Au Oronga Anga te Akareka ra i to te Atua Ngakau

KARE te tua i te mea reka ia. Kua rave te Ariki Vaine ko Atalia i te terono o Iuda na te akavare anga e te ta anga. I te manako tarevake anga e kua mate pouroa te au uanga tikai i te taiaia, kua akamana aia iaia uaorai ei ariki vaine. Tetai vaine akaou mai, te ariki tamaine ko Iehoseba, tei inangaro akaperepere tikai ia Iehova e tana Ture, kua mataku kore i te uuna i te uanga ariki, te pepe ko Ioasa. Kua uuna a Iehoseba raua ko tana tane, te Kau Taunga Maata ko Iehoiada, i te uanga e ono mataiti i roto i to ratou au ngai nooanga o te iero.​—2 Ariki 11:1-3.

Tae ki te tuatau e kua tae a Ioasa i te itu mataiti i te pakari, kua papa te Kau Taunga Maata ko Iehoiada i te akamata i tana parani kia akaatea i te ariki vaine noinoi mei tona terono rave pikikaa ia mai. Kua apai mai aia i te tamaiti mei te ngai uunaia e kua akakorona iaia e ko te uanga tika tikai ki te patireia. I reira kua kika atu ia te Ariki Vaine kino ko Atalia e te au kati ariki ki vao i te ngai o te iero e kua tamateia, ki te mataora e te rekareka o te au tangata. Na ta raua angaanga, kua tauturu maata a Iehoiada raua ko Iehoseba ki te akaoki akaou mai anga i te akamori mou ki te enua o Iuda. Inara tei maata atu, kua tauturu raua i te tamou marie anga i te uanga ariki o Davida, te ka taki atu ki te Mesia.​—2 Ariki 11:4-21.

Ka inangaro katoaia te ariki akamana ouia kia oronga i tetai apinga oronga ua te ka akareka i to te Atua ngakau. Kua inangaro maataia te are o Iehova kia akaouia. To Atalia inangaro maata kia riro mai e ko te tutara anake ua o Iuda kua akatupu kare ua i te akaruke anga o te iero mari katoa i te keia anga o te reira. E no reira kua akanoo a Ioasa i tona ngakau i te patu akaou anga e te akaou anga i te iero. Kare i taroaroa ana, kua oronga aia i tetai akauenga kia akaputu i te au moni inangaroia no te akaou anga i to Iehova are. Kua karanga aia: “Te au moni tapu i apaiia mai ki roto i te are o Iehova, te moni a te aronga katoa i tatauia ra, te moni akaora i te vaerua i akonoia no te tangata katoa, e te moni katoa ta te ngakau o te tangata i anoano i te apai mai ki roto i te are o Iehova, Na te kau taunga e akaputuputu no ratou, te tangata katoa tana e tau ra; ka rave akaou ei i te au ngai i ngaangaa i te are nei, kia kitea atu taua au ngai ngaangaa ra.”​—2 Ariki 12:4, 5.

Kua oronga puareinga ua te au tangata. Te au kau taunga, ra, kare i tae te ngakau i te akatupuanga i ta ratou apainga i te akaouanga i te iero. No reira, kua iki mai te ariki i te akono tikai i teia manamanata e kua akaue kia aere tika pouroa te au moni tauturu ki roto i tetai pia takake. Kua tuku aia ia Iehoiada ei tiaki, e te karanga ra te tataanga: “Kua rave akerā Iehoiada taunga i tetai pia, e kua ou aia i tetai rua i te tapoki o taua pia ra, kua tuku iora ki te pae atarau, ki te pae katau kia tomo mai ki roto i te are o Iehova: e kua tuku iora te taunga i tiaki i te ngutupa i te au moni katoa, i apaiia mai ki roto i te are o Iehova, ki roto. E koia rai kia akara ratou e, kua maata te moni i roto i taua pia ra, kua aere maira ki runga te tata tuatua a te ariki, e te taunga maata, kua tata iora i te moni i rauka i roto i te are o Iehova, e kua aao iora ki roto i te au pute. E oti akera taua moni ra i te tatauia, kua tuku iora ratou ki te rima o te aronga i rave i taua angaanga ra, ko tei akara i taua are o Iehova ra: e pou akera ia ratou i te tutaki aere i te au taunga tarai rakau, e te aronga patu, tei rave i te angaanga i taua are o Iehova ra, E tei te au taunga, e te tarai toka, e tei te oko rakau oki, e te toka taraiia ra, ei tuā i te au ngai i ngaangaa i te are o Iehova, e tei te au mea katoa i okoia ei tuā i taua are ra.”​—2 Ariki 12:9-12.

E ngakau tae tikai te ariuanga o te tangata. Kua akaou akaouia to Iehova are akamorianga e rauka ai tana akamorianga i te tamou marie i roto i te tu ngateitei. No reira, pouroa te au moni tauturu kua taangaanga meitakiia. Kua akapapu te Ariki ko Ioasa i te reira!

