Ka Ui ta Tatou Aronga Tatau
Kua Atoro Tikai Ainei Te Au Tangata Pakari E Toru I Te Pepe Ko Iesu?
Te akatutu maira te tua o te tuatau Kiritimiti o mua ana mei Marike Apatonga ki Europa Itinga e ki Asia, i te Anauanga o Iesu e tetai au ariki tokotoru, e apai ra i te au apinga aroa na te pepe anau ou ko Iesu. E tua tika ainei teia? Te tano ra ainei te reira ki te au mea tika tikai tei tupu? Ka akara ana ra tatou.
E rua nga Evangeria, ko Mataio raua ko Luka, tei rekoti i te anauanga o Iesu. Te akaari maira teia nga papaanga e, e au tiaki mamoe akaaka ua rai mei te au koro i vaitata mai, tei aere i te atoro ia Iesu i tona anauanga. Ko te au ariki, me kore te au tangata pakari, e aronga akara etu ratou, kare i te ui ariki, e kare te Pipiria i akakite mai e, e tokoia ratou. Kare te aronga akara etu i aere tika ana ki ko i te pepe anau ou i roto i te are puakatoro, mari ra kua tae atu ratou i te tuatau e tamaiti meangiti ua a Iesu, e te noo ra i roto i tetai are. Kua riro katoa to ratou taenga atu ei akatupu i tetai mea te ka takino i te oraanga o Iesu!
Akara meitaki ana i te papaanga no te anauanga o Iesu tei tataia e te tangata tata Pipiria ko Luka, ka kite koe e te karanga ra e: “E aronga tiaki mamoe . . . e tika ki roto i te au koro, i te tiaki anga i ta ratou anana i te po. E i na, kua tu maira tetai angela a te Atu ki vaitatao ia ratou, . . . kua tuatua maira te angela kia ratou . . . e kite kotou i taua tamaiti ra i te vai ua anga ki roto i te are puakatoro, kua vaîia ki te kakau . . . Aere viviki atura ratou, e kite atura ia Maria raua ko Iosepha, e te tamaiti i te vai ua anga ki roto i te are puakatoro.”—Luka 2:8-16.
Ko Iosepha ua e Maria, e te au tiaki mamoe tei ko i te pepe ko Iesu. Kare e aronga ke atu i tareia mai i roto i te ripoti a Luka.
Teianei ka akara ana i te papaanga a Mataio 2:1-11 mei roto i te Pipiria King James: “Kia anau a Iesu i Betelehema i Iudea ra, i te au rā o te ariki ra o Heroda, i na, e au tangata pakari tei aere mai ki Ierusalema, mei te itinga o te rā mai . . . E tae atura ratou ki roto i te are, kite atura ratou i taua tamaiti iti ra, e tona metua vaine ko Maria.”
Akara ana ra e te akakite ra te papaanga e ko te “au tangata pakari” ua, kare e e “toru au tangata pakari,” e i aere mai ratou na mua mei te itinga mai ki Ierusalema, kare ki to Iesu oire anau, ko Betelehema. I te taime i tae atu ei ratou ki Betelehema, e “tamaiti iti ” a Iesu—kare aia i te pepe—e kare katoa i roto i te are puakatoro, mari ra tei roto i tetai are.
Tetai katoa, i te Pipiria King James e taangaanga ra i te tuatua “au tangata pakari” i te akataka mai i teia au manuiri, te taangaanga ra etai atu au urianga i te tuatua “Taunga Purepure” me kore “aronga akara etu.” Kia tau ki te A Handbook on the Gospel of Matthew, ko te tuatua “au tangata pakari” e urianga te reira no “tetai nomena Ereni e tuatua ra i te au taunga Peresia, e aronga kite karape i te akara etu.” E te akamarama maira te puka The Expanded Vine’s Expository Dictionary of New Testament Words i taua tuatua ra ei “tangata manamana, tangata purepure, e tangata pikikaa e e mana angaanga manamana tona, e tangata tei karanga e e taunga aia no te angaanga purepure.”
Noatu te rave matauia nei te angaanga akara etu e te purepure i teia tuatau, te akamatakite maira te Pipiria eiaa e rave i te reira. (Isaia 47:13-15) Ko tetai tu purepure te reira, e e au angaanga viivii anake ki te Atua ko Iehova. (Deuteronomi 18:10-12) Ko te tumu tera kare e angera i akakite ana i te anauanga o Iesu ki te aronga akara etu. Inara, na roto i te moemoea, kua akamatakite mai te Atua ia ratou eiaa e oki e akakite ki te ariki kino ko Heroda, i te mea te umuumu maira aia e ta ia Iesu. No reira kua “aere atura ratou ki to ratou uaorai enua na tetai ara ke.”—Mataio 2:11-16.
Ka inangaro ainei te au Kerititiano mou kia akamou ua atu rai ki te tua maani ua tei taviriviri i te tuatua mou tikai no runga i te Anauanga o Iesu? Papu rava e ko te pauanga koia oki, kare.