Maata Roa Ainei te Kite no Tatou?
Te noo ua ra tetai nga tokorua mitinari i tetai ngai tapa taatai i Aperika Opunga te akarakara ra i te marama kaka i runga. “Eaa ra te maata o ta te tangata i kite no runga i te marama, e eaa atu ra te maata ka inangaroia i te kite?” i akamanako ei te tane.
Kua pau atu tana vaine: “E akamanako ana ra e ka rauka ia taua i te akarakara i te enua i te tere anga mai na te pae mei teia rai—eaa ra te maata oe te kite e vai nei i runga i te enua, e eaa atu ra te maata ka inangaroia i te apii? E akamanako ua ana! Kare anake ua e te takapinipini nei te enua i te ra te neke aere ua nei ra te katoaanga o to tatou akatereanga o te ra. Teia te aiteanga penei kare rava tatou i konei akaou i teia ngai tikai o te ao e pini ua ake. E tika, kua kite tatou e teiea to tatou ngai i teianei, i te piri anga ua ra oki ki te au mea o te rangi tei matauia. E maata tikai te kite i rauka ia tatou no runga i tetai au apinga, inara i tetai tu, kare ua rai tatou i kite e teiea tikai tatou!”
TE TAIKU maira taua au manako ra i tetai au tuatua tika puapinga tikai. Te akaraanga e maata tikai te ka apiiia. E tika, e te apii nei tatou i tetai au mea ou i te au ra ravarai. Inara, noatu eaa te maata i ta tatou e apii ra, i te akaraanga ra kare e rauka ana ia tatou i te apii pouroa i ta tatou e inangaro viviki ra i te kite.
Inara, kapiti mai ki te kite i te apii i te au akakiteanga ou, kua maata roa atu te ririnui no te akaputu i te kite. Na roto i te kite tekinoroti kua tupu takiri te kite akaputuia o te tangata ki te au turanga maata ua atu ei. I teianei e maata tikai te ririnui o te au disk marokiakia o te komupiuta no reira kua koini uaia te au tuatua ou no te tareanga numero i te akataka anga ia ratou. Ka rauka i tetai CD-ROM ua nei i te akaputu i tetai aka akakiteanga maata; ko tona ririnui kua akatakaia mai e ka rauka e 680 mekapaiti (megabyte) me kore maata atu. Ka rauka i tetai DVD tau ua i te mou vaitata rai e itu taime mei te reira rai te maata, e penei ka rauka akaou mai tetai tei maata roa atu to ratou ririnui.
Vaitata rai e kare e rauka ia tatou kia marama tikai i te au ravenga a te tangata i teia tuatau no te komunikeiti anga i te akakiteanga. E mea umere tikai te viviki i te takaanga o te au matini nenei anga, i te maani anga i te au nuti pepa, te au makatini, e te au puka. No tetai tangata te taangaanga ra i te Internet, ka rauka viviki ua mai te au akakiteanga openga kore na te kiriki ua anga. Na roto i teia e tetai au mataara ke atu e manganui, te maata viviki ua atura te tuaanga i te akakiteanga i te ka rauka i tetai i te tamou mai i te reira. I tetai taime e akaaiteia ana te maata o te akakiteanga ki te tai, no te maata ka anoanoia tatou kia apii i te kau i roto i te reira, ei akatauanga ua, inara ma te tauta pakari auraka kia inu pouroa i te reira. Kua riro te tu maata tikai o te reira i te maro ia tatou kia iki meitaki.
Tetai tumu ke mai ka iki meitaki ei koia oki no te mea kare te maataanga o te akakiteanga e rauka maira i te mea puapinga tikai. E tika roa, kare e tau katoa ana etai o te reira e, kare e puapinga i te kite atu. E akamaara e te taiku ra te kite no runga i te akakiteanga—noatu e meitaki me e kino, tau me e tau kore. Ei akakononinoni roa atu i te au mea, koia oki ko te au apinga e manako ra te manganui e e au mea tika kare ua rai i te tika tikai. Mei teaa atura te maata i te taime e kitea mai ana i muri maira e kua tarevake me kore e pikikaa, te au tuatua a te aronga mana akangateiteiia! E akamanako ana, ei akatauanga, i te tangata tata tuatua o te oire Ephesia, tei manakoia e e opita kite maata i reira. Kua karanga aia e: “Koai ïa tangata kare i kite e te akamori nei teianei oire ko Ephesia nei i te atua maata ia Diana, e te tiki i topa mai ki raro nei no runga mai ia Dia ra?” (Angaanga 19:35, 36) Noatu i te akaraanga e kua kite matauia teia—e te taumaro kore katoaia, e maata te ka karanga e—kare i te tika e i topa mai te tiki ki raro no runga mai ia Dia. E tumuanga tau i reira, kia akamatakite mai te Pipiria Tapu i te au Kerititiano kia paruru atu i tei “tapikipikiia e e kite.”—1 Timoteo 6:20.
Tetai tumu pakari ka iki meitaki ei no runga i te kite koia oki no te mea e poto ua to tatou oraanga. Noatu eaa toou pakari, kare e ekoko e maata ua atu te au tu kite taau ka inangaro i te akara, inara kua kite koe e kare e roa rava toou ora anga no te rave i te reira.
Ka taui ainei teia tumu manamanata? Ka rauka mai ainei tetai turanga kite te ka akaroa maata atu i te oraanga, e mutu kore ua atu? Kua vai ke ana ainei taua tu kite ra? Me koia ia, ka rauka ainei te reira i te katoatoa? Ka tae mai ainei te ra e riro ei te kite katoatoa mei ta tatou e tapapa ra—te tuatua tika? Kua kiteaia e te nga tokorua mitinari tei taikuia i runga akenei te au pauanga merengo ua ki taua au uianga, e ka rauka katoa ia koe. Tatau i te atikara e aru mai nei ine, te ka oronga mai i te manakonakoanga o te rauka anga mai ia koe te kite e tuatau ua atu.