Akapeea Koe me Akono i te Au Manako Patoianga?

I TE au ra e kite ana tatou i te au tu tangata tuke tuke. Te apai maira teia i te au rekareka anga e te au akaraanga ou kia tatou. I tetai taime, te akatupu ra te reira i te au manako patoianga, etai e mea pakari e tetai e mea iti ua i to tatou oraanga i te au ra. Noatu e eaa te tu, akapeea tatou me akono i te au manako patoianga te akakeu maata ra ia tatou i te pae manako, ngakau, e te pae vaerua.

Te raveanga i te ka rauka ia tatou kia akatikatika ma te ariki ua i te au manako patoianga ka tauturu te reira kia rekareka tatou i te oraanga maoraora e te au pirianga au tikai ma tetai atu. Te na ko ra tetai materi taito e: “Tei te maki kore o te ngakau, ko to te kopapa ïa ora.”​—Maseli 14:30.

Ei tuke anga te vaira te tuatua mou: “Mei te oire koro kore e te ngaangaa ra, koia katoa te tangata kare i akavi i tona uaorai vaerua.” (Maseli 25:28) Koai ia tatou ka inangaro i te akariro ia tatou uaorai e kia akakinoia e te au manako tarevake te ka akatupu ia tatou kia rave i te au tu tau kore​—te au tu te ka apai mai i te kino ki tetai atu e kia tatou? Me kare e akatereia, ka rauka i te au ariu anga riri i te rave i te reira. I te Tuatua i te Maunga, kua tuatua a Iesu e kia akara makitoro tatou i to tatou tu, te ka akakeu e akapeea tatou me akono i to tatou au manako patoianga ma tetai atu. (Mataio 7:​3-5) Koi kore ei e tuatua akakino atu i tetai, kia manako tatou e akapeea me tatanu e te akono i te au pirianga oa ma te aronga e au manako patoianga to ratou e te ngai i aere mai ei.

To Tatou Tu

Ko tetai takainga mua no te akatikatikaanga i tetai manako patoianga koia oki kia kite e ka tupu rai te au manako e te au tu tarevake kia tatou. Te akamaara maira te au Tuatua Tapu kia tatou e kua ara pouroa tatou “e kua ngere i te akameitaki a te Atua.” (Roma 3:23) Pera katoa, te akaari maira te kite karape i te tumu o to tatou manamanata kare e ko tetai ke. I roto i teia, ka akara ana tatou i te kite anga o Iona.

I raro ake i te ikuiku anga no ko mai ia Iehova, kua aere atu a Iona ki te oire ko Nineve i te tutu aere no runga i te akavaanga ka aere mai a te Atua ki runga i te reira au tangata. Te tupu anga mataora koia oki kua tataraara te katoa anga o te oire o Nineve e kua akarongo i te Atua mou. (Iona 3:​5-10) Kua manako a Iehova e kua tau to ratou tu tataraara e kia akakoreia, no reira kua akaora aia ia ratou. “Kinokino roa akerā Iona, e maata atura tona riri.” (Iona 4:1) Poitirere tikai to Iona ariu anga ki to Iehova tu aroa. Eaa ra a Iona ka riri ei ia Iehova? I te akaraanga, kua manako maata a Iona i tona uaorai au manako ngakau, te manako anga kua kore aia i akakeu i te ngai tangata. Kare aia i ariki meitaki i te tu aroa o Iehova. Ma te takinga meitaki, kua taki atu a Iehova ia Iona na roto i tetai apii anga akatutu tei tauturu iaia kia taui i tona tu e kia akara maata atu i te puapinga o te tu aroa o te Atua. (Iona 4:​7-11) Te taka meitaki ra e te umuumuia ra e kia akatikatikaia to Iona tu, kare i to Iehova.

Ka umuumuia ainei tatou i tetai taime kia taui i to tatou uaorai tu no tetai apinga? Te ako maira te apotetoro ko Paulo ia tatou: “I te akangateitei anga tetai ki tetai.” (Roma 12:10) Eaa te aite anga o tana tuatua? I tetai tua, te akamaroiroi ra aia ia tatou kia tau te manako e kia akono i tetai atu au Kerititiano ma te ngateitei oonu e te akateitei. Te kapiti maira ki roto i teia te kite anga e kua rauka i te tangata tataki tai te akameitaki anga kia iki ua. Kua akamaara katoa a Paulo ia tatou: “Ei runga iaia uaorai ta te tangata ravarai apainga.” (Galatia 6:5) No reira, i mua ake ka akatupu ei te manako patoianga ma tetai ke, mei teaa te pakari kia akamanako me te anoanoia ra to tatou uaorai tu kia akatikatikaia! Kia tauta pakari tatou i te akaata i te manako o Iehova e kia akamou au ma tetai atu te inangaro ra i te Atua.​—Isaia 55:​8, 9.

