Ka Inangaro Ainei Tatou i Tetai Mesia?

PENEI ka ui koe i taua uianga ra e, “Ka inangaro ainei tatou i tetai Mesia?” Ae, e mea tau i te ui e me ka akatupu tikai ainei tetai Mesia i tetai akakeu anga ki runga ia koe.

Ko te manako o etai aronga taau e akangateitei ra ka akapapu mai kia koe ra e te marama ua ra e te taka meitaki ua te pauanga: Ka inangaro tikai koe i tetai Mesia, mei ta te katoatoa e inangaro ra. Kua tata tetai tangata kite i roto i te ture ngati Iuda i te anere mataiti mua no runga i te Mesia e: “Noatu e mei teaa te maata te au totou a te Atua, kua riro mai te reira ei Tika Tikai oki i roto iaia.” Kua akakite mai aia i te tuanga maata ta te Mesia ka rave i roto i te akakoroanga a Tei Anga ra i te akameitaki anga i te pa enua ravarai o te enua nei. (2 Korinetia 1:20, NW) E puapinga maata tikai te tuanga a te Mesia e kua riro mai tona tae anga mai e te oraanga e tumu anga no te totou o te Pipiria. I roto i tetai puka tei taangaangaia e te au mirioni ua atu tere atu i te 70 mataiti i topa akenei, kua akakite mai a Henry H. Halley e: “Kua tataia te Koreromotu Taito ei akatupu i tetai tapapaanga, e te akatuera maira i te mataara, no te Aerenga Mai o [te Mesia].” Inara ka anoanoia ainei tona aerenga mai? Eaa ra koe ka manako atu ei i te reira?

Te aite anga tikai o te “Mesia” ra ko “Tei Akatainuia” e kua aiteite ki te tuatua tei kite meitakiia ko “Karaiti.” Koia Tei, ta te Encyclopædia Britannica, Tataanga 1970, i taiku maira e “te oko maata roa atu,” kua aere mai no te apa a te nga tangata mua, ko Adamu raua ko Eva. Kua anga apa koreia raua, ma te manakonako anga reka no te oraanga ope kore i roto i te Parataito, inara kua ngaro ia raua taua manakonako anga. Kua akakite atu tetai angera meameaau, tei kiteaia mai e ko Satani te Tiaporo, e te arairai maata tikai ra Tei Anga mai ia raua ra e e meitaki atu kia rave raua i ta raua uaorai iki anga e eaa te mea meitaki e eaa te mea kino.​—Genese 3:1-5.

Kua akavareia a Eva e kua irinaki atu ki taua pikikaa. I te akara anga no te akaperepere anga i te pirianga o tana vaine i runga ake i te tiratiratu ki te Atua, kua turu atu a Adamu i taua meameaau tei akamataia mai e te Tiaporo. (Genese 3:6; 1 Timoteo 2:14) Na roto i ta raua au angaanga, e maata atu ta raua i akaruke i to raua uaorai manakonako anga no te oraanga ope kore i roto i te ngai parataito. Kua oronga mai raua ki ta raua uanga kare i anauia ake i te ara e tona ra tupu anga, ko te mate.​—Roma 5:12.

Kua akakoro viviki i reira Tei Anga mai ia tatou, ko Iehova, i te au ravenga kia taui i te au akatupu anga kino o te papaanga no te au tupuanga tei akamataia mai e te meameaau. Ka akatupu aia i tetai akaongi anga na roto i tetai ravenga te ka riro mai i muri mai e e kaveinga ture i roto i te Ture a Mose​—ei akaaiteite anga. (Deuteronomi 19:21; 1 Ioane 3:8) Kia akamerengoia teia kaveinga ture me ka rauka i tetai ua atu uanga manuia kore a Adamu raua ko Eva te oraanga ope kore i runga i tetai enua parataito, mei ta Tei Anga maira i akakoro ana no te au ngutuare tangata. Te taki atura teia ia tatou ki te Mesia.

I te akautunga anga i te Tiaporo, kua akakite te Atua ko Iehova i roto i te totou mua o te Pipiria e: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:15) Kua akakite mai tetai tangata apii Pipiria e “te tua no te au taputou a te mesia tei orongaia mai i roto i te au Tuatua Tapu kua akamata mai te reira ki [teia] tuatua.” Kua akakite mai tetai e e rima rave te Mesia na te Atua te “ka taui i te tumatetenga katoa no te ara,” e i taua taime rai te apai maira i te au akameitakianga ki te tangata ravarai.​—Ebera 2:14, 15.

Inara, penei kua kite koe e kare tikai te au tangata e akameitakiia nei. Mari ra, te kite maata nei te au tangata ravarai i te manakonako anga puapinga kore ua e te taitaia. No reira, te karanga ra The World Book Encyclopedia e “e manganui te au ngati Iuda te tapapa ua nei rai i to te Mesia aere anga mai” e nana oki “e akatikatika i te au tarevake e te akakore anga i te au enemi o te au tangata ra.” Inara, te karanga ra te Pipiria e kua aere takere mai te Mesia. E tumu anga ainei tetai kia irinaki atu i ta te Pipiria e karanga ra? Na te atikara e aru mai nei e pau mai.