Te Akaari ra Ainei Koe​—E Akameitaki Anga Toou Uaorai?

I tetai kainga mitinari i Aperika Opunga, i noo ana tetai puakaaoa i reira ko Teddy tona ingoa. me pei atu tetai i te potonga kiko na Teddy, kua apuku viviki ua aia i te reira, kare e tongianga, kare e katikatianga. I te utianga tona ao i raro ake i te ra vera ra, kua tatari atu aia no tetai atu potonga kai kia peiia atu kiaia. I te pouanga te kiko, kua uri ke atura aia e kua aere atu i tona mataara.

Kare ua a Teddy i akakite mai i tetai tuanga akameitaki anga no tana i rauka ra. Kare ra tetai i manako atu kia akapera aia. Koia oki, e puakaaoa ua aia.

NO TE akameitaki ra, e putuputu tatou i te manako kia tere atu to te au tangata i to tatou manako atu i te au manu ra. Te mea matauia ka mareka kore ua tatou. E manganui te au tangata te ka kapo ua mai i te ka rauka ia ratou no teianei oraanga e ka akarakara no etai atu. Kare katoa teianei i te mea poitirere. Kua totou mai te Pipiria e i te tuatau openga, ka kore te akameitaki a te tangata.​—2 Timoteo 3:1, 2.

Inara, e tuke te vaerua o te au tavini o te Atua ra. Ka tauru ratou ki to ratou ngakau i te akoanga a te apotetoro ko Paulo, tei akamaroiroi maira i te au oa akarongo ra: “Kia mareka oki kotou.”​—Kolosa 3:15.

Te Akaari ra Iehova Iaia Uaorai e Akameitaki

Te akanoo ra te Atua ko Iehova i te akatauanga apa kore ua i te akaarianga ariki anga. E akamanako e akapeea tona au manako no tona au tavini tiratiratu. Kua tata a Paulo, ma te akauru anga, ki te au Kerititiano Epera ra: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.”​—Ebera 6:10.

E maata ta Iehova ra akatauanga ariki anga no tona au tavini tiratiratu ra. Kua akameitaki aia ia Aberahama na te akatupuanga kia tini tikai tana au anaunga, e kua riro ratou “mei te etu o te rangi ra, e mei te onetea i taatai ra.” (Genese 22:17) I te ariki anga no to Iobu tiratiratu i raro ake i te timata anga, kare a Iehova i akaora anake i to Iobu ra tu apinganui mari ra kua oronga katoa kia “tataki rua” atu. (Iobu 42:10) Ta Iehova ra au akonoanga i te au tangata katoa i te au tauatini mataiti ra kua akapapu i te tika o te tuatua: “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”​—2 Paraleipomeno 16:9.

To te Atua ra ariki anga e te manako anga kia tutaki i te aronga tei kimi ra kia rave i tona anoano ko etai tuanga maata ia no tona tu. Te kiteanga i teia e apinga maata ia i te akarongo Kerititiano. Kua tata a Paulo: “Kare ra e akarongo ra kare rava aia e mareka: ko te akamori i te Atua ra, kia akarongo aia e koia tei tutaki mai i te aronga i kimi tikai iaia.”​—Ebera 11:6.

Naringa i akakite a Iehova i tetai vaerua riri, e te akaapa ua, ka akaapaia tatou katoatoa. Kua akakite mai te tata taramo i teianei tumu i te tuatau roa kua topa: “Naringa koe, e Iehova, e akairo ana i te au ara nei, e te Atu, koai te ka mou?” (Salamo 130:3) Kare a Iehova i ariki kore e kare oki e akaapa ua. Te akaperepere ra aia i te aronga tavini iaia. Te akakite ra aia e e akameitaki aia uaorai.

Ko Iesu​—Tetai Peretana Ariki Oonu Tikai

I te akaataanga tikai i te au tu o tona Metua i te rangi ra, kua akaari a Iesu Karaiti i tona uaorai akameitaki anga no te au apinga ta etai ke i rave no te akarongo. E akamanako ana i tei tupu i tetai tuatau i te iero i Ierusalema: “Nānā akera [Iesu], kite atura i te aronga apinga nui i te tuku anga mai i ta ratou moni ki roto i te pia apinga. E kite katoa atura aia i tetai vaine takaua apinga kore i te tuku anga i nga lepeta e rua ki roto. Kua karanga atura aia, E tuatua-mou tei taku e karanga atu kia kotou na, E maata ta te vaine takaua apinga kore nei i tuku ki roto, i ta ratou ravarai: No roto oki i te toenga i to ratou apinga maata ta ratou i tuku maira ki roto i te apinga a te Atua: kareka aia nei, kua ope rava tona apinga rikiriki i te tukuia e ia ki roto.”​—Luka 21:1-4.

I te manako anga no te pae i te moni, e meangiti ua taua moni tauturu ra, me ka akaaiteia atu ma ta te aronga apinga nui ra. Te maata anga o te aronga i reira e vaitata kare ua i kite atu iaia. Inara, kua kite atura Iesu i tana vaine takaua ra. Kua kite aia i tona au turanga. Kua akara atu Iesu iaia e kua ariki atu oki iaia ra.

