Ta Iehova Akakoreanga Ara​—Te Puapinga Noou

1. Eaa i ngatā ai i te mārama i te akakoreanga ara a te tangata?

“KUA AKAKORE AU I TAAU ARA.” E au tuatua pumaana tikai teia me kua tuatua e kua rave ana koe i tetai apinga tei mamae tetai! Inara, eaa te aiteanga o te tuatua “kua akakore au i taau ara”? Penei te tuatua ra aia e ka vai rai korua ei oa meitaki? Me kore penei kare aia e inangaro i te akamanako akaou i tei tupu, inara kare to korua pirianga i aite mei to mua ana? No reira e ngatā i te mārama i te akakoreanga ara a te tangata.

2. Akapeea te Pipiria te akamārama anga i ta Iehova akakoreanga ara? (Akara katoa i te tataanga rikiriki i raro.)

² E tuke takiri ta Iehova akakoreanga ara ki ta te tangata. Karanga te tata salamo no Iehova: “Tei ia koe ra te akakore i te ara, kia matakuia oki koe ra.”a (Sala. 130:4) Ae, ko ta Iehova akakoreanga ara e mea mou ïa. Koia anake tei akaari mai kia tatou i te aiteanga tikai o te akakoreanga ara. I tetai au atianga, kua taangaanga te au tata Pipiria i te tuatua Epera no te akakoreanga ara kia Iehova anake, e kare ki te tangata.

3. Eaa te tuke i ta Iehova akakoreanga ara ki ta te tangata? (Isaia 55:​6, 7)

³ Me akakore a Iehova i te ara a tetai ke, ka takore takiri aia i te reira. Ka rauka akaou tetai pirianga vaitata kia Iehova. E akameitakianga teia e kua akakore takiri a Iehova i ta tatou ara.—E tatau ia Isaia 55:​6, 7.

4. Akapeea a Iehova me tauturu ia tatou kia mārama i te aiteanga o te akakoreanga ara?

⁴ Me e tuke ta Iehova akakoreanga ara ki ta tatou, akapeea tatou e mārama ai i te reira? Kua taangaanga a Iehova i te au akatutuanga ei tauturu ia tatou kia kite akapeea aia me akakore i te ara. I teia atikara, ka uriuri tatou i teia au akatutuanga. Akaari mai te reira akapeea a Iehova me akakore i ta tatou au ara e akapeea e rauka ai tetai pirianga meitaki kia Iehova. Ka akakeuia tatou kia akaperepere i to tatou Metua aroa e te takinga meitaki tei akakore ua i ta tatou ara.

KA TAKORE A IEHOVA I TE ARA

5. Eaa te ka tupu me akakore a Iehova i ta tatou au ara?

⁵ I roto i te Pipiria, kua akaaiteia te ara ki tetai apainga teiaa. Akakite te Ariki ko Davida no tana ara: “Kua na runga taku nei au ara i toku mimiti: mei te apainga teimaa kare e maranga iaku nei.” (Sala. 38:4) Ka akakore a Iehova i te au ara a te aronga tei tataraara. (Sala. 25:18; 32:5) Ko te aiteanga o te tuatua Epera tei uriia no te akakoreanga ara, koia oki kia apai keia te reira. Me akakore a Iehova i ta tatou ara, ka takore takiri aia i ta tatou apainga teiaa mei te mea atura e te apai ke nei aia i te ara mei ia tatou.

6. Eaa te mamao ka apai ke atu ei a Iehova i ta tatou au ara?

⁶ Ko tetai akatutuanga, ka apai ke atu a Iehova i te ara mei ia tatou. Akakite a Salamo 103:12: “Mei te itinga o te rā e taka ke i te opunga o te rā ra, ko tana ïa akataka ke anga i ta tatou au ara ia tatou nei.” E mamao atu te itinga mei te opunga. Ka vai takake ua raua. Tona aiteanga, ka apai ke atu a Iehova i ta tatou au ara ki tetai ngai mamao tikai. Te akapapu maira te reira e ka takore takiri a Iehova i ta tatou au ara!

7. Akapeea te Pipiria i te akamārama anga i ta Iehova ka rave no ta tatou au ara? (Mika 7:​18, 19)

⁷ Noatu e ka apai ke a Iehova i te ara mei ia tatou, ka tāpu ainei aia i te reira? Kare. Kua tata te Ariki ko Hezekia no Iehova: “Kua akaruke koe i taku au ara katoa nei ki muri mai i to tua.” (Isa. 38:​9, 17) Te akaari maira teia e ka apai ke a Iehova i te ara a te aronga tataraara e ka titiri aia i te reira ki muri iaia. Ko teia tetai urianga ke: “Kua akaruke koe i ta matou au ara mei te mea atura kare te reira i tupu.” Kua taiku katoa te Pipiria i tetai akatutuanga i roto ia Mika 7:​18, 19. (E tatau.) Karanga a Iehova e ka titiri aia i ta tatou au ara ki raro roa i te au ngai oonu o te moana. I te tuatau taito, me topa tetai apinga ki roto i te moana kua ngaro rai te reira.