To Tatou Araveianga

Ka akamanako ana e rua nga tamariki e uuti ra i tetai apinga kangakanga, te uuti pakari ra tetai e tetai e raukai te reira. Penei ka aru mai te au tuatua riri i te putotoanga e tae ua atu i te openga ra kua tuku tetai me kare kua tauru mai tetai tangata.

Te akakite maira te tataanga i roto ia Genese kia tatou kua rongo atu a Aberahama e kua tupu te tauetono anga i rotopu i tana aronga tiaki manu e te au tiaki o tana nepeu ko Lota. Kua tamata a Aberahama i te aravei ia Lota e kua tuatua atu: “Teia taku tuatua kia koe, auraka roa to taua ei tauetonoanga, e ta toku nei au tangata tiaki puaka, e te au tangata tiaki puaka noou ra; okotai oki o taua kopu-tangata.” Kua akakoro oki a Aberahama kia kore te maro anga e akakino i to raua piri anga. Eaa te tutaki anga? Kua papa aia no te akaatinga i tana akameitaki anga no te iki anga ei tangata pakari; kua papa aia i te tuku ua atu i tetai apinga. Kua akatika a Aberahama ia Lota kia iki i te ngai tana i anoano no te apai i tona ngutuare tangata e te au manu. Kua iki iora a Lota nona uaorai i tetai ngai matie o Sodoma e Gomora. Kua takake atu a Aberahama raua ko Lota ma te au.​—Genese 13:​5-12.

Kia akatupu i te au pirianga au i rotopu i tetai, te papa ra ainei tatou kia rave mei ta Aberahama i rave ra? Te akanoo nei teia tuanga o te Pipiria no tatou i tetai akaraanga meitaki tikai kia aru i te akonoanga i te manako patoianga. Kua pati a Aberahama: “Auraka roa to taua ei tauetonoanga.” Ko to Aberahama anoano ngakau tae koia oki kia tupu te rapakau anga au. Papu ka tauturu taua pati anga kia akono i te au pirianga au kia akakore i te tu marama kore. Kua taopenga a Aberahama ma te tuatua “okotai oki o taua kopu-tangata.” Eaa ra ka akaatinga ei i taua pirianga akaperepere no te inangaro i tei tau kia koe me kare te tu ngakau parau? Kua akara tika a Aberahama ki runga i tei puapinga maata. Kua rave aia i te reira ma te akangateitei uaorai e te akateitei, i taua taime rai te akangateitei anga i tana nepeu.

Koi tupu mai ei te au turanga ka anoanoia te tauru mai anga e raukai te akatikatika i te au manako patoianga, mei teaa ra te meitaki kia akatikatika i te reira ko korua ua! Kua akamaroiroi a Iesu ia tatou kia manako rave ua i te akatupu anga i te au ma to tatou taeake, te tataraara anga me anoanoia.a (Mataio 5:​23, 24) Ka umuumuia te tu akaaka, me kare te akaaka o te manako, inara kua tata a Petero: “E kotou ravarai oki ka kauraro ia kotou uaorai, e kia kakauia kotou i te akaaka; ‘e patoi te Atua i tei nengonengo, e oronga mai i te meitaki no tei akaaka.’ ” (1 Petero 5:5) Ta tatou akonoanga i tetai taeake akamori te akakite ra i to tatou pirianga ma te Atua.​—1 Ioane 4:20.

I roto rai i te putuputuanga Kerititiano, penei ka umuumuia tatou kia tuku i te tika anga e raukai te akono i te au. Kua aere mai tetai au numero meitaki te kapiti nei ki te Au Kite o Iehova ki roto i te pamiri o te Atua o te aronga akamori mou i nga mataiti e rima i topa ua akenei. Mei teaa ra te rekareka ta teia e apai maira ki to tatou ngakau! Te tu e akono ra tatou ia tatou uaorai papu te akakeu ra i teia e tetai atu i roto i te putuputuanga. E tumu meitaki teia no te manako meitaki anga no runga i ta tatou iki angaanga tarekareka, au angaanga akareka, au angaanga oaoa, me kare ngai angaanga, te manako anga e akapeea etai i te akara mai anga ia tatou. Ka marama koreia ainei etai o ta tatou au angaanga me kare au tuatua e ka riro ei tumu no te akaturori anga i tetai ke?

