Oraanga Kerititiano e te Angaanga Orometua—Au Manako ke Mai

NOEMA 5-11

AU MEA UMERE I ROTO I TE PIPIRIA | IOANE 20-21

“Te Maata na Toou Anoano Kiaku i Teia?”

(Ioane 21:1-3) E muri akera, kua akakite akaou mairā Iesu iaia uaorai ki te au pipi i te roto i Tiberia ra, na ko aia i te akakite anga mai. ² Te putuputu katoa rā Simona Petero, ma Toma, ko te karangaia ia Didimo ra, e ko Natanaela i Kana i Galilea ra, e nga tamariki a Zebedaio ra, e ko e toko rua oki puke pipi a Iesu ra. ³ Kua karanga aturā Simona Petero kia ratou, Te aere nei au e tautai. Kua tuatua maira ratou, Aere katoa tatou. Aere atura ratou i reira ra ki runga i te pai; kare ua a ratou mea ika i rauka i te reira po.

(Ioane 21:4-14) E popongi akera, te tu ua rā Iesu i te pae roto ra: kare ra te au pipi i kite e ko Iesu. ⁵ Kua tuatua mairā Iesu kia ratou, E te au tamariki ra, e manga ta kotou? Kua karanga atura ratou, Kare ua. ⁶ Kua tuatua maira aia kia ratou, Ka tuku i te kupenga ki te pae katau i te pai na, ka rauka ïa ta kotou. Kua tuku atura ratou, e kare ua atura e maranga ia ratou kia kika i te maata o te ika. ⁷ Kua karanga atura taua pipi akaperepereia e Iesu ra kia Petero, Ko te Atu. Akarongo akerā Petero e, ko te Atu tera, ka kakau iora i tona kakau i runga, ko tei vaio keia e ia ra, e rere atura ki raro i te tai. ⁸ Na runga maira tetai pae pipi i te boti, ma te kupenga e te ika i te kika anga mai, (kare i mamao ua ki uta, ka tau i te rua anere i te kubiti.) ⁹ E tae maira ratou ki uta, akara atura i te ai te ka ra, e te ika ki runga, e te manga oki. ¹⁰ Karanga aturā Iesu kia ratou, Ka rave mai na i tetai aronga i ta kotou ika i rauka ra. ¹¹ Aere aturā Simona Petero ki runga i te boti, kika maira ite kupenga ki uta, kua ki i te ika mamaata, okotai anere e rima ngauru ma toru; kare ua ra i motu te kupenga i taua aronga ika mamaata ra. ¹² Kua karanga aturā Iesu kia ratou, Ka aere mai ka kai. Kare ua ra tetai pipi i ui atu kiaia, Koai koe? i te mataku; kua kite oki ratou e, ko te Atu ïa. ¹³ Kua aere aturā Iesu, rave iora i te manga, kua tuku atura kia ratou ra, e te ika katoa oki. ¹⁴ Ko te tu toru teia o to Iesu akakite anga mai iaia ki te au pipi ra, i muri ake i tona tu akaou anga mai, mei te mate mai.

(Ioane 21:15-19) E pangia akera ratou, kua karanga aturā Iesu kia Simona Petero, E Simona a Iona e, te maata na toou anoano kiaku i teia? Kua tuatua maira aia, A, e te Atu; kua kite koe e, te anoano atu nei au ia koe. Kua karanga atura aia, Ka angai i taku au punua mamoe. ¹⁶ Kua karanga akaou atura aia kiaia, ko te tu rua ïa, E Simona a Iona e, te anoano na koe iaku? Kua tuatua maira aia kiaia, A, e te Atu, kua kite koe e, te anoano atu nei au ia koe. Kua karanga atura aia, Ka tiaki i taku au mamoe. ¹⁷ Kua karanga atura aia kiaia, ko te tu toru ïa, E Simona a Iona e, te anoano na koe iaku? Kua aue iorā Petero i te mea ka tu toru akera ona ui anga mai kiaia, Te anoano na koe iaku? E kua tuatua maira, E te Atu, kare ua e mea toe i te kitea e koe; kua kite koe e, te anoano atu nei au ia koe. Kua karanga aturā Iesu, Ka angai i taku au mamoe. ¹⁸ Tika, tika tikai taku e karanga atu kia koe, I toou ou anga, kua tatua koe ia koe uaorai, e kua aaere iora koe ki taau ngai i anoano ra: e kia ruaine koe, ka akatika koe i o rima, e na tetai ke koe e tākai, e apai atu ei ia koe i te ngai anoano koreia e koe ra. ¹⁹ Akapera atura aia i te akakite anga kiaia, i te tu o tona mate e akakakāiaʼi te Atua iaia. E oti akera taua tuatua ra, kua karanga atura aia kiaia ra, Ka aru mai iaku.

au mea ke mai roto i te nwtsty no runga ia Ioa. 21:15, 17

karanga aturā Iesu kia Simona Petero: Kua tupu teia i muri ua ake i te kopae anga a Petero i te kite ia Iesu e toru taime. Kua ui a Iesu i teia au uianga kia kite aia i to Petero manako, tei tupu mai “kua aue iorā a Petero.” (Ioa. 21:17) Roto ia Ioa. 21:15-17 kua taiku a Ioane i teia verepa Ereni a·ga·paʹo, aroa, e te phi·leʹo, te urianga e anoano. E rua taime kua ui a Iesu kia Petero: “Te anoano ana koe iaku?” E rua taime kua akapapu mai a Petero e te “anoano” ra aia ia Iesu. Kua ui akaou a Iesu: “Te anoano ana koe iaku?” Pau akaou mai a Petero, ae. I te au taime i akapapu a Petero i tona inangaro, kua akakite a Iesu e na teia tu aroa e te anoano e akakeu ia Petero kia angai e kia “tiaki” i ta Iesu au pipi i te pae vaerua, i konei tana mamoe, me kore “taku au mamoe.” (Ioa. 21:16, 17; 1 Pete. 5:1-3) Kua akapapu mai Petero i tona inangaro ia Iesu e toru taime e oti kua oronga a Iesu i te tika anga kiaia kia akono i tana au mamoe. Na teia tu, kua akapapu mai a Iesu e kua akakoreia ta Petero ara no te kopae anga i te kite iaia e toru taime.

