‘E te Atua, e Akakite ua Mai i to Mārama’

“E akakite ua mai i to mārama e te tuatua-mou; e na te reira e arataki iaku nei.”​—SALAMO 43:3.

1. Akapeea ta Iehova ra akakiteanga i tana au akakoroanga?

EAKAMANAKO anga tikai to Iehova i te tu o tana akakite anga kia kitea tana au akakoroanga ki tona au tavini. Kare e na te akakiteanga i te tuatua mou katoa i te tuatau okotai na te akamuraanga akamatapo mai i te marama, te akamarama marie ua maira aia ia tatou. Penei ka tau to tatou aerenga i te arataa o te oraanga kia akaaiteia ki tetai aaere anga a tetai tangata i tetai aerenga roa. Kua akamata aia i te mamaiata e e meangiti ua tana i kite ana. I te akamata anga te ra i te itianga marie mai ki runga i te enua, kua rauka i taua tangata ra i te akataka i etai au tuanga tokoiti ua takapini iaia. Ko te toenga e manga kite ua tona kare i taka meitaki. Inara i te teitei maianga te ra, kua rauka iaia kia kite mamao atu. Mei te reira katoa te marama pae vaerua ta te Atua e oronga maira. Te akatika ra aia ia tatou kia kite i etai au apinga i tetai taime. Kua oronga mai te Tamaiti a te Atua ra, koia Iesu Karaiti i te marama anga na roto i tetai tu aiteite. E akamanako tatou i akapeea ta Iehova ra akamarama anga i tona au tangata i te au tuatau taito ra e akapeea tana rave anga i teia tuatau nei.

2. Akapeea ta Iehova oronga anga akamarama anga i te au tuatau i mua ake i te Kerititiano ra?

² Penei ko te aronga i akapapaia i te Salamo 43 ra ko nga tamaroa a Kora. Ei au ngati Levi, ia ratou te tika kia apii atu i te Ture a te Atua ki te au tangata ra. (Malaki 2:7) Inara, ko Iehova to ratou Puapii Mekameka, e kua akara atura ratou kiaia ei Tumu no te pakari katoatoa. (Isaia 30:20) “E taku Atua . . . e akakite ua mai i to mārama e te tuatua-mou,” ta te tata taramo i pure. “E na te reira e arataki iaku nei.” (Salamo 43:​1, 3) Me te vai tiratiratu ra to Iseraela kiaia, kua apii atura Iehova ia ratou i tona au aerenga. E au anere mataiti i muri akera, kua akaperepere atura Iehova ia ratou ma te marama e te tuatua mou no tetai tu meitaki maata. Kua rave te Atua i te reira i tana tono maianga i tana Tamaiti ki te enua nei.

3. Na roto i teea tu te tuku anga i te au ngati Iuda ra ki te timata anga na ta Iesu apiianga ra?

³ E ko te tangata ko Iesu Karaiti, e “mārama [tikai te Tamaiti a te Atua] o teianei ao.” (Ioane 8:12) Kua apii aia i te au tangata i te au apinga ou​—na te au “parabole” mai. (Mareko 4:2) Kua akakite aia kia Ponotio Pilato: “Kare to teianei ao taku basileia.” (Ioane 18:36) Ko tetai manako ou te reira no te tangata Roma e tika oki ia no te au ngati Iuda, no te mea kua manako ratou e ka apai mai te Mesia i te Patireia o Roma kia tuturi e kia akaora oki ia Iseraela ki tona tu kaka mua ra. Kua akaata maira Iesu i te marama mei ko mai ia Iehova, inara kare tana au tuatua i akamareka i te au tutara ngati Iuda ra, no te mea “e mea meitaki na ratou te akameitaki a te tangata i te akameitaki a te Atua ra.” (Ioane 12:​42, 43) E manganui te au tangata i iki kia mou atu ki ta ratou au ikuiku anga tangata kare ra kia ariki i te marama pae vaerua e te tuatua mou mei te Atua maira.​—Salamo 43:3; Mataio 13:15.

