Te Au Piri Tu-Atua e ta te Atua Akakoroanga

ME KARE tetai e kite e eaa te reira, e timata anga ia; inara me kite tetai e eaa te reira, kare ia i te timata anga. Eaa te reira? E piri.

I roto i te taiate teitei o teia tuatau, te manako ra te tangata i te piri ei kanga anga na te tamariki, inara i te tuatau taito e “timata anga i te tu pakari,” te piri i tuatuai The Interpreter’s Dictionary of the Bible.​—Akaaite ia Maseli 1:5, 6.

I te mea kare i akakite ua i tona anoano me kare akakoroanga, i tetai taime kua arai akakoro ua a Iehova i tana au tuatua totou, te taangaangaanga i te au akaaite anga, te akariro anga e kia muna te “au tuatua araiia,” me kare te au piri ngata. (Salamo 78:2, King James Version; Numero 12:8, The Emphasized Bible) Ko te tika, koi taangaanga uaia ra te tuatua Epera o te piri e 17 taime i roto i te Pipiria, kua ki tikai te au Tuatua Tapu i te au piri e te au materi.

Maata te Au Piri Pipiria

Kua tuatuaia no te Ariki ko Solomona e kua rauka i te akamatara i te au uianga ngata tikai, me kare te au piri, tei tukunaia mai kiaia. (1 Ariki 10:1, tataanga i raro ake akaaite ia NW.) E tupu anga teia no te tu pakari tei orongaia mai e te Atua. Me e tika anga tetai i roto i te au ripoti a te au tangata tuatua enua taito e kua autu kore a Solomona i tetai timata anga piri ma te Ariki o Hiram o Turia, penei kua tupu teia i muri ake i te ngere anga iaia to Iehova vaerua tei tupu mai i te akaruke anga aia i te akarongo. Ma te aiteite kua akaari katoa te Akava ko Samasona e te reka ra te piri. I tetai atianga, akamaroiroiia e te vaerua tapu, kua oronga tetai piri kiaia i tetai tuatau kia tamataku i te au ngakau o te au enemi o te Atua.​—Akava 14:12-19.

Inara, e manganui te au piri Pipiria, kua o tika atu ma ta Iehova au akakoroanga. Ei akaraanga, ka akamanako ana, ia Genese 3:15. Ko teia totou, tei akanoo i te tango no te tumu tuatua o te Pipiria, e tuatua muna e, e “tuatua ngaro” ia. (Roma 16:25, 26) I te pae mai e kua orongaia te au orama manamana e te au akakite anga, kua kite katoa te apotetoro ko Paulo i tetai au tu o ta te Atua akakoroanga “mei te mea na roto i te io,” me kare i te tuatua tika tikai, te “tuatua uunaia.” (1 Korinetia 13:12; 2 Korinetia 12:1-4) E akapeea te au tamanako anga ope kore no runga i te numero muna o te puaka taae​—“ono anere e ono ngauru e ono”​—tei akakite vivikiia mai e ma te kore te akamarama anga ia Apokalupo 13:18? Ka rauka iaai te akamatara i teia au piri tu-Atua, e eaa to ratou akakoroanga?

Akamataraanga i te Au Tuatua Ngaro

No te manganui ia tatou, ko te akara anga tetai apinga akaperepere roa atu o to tatou tu e rima. Inara ma te kore te marama, vaitata rai ka puapinga kore te akara anga a te tangata. Ka matapo tatou. Pera katoa rai, te manako o te tangata. Ka rauka i te reira i te akaaite i te au tu, taangaanga i tei tau, e i reira i te akamatara anga i te au piri. Inara, e maata atu te apinga tei anoanoia kia akamatara i te au tuatua ngaro. Koi oronga mai ei tetai i te au pau anga ki te au piri tei tukunaia mai i roto i te Pipiria, ka rauka anake i Tei Tata, ko Iehova, te Atua o te marama, te akakite mai i to ratou aiteanga.​—1 Ioane 1:5.

Ma te manuia kore, e tu ngakau parau e te takake to te tangata no te tiaki ki runga ia Iehova no te au pauanga. Kua umere i te mea muna, te vaira te aronga, te kimi ra i te akakeu anga kite kare ra i te tuatua mou, kua kimi i te au pau anga i vao ake i ta te Atua Tuatua. Ei akaraanga, kua manako te aronga ngati Iuda purepure ma tona Cabala i te puapinga purepure o te au numero e te au reta o te ara reta Epera. I tetai tua, kua taangaanga te au Gnostic o te rua anere mataiti, i te au Tuatua Tapu Ereni e te Epera i te tauta anga i te akataka i te au aiteanga muna mei ia ratou.

