Tetai Tauturu Uri Reo Meitaki

TE INANGARO ra te Atua ko Iehova, Tei Tata i te Pipiria, e kia akakiteia te tuatua meitaki o tona Patireia “ki te pa enua katoa, e te au kopu, e te au reo, e te au iti-tangata.” (Apokalupo 14:6) Te inangaro ra aia kia rauka ngoie ua tana Tuatua tataia ki te au tangata katoatoa. Ki taua openga ra, maata ake te reo i uriia ai te Pipiria e i tetai ua atu puka ke i te ao nei. E au tauatini o te aronga uri reo tei akapou maroiroi tikai i te taime i te uri anga i to te Atua manako i roto i tetai reo ke atu.

Inara kare te Pipiria anake te akakoroanga no te urianga. Putuputu ana te taime, kua taangaangaia rai te Pipiria ei tauturu i te urianga i tetai au tataanga ke mai. Manganui te aronga uri reo tei akaaite ana i te au urianga o te au tuatua Pipiria i roto i te au reo ke ke kia rauka i tetai urianga meitaki no tetai au tuatua tikai. Te au tu o te Pipiria ei tauturu i te urianga kua tukunaia i teianei ki te angaanga i roto katoa i te urianga komupiuta.

E ngata tikai no tetai komupiuta i te uri reo. Kua manako mai etai aronga kite e tei runga ravao te urianga i te ka rauka i te komupiuta i te rave. No teaa ra? Kare te reo e au putunga tuatua ua. Te reo tatakitai te vai ra to te reira uaorai au kapipitianga tuatua, te au ture, te au tuke anga ki teia au ture, te au idiom, e te au akatutuanga maata. Te au tautaanga i te apii i tetai komupiuta i teia au apinga katoatoa kare roa i puapinga mai ana. Te maata anga o te au urianga komupiuta tei maaniia kare takiri i maramaia ana.

Inara, i teianei, te kimikimi ra te au taineti komupiuta i te au ravenga ou. “Ta matou ravenga te taangaanga ra i te au papaanga tare numero kia kitenaia mai te urianga tau roa atu,” i karanga ai a Franz Josef Och, tetai tangata maata kite karape i roto i te urianga komupiuta. Ka karanga ua tatou e te inangaro ra koe i te uri i te reo Initi ki roto i te reo Papaa. Te mea mua, ka rave mai i tetai tataanga te vai ra i roto i nga reo roa ai. E oti akera tuku atu i te reira i roto i te komupiuta. Ka akaaite te komupiuta i nga tataanga. Me, ei akaraanga, ka kite mai te komupiuta i taua tuatua Initi rai i te au ngai e manganui e i te au taime takitai i roto i taua rai takiota aiteite ra e kite ua mai te reira i te tuatua Papaa “are,” ka taopenga te komupiuta e ko te tuatua Initi te tuatua ia no te “are.” E penei ka kiteaia mai e ko te au tuatua i te pae mai e au tuatua akatutuia, mei te “maatamaata,” “meangiti,” “takere,” me kore “ou.” No reira, kua akatupu te komupiuta i tetai papaanga no te au tuatua tei aite atu e te au kapipitianga tuatua. I muri ake i taua “terenianga,” e penei ka pou ua nga mea ra ua me kore nga mea epetoma ua, ka rauka te komupiuta i te akono i ta te reira i “tamou mai” ki tetai tataanga ou. Noatu e penei e kino tikai te urianga tei taopenga mai i te tua o te karama e te tu tataanga, tei matauia kua rava ua te reira i te maramaia i te oronga mai i te aiteanga e te au akatakaanga puapinga maata.

Te tu o te urianga tei runga i te tu tikai o te maata e te tu o te tataanga tei tukuna mua ia ki roto i te komupiuta. E i roto i teia tu i riro mai ei te Pipiria ei mea puapinga maata. Kua uri meitakiia te reira i roto i te au reo e manganui, ka rauka ngoie ua ia, e te vai ra tetai aka putunga tataanga. No reira ko te Pipiria te ikianga mua a te tangata kimikimi i te terenianga i te komupiuta i tetai reo ou.