Apii i Roto i te Poroutia Nuti Meitaki
1. I akapeea te tataangaia te poroutia Nuti Meitaki?
1 Mei tei uriuriia i roto i Ta Tatou Angaanga Patireia o Tiurai, tetai mea puapinga i roto i ta tatou vairanga puka koia oki, te poroutia Nuti Meitaki no ko i te Atua! Te au irava i taikuia i roto i teia poroutia, kare te au tuatua o taua au irava ra i tata pouroaia ki roto. Te tumu, ei akakeu i te pu ngutuare kia tatau mei roto tika mai i te Pipiria. Noatu kua tataia ta tatou au puka kia rauka i te tangata tatau i te apii, kareka teia poroutia kua tataia kia rauka i te uriuri kapiti ma te puapii. No reira me oronga tatou i te reira, akatutu e akapeea me apii, ei akakeu i te pu ngutuare kia kite aia i te mataora o te apii i te tuatua meitaki mei roto i te Pipiria.—Mata. 13:44.
2. Akapeea tatou me taangaanga i te poroutia Nuti Meitaki i te araveianga mua?
2 Te Araveianga Mua: Penei e karanga koe e: “Te aere mai nei au no te mea e manganui to tatou iti tangata e manamanata nei no runga i to tatou oraanga no te tuatau ki mua. I toou manako e ka meitaki mai te turanga o to tatou oraanga? [Tiaki no te pauanga.] E nuti meitaki to roto i te Pipiria, te oronga maira i te manakonakoanga no tatou. Teia tetai au uianga ka rauka i te Pipiria i te pau mai.” Oronga i te poroutia ki te pu ngutuare, pati iaia kia iki i tetai uianga i te kapi i muri. E oti taangaanga i te parakarapa mua o taua apii ra i te akatutu mai akapeea me apii. Tetai mataara ke mai, e ui i tetai uianga no runga i te apii taau i iki e oti akaari e ka akapeea te poroutia i te tauturu anga iaia kia kite i te pauanga a te Pipiria. Me e vitio tetai no tera apiianga i runga i te jw.org, e akatangi ana tetai au papuritia i te reira me rave ratou i te tuatua akatutuanga.
3. Akamārama mai ka akapeea me rave i tetai apii i roto i te poroutia Nuti Meitaki.
3 Akapeea me Rave i te Apii Pipiria: (1) Tatau i te uianga akatouia tei tanumeroia, ei tauturu i te pu ngutuare kia akamou ki te manako maata. (2) Tatau i te parakarapa e aru maira. (3) Tatau i te au irava tei akaararaia, taangaanga i te au uianga ka tau ei tauturu i te pu ngutuare kia kite e akapeea te irava i te pau anga i te uianga tei tanumeroia. (4) Me e parakarapa ke mai tetai i raro i te uianga, aru akaou i te au takainga i roto i te numero 2 e te 3. Me ka tano tetai vitio no te uianga e kare koe e akaari ake i te reira ki te pu ngutuare, akaari i te reira i te taime o te uriurianga. (5) Mea openga, ui eaa te pauanga a te pu ngutuare no te uianga tei tanumeroia, kia akapapu e kua mārama aia.
4. Eaa te ka tauturu ia tatou kia kite e kia tukatau i te taangaanga i teia puka apii?
4 Akamatau ia koe ki teia puka apii puapinga. Taangaanga i te reira i te au atinga ravarai ka tau. Mua ake i te apiianga okotai, akamanako i te tangata apii e te mataara meitaki roa atu i te akamārama kiaia i te au irava i roto i te apii. (Mase. 15:28; Anga. 17:2, 3) Me kite e me tukatau koe i te taangaanga i te poroutia, penei ko teia taau puka apii ka inangaro i te apii i te tuatua mou ki te tangata!