4. Akapeea tatou i kite ei e ka tupu ua atu te tu marama anga o te au pipi a Iesu ra?

⁴ Inara, e tokoiti te au tane e te au vaine ngakau tiratiratu tei takave rekareka i te tuatua mou ra ta Iesu i apii. Kua aere marie ratou ki mua i te kiteanga i te au akakoroanga a te Atua ra. Inara, i te vaitata anga te openga o to ratou Puapii i te enua nei, e maata ta ratou tei vaira kia kite. Kua tuatua a Iesu kia ratou: “E manganui ra taku tuatua e akakite atu kia kotou, kare ra e tika ia kotou i teianei.” (Ioane 16:12) Ae, ka tupu ua atu te kite o te au pipi ra i te tuatua mou a te Atua.

Te Kaka ua Atura te Marama

5. Eaa te uianga tei tu maira i te anere mataiti mua ra, e iaai te apainga no te akaotianga i te reira?

⁵ I muri ake i to Iesu matenga e te tuakaouanga, kua meitaki atu te kaka anga o te marama mei te Atua ra i to mua ana. I roto i tetai orama tei orongaia kia Petero, kua akakite mai a Iehova e mei reira mai ka rauka kia riro te au Kenitara peritome koreia ei au pipi na Karaiti. (Angaanga 10:​9-17) E akakiteanga te reira! Inara, kua tu mai tetai uianga i muri akera: I umuumu ainei a Iehova i taua aronga Kenitara ra kia peritomeia i muri ake i te riroanga ei au Kerititiano? Kare taua uianga i pauia i roto i te orama ra, e kua riro taua tumu ei taumaro anga veravera i roto i te au Kerititiano. Kua tau te reira kia akaotiia, kia kore to ratou taokotaianga meitaki e akaparuparuia. No reira i Ierusalema, “kua uipa iora te au aposetolo e te aronga orometua ra, e akaeatu i taua tuatua ra.”​—Angaanga 15:​1, 2, 6.

6. Eaa te ravenga ta te au apotetoro e te aronga pakari i aru i ta ratou akamanako anga i te uianga no te peritome?

⁶ Akapeea e raukai i taua aronga i uipa atura ki reira kia tamanako i to te Atua ra anoano no te au Kenitara akarongo ra? Kare a Iehova i tono atu i tetai angera kia akaaere i ta ratou uriurianga manako, kare katoa oki aia i akaperepere atu i te aronga i reira ra ma te orama. Inara, kare i akaruke takiriia te au apotetoro e te aronga pakari ra oki ma te kore arataki anga. Kua akamanako ratou i te akakite anga a etai au Kerititiano ngati Iuda tei kite ra i akapeea ta te Atua akamata anga i te akono i te au tangata no e au pa enua ra, i te riringianga i tona vaerua tapu ki rungao i te au Kenitara peritome koreia ra. Kua kimi katoa ratou i te au tuatua Tapu no te arataki anga. Ei tupu anga, kua akono atura te pipi ko Iakobo i tetai manakoanga tei akatumuia ra ki runga i tetai tuatua tapu akamaramaanga. Ia ratou i tamanako ei i te akakite anga, kua riro kia marama te anoano o te Atua ra. Kare i anoanoia to te au pa enua ra kia peritomeia no ratou kia rekareka i to Iehova ra mareka anga. Kare te au apotetoro ra e te aronga pakari i taroaroa i te tataanga i te ikianga kia raukai te arataki anga a te reira i te aronga oa Kerititiano.​—Angaanga 15:​12-29; 16:4.