te maata na toou anoano kiaku i teia?: Tukeke te aiteanga no te au tuatua “te maata na toou anoano.” Ki tetai au tangata e tau ake teia aiteanga, “e maata atu ainei toou inangaro iaku i to teia au pipi?” me kore “e maata atu ainei toou inangaro noku i to tetai ua atu pipi?” Inara ko te aiteanga tikai, “te maata na toou anoano kiaku i teia?” koia oki ko te ika ta ratou i rauka e ta ratou angaanga tautai. No reira ko te manako maata i roto i teia irava: ‘Te maata ra toou anoano iaku i teia au mea o te oraanga? Me koia ïa, angai i taku au mamoe.’ Teia uianga kua tau no te oraanga o Petero i mua ana. Noatu koia tetai o te au pipi mua a Iesu (Ioa. 1:35-42), kare aia i aru vave ana ia Iesu i reira rai. Kua rave ua atu rai aia i tana angaanga tautai. No tetai au marama i muri mai i akaruke ei a Petero i tana angaanga tautai kia riro mai ei ‘ravakai tangata.’ (Mata. 4:18-20; Luka 5:1-11) I muri poto ua ake i to Iesu mateanga, karanga a Petero e te aere nei aia ka tautai, e kua aru katoa tetai mai au apotetoro iaia. (Ioa. 21:2, 3) No reira ko ta Iesu e tauta ra i te akaari kia Petero, kia iki aia i te ikianga meitaki: Ka aruaru ainei aia i tana angaanga tautai, me ka tuku aia ei mea mua kia angai i te au mamoe a Iesu me kore tana au pipi?—Ioa. 21:4-8.

te toru o te taime: Kua kopae a Petero i te kite i tona Atu e toru taime; teianei kua oronga mai a Iesu i tetai atianga no Petero kia akapapu i tona inangaro iaia e toru taime. Iaia e rave ra i teia, kua akakite a Iesu kia Petero kia akaari i tona tu aroa e te anoano na te tukuanga i te au mea pae vaerua ei momua. Ma tetai au taeake, ka angai, ka akamaroiroi, e ka tiaki a Petero i te anana mamoe tiratiratu a Iesu. Kua ikiia teia aronga inara ka anoanoia rai ratou kia angaiia i te pae vaerua.—Luka 22:32.

Kimi i te Mārama o te Tuatua Mou

(Ioane 20:17) Kua tuatua mairā Iesu kiaia, Auraka koe e akatukia mai iaku; kare rai au i tae ki runga i toku Metua ra: e aere ra koe ki toku au taeake ra, e karanga atu kia ratou e, Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra.

au mea ke mai roto i te nwtsty no runga ia Ioa. 20:17

Auraka koe e akatukia mai iaku: Ko tetai aiteanga katoa o te verepa Ereni e haʹpto·mai, “kia amiri” me kore “kia mou; kia mou piri.” Kua uriia e tetai au tangata ta Iesu au tuatua e: “Auraka e amiri mai iaku.” Inara kare a Iesu e karanga ana kia Maria Magadala kia kore e amiri mai iaia, no te mea kare aia i akapera ana i te au vaine tei “tapeka atura i tona vaevae” i muri ake i tona tuakaouanga. (Mata. 28:9) Kua rave a Maria Magadala i teia no te mea ka oki a Iesu ki te rangi. No tona inangaro i tona Atu, kua mou piri aia ia Iesu kare i tuku ana iaia. Ei akapapu kiaia e kare aia e akaruke vave, kua karanga a Iesu kia Maria kia tuku iaia e kia aere e akakite ki tana au pipi e kua akatuakaouia aia.

(Ioane 20:28) Kua karanga aturā Toma kiaia, na ko atura, E taku Atu, e taku Atua.

au mea ke mai roto i te nwtsty no runga ia Ioa. 20:28

E Taku Atu, e taku Atua: “Toku Atu e toku Atua [ho the·osʹ]!” Kua manako tetai au tangata e ko teia tuatua, te tuatuaia ra kia Iesu, inara ko te tikaanga tikai te tuatuaia ra ki te Atua, tona Metua. Karanga tetai pae e i roto i te reo Ereni kia tuatuaia rai teia no Iesu. Inara ko teia au tuatua “e taku Atu, e taku Atua,” ka mārama meitakiia atu te reira me kite tatou i te katoa anga o te aerenga manako o te au Tuatua akauruia. I te mea e te akakite maira te au tataanga e kua akakite a Iesu ki tana au pipi e, “Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra,” kare i reira e tano e ka manako a Toma ia Iesu e ko te Atua mana katoatoa. (Akara i te au mea ke mai roto i te nwtsty no runga ia Ioa. 20:17.) Kua rongo ana aia ia Iesu e pure ra ki tona “Metua,” e te kapikianga Iaia e ko te “Atua mou.” (Ioa. 17:1-3) No reira, te tumu i tuatua akapera ai aia ia Iesu e ko “taku Atua”: Kiaia e “atua” a Iesu inara kare aia ko te Atua mana katoatoa. (Akara i te au mea ke mai roto i te nwtsty no runga ia Ioa. 1:1.) Me kore kua tuatua akapera aia mei ta tetai au tavini o te Atua me kapiki i te au angera. Kua tataia teia i roto i te au Tuatua Tapu Epera. Penei kua kite katoa a Toma i tetai au tangata me kore kua tatau aia i roto i te au Tuatua akauruia e kua kapiki ana te tangata i tataia ai teia irava i te au angera mei te mea atura e ko Iehova ratou. (Akaaite kia Gene. 16:7-11, 13; 18:1-5, 22-33; 32:24-30; Aka. 6:11-15; 13:20-22.) No reira te kapiki nei a Toma ia Iesu e ko “taku Atua” i roto i teia tu, te āriki anga iaia e ko te mata e te vaa tuatua o te Atua mou.

