Te Maara Ainei ia Koe?

Kua ariki ainei koe i te tatauanga i te au itiu i ou ake nei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Eaa te mea puapinga ia tatou e akatikatika ra i te manako patoianga ma tetai?

Kia kite tatou na mua e ka tupu rai te au manako e te au tu tarevake kia tatou. I reira kia akamanako pakari tatou me ko tatou te tumu o te manamanata kare e ko tetai ke.​—8/15, kapi 23.

• Aea “te tuatau e tupu ei te au mea katoa nei,” tei taikuia ia Angaanga 3:21?

Ka aere mai te tupu anga i nga tuanga e rua. Te mea mua, te tupu anga o tetai parataito vaerua te tupu nei mei te 1919 mai. Ka aere mai tetai atu tupu anga me akaouia to tatou enua ei parataito tikai.​—9/1, kapi 17, 18.

• Akapeea e riro ei e kare o te ro arataki, mei tei taikuia ia Maseli 6:​6-8, inara te oronga maira i tetai akaraanga meitaki kia tatou?

I roto i te katoa anga o te ro, te vaira tetai ro ariki vaine, inara e ariki vaine ua aia i te tu e nana e anau ana i te au ua e koia te metua vaine o te katoa anga. E angaanga maroiroi tikai te au ro, kia pera katoa rai tatou, te tautaanga i te akamako i ta tatou angaanga, noatu me kare e akaraia mai.​—9/15, kapi 26.

• Kua tika tikai ainei te totou a Hulada, tei rekotiia ia 2 Ariki 22:20, e ka mate “au” ua a Iosia, i te mea kua akakinoia aia i roto i te tamaki anga?

Ae, kua mate au ua aia i te tu e kua mate aia i mua ake i te kino o te 609-607 M.T.N., i te opu anga e te takore anga to Babulonia ia Ierusalema.​—9/15, kapi 30.

• Akapeea oki i riro ei e e tuatua meitaki anga na Solomona kia akataka i tetai vaine “mei te aili te inangaro! e mei te iale te manea!”? (Maseli 5:​18, 19)

Te ua puakanio, me kore puakanio momoavao, e tu tau e te maru ia i te akaraanga. Noatu rai, ka ora aia e ka anau i roto i te au ngai tokatoka, au ngai kare e itaeia e e kare e maata te kai.​—10/1, kapi 30, 31.

• Koai a Henry Grew raua ko George Storrs?

Kua ora ana teia nga tangata i te 1800 e e aronga apiipii Pipiria aruaru tikai. Kua kite mai a Grew e kare te Toru Tai i roto i te irava, e pera katoa i te au apiianga mate kore o te meta e te ai era. Kua kite a Storrs e ka rauka i etai te ora mutu kore i te enua. No mua ake nga tokorua ia Charles Taze Russell, tei akamata i te nenei i teia makatini i te 1879.​—10/15, kapi 26-30.

• Eaa to te Au Kite o Iehova manako no runga i te au ravenga i te pae vairakau no te taangaanga i to tetai uaorai toto?

Te akanooanga i to ratou au irinaki anga ki runga i te Pipiria, kare ratou e akaputu i to ratou uaorai toto e i muri mai ka ariki ia ei pamu anga. Ka iki ua tetai Kerititiano nona uaorai e akapeea me akonoia tona toto i roto i te aerenga o te ravenga vai anga, te kimikimi anga pae vairakau, me kare te rapakau anga ou akenei. Ka akamanako aia i ta te Pipiria e akakite ra no runga i te toto e kia maara e kua akatapu tikaiia aia ki te Atua.​—10/15, kapi 30, 31.

• Te akaari maira tetai tare anga tei raveia i te akamata anga o teia mataiti i teea anoano anga puapinga i roto i te Au Kite o Iehova takapini i te koropu?

Te anoanoia ra e kia maata atu te au Are Uipaanga Patireia e 11,000 i te au enua kare e meitaki ana te tupu anga, te ngai te kotingaia ra i te pae moni. Te akanooia nei te au moni tauturu mei te au Kerititiano i te au enua e manganui e kia tauturu i te patu anga i te au ngai uipaanga tau tikai.​—11/1, kapi 30.

• Eaa etai o te au tuatua mua te taangaangaia ra i roto i te Pipiria no runga i te akamori anga?

Tetai ko te lei·tour·giʹa, tei uriia e ko te “tavinianga i te au tangata.” Tetai atu ko te la·treiʹa, tei uriia e ko te “tavinianga tapu.” (Ebera 10:11; Luka 2:​36, 37)​—11/15, kapi 11-12.

• Eaa tetai apiianga puapinga ka kite tatou mei te tataanga Pipiria o Adamu raua ko Eva?

E neneva ua etai akamea anga no te akatakake mai mei te Atua ko Iehova.​—11/15, kapi 24-7.

• Eaa te akapapu anga Tuatua Tapu e te akamana ra te Atua i tona au tavini?

Kua oronga pouroa mai a Davida, Habakuka, e te apotetoro ko Paulo i te au akakite anga na ratou uaorai ki te tika anga e kua akamaroiroi, me kore kua akamana te Atua ko Iehova ia ratou. (Salamo 60:12; Habakuka 3:19; Philipi 4:13) No reira, ka papu tatou e te puareinga ra te Atua e te rauka ra i te akaketaketa ia tatou.​—12/1, kapi 10, 11.