Orongaia Mai Tetai Apinga Puapinga Maata
1 Kua akaperepere te apotetoro ko Paulo i tana angaanga tei orongaia mai e te Atua kia tutu aere e kua taiku aia i te reira ei “apinga puapinga maata.” (2 Kori. 4:7, NW) Kua akakoromaki aia i te au akaaoanga e te takinga kino anga i te akonoanga i te reira angaanga. Kua tutu maroiroi aia ki te tangata ua tana i aravei atu. Kua akono aia i te au teretereanga ngata e manganui e te kino pakari i runga i te enua e te tai katoa. Akapeea tatou i te aruanga ia Paulo e te akaarianga e te akaperepere ra tatou i ta tatou angaanga orometua? (Roma 11:13) Eaa te akariro ra i ta tatou angaanga orometua ei apinga puapinga maata aite koreia?
2 Tetai Apinga Puapinga Maata Rava Roa: E apai putuputu mai ana te au apinga puapinga maata i te enua nei i te taitaia maata e e oronga ua mai ana te reira i te au akameitakianga kotingaia me kore no tetai tuatau poto ua. I tetai tua ra, te oronga maira ta tatou angaanga orometua i te au akameitakianga mutu kore kia tatou e ki tetai ke. (1 Timo. 4:16) E tauturu ana te reira i te au tangata ngakau tae kia kite mai ia Iehova, kia akono i te au tauianga i roto i to ratou oraanga, e kia rauka i tetai manakonakoanga tikai no te oraanga mutu kore. (Roma 10:13-15) Na te akangateitei maata anga i ta tatou angaanga orometua, ka rauka ia tatou i tetai akakoroanga merengo tikai i roto i te oraanga, tetai manakoanga papu no te akatupuanga, e te manakonakoanga akamaroiroi no te tuatau ki mua.—1 Kori. 15:58.
3 Akaari e te Akaperepere ra Koe i Taau Apinga Puapinga Maata: Te maata o te puapinga ta tatou e tuku ana ki runga i tetai apinga, e akaari putuputuia ana i roto i ta tatou e inangaro ra i te tutaki atu no te reira. Mei teaa tikai te arikianga i te akapouanga i to tatou taime e te maroiroi i te akapaapaaanga ia Iehova! (Ephe. 5:16, 17) Te tu e akapou ana tatou i to tatou taime ka akaari mai e te tuku maata ra tatou i te puapinga ki runga i te au apinga pae vaerua i to te au aruaruanga materia. I te mea e e apinga akaperepere tikai ta tatou e oronga ra, ka inangaro tatou i te tutu aere ma te maoraora e kia kite viviki mai i te au atianga ravarai i te akakitekite i te tuatua meitaki.
4 Tei matauia kare te au apinga oko maata e uunaia ana mari ra e akaariariia ana te reira no te katoatoa i te akarakara atu. Me akamanako tatou i ta tatou angaanga orometua ei apinga puapinga maata, ka riro te reira ei tuanga maata i roto i to tatou oraanga. (Mata. 5:14-16) Ma te ngakau rekareka, kia aru ua rai tatou i te apotetoro ko Paulo e kia akono i te au atianga ravarai i te akaari e te akaperepere tikai ra tatou i ta tatou angaanga orometua, te akangateiteianga i te reira ei apinga puapinga maata.