Kua taumaro ana tetai aronga no runga i te nga kupu i mua ake i te kupu “atu” e te “atua,” e te tuatua ra te reira i te Atua mana katoatoa. Inara, i roto i teia aerenga tuatua kua aruia te urianga kia tau ki te aerenga tuatua a te reo Ereni. Ka kiteaia teia tu urianga i roto i te au irava mei ia Luka 12:32 (“taku anana iti”) e Kolo. 3:18–4:1 (“te au vaine”; “te au tane”; “te au tamariki”; “te au metua”; “te au tavini”; “te au atu”). Ei akaraanga, me ka uriia a 1 Pete. 3:7 mei teia te tu, ko te urianga i reira e: “Te au tane.” No reira kare te nga kupu o mua ake i te kupu “tane” e akataka rava ana i ta Toma e manako ra i tona tuatua anga i teia.

Tatau Pipiria

(Ioane 20:1-18) E tae akera ki te rā mua o te ebedoma ra, kua aere aturā Maria i Magadala ra i te akirata i te tanumanga, te vai mareureu ua ra, e kite akera kua uri keia te toka i te tanumanga ra. ² Oro ua maira aia kia Simona Petero ra, e ki te pipi akaperepere a Iesu ra, kua tuatua maira kia raua, Kua apai keia e ratou te Atu i te tanumanga ra ki vao, e kare ua matou i kite i te ngai i vaioia aia e ratou ra. ³ Aere aturā Petero i reira ra ki vao, e taua pipi katoa ra, e aere tika raua i te tanumanga ra. ⁴ Kua ooro raua ravarai; e emo iorā Petero i taua pipi ra, ko tei tae atu na ïa ki te tanumanga ra. ⁵ E piko iora aia ki raro, akara atura i te kakau vaî i te vai ua anga; kare ra aia i tomo ki roto. ⁶ Kua aere mairā Simona Petero i muringao iaia ra, tomo atura ki roto i te tanumanga ra, akara iora i te kakau vaî i te vai ua anga, ⁷ E te kakau i te vaî i tona upoko ra, kare ïa i vaioia i te vairanga o te kakau vaî ra, i kokopiia e vaio keia ki te vairanga ke. ⁸ Kua tomo katoa atura tetai pipi, ko tei tae atu na ki te tanumanga ra, ki roto; kite atura aia, e akarongo atura. ⁹ Kare akerai ratou i kite i te tuatua i tataia ra e, kia tu akaou maira aia mei te mate maira e tikaʼi. ¹⁰ Oki akaou atura nga pipi i to ratou ra. ¹¹ Karekā Maria, te tu ua ra ïa i te pae i vaitatao i te tanumanga ra, te aue ua ra; piko iora aia ki raro ma te aue, e akara atura ki roto i te tanumanga ra, ¹² Kite atura aia i e toko rua puke angela ma te kakau teatea, i te noo anga ki te ngai i vaioia te kopapa o Iesu ra, i te upoko tetai, e i te vaevae tetai. ¹³ Kua tuatua maira raua kiaia, Eaa koe i aue ei, e maine? Kua karanga atura aia, No toku Atu i apai keia e ratou nei, e kare au i kite i te vaio angaia e ratou ra. ¹⁴ E kia akapera atura aia, e oti akera, kua anga atura aia ki muri, e kite atura aia ia Iesu i te tu ua anga, kare aia i kite e, ko Iesu. ¹⁵ Kua tuatua mairā Iesu kiaia, E maine, eaa koe i aue ei? koai taau e kimi na? Maara akera aia e ko te tangata tanu-kai ra, kua na ko atura, E tama, naau aia i apai ke ra, ka akakite mai koe i te vaio angaia e koe na, e naku aia e tiki e apai ke. ¹⁶ Kua tuatua mairā Iesu kiaia, E Maria. Kua ariu atura aia, karanga atura, E Raboni, ko tei tuatuaia ra e, E te Orometua. ¹⁷ Kua tuatua mairā Iesu kiaia, Auraka koe e akatukia mai iaku; kare rai au i tae ki runga i toku Metua ra: e aere ra koe ki toku au taeake ra, e karanga atu kia ratou e, Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra. ¹⁸ Aere aturā Maria i Magadala ra, e kua akakite atura ki te au pipi ra e, kua kite aia i te Atu, e nana aia i tuatua mai i taua tuatua ra.

