no ta tatou au raveanga tarevake ra. Te kopae akaipoipo anga, e te to anga anoano koreia, te au maki no te ainga tau kore, te ngere i te irinakiia mai me kare te akangateitei koreia​—pouroa teianei au mea penei e tupu anga mii no te ara, e kare a Iehova e paruru ia tatou mei te reira. E akamanako ana e noatu ra i akakore aia i ta Davida au ara kia Bate-seba raua ko Uria, kare a Iehova i paruru ia Davida i te au tupu anga kikino tei aru maira.​—2 Samuela 12:9-14.

15, 16. Akapeea te ture tei rekotiia ia Levitiku 6:1-7 i te akapuapinga anga i tei takinga kinoia e pera katoa tei rave ra i te kino?

¹⁵ Penei te vai katoa ra etai atu au tupu anga no ta tatou ara mai. Ei akatauanga, e akamanako i te tataanga i roto ia Levitiku pene 6 ra. Kua akakite mai te Ture a Mose i te turanga tei rave ra tetai tangata i te tarevake kino na te rave keanga i te au apinga a tetai taeake Iseraela ra na te keia anga, te aru, me kare te pikikaa. E i muri iora kua karanga taua tangata ra e kare aia i rave i taua apa ra, tae roa kia taputou pikikaa. Kua patoi atu ta tetai ra tuatua i ta tetai. Inara, i muri akera, kua kinokino te akava ngakau o tei rave ra i te apa e kua aaki i tana ara. E raukaʼi ta te Atua ra akakore anga ara, ka umuumuia kia rave aia e toru atu apinga ke: e akaoki atu i tana i rave ke ra, e tutaki atu i te tangata nana ra te apinga i tetai akautunga e 20 patene, e oronga oki i tetai mamoe toa ei tutakiangaara. I reira, kua tuatua te ture e: “E na te taunga e apai i te tapokiangaara nana ki mua i te aroaro o Iehova; e ka akakoreia tana ara i te au mea katoa tana i rave.”​—Levitiku 6:1-7; akaaite ia Mataio 5:23, 24.

¹⁶ Ko teianei ture e apinga aroa ia no ko mai i te Atua ra. Kua puapingaia tei keiaia ra tana, e kua akaokiia maira tana apinga e kare e ekoko anga kua meitaki mai tona manako ngakau i te akatika anga tei rave tarevake ra i tana ara. I taua tuatau katoa ra oki, kua akapuapingaia e te ture tei akakeuia ra tona akava ngakau kia akatika e kua apa aia e kua akatikatika i tana tarevake. E tika oki, naringa kare aia i akatika kia rave i te reira, kare rava e akakore anga ara nona mei ko mai i te Atua ra.

17. Me mamae ngakau etai ke ra no ta tatou ara i rave, eaa ta Iehova e manako maira ia tatou kia rave?

¹⁷ Noatu ra e kare tatou i raro ake i te Ture a Mose, te oronga maira te reira i te kite anga oonu ki roto i to Iehova ra manako, kapiti katoa oki i tona manakoanga no te akakore anga ara. (Kolosa 2:13, 14) Me mamae ngakau etai ke ra me kare kua takinga kinoia na ta tatou au ara, te mareka ra a Iehova me ka rave tatou i te ka rauka ia tatou kia ‘akatika i te tutaki.’ (2 Korinetia 7:11) Te kapiti ra teia i te akatikaanga e kua ara tatou, te aakianga i ta tatou apa, e te tataraara anga ki tei takinga kinoia ra. Ei reira ka rauka ia tatou kia pati kia Iehova na te akatumu anga ki runga i te atinga o Iesu e kia kite oki i te meitaki no tetai akava ngakau ma e te akapapu anga e kua akakoreia e te Atua ta tatou ara.​—Ebera 10:21, 22.

18. Eaa te ako anga penei ka kapitiia mai ki ta Iehova ra akakore anga ara?

¹⁸ Mei tetai metua aroa ra, penei ka oronga mai a Iehova i te akakore anga ara ma tetai ako anga oki. (Maseli 3:11, 12) Penei ka akakore tetai Kerititiano tataraara i tana angaanga tavinianga ei tetai o te aronga pakari ra, ei tetai tavini orometua, me kare ei tetai painia. Penei ka riro ei mamae ngakau kiaia kia ngere aia no tetai tuatau i taua angaanga tei apinga maata ra kiaia. Inara, kare te aiteanga o taua ako anga ra i te mea e kua ngere aia i ta Iehova ra akaperepere anga me kare e kua arai a Iehova i te akakore anga ara. Kapiti katoa oki, ka tika tatou kia maara e ko te ako anga mei ko mai ia Iehova ra e akapapu anga ia i tona aroa no tatou. Ko te arikianga e te akonoanga i te reira ei meitaki ia no tatou e ka taki atu ki te ora mutu kore.​—Ebera 12:5-11.

19, 20. (a) Me kua rave koe i te au tarevake, eaa koe i kore ei e tau kia manako ngakau e e mamao roa koe kia itaeia e to Iehova ra aroa? (e) Eaa te ka uriuri manakoia i roto i te atikara te aru maira?

¹⁹ Mei teaa ra te pumaanaanga kia kite e te tavini ra tatou i tetai Atua tei ‘tika i te akakore mai i te ara’! E maata atu ta Iehova e kite maira i ta tatou ara ua e te au tarevake ra. (Salamo 130:3, 4) Te kite ra aia eaa tei roto i to tatou ngakau. Me te manako ra koe e kua ati toou ra ngakau e kua paruparu no te au tarevake kua topa, eiaa e manako e kua mamao roa koe kia itaeia e to Iehova ra aroa. Noatu rai eaa taau au tarevake i rave ana, me kua tataraara tikai a koe na, kua rave i te takainga kia akatika i te tarevake, e kua pure akatenga no ta Iehova ra akakore anga ara na te akatumu anga ki runga i to Iesu ra toto akamaringiia, ka rauka ia koe te irinaki anga papu e te tau ra te au tuatua ia 1 Ioane 1:9 kia koe: “Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai.”

²⁰ Te akamaroiroi maira te Pipiria ia tatou kia aru i ta Iehova ra akakore anga ara i ta tatou au akonoanga tetai ma tetai. Inara, eaa te maata te akakore anga ara e te akangaropoina anga te ka rauka kia manakonakoia e tatou me ka ara mai etai ke ra kia tatou? Ka uriuri manakoia teia i te atikara te aru mai nei.

[Tataanga Rikiriki i Raro]

Akapeea Koe me Pau?

◻ Eaa ra a Iehova tei ‘tika i te akakore mai i te ara’?

◻ Akapeea ta te Pipiria akataka anga i te oti takiri anga ta Iehova ra akakore i te ara?

◻ Me akakore a Iehova i te ara, na roto i teea tu tona akangaropoina anga i te reira?

◻ Eaa ta Iehova e manako maira ia tatou kia rave me ka mamae ngakau etai ke ra no ta tatou au ara?

[Tutu i te kapi 12]

Me mamae ngakau etai ke ra no ta tatou au ara, te manako maira Iehova kia rave tatou i te au akatikatika anga