I tetai atu atianga te o maira ko tetai vaine apinga nui, ko Maria. Ia Iesu e noo ra i te pae kaingakai, kua riringi atura aia i tetai manongi kakara oko maata ki runga i nga vaevae e ki runga oki i te upoko o Iesu ra. Kua akaapa tetai papaki i tana i rave ra, i te manakoanga e ka rauka kia okoia taua inu ra e ka oronga atu ei i te moni ei tauturu i te aronga putaua. Akapeea to Iesu manako? Kua tuatua aia: “Vaio atu iaia, eaa kotou i tamanamanata atu ei iaia? e ravenga meitaki tana i rave mai iaku nei. Koia mou taku e karanga atu kia kotou nei, Te au ngai katoa e tuatuaiaʼi teianei evangelia i te ao katoa nei, e tuatua katoaia ta teianei vaine i rave nei, ei manako anga atu iaia.”​—Mareko 14:3-6, 9; Ioane 12:3.

Kare a Iesu i koumuumu akaapa ua e ka tau ua taua inu oko maata ra kia tukuia no tetai atu angaanga. Kua ariki aia i te akakite anga maoraora o to Maria aroa e te akarongo oki. Kua tataia taua atianga ra i te Pipiria ei tetai manako anga no tana angaanga meitaki. Ko teianei au tataanga e etai katoa te akaari ra e e tangata ariki oonu a Iesu ra.

Me ko koe tetai e tavini no te Atua, ka papu ia koe e ko te Atua ko Iehova raua ko Iesu Karaiti te ariki oonu ra i taau au tauta anga kia akatupu i te akamori anga ma. Te akavaitata atura taua kite ra ia tatou kia raua e te akakeu ra ia tatou kia aru ia raua na te akapapuanga e te akameitaki ra tatou uaorai.

To Satani Vaerua Akaapa Ua

I teianei e akamanako tatou i tetai akatauanga no tetai kare ra i akaari iaia uaorai kia akameitaki​—koia Satani te Tiaporo ra. No to Satani ngere i te ariki anga tei orongaia ra ki tana aratakianga i tetai meameaau anga kino i te Atua ra.

No te akono anga i tetai vaerua apa no te reka kore i roto iaia uaorai, kua akamata a Satani i te ruru i te reira ki roto i etai ke atu. E akamanako ana i te au tupuanga i roto i te kainga i Edene ra. Kua angaia e Iehova ra te tangata mua e te vaine oki, e kua tuku ia raua ki roto i tetai kainga parataito, e kua tuatua kia raua: “E kai ua koe i to te au rakau katoa o te kainga nei.” E okotai ua rakau tei tureia. Kua tuatua te Atua: “Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira ka mate ia koe.”​—Genese 2:16, 17.

Inara, kare i roaia, kua akaaoia e Satani to Iehova ra tu ngateitei. I tetai tuanga, kua anoano aia kia akariro ia Eva kia kore e akameitaki ia Iehova e kia akakeuia aia kia meameaau katoa iaia, mei ia Satani uaorai i meameaau ra. “Koia ïa, kua tuatua mai te Atua e, Auraka korua e kai i to te au rakau katoa o te kainga nei?” Ta Satani i ui. (Genese 3:1) Tana akakite anga marama e te tapu ra te Atua i tetai apinga puapinga maata mei ia Eva, tetai apinga te ka akatuera i tona nga mata e ka akariro iaia kia aiteite ki te Atua uaorai ra. Kare e kia akaari i tona uaorai akameitaki anga no te au mea meitaki e manganui ta Iehova ra i tuku ki rungao iaia, kua akamata a Eva i te anoano i te mea tureia ra.​—Genese 3:5, 6.

Te kite meitakiia ra te au tupu anga kikino. Noatu rai e kua orongaia te ingoa ko Eva kiaia “no te mea, ko te metua vaine aia no te tangata ravarai,” i tetai tu kua riro aia ei te metua vaine no te tangata ravarai te mate atura. Mei ia Adamu maira kua akatuangaia te au tangata ravarai i te ara tei akatupu i te mate.​—Genese 3:20; Roma 5:12.

E Aru i te Atua e ia Karaiti Oki

E akamanako i te tuke anga i rotopu ia Satani raua ko Iesu ra. Kua akatakaia a Satani ei “te akaapa i to tatou au taeake . . . , ko tei akaapa ia ratou ki mua i te aroaro o to tatou Atua i te po e te ao.” (Apokalupo 12:10) Kua “tika meitaki rava atu [ia Iesu] kia akaora i te aronga e na reira atu iaia ra i te aere ki te Atua ra, e tika oki aia i te ora anga e tuatau ua atu ei pati i ta ratou.”​—Ebera 7:25.

Te akaapa ra a Satani i te au tavini o te Atua. Te ariki ra Iesu ia ratou e te pati ra no ratou. Ei aronga aru ia Karaiti, ka tau te au Kerititiano kia tauta kia kimi no te meitaki i tetai e tetai ra, i te arikianga e te manako meitakianga tetai i tetai. I te raveanga i te reira, te akaari ra ratou i to ratou uaorai akameitaki anga ki tei akanoo maira i te akatauanga meitaki roa i te arikianga, koia te Atua ra ko Iehova.​—1 Korinetia 11:1.

[Tutu i te kapi 17]

Kua akakite a Iesu i te ariki anga no ta Maria angaanga meitaki ra