Te akamaara maira te apotetoro ko Paulo ia tatou: “E tika te au mea katoa iaku, kare ra e tau katoatoa kia rave: e tika te au mea katoa iaku, kare ra te au mea katoa e tamaata i te meitaki. Auraka rava e tangata e kimi i tona uaorai meitaki, e kimi ra te tangata ravarai i to etai ke ra.” (1 Korinetia 10:​23, 24) Ei au Kerititiano, te manako ngakau tika ra tatou kia akamatutu i te aroa e te taokotai anga o te akataeake anga Kerititiano.​—Salamo 133:1; Ioane 13:​34, 35.

Au Tuatua Rapakauanga

Ka riro te au tuatua ei akakeu anga ririnui ei meitaki. “E tau te tuatua meitaki ki te topatapata meli ra, e vene i te vaerua nei, e ora oki to te ivi.” (Maseli 16:24) Te akatutu maira te tua o Gideona no te kore e inangaro i te maro anga ma to Epheraima i te tuatua tika o teia materi.

Kua kapiki tauturu atu a Gideona tei o oonu ki roto i te tamaki anga ia Midiana, i te kopu o Epheraima. Inara, i muri ake i te akamutu anga te tamaki, kua uri atu to Epheraima ki runga ia Gideona e kua kopekope mareka kore e kare aia i kapiki ana ia ratou i te akamata anga o te tamaki. Te akakite ra te tataanga e “kua akamura rava maira ratou iaia.” Kua pau atu a Gideona: “Eaa taku puapinga i rave nei i ta kotou? kare aina te meitaki maata to te toenga vine a Epheraima i te vine akaū a Abiezera? Kua tuku mai te Atua i nga ariki Midiana ia Oreba raua ko Zeeba ki to kotou rima; eaa oki taku puapinga iti i rauka i ta kotou na?” (Akava 8:​1-3) Na roto i tana au tuatua maru, iki meitakiia, kua kopae a Gideona i te ka riro ei tamaki anga kopu. Penei kua manamanata to Epheraima no te manako anga iaia uaorai e te ngakau parau. Inara, kare te reira i tapu ana ia Gideona i te tautaanga i te akatupu i te tupu anga au. Ka pera ainei tatou?

Penei ka tupu viviki mai te riri i roto i tetai e ka akatupu i te kino kia tatou. E akakite ua i to ratou manako ngakau, e e angaanga kia marama i to ratou au manako. Penei na roto i tetai tu kua tauturu tatou ia ratou kia manako akapera? Me koia ia, eaa i kore ei e akatika i ta tatou tuanga i te akatupu anga i te manamanata e e akakite i to tatou tu mii no te akamaata anga i te manamanata. Penei ka rapakau tetai au tuatua manako meitakiia i tetai pirianga akakinoia. (Iakobo 3:4) Penei tetai tei riri ra te umuumu ra i ta tatou tu akapapu anga. Te akakite ra te Pipiria e “kare e vaie ra, e mate ïa ai.” (Maseli 26:20) Ae, ka rauka i te au tuatua iki meitakiia tei orongaia na roto i tetai tu tau te “akaanga ke i te riri” e ka riro ei rapakauanga.​—Maseli 15:1.

Te tuatua maira te apotetoro ko Paulo: “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.” (Roma 12:18) E tika kare e rauka ia tatou i te akatere i te manako ngakau o tetai, inara ka rauka ia tatou i te rave i ta tatou tuanga kia akamaata i te au. Koi kore ei e kauraro atu ki to tatou uaorai tu apa ua mei to tetai atu, ka rave angaanga tatou i teianei kia taangaanga meitaki i te au kaveinga Pipiria. Te akono anga i te au manako patoianga na roto i ta Iehova tu e ikuiku maira ia tatou ka tupu mai to tatou au mutu kore e te mataora.​—Isaia 48:17.

[Tataanga Rikiriki i Raro]

[Tutu i te kapi 24]

Te maro ra ainei tatou e kia rave uaia te au mea i ta tatou i manako ra?

[Tutu i te kapi 25]

Kua akanoo a Aberahama i te akaraanga meitaki e kia tuku ua e raukai i te akatikatika i te manako patoianga