I teia tuatau, te akara meitaki ra ta Iehova akaaerenga e pouroa te moni orongaia te taangaanga meitaki ia ra kia akatere i te akamorianga no Iehova ki mua, e kua ariu mai te au Kerititiano mou mei taua au Iseraela taito ra i rave​—na roto i te tu ngakau tae. Penei ko koe tetai i roto i taua aronga tei oronga tauturu ki te akamaata anga o te au inangaro Patireia i teia mataiti tavini anga i topa akenei. E akara ana tatou i tetai au mataara i taangaangaia ai taau au oronga anga.

NENEI ANGA

Takapini i te ao katoa, kua neneiia te au puka tei aru mai no te apii e te tua anga:

• Au puka: 47,490,247

• Au puka rikiriki: 6,834,740

• Au poroutia: 167,854,462

• Au karena: 5,405,955

• Au makatini: 1,179,266,348

• Au aenga pepa: 440,995,740

• Au vitio: 3,168,611

Kua raveia te neneianga i Aperika, Marike Tokerau, Rotopu, e te Tonga, Asia, Europa, e te au pa enua Patipika​—e 19 enua te katoatoa.

“Ko Katelyn May toku ingoa. E varu oku mataiti i te pakari. E $28 aku tara, e ka inangaro au ia kotou kia apai i te reira kia tauturu i te tutaki no te au matini neneianga. Toou tuaine meangiti ka ua, ko Katelyn.”

“Kua uipaanga matou ei pamiri no runga i te au apinga neneianga. Kua iki mai ta maua tamariki, e 11 e te 9 mataiti, i te kiriti mai i tetai moni mei ta raua moni akaputu e kia oronga i ta raua tuanga. Te mataora nei maua i te tuku kapiti atu i ta raua tauturu ki ta maua.”

PATU ANGA

Tei aru mai ko tetai o te au angaanga patu anga tei raveia i te turuturu i te au angaanga a te Au Kite o Iehova:

• Au Are Uipaanga Patireia i te au enua ma te au tauturu kotingaia: 2,180

• Au Are Akaputuputuanga: 15

• Au Manga: 10

• Aronga tauturu i te pa enua i roto i te tavini anga tamou: 2,342

“I teia openga epetoma kua raveia ta matou uipaanga mua i roto i to matou Are Uipaanga Patireia ou. Kua mataora tikai matou e kua rauka i tetai ngai meitaki kia akapaapaa i to tatou Metua, te Atua ko Iehova. Te akameitaki nei matou ia Iehova e ia kotou no te akamanakoanga i to matou au inangaro na te patu maata atu anga i te Au Are Uipaanga Patireia. E tikai, e apinga puapinga tikai to matou Are Uipaanga Patireia ki te oire tangata.”​—Tire.

“Te akaperepere maata tikai nei te au taeake e te au tuaine i te tauturu tei orongaia mai e te akaaerenga o Iehova. Ki teia tuatau, te tuatua nei rai matou no runga i te taime mataora tikai ta matou i akapou ma te aronga patu anga.”​—Morotova.

“Kua akamaara ua akenei maua ko taku vaine i to maua 35 mataiti akaipoipoanga. Te kimi ra maua eaa ta maua ka oake ki tetai e tetai no teia atianga, e kua manako mai maua i te akaoki i tetai apinga kia Iehova e ki tana akaaerenga, no te mea naringa kare ta ratou tauturu, kare roa maua e puapingaia i to maua akaipoipoanga. Ka inangaro maua kia taangaangaia te moni tukunaia atu nei i te tauturu anga i te patu anga i tetai Are Uipaanga Patireia i roto i tetai o te au enua putaua.”

“Kua tu ua akenei au i tetai akatuanga anga, e mei te mea e e meangiti ua taku ‘au inangaro’ e e meangiti rava atu taku ‘au umuumuanga,’ ka inangaro au i te oake atu i teia moni tukunaia atu nei kia tauturu i te patu i te Au Are Uipaanga Patireia, te umuumu maataia ra i roto i te au enua e manganui.”

TAUTURU TUMATETENGA

I roto i teia au tuatau openga, e tupu putuputu ana te au tumatetenga ma te kore e matakiteanga. E manganui te Au Kite o Iehova e oronga maata atura i te au moni tauturu kia rauka te au taeake i roto i te au ngai rokoia i te tauturuia. Ei akamaaraanga, te akaaereia ra te tauturu tumatetenga ei tuanga o te angaanga takapini i te ao katoa. Tei aru mai ko tetai au ngai i tauturu ei te Au Kite o Iehova i te au tangata tei rokoia e te tumatetenga:

• Aperika

• Asia

• Ngai i Karapieni

• Au Airani o te Patipika

“Te inangaro nei maua ko taku tane i te akameitaki maata tikai ia kotou no te tuku mai anga i te au apinga no te au tautaanga tauturu no te kino tei tupu i te tuatau o te au uriia. Kua rauka ia maua i te tamou i tetai tauu are ou ki runga i to maua are. Te rekareka tikai nei maua e kua ariu viviki mai kotou.”

