Puapinga Ainei te au Pauanga?
“Ka kite ïa kotou i te tuatua-mou, e na te tuatua-mou kotou e akarangatira.”—IOANE 8:32.
TEI roto i te Pipiria te tuatua mou te ka akarangatira ia tatou mei te au irinakianga kononinoni me kore tarevake no runga ia Iesu. Inara, e puapinga tikai ainei eaa ta tatou e irinaki ra no runga iaia? Ae, e puapinga te reira kia Iehova, kia Iesu e kia tatou.
● Eaa ra te reira i puapinga ai kia Iehova? No te mea “ko te Atua oki te aroa.” (1 Ioane 4:8) Te inangaro ra a Iehova kia noo mataora ua tatou e tuatau ua atu. Kua tuatua a Iesu e: “I aroa mai te Atua i to te ao nei [te au tangata ravarai], kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Kua tono mai te Atua i tana Tamaiti ei Akaora no tatou e ei akatuera i te mataara no tatou kia noo ki runga i te enua Parataito e tuatau ua atu, kia rotai ki Tona akakoroanga mua. (Genese 1:28) Te inangaro ra te Atua i te oronga i te apinga aroa no te ora mutu kore ki te aronga tei apii i te tuatua mou no runga i tana Tamaiti e tei aru rotai i te reira.—Roma 6:23.
● Eaa ra te reira i puapinga ai kia Iesu? Te aroa katoa maira a Iesu i te tangata. Kua akaari mai aia i te aroa akaatinga anga na te oronga puareinga mai anga i tona oraanga no tatou. (Ioane 15:13) Kua marama aia e te oronga maira aia i te ravenga anake ua no te ora. (Ioane 14:6) Ka poitirere ainei tatou e te inangaro ra a Iesu i te kite e e manganui te ka puapingaia mei tona atinga oko? No reira aia i akaue ei i tana au pipi mou kia apii i te au tangata takapini i te ao no runga i to te Atua anoano e tona akakoroanga.—Mataio 24:14; 28:19, 20.
● Eaa ra te reira i puapinga ai kia tatou? Ka akamanako poto ana i te au mea e puapinga maata ra kia koe—toou oraanga kopapa e toou pamiri. Te inangaro ra ainei koe i tetai oraanga kopapa meitaki e tetai oraanga meitaki noou uaorai e no toou aronga akaperepere? Te oronga maira a Iehova na roto ia Iesu i te manakonakoanga no tetai oraanga kopapa apa kore e tetai oraanga mutu kore i roto i tetai ao ou, noou e no toou aronga akaperepereia, e oraanga kare e mamae e te tamamae anga. (Salamo 37:11, 29; Apokalupo 21:3, 4) Ka inangaro ainei koe i te noo i roto i tetai ao mei tera rai? Me koia ia, te vai ra tetai apinga ka rave koe.
Akara akaou i te irava tei taikuia mai i te akamataanga: “Ka kite ïa kotou i te tuatua-mou, e na te tuatua-mou kotou e akarangatira.” Ka riro te tuatua mou no runga ia Iesu e tana ka rave no te akatupuanga i to te Atua akakoroanga ei akarangatira ia tatou mei te tuikaa kino roa atu—te tuikaa ki te ara e te mate. E kite ei koe i taua akarangatira anga, ka anoanoia koe kia ‘kite i te tuatua-mou.’ Eaa ka kore ei e apii atu no runga i teia tuatua mou e akapeea koe e toou aronga akaperepereia e puapinga ai mei te reira? Ka rekareka te Au Kite o Iehova i te tauturu ia koe.