NOEMA 12-18

AU MEA UMERE I ROTO I TE PIPIRIA | ANGAANGA 1-3

“Riringiia te Vaerua Tapu ki Runga i te au Kerititiano”

(Angaanga 2:1-8) E tae rava atura ki te rā Penetekose, kua taki ruru marie akera ratou katoa i te ngai okotai ma te inangaro okotai. ² E kare akera i mamia, ko te aruru maira no runga mai i te rangi, mei te matangi viviki maata ra; kua ki rava akera te are i nooia e ratou ra. ³ E kua mama maira te arero manga kia ratou, mei te ai ra te tu, e to iora ki rungao ia ratou katoa ra. ⁴ E ki akera ratou ravarai i te Vaerua Tapu, kua tuatua iora i te tuatua ke, i ta te Vaerua i oronga mai i te tuatua kia ratou ra. ⁵ E te noo ra oki te tangata ngati Iuda akono i te Atua i Ierusalema, no te pa enua ravarai i raro ake i teianei rangi. ⁶ E tutuki atura taua rongo ra, kua uipa maira te tangata ravarai, e va ua iora, no te mea i akarongo atura taua au tangata katoa ra, i ta ratou uaorai tuatua tikai i te tuatua angaia mai. ⁷ Poitirere rava atura ratou katoa, ma te umere, na ko iora ratou ratou uaorai, I na, kare aina ratou e tuatua nei i to Galilea anake? ⁸ Eaa ra oki teia i akarongo ei tatou ravarai nei i te reo, tonao tonao, i anau ei ra?

(Angaanga 2:14) Kua tu akera rā Petero ki runga, e te ngauru ma tai katoa ra, kua akateitei ua atura i tona reo, karanga atura kia ratou, E te au tangata o Iudea nei, e te aronga katoa e noo i Ierusalema nei, kia kite mai kotou i teia, e ka akarongo mai ana i taku nei tuatua.

(Angaanga 2:37, 38) E kite akera ratou i taua tuatua ra, puta atura to ratou ngakau, e kua tuatua maira kia Petero ma te au aposetolo katoa, E tāma, e te au taeake nei, e akapeea matou nei? ³⁸ Kua karanga aturā Petero kia ratou, E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara; e ka orongaia mai ïa te Vaerua Tapu kia kotou.

(Angaanga 2:41) E te aronga katoa i āriki marie i tana tuatua, bapetizoia iora ïa; e kapiti katoaia maira kia ratou e toru katoa paa tausani i taua rā ra.

(Angaanga 2:42-47) Kua mou piri tikai atura ratou i ta te au aposetolo i apii ra, e te kapiti katoa anga atu, e te vavaʼi anga i te manga, e te pure anga oki. ⁴³ E rokoia iora ratou ravarai e te mataku, e manganui te mea umere e te akairo i raveia e te au aposetolo ra. ⁴⁴ Uipa akera taua aronga katoa ra i te ngai okotai, e kapiti ua akera oki to ratou apinga. ⁴⁵ E kua oko atura oki ratou i to ratou kainga e te apinga, e tua iora oki na ratou ravarai, e tau katoatoa akera. ⁴⁶ E noo tamou iora ratou ra ki roto i te iero ra, i te au rā katoa, ma te inangaro okotai, e te vavaʼi anga i te manga, i tera are, i tera are, kai iora oki ratou i te kai ma te rekareka, e ma te tavaitai ua te ngakau; ⁴⁷ I te akameitaki anga i te Atua, e ma te kiteia mai e te tangata ravarai. E te aronga i akaoraia ra, kua kapitiia ïa e te Atu i te ekalesia ra, kare e rā i tukua.

w86 12/1 29 ¶4-5, 7

Oronga ua Kia Rekareka te Ngakau

I te tuatau i akamata ai te putuputuanga Kerititiano i te mataiti 33 T.N., ko “te kapiti katoa anga atu, te vavaʼi anga i te manga, e te pure anga oki,” e peu matauia te reira i te raveia e te au pipi ou e 3,000. Eaa ra te tumu? Kia rauka ia ratou pouroa i te akamaroiroi i to ratou akarongo, e kia rave ua atu rai ratou ‘i ta te au aposetolo i apii ia ratou.’—Angaanga 2:41, 42.

Ko te au ngati Iuda e te aronga tei akarongo i te Atua, ka aere mai ratou ki Ierusalema no te rā Penetekote. Inara ko te aronga tei riro mai ei au Kerititiano, kua noo roa atu ratou ki reira kia akaketaketaia to ratou akarongo. Ko te manamanata i reira, kare e rava te kai e te ngai ka noo ratou. Tetai pae o ratou kare e rava ana ta ratou moni, tetai e maata ta ratou. No reira kua oko tetai aronga i ta ratou apinga kia rauka i te tauturu i teia au taeake.—Angaanga 2:43-47.

Kua raveia teia au mea pouroa ma te aroa, kare no te kimianga moni. Kare tetai ua atu i umuumuia ana kia oko me kore kia oronga i tetai apinga na teia au taeake; e kare katoa e no te mea kare e rava ana ta ratou kai. Pera katoa kare te aronga e maata ta ratou apinga e māroia ana kia oko i ta ratou apinga. Mari ra, no te inangaro i tetai e tetai, kua oko ratou i ta ratou au apinga e kua oronga i ta ratou i rauka mai, ei turuturu i te angaanga no te Patireia o te Atua.—Akaaite kia 2 Korinetia 8:12-15.