7. I roto i teea tu te aerenga ki mua o te au Kerititiano o te anere mataiti mua ra?

⁷ Kare mei te au arataki akonoanga ngati Iuda, tei mou ra ki te au ikuiku anga a to ratou ai metua, kua rekareka te maataanga o te au Kerititiano ngati Iuda ra i te rauka anga ia ratou teianei kiteanga ou meitaki no ta te Atua ra akakoroanga no te au tangata o te au pa enua ra, noatu rai e kua umuumuia te arikianga i te reira i tetai tauianga manako no te au Kenitara tei matauia ra. Kua akameitaki atura Iehova i to ratou vaerua taakaaka, e “tinamou atura te au ekalesia i te akarongo anga i te tuatua, tupu atura i te mata anga, kare e rā i tivata.”​—Angaanga 15:31; 16:5.

8. (a) Akapeea tatou i kite ei e e maata atu te marama anga ka tapapaia atu i muri ake i te openga o te anere mataiti mua ra? (e) Eaa nga uianga tau ta tatou ka akamanako?

⁸ Kua tupu tamou mai te kaka anga o te marama i te pae vaerua ra i te anere mataiti mua katoa ra. Inara kare a Iehova i akakite katoa i te au tuanga ravarai o tana au akakoro anga ki te au Kerititiano mua ra. Kua tuatua atu te apotetoro ko Paulo ki te aronga akarongo o te anere mataiti mua ra: “Teianei oki te kite makiri ua nei tatou, mei te mea e i na roto i te io.” (1 Korinetia 13:12) Kare i meitaki taua io ra i te akaata mai. I te akamata anga, i reira, kua kotinga uaia te kite anga i te marama pae vaerua ra. I muri ake i te matenga o te au apotetoro ra, kua poiri mai te marama no tetai tuatau, inara i te au tuatau i topa ua akenei kua riro kia maata mai te kite Tuatua Tapu. (Daniela 12:4) Akapeea ta Iehova ra akamarama anga i tona au tangata i teianei tuatau? E akapeea te akarongo tau atu na tatou me ka akamaata mai aia i to tatou kiteanga i te au Tuatua Tapu ra?

Te Riro ra te Marama kia Kaka Maata Atu

9. Eaa te ravenga taka ke e te meitaki oki tei raveia no te apiianga Pipiria a te Aronga Apiipii Pipiria mua ra?

⁹ I teia tuatau nei kua mama mai te kaka anga mua tikai o te marama ra i te tuanga kota openga o te 19 anere mataiti nei i te akamata anga tetai pupu tangata e te au vaine Kerititiano oki i tetai apii anga akatenga i te au Tuatua Tapu ra. Kua akatupu ratou i tetai ravenga tau no te apiianga Pipiria. Na tetai e akatu mai i tetai uianga; i reira te pupu ka kimikimi ei i te au irava Tuatua Tapu katoatoa te piri atura. Me ka akara anga patoi atu tetai irava Pipiria i tetai ke ra, kua tauta teianei au Kerititiano ngakau tae kia akarotai atu i nga mea e rua ra. Kare mei te au arataki akonoanga o taua tuatau ra, kua tauta te Aronga Apiipii Pipiria (tei matauia ra ko te Au Kite o Iehova i teia tuatau nei) kia tuku na te au Tuatua Tapu, kare na te ikuiku anga me kare apiianga tangata e arataki ia ratou. I muri ake i ta ratou akamanako anga i te au akakite anga ravarai tei rauka no te Tuatua Tapu, kua rave ratou i te tataanga no ta ratou au tika openga. Na teea tu kua akamaramaia ta ratou kiteanga i te au apiianga Pipiria tumu e manganui ra.

10. Eaa nga tauturu apii Pipiria meitaki ta Charles Taze Russell i tata ra?

¹⁰ Ko tetai tei maata te kite i roto i te Aronga Apiipii Pipiria ko Charles Taze Russell. Nana i tata tetai papaanga e ono puka tauturu i te apii Pipiria tei tapaia ko te Studies in the Scriptures. Kua manako katoa te Taeake ko Russell kia tata i tetai tuanga itu, te ka akataka i nga puka Pipiria o Ezekiela e Apokalupo oki. “Me ka kitea e au te taviri,” tana i tuatua, “ka tata au i te Tuanga Itu.” Inara, tana i kapiti mai: “Me ka oronga te Atu i te taviri ki tetai ke atura, ka rauka iaia te tata i te reira.”

