Akamaroiroianga no te Katoatoa
1. Eaa te au atianga takake ta te au tutaka a te au akaaere kotinga e oronga maira?
1 Kua tata te apotetoro ko Paulo ki te putuputuanga i Roma e: ‘E anoano maata toku kia kite atu ia kotou, kia tuku au i ta te vaerua ia kotou, kia akatinamouia kotou: Kia akamaroiroi oki au e kotou katoa i to tatou akarongo, i to kotou e i toku katoa oki.’ (Roma 1:11, 12) Te oronga maira te au tutaka a te au akaaere kotinga i teia tuatau nei, i te au atianga aiteite no te akamaroiroianga.
2. Eaa te tumu e akakite vaveia ana te tutaka a te akaaere kotinga?
2 Te Putuputuanga: Tei matauia e akakiteia ana te tutaka a te akaaere kotinga ki te putuputuanga e toru marama i mua atu. Kia rauka ia tatou i te tuatau kia taui i ta tatou papaanga kia puapinga meitakiia. (Ephe. 5:15, 16) Me te angaanga ra koe, penei ka rauka ia koe i te pati i tetai tuatau orote kia turuturu i te angaanga tutu anga i taua epetoma ra. E akanoo ana tetai pae i te painia tauturu i te marama o te tutaka. Me kua parani koe i te aere atu e ngai ke, ka rauka ainei ia koe i te akono i te au tauianga e rauka ai kia noo mai i tera epetoma?
3. Eaa ta tatou uaorai ka rave i te tuatau o te tutaka kia rauka te akamaroiroianga?
3 Tetai akakoroanga maata no te tutaka a te akaaere kotinga koia oki kia oronga i te akamaroiroianga e te terenianga uaorai i roto i te angaanga tutu anga. Ka rauka ainei ia koe i te pati kia angaanga atu kiaia me kore ki tana vaine me kua akaipoipo aia? E mataora ana te akaaere kotinga i te angaanga ki te au papuritia tukeke, kapiti mai te aronga e kare e tu katau roa ana me kore te ngere ra i tetai tu karape i roto i te angaanga orometua. Ka puapinga te katoatoa mei tana akatutuanga e kia taangaanga i te au tamanakoanga tana ka oronga takinga meitaki mai. (1 Kori. 4:16, 17) I te patianga iaia kia aere mai i te kaikai, te oronga maira i te au atianga kia akamaroiroi i tetai e tetai. (Ebe. 13:2) I te mea e kua akatanotanoia tana au akoanga ki te au anoano o te putuputuanga, e akarongo meitaki atu.
4. Akapeea tatou i te akamaroiroianga i to tatou akaaere kotinga?
4 Te Akaaere Kotinga: Kare te apotetoro ko Paulo i tuke roa mei te au taeake tana i tavini atu mei tera te tu e kua kite mai aia i te au akaaoanga e te au apiapi e kua akaperepere tikai aia i te akamaroiroianga. (2 Kori. 11:26-28) I te kiteanga te putuputuanga i Roma e te aere maira a Paulo ki reira, e mouauri i teianei, kua teretere atu tetai pae ki te Ngai Okookoanga i Apio Foro i te aravei iaia—e 74 kiro mita i te mamao! “Kite akerā Paulo ia ratou, akameitaki atura i te Atua, e maroiroi atura.” (Anga. 28:15) Ka rauka katoa ia koe i te akamaroiroi i toou akaaere kotinga. E akaari i te ‘akangateitei maata’ kiaia na roto i taau turuturuanga maoraora no tana tutaka. (1 Timo. 5:17) E akakite e e akaari i toou arikianga ngakau tae no tana au tautaanga noou. Ka mataora tikai aia e tana vaine, ia raua e akatau maira i toou akarongo, te aroa, e te akakoromaki.—2 Tesa. 1:3, 4.
5. Eaa tatou katoatoa ka anoano ei i te akamaroiroianga i teia tuatau?
5 I roto i teia “au tuatau kikino tei ngata roa no te akono atu,” koaiia tangata i rotopu ia tatou e kare e anoano ana i te akamaroiroianga? (2 Timo. 3:1, NW) Kia akakoro koe i teianei kia piri katoa atu ki roto i teia epetoma no te angaanga takake ma te akaaere kotinga. Ka rauka ia tatou katoatoa—te au akaaere kotinga e te au papuritia katoa—i te piri atu ki roto i tetai akamaroiroianga mataora. Na roto i teia mataara e rauka katoa ei ia tatou i te ‘akapumaana tetai ki tetai, e te akatupu i te meitaki tetai ki tetai.’—1 Tesa. 5:11.