Akaari Ana Koe e Peea me Apii i te Atoroanga Mua?

Me orongaia atu tetai apii Pipiria, tetai aronga ka karanga mai e kare ratou e inangaro, me kore te apii ra ratou i te Pipiria i ko i ta ratou pure. I te mea e kare ratou i kite e e tuke ta tatou apii anga i te Pipiria ki ta te au akonoanga ke, kare ratou i kite e ka riro te apii, kia marama e kia mataora ratou. No reira, i to te oronga ua i tetai apii, kore ei koe no tetai nga miniti, e akaari e peea me apii te Pipiria i te atoroanga mua? Ei akatutu: Eiaa e akakite ua e e tangata kite koe i te tunu kai, e oti ka karanga e, ka oki mai koe e tetai manga maoa; i reira rai, akaari kia ratou peea me tunu i te kai! Teia tetai mataara te rave i te reira no tetai nga miniti ua, akatumuia ki runga i tetai manako mei te kapi 6 o Ta Tatou Angaanga Patireia o Tianuare 2006:

“I toou manako ka tae mai ainei te tuatau e ka akatupuia teia au tuatua?” [Tatau ia Isaia 33:24, e tiaki no te pauanga.] Ka inangaro au i te akaari kia koe i tetai mea umere no runga i teia manako.” Oake i te puka Ta te Pipiria e Apii Maira ki te pu ngutuare, e e taki iaia ki te parakarapa 22 i te kapi 36. Tatau te uianga i raro roa i te kapi, e e pati i te pu ngutuare kia kimi i te pauanga, ia koe e tatau ra i te parakarapa. E oti ui akaou i te uianga, akarongo me pau te pu ngutuare. Tatau kapiti akaou i tetai irava ke mai. Ui i tetai uianga ka pauia me atoro akaouia atu, e e akanoo papu i te taime no te oki akaou. Kua akamata koe i tetai apii Pipiria!