11. Eaa te pirianga te vaira i rotopu i te tuatau e to tatou kite meitakianga i te au akakoroanga a te Atua ra?

¹¹ Te akatutu maira te tataanga i mua akenei ma C.T. Russell i tetai tumu puapinga maata i te rauka anga ia tatou kia kite i etai au tuanga o te Pipiria​—e te tuatau oki. Kua kite te Taeake ko Russell e kare e rauka iaia kia opara i te marama kia kaka mai ki runga i te puka o Apokalupo mei tetai tangata kake maunga ra kia manono marie i te ra kia iti mai i mua ake i tona tuatau akatakaia ra.

Akakiteia​—Mari ra i ta te Atua Tuatau Tau

12. (a) A naea e kitea meitakiiai te totou Pipiria ra? (e) Eaa te akatauanga te akaari maira e tei runga te rauka anga ia tatou kia kite meitaki i te totou Pipiria i ta te Atua tuatau i akanoo ra? (E akara i te tata anga i raro ake.)

¹² Mei te au apotetoro oki i kite ra i te au totou no te Mesia ra i muri anake i to Iesu ra matenga e te tuakaouanga, te au Kerititiano i teianei tuatau ka kite marama i te totou Pipiria i tona tu ki meitaki katoa i muri anake i te tupu anga te reira ra. (Luka 24:​15, 17; Angaanga 1:​15-21; 4:​26, 27) A Apokalupo ko tetai puka totou ia, no reira ka tau tatou kia manako atu kia kite meitaki i te reira i te tupu anga te au mea akatakaia mai e te reira ra. Ei akatauanga, kare e rauka ia C. T. Russell te kite tika i te aiteanga o te puaka taae kutekute akatutuia tei taikuia ra ia Apokalupo 17:​9-11, i te mea ko nga akaaerenga tei akatutuia maira e te puaka taae ra, koia oki, te League of Nations e te United Nations, kare i vai mai no muri anake i tona matenga ra.a

13. Eaa te tupu ra i etai taime me ka tukuia mai te marama anga ki runga i tetai tumu no te Pipiria?

¹³ I te kite anga te au Kerititiano mua ra e ka rauka kia riro te au Kenitara peritome koreia ra ei au oa akarongo, kua taki atu taua tauianga ra ki tetai uianga ou no te umuumu anga i te au tangata o te au pa enua ra kia peritomeia. Na teia i akakeu i te au apotetoro e te aronga pakari ra kia akara matatio i taua maroanga katoa ra no te peritome anga. Te mou tika ra taua akatauanga rai i teia tuatau nei. Na tetai kaka meitaki anga mai te marama ki runga i tetai tumu no te Pipiria ka taki atu i etai au taime i te au tavini akatainuia o te Atua ra koia, “te tavini akono meitaki e te pakari,” kia akara matatio akaou i etai tumu te piri maira, mei ta tetai akatauanga tei aru mai i mua ua akenei i akatutu maira.​—Mataio 25:45.

14-16. Akapeea te akatupu anga a tetai akatikatika i to tatou manako anga no runga i te iero vaerua ra, ki to tatou kite anga ia Ezekiela pene 40 ki te 48 ra?

¹⁴ I te 1971 kua neneiia tetai akatakaanga i te totou na Ezekiela i roto i te puka “The Nations Shall Know That I Am Jehovah”​—How? Kua uriuri poto maira tetai pene o taua puka ra i ta Ezekiela orama no tetai iero. (Ezekiela, pene 40-48) I taua tuatau ra, ko te akara atu anga e akapeea te orama o te iero a Ezekiela ra i te akatupu angaia i te ao ou ra.​—2 Petero 3:13.