“Ko Connor toku ingoa, e e 11 oku mataiti. I toku kiteanga i te tsunami i te u atu anga, kua inangaro mai au i te tauturu. Te manakonako atu nei au e ka tauturu teia i toku au taeake e te au tuaine.”

AU TAVINI TINAMOU TAKAKE

Te tavini tinamou ra te au numero Kerititiano i roto i te angaanga evangeria me kore i roto i te au kainga Betela. Tetai aronga tauturu tamou te turuturuia ra e te au tauturu oronga ua. I roto i teia ko te aronga tei aru mai:

• Au mitinari: 2,635

• Au akaaere tutaka: 5,325

• Au aronga Betela: 20,092

“Mei te mea e kare e rauka iaku i te tavini i teianei i ko i te Betela [e tamaiti e rima mataiti i te pakari], te inangaro nei au i te tuku atu i teia moni tauturu ma te aroa maata. Me maata mai au, ka aere au ki Betela i te angaanga pakari.”

Akamaroiroi Anga i te Apii Pipiria

Kua akaue a Iesu Karaiti i tana au pipi kia “akariro i to te pa enua katoa ei pipi.” (Mataio 28:19) I te akarongo anga i tana au tuatua, te angaanga ra te Au Kite o Iehova i te tutu anga e te apii anga i te karere Pipiria i roto e 235 enua. E nenei ana ratou e e tua ana i te au puka Pipiria i roto e 413 reo.

E tikai, te tauturu puapinga maata rava atu ka rauka i tetai Kerititiano i te rave kia kite maata mai te au tangata no runga i te Atua e Tana au akakoroanga koia oki ko tona taime. Kua oronga maata te Au Kite o Iehova i to ratou taime e te maroiroi i te tauturu anga i to ratou au tangata tupu. Kua oronga aroa katoa ratou na roto i te pae o te moni, e pouroa ta ratou au tauturu, i roto i te au tu ravarai, kua tauturu i te akakiteanga i to Iehova ingoa e te akakoroanga i roto i te enua katoa nei. Kia akameitaki ua atu rai Iehova i teia au tautaanga i te tauturu i tetai ke kia kite maata atu no runga iaia. (Maseli 19:17) Taua tu puareinga te akarekareka ra i to Iehova ngakau!​—Ebera 13:15, 16.

[Pia i te kapi 28-30]

Au Ravenga ta Etai e Iki ra no te Oronga

AKAPUTUANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia: “Akaputuanga no te Angaanga i Teianei Ao​—Mataio 24:14.”

Te au marama katoatoa, e tuku ana te au putuputuanga i teia au moni ki te opati manga o te Au Kite o Iehova te akono ra i to te reira au enua tataki tai. Kia tuku tika katoaia te au moni tauturu tei oronga uaia ki te Treasurer’s Office, Watchtower Bible and Tract Society of New Zealand, P O Box 75-142, Manurewa, me kore ki te opati manga o te Au Kite o Iehova e akono ra i toou enua. Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputu anga no te akakite i teia apinga aroa tikai.

AKANOOANGA I TE TURANGA NO TE TAUTURU

Penei ka orongaia te moni na roto i tetai akanooanga takake e, me ka pati mai te tangata oronga ra i te reira, ka akaokiia atu te moni oronga ua kiaia. No tetai akakite anga maata atu, e tata ki te Treasurer’s Office i te atereti i akakiteia i runga akenei ine.

PARANIANGA ORONGA UA

I te pae i te au moni oronga aroa ua e te au moni oronga tauturu ua, te vai ra tetai atu au ravenga orongaanga no te akapuapinga i te angaanga Patireia i teianei ao. Te kapiti maira teia i te:

Initurini: Penei kia tukuia te ingoa o te Watchtower Society e ko tei puapingaia mei tetai koreromotu initurini no te oraanga me kore tetai akapapaanga akaangaroi anga/moni pakari.

Apinga Akaputuia e te Au Poni: Penei ka orongaia te au apinga akaputuia e te au poni ki te Watchtower Society ei apinga aroa.

Are e te Enua: Penei ka orongaia te au enua e te au are ka rauka i te oko ki te Watchtower Society ei apinga aroa me kore, na te akono anga i tetai koreromotu no te au apinga o te oraanga ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaia ai tetai ua atu enua e te are.

Au Koreromotu e te Au Taokotaianga: Penei ka oronga tikaia te apinga me kore te moni ki te Watchtower Society na roto i tetai koreromotu tikaia e te ture, me kore kia tukuia te ingoa o te Watchtower Society te ka puapingaia no tetai koreromotu no te taokotaianga.

[Akameitakianga no te Tutu i te kapi 27]

Faithful video: Stalin: U.S. Army photo