E Puapinga Ainei e ko Teea Akonoanga Taau ka Iki?

E INANGARO ana te maataanga ia tatou e kia maata te au apinga ta tatou ka rauka i te iki mai me aere tatou i te okooko. Me oronga mai te makete i te au tu ua rakau e te au vetitaporo tuke tuke, ka rauka i reira ia tatou i te iki i te au mea reka rava atu e te meitaki no to tatou pamiri. Me e maata te au vaito e te kara kakau mama ua ta tetai toa kakau ka oronga mai, ka rauka ia tatou i te iki i te au mea ka tau meitaki ia tatou. Tetai au ikianga e rave ana tatou i roto i te oraanga, e akaarianga ua te reira i to tatou uaorai inangaro tataki tai. Tetai papaki ra, ka akatuke te reira i to tatou turanga, ei akaraanga, te kai meitaki no te kopapa me kore te au taeake tu pakari ta tatou ka iki. Akapeea i reira ta tatou ikianga no runga i te akonoanga? Ka riro ainei te mataara e akamori ra tatou ei akaarianga ua i to tatou uaorai inangaro? Me ka riro ainei te reira ei akatuke maata i to tatou turanga?

E maata ua atu te au akonoanga tuke tuke ka rauka i te iki mai. Te akapapu ua maira te au enua e manganui i teianei, i te turanga rangatira o te akonoanga, e te maata ua atura te tangata e akaruke ra i te akonoanga a to ratou au metua. I roto i tetai tareanga i Marike, kua kitea mai e e 80 patene au tangata i Marike tei “irinaki e e maata atu i te okotai ua akonoanga e taki ra ki te ora.” Te na ko ra taua tareanga ra e, “e tai i roto i te toko rima tangata tei akakite mai e kua tangata mamaata ratou i taui ei i ta ratou akonoanga.” Kua akaari mai tetai kimikimianga i Paratiri e vaitata rai e 25 patene tangata i Paratiri tei taui i ta ratou akonoanga.

I mua ana, e mea taumaroia e te tangata te au apiianga tei tuke mei tetai akonoanga ki tetai. Teianei ko te manako maata koia oki, ‘Kare i te mea puapinga e ko teea taau akonoanga ka iki.’ E puapinga ainei ra te reira? Ka akatuke ainei taau ikianga akonoanga ia koe?

Mei te aronga okooko ngakau pakari e uiui ana no runga i te ngai no reira mai teia au apinga e orongaia nei, penei e mea tau kia ui koe e i, ‘Akapeea ra teia au akonoanga tuke tuke i te akamata mai anga, e no teaa ra?’ Na te Pipiria e oronga mai i te au pauanga.

Akapeea te Au Akonoanga i te Akamata Mai Anga?

I Iseraela i taito, kua akamata te Ariki ko Ieroboama i tetai akonoanga ou vaitata rai e tai tauatini mataiti i mua ake ka aere mai ei a Iesu ki te enua nei. Ko Ieroboama te ariki mua o te patireia apatokerau o Iseraela tei akatakake mai ia ratou. E angaanga ngata tikai tana e aro atura i te taokotai mai anga i te tangata ki raro i tana akatereanga. “Kua kimi iora te ariki i te ravenga, e kua anga iora i nga punua puakatoro auro e rua ra, e kua karanga atura ki to Iseraela, Angaanga maata ta kotou i te aere ua anga ki Ierusalema; i na to atua, e Iseraela e.” (1 Ariki 12:28) Te taka meitaki ra e, kua inangaro te ariki i te taangaanga i te akonoanga ei akaariuke i te inangaro o te tangata mei Ierusalema, te ngai matauia e ratou i te akamori. Kua vai rai te akonoanga ta Ieroboama i akamata no tetai au anere mataiti e kua taopenga mai ki te pou o te au mirioni ua atu, i te akautunga anga te Atua i te patireia apoteiti o Iseraela. Ko te akonoanga ta Ieroboama i akamata, e ravenga ua te reira kia rauka te mana poritiki. Tetai au akonoanga o te Enua tei vai mai ki teia tuatau, i akamata mai rai na roto i te au tautaanga kia akaririnui atu i te mana poritiki.

Kua akaari katoa mai te apotetoro ko Paulo i tetai akakoroanga ke i akamata ai te tangata i tetai akonoanga ou i te tuatua anga aia e: “Kua kite oki au kia riro ke atu au, ka o mai ei te luko taae ki roto ia kotou na, kare e akaperepere i te anana. E ka tu mai oki te tangata mei roto ia kotou uaorai, e tuatua mai i te tuatua mingi, kia aruia ratou e te pipi.” (Angaanga 20:29, 30) Maata te taime e akamata ana te au arataki akaparau i te au taokotaianga akonoanga ei akaepaepa ia ratou uaorai. Kua riro te au pupu e manganui ei akamavete i te au akonoanga e tapikipiki ra e e Kerititiano ratou.

Koai ta te Au Akonoanga e Inangaro ra i te Akarekareka?

Penei ka riro te ariu anga ki te inangaro o te maataanga ei akakeu i tetai aronga kia akamata i tetai akonoanga ou. Ei akatauanga, kua ripoti mai te makatini Economist no runga i tei karangaia e e au akonoanga mamaata i Marike. Te akakite ra te atikara e te maata ua atura teia au akonoanga no te mea kua “akanooia te reira ki runga i te au kaveinga a te au pitiniti puapinga: na te tuku anga i te inangaro o te au mema na mua.” Tetai papaki e tamataora ana ratou i te “au akoanga na roto i te au vitio, te au nuku, e te au akatangitangi anga imene ou.” Te karanga ra te au arataki o tetai au akonoanga e te apii ra ratou i to ratou au mema kia “rauka te apinga nui, te maroiroi e te manamanata kore.” Noatu te akaapaia ra taua au akonoanga ra no tei piri ki te angaanga tamataora me kore ki “te angaanga rapu ia koe uaorai,” te karanga ra taua makatini ra e, “te rave ua ra ratou i te reira no te mea te umuumuia maira.” Te taopenga ra te ripoti e: “Kua puapinga maataia te taokotaianga i rotopu i te pitiniti e te akonoanga.”

Noatu kare te tu pitiniti o tetai au akonoanga e kite ateaia ana, ko te au akonoanga ra e “ariu atura ki tei inangaroia maira,” te akamaara maira te reira ia tatou i te akamatakiteanga ta Paulo i oronga mai. Kua tata aia: “Te vai atura oki te tuatau e kore ei ratou e āriki i te tuatua-mou; no te navenave o to ratou taringa e akaputu ei ratou i te orometua e tau i to ratou uaorai inangaro; E ariu ke oki to ratou taringa i te tuatua-mou, e anga atu ei ki te tuatua taeke ua.”​—2 Timoteo 4:3, 4.

I te mea e maata te au akonoanga tei tupu mai na roto i te anoano mana poritiki, te turanga ngateitei, e te arikianga tei rekaia, e kare no te anoano tikai i te akarekareka i te Atua, kare i reira i te mea poitirere e te piri nei te akonoanga ki roto i te au tu kino mei te takinokino tamariki, te angaanga pikikaa, te tamaki, me kore te tamataku. Te maataanga i te taime e pikikaa ua rai te akonoanga. Akapeea koe i te kopae anga kia kore e akavareia?

[Tataanga i te kapi 4]

E maata te au akonoanga tei tupu mai na roto i te anoano mana poritiki, te turanga ngateitei, e te arikianga tei rekaia, e kare no te anoano tikai i te akarekareka i te Atua