8. Eaa ta tatou i apii mai?

⁸ Te akataka ra te Pipiria me akakore a Iehova i ta tatou ara, ka takore takiri aia i te reira. Mei ta Davida i karanga, “e ao to ratou, to tei akakoreia, ta ratou ara, to tei tapokiia to ratou kino. E ao to te tangata, kare i tapepeia e Iehova i te ara.” (Roma 4:​7, 8) E akakoreanga ara tikai te reira!

KA TAMĀ A IEHOVA I TE ARA

9. Akapeea te Pipiria me tauturu ia tatou kia mārama i ta Iehova akakoreanga ara?

⁹ Kua taangaanga a Iehova i tetai akatutuanga ei tauturu ia tatou kia mārama i te puapinga o te atinga oko. Ka tamā aia i te ara a te aronga tei tataraara. I roto i te Pipiria, ka tamā e ka orei a Iehova i te au ara. Tei tupu, kua tamāia te tangata ara. (Sala. 51:7; Isa. 4:4; Iere. 33:8) Kua akamārama a Iehova i teia: “Aite ua rai ta kotou au ara ki te mea kutekute ra, e teatea ïa mei te kiona ra; muramura ua rai mei te mea ekoeko ra, e riro ïa mei te uru-mamoe ra te teatea.” (Isa. 1:18) E ngatā i te tamā i tetai kakau to’u. Kua akakite a Iehova i teia akatutuanga ei akapapu kia tatou e me tamā aia i ta tatou au ara kare e kitea akaouia te reira.

10. Akapeea te Pipiria me akamārama i ta Iehova akakore anga i te ara?

¹⁰ Tei taikuia i te atikara i mua ana, kua akaaiteia te au ara ki te “[kai]ou.” (Mata. 18:​32-35) No reira i te au taime ravarai me ara tatou ki mua ia Iehova, mei te mea te maata ua atura ta tatou kaiou. E āka kaiou ka tutakiia. Inara me akakore a Iehova i ta tatou au ara, ka takore takiriia te reira. Kare tatou e anoanoia kia tutaki i te au ara tana i akakore. Mei tetai tangata mataora kua takoreia tana āka kaiou, ka mataora katoa tatou me akakore a Iehova i ta tatou au ara!

11. Eaa te aiteanga me karanga te Pipiria e kua “taparaia” ta tatou au ara? (Angaanga 3:19)

¹¹ Kare a Iehova e takore ua i ta tatou kaiou mari ra ka tangaro e ka tapara aia i te reira. (E tatau ia Angaanga 3:19.) Ei akatutuanga, e akamanako ana i tetai tangata tei tipu i tetai āka kaiou i runga i te pepa. Inara ka kiteaia rai te numero i raro ake. E tuke me taparaia tetai apinga. Kia mārama i teia, i te tuatau taito e taangaangaia ana te inika tei ka’iroia ki te carbon, gum, e te vai. Ka rauka i tetai tangata i te tapara i te au tataanga ki tetai kakau mā’u. No reira, me “taparaia” tetai kaiou, ka ngaro takiriia te reira e kare e kitea te au tataanga. Mei te mea atura e kare e kaiou. E pumaana tikai i te kite e kua tangaro takiri a Iehova i ta tatou au ara!—Sala. 51:9.

12. Eaa ta tatou i apii mai mei te akatutuanga no te tumurangi?

¹² Tetai akaou akatutuanga akapeea a Iehova me tangaro takiri i ta tatou au ara, karanga aia: “Kua akakoreia e au taau au ara mei te tumurangi, e toou au kino mei te tumurangi patapatatue.” (Isa. 44:22) Me akakore a Iehova i ta tatou au ara, mei te mea atura e kua tangaro aia i te reira ki muri i te tumurangi.

13. Eaa to tatou manako me akakore a Iehova i ta tatou au ara?

¹³ Eaa ta teia au akatutuanga e apii maira ia tatou? Me akakore a Iehova i ta tatou au ara, kare te reira e manako akaouia i roto i to tatou oraanga. Na roto i te toto o Iesu Karaiti, kua takore takiriia ta tatou kaiou mei te mea atura e kare tatou i rave ana i te reira. Me tataraara tatou, ko te ravenga teia e akakore ei a Iehova i te ara.

