Maara Ainei ia Koe?

Kua ariki ainei koe i te tatauanga i te au itiu i ou ake nei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Eaa ra te tumu ariki ngoie uaiai te Kiritimiti i Korea?

E irinaki anga taito tetai i Korea e tetai atu au enua no runga i tetai atua o te ngai tunu kai tei manako ia ra e ka aere mai na roto i te pu auai e ka apai mai i te au apinga aroa i Titema. E pera katoa, i muri ake i te Tamaki II o te Ao, kua tua aere te au vaeau U.S. i te au apinga aroa e te au apinga tauturu i te au are pure i te reira ngai.​—12/15, kapi 4, 5.

• I roto i te akatupu anga o Isaia 21:8, koai te “tangata tiaki” ta te Atua e taangaanga ra i to tatou tuatau nei?

Kua akakitekite aere te au Kerititiano akatainuia i te vaerua, te tavini ra ei pupu tiaki, i te au tangata ki te aiteanga o te au tupu anga i teianei ao tei akatupu i te totou Pipiria. Kua tauturu katoa ratou i te aronga apii Pipiria kia kite e kia kopae ke i te au apii anga e te au raveanga kare e tau ana ki te Pipiria.​—1/1, kapi 8, 9.

• Koai tikai te “Polish Brethren”?

E akonoanga pupu meangiti ua ratou i roto i te 16 e te 17 anere mataiti i Porani tei akamaroiroi te aru anga i te Pipiria e kua kopae ke atu i te au apii anga akonoanga ou, mei te Toru Tai, te papetito anga i te pepe, e te ai era. Kare i roa ana, kua takinokino pakariia ratou e kua taomiia kia totoa aere ki tetai atu au enua ke ra.​—1/1, kapi 21-3.

• Eaa ra ka irinakiiai te au totou Pipiria e kare te au akakitekite anga a te aronga apii i te tuatau ki mua me kore te au tangata akara etu?

E tau kore tikai te au peroveta tangata tutu ua no te mea kare ratou e akarongo ana kia Iehova e te Pipiria. Ko te au totou Pipiria anake ua te ka tauturu ia koe kia kite i te au tupu anga tau ki to te Atua akakoroanga, te akapuapinga ra ia koe e toou ngutuare tangata e tuatau ua atu.​—1/15, kapi 3.

• Eaa tetai au akapapu anga ka akakite mai kia tatou e te noo nei tatou i roto i te tuatau openga?

Te kite nei tatou i te au tupu anga o te titiri anga o Satani mei te rangi maira. (Apokalupo 12:9) Te noo nei tatou i te tuatau o te “ariki” openga tei akakiteia mai ia Apokalupo 17:​9-11. Te topa nei te numero o te au Kerititiano akatainuia tika tikai, inara i te akara anga ka vairai tetai o ratou ki runga i te enua i te akamata anga o te tumatetenga maata.​—1/15, kapi 12, 13.

• I naea te puka o Habakuka i tataiai, e eaa ra i tau ei kia irinaki tatou i te reira?

Kua tataia teia puka Pipiria e vaitata ki te 628 M.T.N. Tei roto i te reira te au akautunga anga a Iehova ki runga ia Iuda taito ra e kia Babulonia. Te akakite katoa maira te reira i te au akautunga tu-Atua te ka tupu kare e roa atu ana ki runga i te akatere anga kino o teianei ao.​—2/1, kapi 8.

• Teiea ra i roto i te Pipiria ka kite tatou i te ako anga pakari a te metua vaine no te au vaine tau?

Ko te pene openga o te puka o Maseli, pene 31, te ngai meitaki no taua akoanga.​—2/1, kapi 30, 31.

• Eaa ra tatou ka akameitaki ei ia Iehova no te akakite mai anga i ‘te manako o te Mesia’ kia tatou? (1 Korinetia 2:16)

Na roto i te tata anga Evangeria, kua tauturu mai a Iehova ia tatou kia kite i to Iesu au manako, te manako ngakau, te au angaanga, e te au manako anga maata. Ka tauturu teia ia tatou kia riro mai mei Iesu rai, i te maata anga i roto i te maata anga ta tatou ka rave i te angaanga tutu aere anga akaora anga.​—2/15, kapi 25.

• Te pau maira ainei te Atua i te au pure i teia tuatau nei?

Ae. Noatu te akaari maira te Pipiria e kare te Atua e pau i te au pure katoatoa, kua akapapu maira te au akakite anga i teia tuatau nei e e pau putuputu ana aia i te tangata tei pure ra no te akapumaana e te tauturu anga i roto i te au apinga mei te akameitaki akaouanga i te au manamanata akaipoipo.​—3/1, kapi 3-7.

• Eaa ta tatou ka rave kia rauka mai to te Atua ra maroiroi?

Ka pati tatou i te reira na roto i te pure, kia rauka te akamaroiroi anga pae vaerua no roto mai i te Pipiria, e kia rauka te akamaroiroi anga na roto i te kapipiti anga Kerititiano.​—3/1, kapi 15, 16.

• Akapeea te nga metua i te tauturu anga i ta ratou tamariki kia puapinga maata mei te au uipaanga Kerititiano?

Ka tauturu ratou i ta ratou tamariki kia vai araara, penei na te moe anga i mua akera. Ka akamaroiroi i te tamariki kia “tata i te au tumu,” penei ka tata i tetai akairo ki runga i te pepa i te au taime tataki tai me taikuia mai tetai tuatua me kore ingoa matauia.​—3/15, kapi 17, 18.

• Eaa tetai apinga ta tatou ka apii mai mei te akatauanga o Iobu?

Kua tuku a Iobu i tona pirianga ki te Atua na mua, e tau aia i roto i tana au angaanga ma tona au oa, kua tauta aia kia vai tiratiratu ki tana vaine, kua akaari aia i te manako ngakau no te tu pae vaerua o tona ngutuare tangata, e kua akakoromaki aia i raro ake i te timata anga.​—3/15, kapi 25-7.

• Te vaira ainei tetai papaanga uuna i roto i te Pipiria te ka oronga mai i tetai kite oonu i te au tata anga muna?

Kare. Ka tau kia tuatuaia e te vaira tetai papaanga uuna i roto i etai atu au puka ke. Ka puapinga kore te au papaanga uuna i roto i te Pipiria e te au tuke anga i te au reta i roto i te au tata anga Epera.​—4/1, kapi 30, 31.