Kimi i te Mārama o te Tuatua Mou

(Angaanga 3:15) I ta io nei oki i te Tumu o te ora, i ta te Atua i akatu mei te mate maira; ko matou nei rai oki te kite.

it-2 61 ¶1

Iesu Mesia

“te Tumu o te ora.” Ei akaari i te aroa takinga meitaki o te Atua, kua oronga a Iesu Mesia i tona oraanga apakore ei atinga oko. Rauka atura i reira i te au pipi a Iesu i te tutara kapiti ma ia i runga i te rangi, e kua riro katoa ei akameitakianga no te au tangata ka noo ki runga nei i te enua. (Mata. 6:10; Ioa. 3:16; Ephe. 1:7; Ebe. 2:5; akara OKO.) Kua riro mai i reira a Iesu ko “te Tumu [“Tama Ariki,” KJ; JB] o te ora” no te tangata. (Anga. 3:15) I roto i te reo Ereni te aiteanga e, “tutara.” Kua kapikiia katoaia a Mose (Anga. 7:27, 35) e ko te “tutara” o Iseraela.

(Angaanga 3:19) E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o te Atua ra;

cl 265 ¶14

E Atua ka “Akakore i te Ara”

¹⁴ To Iehova tu e ka akakore ua i te ara, te akatakaia ra te reira i roto ia Angaanga 3:19: “E teianei, e tataraara kotou, e e ariu mai, kia taparaia ta kotou ara.” Te aiteanga o te tuatua taparaia i roto i te verepa Ereni, “kia tāmā, . . . akangaropoina me kore kia akakore.” Karanga tetai au tangata e kua aite teia ki tetai tataanga tuatua me tāmāia te reira. Ka rauka ainei te reira i te tāmā? Ko te inika e taangaangaia ana i te reira tuatau, kua maaniia ki te ngarau, te tapou, e te vai. Me tata tetai tangata i tetai au tuatua ki teia inika, ka rauka ua iaia te tāmā i te reira ki tetai kakau. Me akaaite tatou i teia ki ta Iehova i rave, e tu aroa tikai tona. Me akakore aia i ta tatou ara, mei te mea atura e ka mou mai aia i tetai kakau e ka tāmā i te reira.

Tatau Pipiria

(Angaanga 2:1-21) E tae rava atura ki te rā Penetekose, kua taki ruru marie akera ratou katoa i te ngai okotai ma te inangaro okotai. ² E kare akera i mamia, ko te aruru maira no runga mai i te rangi, mei te matangi viviki maata ra; kua ki rava akera te are i nooia e ratou ra. ³ E kua mama maira te arero manga kia ratou, mei te ai ra te tu, e to iora ki rungao ia ratou katoa ra. ⁴ E ki akera ratou ravarai i te Vaerua Tapu, kua tuatua iora i te tuatua ke, i ta te Vaerua i oronga mai i te tuatua kia ratou ra. ⁵ E te noo ra oki te tangata ngati Iuda akono i te Atua i Ierusalema, no te pa enua ravarai i raro ake i teianei rangi. ⁶ E tutuki atura taua rongo ra, kua uipa maira te tangata ravarai, e va ua iora, no te mea i akarongo atura taua au tangata katoa ra, i ta ratou uaorai tuatua tikai i te tuatua angaia mai. ⁷ Poitirere rava atura ratou katoa, ma te umere, na ko iora ratou ratou uaorai, I na, kare aina ratou e tuatua nei i to Galilea anake? ⁸ Eaa ra oki teia i akarongo ei tatou ravarai nei i te reo, tonao tonao, i anau ei ra? ⁹ I to Paretia, e to Madai, e to Elama, e te aronga e noo i Mesopotamia, e i Iudea, e to Kapadokia, to Ponoto, e to Asia, ¹⁰ To Pherigia, e to Pamephulia, to Aiphiti, e to Libia, i te pae e topiri tika mai ki Kurene, e te tangata ke oki no Roma, ko te ngati Iuda oki e te akarongo ou mai, ¹¹ To Kereta e to Arabia, i te akarongo anga atu tatou ia ratou i te tuatua anga mai i te peu taka ke a te Atua i to tatou uaorai nei au reo tikai. ¹² Kua va ua iora ratou katoa, e kua ekoko iora, na ko akera ki tetai ki tetai, Eaa ra teia? ¹³ Kareka tetai pae ra, na ko maira ïa i te aviri anga, Kua ki teianei au tangata i te wina venevene. ¹⁴ Kua tu akera rā Petero ki runga, e te ngauru ma tai katoa ra, kua akateitei ua atura i tona reo, karanga atura kia ratou, E te au tangata o Iudea nei, e te aronga katoa e noo i Ierusalema nei, kia kite mai kotou i teia, e ka akarongo mai ana i taku nei tuatua. ¹⁵ Kare oki teianei au tangata i kona i ta kotou e manako na, ko te toru rai oki teia o te ora i teianei rā. ¹⁶ Ko tei tuatuaia maira teia e Ioela peroveta ra e, ¹⁷ “Kia tae ki te au rā openga ra, (te tuatua maira te Atua,) e riringi atu ei au i taku Vaerua ki rungao i te tangata ravarai; e na ta kotou au tamariki tamaroa, e te au tamaine, e totou mai, e ka kite oki to kotou au tangata ou ra i te orama, e to kotou au tangata ruaine oki e moemoeaia ïa: ¹⁸ E riringi atu au i taku Vaerua ki rungao i toku au tavini, e toku au tavini vaine, i te reira au rā, e ka totou mai ratou; ¹⁹ E akakite oki au i te mea umere ki runga i te rangi, e te akairo ki raro i te enua: te toto, e te ai, e te kou auai oki: ²⁰ Ka riro te rā ei poiri, e te marama ei toto, e tae ei ki taua rā mataku maata o te Atu ra: ²¹ E riro oki e, ko te kapiki i te ingoa o te Atu ra, e ora ïa.”