KA ĀRIKI AKAOU A IEHOVA IA TATOU EI AU OA NONA

14. Eaa tatou ka irinaki ei e ka akakore a Iehova i ta tatou ara? (Akara katoa i te au tutu.)

¹⁴ Me akakore a Iehova i ta tatou ara, ka rauka akaou tetai pirianga meitaki kiaia. Ka tauturu te reira ia tatou kia kore e akaapa ia tatou uaorai. Kare a Iehova e akamoupuku ia tatou me kore e akautunga ia tatou. Kare rava aia e rave i te reira. Me karanga a Iehova e kua akakore aia i ta tatou ara, ka irinaki tatou iaia. Kua akakite te peroveta ko Ieremia no Iehova: “E akakore oki au i ta ratou ara, e kare au e manako akaou i to ratou kino.” (Iere. 31:34) Te taikuanga a Paulo i teia au tuatua, karanga aia: “To ratou kino e ta ratou au ara kare rava au e maara akaou atu.” (Ebe. 8:12) Inara, eaa tikai te aiteanga o te reira?

15. Eaa te aiteanga e kare a Iehova e akamaara i ta tatou au ara?

¹⁵ I roto i te Pipiria, ko te tuatua “e akamaara” kare te reira i aite ki tetai tangata e akamanako ra i te au mea tei tupu i mua ana. Mari ra, te ō maira te angaanga ka rave tetai tangata. Ei akaraanga, kua pati te tangata rave kino kia Iesu: “E te Atu, e akamaara mai koe iaku, kia tae koe ki toou basileia.” (Luka 23:​42, 43) Kare aia i pati ia Iesu kia akamanako iaia i te reira taime. Mari ra, kua pau a Iesu e ka akatu aia i te tangata rave kino. No reira me karanga a Iehova e kare aia e akamaara akaou i ta tatou au ara, te aiteanga kare aia e akautunga ia tatou a te tuatau ki mua.

16. Akapeea te Pipiria te akamārama anga i te tu rangatira me akakoreia ta tatou au ara?

¹⁶ Te taangaanga ra te Pipiria i tetai akaou akatutuanga ei tauturu ia tatou kia mārama me akakore a Iehova i ta tatou au ara, ka akarangatiraia tatou. No to tatou tu apa ua, kua akaaiteia tatou mei te au “tavini no te kino.” Inara me akakore a Iehova i ta tatou ara, kua aite tatou mei te au tavini tei ‘matara i te kino.’ (Roma 6:​17, 18; Apo. 1:5) Ae, ko te akakoreanga ara a Iehova, ka akarangatiraia tatou mei te kino.

17. Akapeea te akakoreanga ara me akaora ia tatou? (Isaia 53:5)

¹⁷ E tatau ia Isaia 53:5. Kua akaaite te Pipiria ia tatou mei te aronga maki te ka mate. Inara, na roto i te atinga oko o tana Tamaiti ko Iesu, kua akaora a Iehova ia tatou. (1 Pete. 2:24) Me ara tatou, ka takino te reira i to tatou pirianga kia Iehova. Inara, na roto i te oko ka rauka iaia i te akakore i ta tatou ara e kia piri vaitata akaou tatou kia Iehova. Ka mataora tetai tangata me akaoraia tona maki kino. Ka mataora katoa tatou me akaora a Iehova i to tatou turanga pae vaerua na te akakoreanga i te ara.

TE PUAPINGA O TE AKAKOREANGA ARA A IEHOVA NO TATOU

18. Eaa ta tatou i apii mai mei te au akatutuanga Pipiria me akakore a Iehova i ta tatou ara? (Akara i te pia “Akakore a Iehova i ta Tatou Ara.”)

¹⁸ Eaa ta tatou i apii mei te au akatutuanga i roto i te Pipiria no ta Iehova akakoreanga ara? Me akakore aia i ta tatou ara, ka takore takiriia te reira. Ka rauka ia tatou tetai pirianga meitaki ki to tatou Metua i te rangi. E akamaara, e apinga aroa te akakoreanga ara a Iehova. Te akaari maira aia i tona aroa takinga meitaki ia tatou. Kare te reira tikaanga i orongaia ki te tangata.—Roma 3:24.

19. (a) Eaa ra tatou ka akameitaki ei ia Iehova? (Roma 4:8) (e) Eaa ta tatou ka uriuri i te atikara ka aru mai?

¹⁹ E tatau ia Roma 4:8. Ka akameitaki tatou ia Iehova no te mea kua “akakore [aia] i te ara.” (Sala. 130:4) Inara me inangaro tatou ia Iehova kia akakore i ta tatou ara, ka anoanoia tatou kia rave i tetai angaanga puapinga. Karanga a Iesu: “Kia kore ra kotou e akakore i ta etai ke ra ara, kare katoa oki to kotou Metua i te ao ra e akakore mai i ta kotou ara.” (Mata. 6:​14, 15) No reira, e aru tatou ia Iehova e kia akakore i te ara a tetai ke. Akapeea tatou me rave i te reira? Ka pau mai te atikara ka aru mai i teia uianga.