3 Tauturu Kia Akakoromaki i te au Turanga Taitaia

MAKI KINO

Karanga a Rose: “E maki kino toku, kare e rauka i te rapakau e ka akatupu te reira i te mamae. Kua kino roa toku oraanga.” Tetai kare e rauka iaia i te akamou i tona manako ki runga i tana apii Pipiria e te au mea pae vaerua. Kua riro ra ta Iesu tuatua ei tauturu iaia i roto ia Mataio 19:26: “E tika ra te au mea katoa i te Atua.” Kite mai a Rose e ravenga ke atu tetai i te apii Pipiria. No tona mamae kare e rauka iaia i te tatau, kua akarongorongo aia i te au rekoti o te Pipiria e no tetai au puka.a Karanga aia, “Naringa kare teia au ravenga, kare toku turanga pae vaerua e ketaketa.”

Me maromaroa a Rose me kore kare e rauka iaia i te rave i tana i matau, ka rauka te pumaana i roto ia 2 Korinetia 8:12: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.” Akapapu tera au tuatua kia Rose e te mareka ra te Atua i tana e rave ra, noatu tona tu maki.

MAMAE NGAKAU

Kua maara ia Delphine: “Te mateanga taku tamaine e 18 ona mataiti, ati ngakau tikai au e kare au e kite eaa taku ka rave. Taui te au mea ravarai.” Rauka iaia te pumaana i roto ia Salamo 94:19, mei ta te tata salamo e karanga ra ki te Atua: “I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.” Karanga aia, “Pure au kia Iehova kia tauturu mai iaku i te kimi i te pumaana no toku mamae ngakau.”

Kua piri atu aia ki roto i tetai au angaanga tauturu i te tangata. Tei tupu, kua akaaite aia iaia ki tetai crayon a te tamariki—noatu kua ati ka rauka rai i te taangaanga. Koia katoa a Delphine, noatu tona ati ngakau, ka rauka rai iaia i te tauturu i tetai ke. Maara akaou iaia: “Kite mai au me taangaanga au i te au kaveinga Pipiria ei akapumaana i taku aronga apii Pipiria, ko ta Iehova tauturu tera kia rauka iaku te pumaana.” Kua tata aia i te au ingoa o te au tangata i roto i te Pipiria tei na roto ana i teia turanga. Kite mai aia, “E pure putuputu ana ratou.” Kite katoa mai aia e “kare e kitea te pauanga me kare koe e tatau i te Pipiria.”

Riro te apiianga i te Pipiria ei tauturu ia Delphine kia akamou i tona manako no te tuatau ki mua, kare ki to muri. Riro te manakonakoanga i roto ia Angaanga 24:15 i te akapumaana iaia: “E e tuakaouanga to tei mate, te aronga tuatua-tika e te aronga tuatua-tika kore.” Akapeea e papu ei iaia ka akatu akaou a Iehova i tana tamaine? Teia ta Delphine pauanga: “Ka kite akaou au i taku tamaine a te tuatau ki mua. Ka aravei maua a te ‘tuatau’ tei akanooia e Iehova. Te kite nei au ia maua i roto i te aua tiare, e ko toku inangaro iaia kua aite ki te rā i anauia mai ei aia.”