Inara, kua taki atu ta te reira kimi anga pouroa, ia ratou ki roto i te au peu peikani me kare au purepure e kua mamao ke mei te tuatua mou tu-Atua. ‘No teaa ra, me kua ki te ao i te kino,’ i akamarama ei te aronga Gnostic, ‘ko Tei Anga, ko Yahweh, kare ia i te Atua meitaki.’ Ko teia ainei te taopenga meitaki ka oronga mai ratou? Mei teaa ra te oonu kore i te akamarama anga a te tangata ra! No reira rai te apotetoro ko Paulo, tei tamaki i te au manako akaruke i te akarongo tei akatupuia i muri mai e te au pupu Gnostic, i akamatakite pakari tikai i roto i tana reta: “Auraka kia rai to kotou manako i te tangata nei i tei tataia ra”!​—1 Korinetia 4:6.

Akakiteanga i te “Au Tuatua Araiia”

Inara, eaa ra tetai Atua o te marama ka tuatuai i te “au tuatua araiia”? Te tu tikai o te piri te akaao ra i to tetai manako e te au mana te tau ra. No reira, kua pipiia i roto i te au Tuatua Tapu mei te apinga akareka i roto i tetai kai reka, kua taangaanga ia ratou i etai taime ei akakeu i te inangaro o te aronga akarongo me kare kia akataka meitaki i te tuatua. I teia au atianga, kua orongaia te au akamarama anga i muri mai.​—Ezekiela 17:1-18; Mataio 18:23-35.

Te oronga ua ra a Iehova i te pakari inara kare ma te marikonga kore. (Iakobo 1:5-8) Ka tamanako ana i te puka Maseli, e akaputuputu anga akauruia ma te au tuatua ngata e manganui tei manakoia e etai ei au piri. E marama ei i te reira te anoanoia ra te tuatau e te akamanako anga. Inara e ia tangata ka puareinga no te rave i te reira? Ka rauka ua te pakari i te aronga te inangaro ra i te keri i te reira.​—Maseli 2:1-5.

Kua taangaanga katoa a Iesu i te au akatutu anga no te akamaeu i te tu ngakau o tana aronga akarongo. Kua putuputu mai te urupu tangata takapini iaia. Kua reka ratou i tana au tua. Kua inangaro ratou i tana au temeio. Inara, e ia ia ratou te puareinga ra no te taui i to ratou tu oraanga e ka aru iaia? Mei teaa ra te tuke anga ki ta Iesu au pipi, tei kimi putuputu e kia marama i ta Iesu au apiianga e kua puareinga i te akaruke ia ratou uaorai kia riro mai ei au pipi nana!​—Mataio 13:10-23, 34, 35; 16:24; Ioane 16:25, 29.

Akaraanga ki te Marama

“Te inangaro i te au piri,” i tuatuai tetai tataanga, “te tau ra ki te au tuatau akaara anga i te kite.” I teia tuatau kua akameitaki teiteiia tatou kia ora i roto i tetai taime te “ruruia [ra] te mārama” no te iti tangata o te Atua. (Salamo 97:11; Daniela 12:4, 9) Ka rauka ainei ia tatou i te tapapa marie ia Iehova kia akakite mai i tana au akakoroanga kia tau ki tana papaanga? Tei puapinga maata atu, te rave viviki ra ainei tatou i te taui i to tatou au oraanga me kite tatou e akapeea me taui maata tikai ki to te Atua anoano akakiteia mai? (Salamo 1:1-3; Iakobo 1:22-25) Me pera tatou, ka akameitaki a Iehova i to tatou tu maroiroi, e raukai, mei te titia mata ka akatikatika i te akara anga aveave, i te vaerua tapu i apai mai i te tutu manea o te akakoroanga tu-Atua ma te taka meitaki i roto i to tatou manako, te akakeokeoanga i to tatou akara anga i te pae vaerua.​—1 Korinetia 2:7, 9, 10.

Ae, te akamaata ra te au piri Tuatua Tapu ia Iehova e ko ‘tei akakite mai i te au tuatua ngaro.’ (Daniela 2:28, 29) Pera katoa, koia katoa Tei Kimi ra i te au ngakau. (1 Paraleipomeno 28:9) Kare te reira e akapoitirere ia tatou kia kite e ko te akamaeuanga i te marama o te tuatua mou tu-Atua e tere ua ana ki mua. (Maseli 4:18; Roma 16:25, 26) I te mea e kare e kimi i te kite o te au apinga oonu a te Atua na roto i te angaanga purepure me kare te kite pakari o te tangata, te ka taki ua ki te puapinga kore, e akara irinaki tikai tatou ki te Atua ko Iehova kia pata mai i te mori tuatua mou no runga i tana “au tuatua araiia,” te akakite anga mai i tana au akakoroanga umere ki te au tavini tiratiratu i tona tuatau tau.​—Amosa 3:7; Mataio 24:25-27.

[Akameitakianga no te Tutu i te kapi 26]

Biblia Hebraica Stuttgartensia, Deutsche Bibelgesellschaft Stuttgart