¹⁵ Inara, e rua nga atikara tei neneiia i The Watchtower o Titema 1, 1972, kua akatupu mai i to tatou kiteanga marama i te orama a Ezekiela ra. Kua uriuri ratou i te iero maata pae vaerua ra tei akatakaia maira e te apotetoro ko Paulo ia Ebera pene 10 ra. Kua akataka maira The Watchtower e ko te Ngai Tapu e te paepae i roto o te iero vaerua ra te akakite ra i te tu o te aronga akatainuia ra ia ratou i runga i te enua nei. I te akara akaou anga ia Ezekiela pene 40 ki te 48 ra i etai mataiti i muri iora, kua kiteaia e mei te raveia ra i te iero vaerua i teia tuatau nei, mei te reira katoa te raveanga i te iero ta Ezekiela i akara i te orama katoa ra oki i teia tuatau nei. Akapeea ra?

¹⁶ I te orama a Ezekiela, te kitea ra te au taunga i te ori aere anga i roto i te paepae o te iero ia ratou e tavini atura i te au kopu kare i te kautaunga ra. Ko teia nei au taunga te akatutu maira i te “kau taunga ariki,” ra koia to Iehova au tavini akatainuia ra. (1 Petero 2:9) Inara, kare ratou e tavini atu i te paepae i te iero i te enua nei no te Tauatini Mataiti Tutara Anga o Karaiti katoa ra. (Apokalupo 20:4) I te maata anga o taua tuatau ra, me kare i te katoa anga o te reira, ka tavini atu tei akatainuia ra i te Atua i roto i te Ngai Tapu Rava o te iero vaerua ra, i te “rangi” ra. (Ebera 9:24) I te mea te kitea ra te au taunga i te aereanga ki tera ngai e tera ngai i roto i te au paepae o te iero a Ezekiela ra, te tika ra e te akatupuia ra taua orama ra i teianei tuatau, i te vai anga tetai papaki o tei akatainuia ra i runga i te enua nei. No reira, i te itiu o Mati 1, 1999, o teia makatini kua akaata mai i tetai manako akatikatikaia no teianei tu. No reira, tae roa mai ki te openga o te 20 anere mataiti nei, kua akaitiia mai te marama vaerua ki runga i te totou a Ezekiela ra.

Kia Mareka i te Akatikatika i Toou Manako

17. Eaa te au akatikatika anga taau i rave i toou uaorai manako anga mei te riroanga kia kite i te tuatua mou ra, e akapeea ta ratou akapuapinga anga ia koe?

¹⁷ Te aronga ravarai tei anoano ra kia kite i te tuatua mou ka tika kia mareka i “te akatuikaa anga atu i te au manako ravarai i te akarongo i te Mesia ra.” (2 Korinetia 10:5) Kare te reira i te mea ngoie ua, e maata oki me kua ketaketa te akauru anga i te au manako ra. Ei akatauanga, i mua ake i te kiteanga i te tuatua mou a te Atua, penei kua rekareka koe i te akonoanga i etai au orote akonoanga ma to pamiri. I muri ake i toou apii anga i te Pipiria, kua kite koe e ko teianei au akonoanga e peikani tikai te akamata anga. I te akamata anga, penei kare koe i mareka kia akono i taau e apii ra. Inara, i te openga, kua maroiroi atu te inangaro no te Atua i to te manako anga akonoanga, e kua akamutu koe i te raveanga i te au akonoanga akamareka kore ra i te Atua. Kare aina a Iehova i akameitaki mai i taau ikianga?​—Akaaite ia Ebera 11:25.