NOEMA 19-25

AU MEA UMERE I ROTO I TE PIPIRIA | ANGAANGA 4-5

“Akakite Ratou i te Tuatua a te Atua ma te tu Ngakau Toa”

(Angaanga 4:5-13) E ao akera, kua ruru akera to ratou au tutara, e te aronga pakari, e te au tata tuatua, i Ierusalema, ⁶ E te taunga maata ra ko Ana, e ko Kaiapha, e ko Ioane, e ko Alekanedero, e te kopu-tangata katoa o te taunga maata ra. ⁷ Tukuia iora e ratou nga aposetolo ra i rotopu, kua ui atura ratou e, Noai te mana, e te ingoa, i tikaʼi teianei i ta korua i rave nei? ⁸ Ki akerā Petero i te Vaerua Tapu, e kua tuatua maira kia ratou, E tāma, e te ui rangatira o te tangata tini nei, e te aronga pakari o Iseraela nei, ⁹ Koai oki teia, te akavaia nei maua i teianei rā, i te meitaki i tukuia atu ki te tangata parukaua i te mea i oraʼi aia nei; ¹⁰ Kia kite kotou ravarai, e te tangata katoatoa o Iseraela nei e, no te ingoa o Iesu Mesia no Nazareta, ta kotou i akasatauro io nei, ko tei akatuia mai e te Atua mei te mate maira, nona i tu atu ei teianei tangata i mua i to kotou aroaro ma te maki kore nei. ¹¹ “Ko te toka teia i akarukeia e kotou, e te aronga patu are, e kua akariroia io nei ïa ei toka tiavā.” ¹² Kare rava oki e ora i tetai ke: kare atu oki e ingoa i akakiteia mai ki te tangata i raro ake i teianei rangi, e oraʼi tatou nei. ¹³ E kia akara atura ratou kia Petero raua ko Ioane i te mataku kore, e kite akera e, e puke tangata apii koreia raua e te kite kore oki, umere atura ratou, e kite atura oki e, ia Iesu katoa ra oki raua.

w08 9/1 15, pia

Te au Tuatua Tapu—Tataanga e te au Kerititiano Mua

E aronga kite kore ainei te au Apotetoro i te tata e te tatau?

I te akarongo anga te au arataki e te aronga pakari i Ierusalema ia “Petero raua ko Ioane i te mataku kore, e kite akera e, e puke tangata apii koreia raua e te kite kore oki, umere atura ratou.” (Angaanga 4:13) E aronga kite kore ainei te au Apotetoro i te tata e te tatau? No runga i teia, karanga te The New Interpreter’s Bible e: “Eiaa tatou e manako e kare rai a Petero [e Ioane] i aere ana ki te apii e kare raua e kite i te tatau e te tata. Kua kite ratou i te tuke i rotopu i te au arataki e te au apotetoro.”

w08 5/15 30 ¶6

Au Manako Maata mei te Puka o Angaanga

4:13—E nga tangata kite kore me kore apii koreia ainei a Petero raua ko Ioane? Kare. Kua kapikiia raua e e nga tangata ‘apii koreia e te kite kore oki’ no te mea kare raua i aere ana ki te au apiianga rapi no te terenianga a te akonoanga.

(Angaanga 4:18-20) Kua tiki atura ia raua e aere mai ki roto, e kua ako atura ia raua, auraka rava e apii, e auraka rava oki e tuatua ma te ingoa o Iesu. ¹⁹ Kua tuatua mairā Petero e Ioane, na ko maira kia ratou, E mea tika i te Atua kia akarongo atu ia kotou auraka te Atua, ka akamaara io ïa kotou. ²⁰ Kare oki matou e tika kia kore e tuatua i ta matou i akara akenei, e ta matou i akarongo akenei.

(Angaanga 4:23-31) E kia tukuia atura raua ra, aere atura ki to raua orai au tangata, akakite atura i te au tuatua ravarai ta te kau taunga nunui ra, e te aronga pakari i tuatua mai kia raua ra. ²⁴ E kite akera ratou, akateitei anake atura to ratou reo i te Atua, i te na ko tai anga atu, E te Atu, ko koe te Atua i anga i te rangi e te enua, e te tai, e te apinga tini ravarai i roto ra; ²⁵ Ko tei tuatua mai na roto i te vaa o to tavini ra o Davida e, “Eaa te au etene i oripu uaʼi e te au tangata nei i manako ei i te mea puapinga kore? ²⁶ Te tu ra te ui ariki o te enua nei ki runga, e te kapiti katoa ra te ui rangatira, e māro ia Iehova e tana i akatainu ra.” ²⁷ Kua uipa tika rai ratou, ko Heroda e Ponotio Pilato, e te au etene katoa e te tangata oki no Iseraela, e rave ia Iesu i to Tamaiti tapu taau i akatainu ra, ²⁸ E akatupu i ta to rima e ta to anoano i akono i muatangana e akatupu ra. ²⁹ E teianei, e akara mai koe, e te Atu, i ta ratou nei akamataku anga mai, e akamaroiroi mai i to au tavini kia tuatua ua i taau tuatua ma te mataku kore, ³⁰ I te akatika anga mai i to rima ei akaora; kia tika te akairo e te piri kia raveia i te ingoa o taau Tamaiti tapu o Iesu. ³¹ E te pure ra ratou, ngaueue iora te ngai i uipaiaʼi ratou; e akakiia maira ratou ravarai i te Vaerua Tapu, kua tuatua ua iora i te tuatua a te Atua ma te mataku kore.

it-1 128 ¶3

Apotetoro

Angaanga i roto i te Putuputuanga Kerititiano. Te riringiia anga te vaerua tapu ki rungao ia ratou, kua riro tikai te reira ei akamaroiroi i te au apotetoro. I roto i te au pene mua e rima o Angaanga, te akakite maira i te tu mataku kore e te ngakau toa o te au apotetoro i te akakitekite i te nuti meitaki e no runga i te tuakaouanga o Iesu, noatu kua tapekaia, pāpāia e kua takinga kinoia. I muri ake ia Penetekote, kua riro te aratakianga a te au apotetoro ma te tauturu a te vaerua tapu, ei akamaata atu i te au tangata i roto i te putuputuanga Kerititiano. (Anga. 2:41; 4:4) Kua tutu aere ratou na mua i Ierusalema, e oti ki Samaria e i muri mai, ki te ao katoa.—Anga. 5:42; 6:7; 8:5-17, 25; 1:8.

Kimi i te Mārama o te Tuatua Mou

(Angaanga 4:11) “Ko te toka teia i akarukeia e kotou, e te aronga patu are, e kua akariroia io nei ïa ei toka tiavā.”

it-1 514 ¶4

Toka Tiavā

Akakite ra a Salamo 118:22 e ko te toka tei akarukeia e te aronga patu are ra ka riro mai ïa ei “toka tiavā” (Ebe., roʼsh pin·nahʹ). Kua taiku a Iesu i teia totou ma te karanga e koia teia “toka tiavā” (Ere., ke·pha·leʹ go·niʹas, toka tiavā). (Mata. 21:42; Mare. 12:10, 11; Luka 20:17) Mei tetai toka i runga roa i tetai are e ka kiteaia e te tangata, kua aite a Iesu ko te toka tiavā o te putuputuanga Kerititiano o te aronga akatainuia. Kua akaaiteia te reira mei tetai iero e kare e kiteia e te mata tangata. Akapapu a Petero e ko ta Salamo 118:22 e tuatua ra, ko te Mesia tikai te reira, koia tei akarukeia e te tangata, inara kua iki te Atua iaia kia riro mai e ko “te toka tiavā.”—Anga. 4:8-12; akara katoa ia 1 Pete. 2:4-7.

(Angaanga 5:1) Ko tetai tangata ra ko Anania te ingoa, e tana vaine ko Saphira, ooko atura i te kainga,

w13 3/1 15 ¶4

Kua Pikikaa a Petero e Anania—Eaa te Apiianga ta Tatou ka Kite Mai?

Kua oko a Anania e tana vaine i tetai potonga enua kia rauka mai te moni ei tauturu i te aronga ou tei papetitoia. Te apai anga a Anania i te moni ki te au apotetoro, kua karanga aia e ko te katoaanga te reira o te moni. Inara kare ko te katoaanga te reira! Kua akapae aia i tetai moni nana uaorai! Kua akakite atu te Atua i teia kia Petero e kua akakite atu a Petero kia Anania e: “Ko te Atua taau i pikikaa ana, kare te tangata.” I reira kua topa a Anania ki raro e kua mate! E toru ora i muri mai, kua tomo mai tana vaine. Kare aia i kite eaa tei tupu ki tana tane, kua pikikaa katoa aia e kua topa aia ki raro e kua mate.

Tatau Pipiria

(Angaanga 5:27-42) E kia aratakiia maira ratou ra, tuku atura ratou ki mua i te aroaro o te Sunederi ra: kua ui maira te taunga maata ra kia ratou, na ko maira, ²⁸ Kare aina matou i akaue tika atu kia kotou, auraka kotou e apii ma teianei ingoa? e i na, kua ki rava Ierusalema ia kotou i ta kotou tuatua, e te inangaro na kotou kia io mai te toto o teianei tangata ki runga ia matou nei. ²⁹ Kua karanga aturā Petero e te au aposetolo katoa ra, na ko atura, Ko te Atua ta matou e akarongo e tikaʼi auraka te tangata. ³⁰ Kua akatu io nei te Atua o to tatou ai tupuna ra ia Iesu, ta kotou i ta nei i te patiti anga ki runga i te rakau: ³¹ Koia ta te Atua i akateitei akenei i tona rima katau ei Ariki e ei Ora, ei oronga mai oki i te tataraara no Iseraela, e te akakore anga i te ara. ³² Ko matou oki tona au kite i taua tuatua nei, e te Vaerua Tapu katoa, ta te Atua i oronga mai ki te aronga e akarongo iaia ra. ³³ E kite akera ratou i te reira, motu atura to ratou ngakau i te riri, e akaeatu ua iora i te ravenga e mate ei ia ratou. ³⁴ Kua tu akera tetai Pharisea ki runga i taua Sunederi ra, ko Gamaliela te ingoa, e apii ture, e tangata akameitakiia e te tangata ravarai, kua akaue atura e arataki atu i te au aposetolo ra ki vao, e kia roa poto ake. ³⁵ E kua karanga atura aia kia ratou, E te au tangata no Iseraela nei, e matakite ia kotou i ta kotou rave anga atu i tenana aronga tangata. ³⁶ Tupu akenei a Teuda i muatangana akenei i te akatietie anga iaia uaorai e tangata maata aia; kapiti katoa atura te tangata iaia e a katoa paa anere; e taia atura aia; e te aronga katoa i akarongo iaia, pueurikiriki ke atura ïa, pou atura. ³⁷ Kua tupu akenei oki i muri ake iaia, ko Iuda no Galilea, i te tuatau i tataiaʼi te ingoa ra, e kapiti atura aia i te tangata e manganui i te aru anga atu iaia: e mate katoa atura aia; e te aronga katoa i aru iaia ra, akangaoro rava atura ïa. ³⁸ E teianei, teia taku tuatua kia kotou, E akataka ke atu kotou i tenana au tangata, e vaio ua atu: na te tangata teianei angaanga e teianei tuatua, ka ngaro ua ïa: ³⁹ Na te Atua ra, kare rava e kore ia kotou; ko te riro aea oki kotou ei aronga tamaki atu ki te Atua. ⁴⁰ Kua akatika maira ratou iaia: e akaokiia maira e ratou te au aposetolo ra ki roto, pāpā atura, e oti akera, kua akaue atura ia ratou, auraka rava e tuatua ma te ingoa o Iesu, e kua tuku atura ia ratou. ⁴¹ Aere atura ratou mei te aroaro atu o te Sunederi, ma te rekareka, i te mea, no tona ingoa i manakoiaʼi ratou e tau ia ratou taua takinga-kino ra. ⁴² E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.