18. Akapeea te akono anga tau na tatou me ka akamaramaia mai to tatou kiteanga i te tuatua mou Pipiria?

¹⁸ Te puapingaia ra tatou na te raveanga au apinga kia tau ki to te Atua anoano. (Isaia 48:​17, 18) No reira me ka tau to tatou manako no tetai tuatua anga Pipiria i te akataka anga, kia rekareka tatou i te tupuanga tuatua mou! Ko te tika, te akakite maira to tatou aere tamouanga i te akamarama angaia, e tei runga tatou i te arataa tika ra. “Ko te arataa oki o te aronga tuatua-tika ra” tei tau ra “ki te mārama kakā ra, ko tei tupu ua kakā anga e tae ua atu ki te avatea tikai.” (Maseli 4:18) E tika, i teia tuatau nei te kite ra tatou i etai tuanga o ta te Atua akakoro anga ‘i roto i tetai tu kare i taka meitaki.’ Inara me tae mai ta te Atua ra tuatau tau, ka kite tatou i te tuatua mou i roto i tona tu manea katoa, me kua vai tamou te tatanu anga i to tatou vaevae ki runga i “te arataa” ra. I teia tuatau nei, kia akateitei tatou i te au tuatua mou ta Iehova i akataka mai, ma te tapapa anga i te akamarama anga i to tei kore ra i kite tikaia.

19. Eaa tetai tu meitaki kia akaari e te inangaro ra tatou i te tuatua mou?

¹⁹ Akapeea tatou i te akakite anga i to tatou inangaro no te marama na roto i tetai tu tau? Ko tetai ravenga na te tatau putuputuanga i te Tuatua a te Atua​—i te au ra takitai me ka rauka. Te aru ra ainei koe i tetai porokaramu putuputu i te tatauanga Pipiria? Te oronga katoa maira nga makatini Te Punanga Tiaki e te Awake! kia tatou i te kai vaerua maata tei tau ra kia rekarekaia. E akamanako katoa, i te au puka, au poroutia, e etai atu au puka tei akapapaia mai ei puapinga no tatou. E peea oki te au ripoti akamaroiroianga no te tutuanga Patireia te neneiia maira i te Yearbook of Jehovah’s Witnesses?

20. Eaa te pirianga i rotopu i te marama e te tuatua mou mei ko mai ia Iehova ra e to tatou aerenga ki te au uipaanga Kerititiano ra?

²⁰ Ae, na roto i tetai tu meitaki ta Iehova ra pauanga i ta tatou pure tei akakiteia maira ia Salamo 43:3. I te openga o taua irava ra, ka tatau tatou: “Kia aratakiia au e [to mārama e te tuatua-mou] ki to maunga tapu, e ki to au puakapa ra.” Te akara atura ra ainei koe ki mua ki te akamorianga ia Iehova, ma tetai aronga tini o etai ke atura? Ko te apiianga pae vaerua te orongaia maira i ta tatou au uipaanga ko tetai tu puapinga maata ia ta Iehova e oronga maira ei akamarama anga i teia tuatau nei. Eaa ta tatou ka rave kia akaoonu atu i ta tatou ariki anga no te au uipaanga Kerititiano ra? Te pati atu nei matou ia koe kia akamanako i teianei tumu na te pure anga i roto i te atikara te aru mai nei.

[Tataanga Rikiriki i Raro]

Ka Rauka Ainei ia Koe te Pau?

• Eaa a Iehova ka akakite marie mai ei i tana au akakoroanga ra?

• Akapeea ta te au apotetoro e te aronga pakari i Ierusalema ra akaoti anga i te maroanga no te peritome anga?

• Eaa te ravenga no te apiianga Pipiria ta te Aronga Apiipii Pipiria mua ra i rave, e eaa i taka ke ei?

• E akatutu mai i akapeea te marama anga vaerua i te akakite angaia mai i ta te Atua tuatau tau ra.

[Tutu i te kapi 12]

Kua kite a Charles Taze Russell e ka kaka mai te marama ki runga i te puka Apokalupo i ta te Atua tuatau tau ra