NOEMA 26–TITEMA 2

AU MEA UMERE I ROTO I TE PIPIRIA | ANGAANGA 6-8

“Timataia te Putuputuanga Kerititiano Ou”

(Angaanga 6:1) E i taua tuatau ra, kia maata te au pipi ra, kua tupu iora te urutoe a te Eleni ki te Ebera, no te mea kare ta ratou vaine takaua i akonoia i te tuanga apinga i te au rā katoa ra.

bt 41 ¶17

“Kia Akangateitei Tatou i te Atua ei Tutara”

¹⁷ Te na roto nei te putuputuanga ou i tetai turanga te ka takino ia ratou. Eaa te reira? Te maataanga o te au pipi i papetitoia, kare ratou no Ierusalema mai, inara kua inangaro ratou i te akaketaketa i to ratou akarongo i mua ake ka oki ei ratou ki to ratou enua. Kua oronga te au pipi e noo ra i Ierusalema i te tauturu, te kai e tetai au apinga tei anoanoia no ratou. (Angaanga 2:44-46; 4:34-37) I te reira tuatau, kua tupu tetai manamanata. Me tuaia te au “apinga i te au rā,” kare te au vaine takaua no Ereni mai e “akonoia.” (Angaanga 6:1) Inara ko te au vaine takaua e tuatua ra i te reo Epera, ka akonoia ratou. Riro atura i reira teia e urutoeanga na ratou i tetai e tetai. I tetai au taime kua kino atu te au manamanata i te urutoe ua i tetai e tetai.

(Angaanga 6:2-7) E kua akaputuputu maira te ngauru ma rua ra i te au pipi katoa e manganui, kua na ko atura, Kare oki te mea tau ia matou kia kopae i te tuatua a te Atua, ka raverave ei i te kaingakai na. ³ E tenana, e te au taeake nei, e kimi io na kotou i e toko itu puke tangata rongo meitaki, e te ki i te Vaerua Tapu, e te karape, i roto ia kotou na, ko ta matou ïa e akono no te reira angaanga. ⁴ Kareka matou, ei te pure matou auraka e tukumoe, e ei te apii oki i te tuatua. ⁵ Mareka rava atura taua aronga maata ravarai i te reira tuatua; e kua iki iora ratou ia Setephano, e tangata ki i te Vaerua Tapu e te akarongo, e Philipa, e Porokoro, e Nikanora, e Timona, e Paremena, e Nikolao, e pipi akonoanga ngati Iuda aia no Anetioka; ⁶ Ko ta ratou ïa i tuku atu ki mua i te aroaro o te au aposetolo ra; e oti akera te pure, kua tuku maira to ratou rima ki rungao ia ratou ra. ⁷ Tupu atura te tuatua a te Atua; e maata rava atura oki te au pipi i Ierusalema; e manganui oki to te kau taunga i akarongo i te tuatua.

bt 42 ¶18

“Kia Akangateitei Tatou i te Atua ei Tutara”

¹⁸ Kua kite mai te au apotetoro e akaaere ra i te putuputuanga ou, e kare i te mea meitaki “kia kopae i te tuatua a te Atua, ka raverave ei i te kaingakai.” (Angaanga 6:2) Kua kimi ratou i tetai ravenga e kua pati ratou ki te au pipi kia kimi mai e itu au tangata ‘tei ki i te vaerua tapu’ ei “akono i te reira angaanga.” (Angaanga 6:3) Kare teia au tangata e anoano ua ia ana no te tua i te kai, mari ra kia mou moni, te oko mai i te ka anoanoia e kia tata i te au mea i raveia. Te au tangata tei ikiia, e ingoa Ereni pouroa to ratou, no reira te au vaine takaua i āriki ei ia ratou. I muri ake pureanga no tetai tauturu no te rave i teia ikianga, kua akanooia e itu au tane ei rave i teia “angaanga.”

(Angaanga 7:58–8:1) Turaki atura iaia ki vao i taua oire ra, peî iora iaia ki te toka: e nga tangata kite ra, tuku maira i to ratou kakau ki te pae vaevae o tetai tangata ou ra, ko Saula te ingoa. ⁵⁹ Kua peî iora ratou ia Setephano ki te toka, te pure ua ra aia, te na ko ra, E te Atu, e Iesu e, ka rave mai koe i toku vaerua ⁶⁰ Tuturi iora aia, kua kapiki ua atura ma te reo maata, E te Atu e, auraka teianei ara e io mai kia ratou nei! E tei te akapera anga ra, moe atura aia.

8 Mareka rava aturā Saula koia i taia. Tupu iora te takinga-kino maata i taua tuatau ra i te ekalesia i Ierusalema ra; pueurikiriki ke atura ratou katoa, e pini rava akera Iudea e Samaria ra, mari ra ko te au aposetolo ra.

Kimi i te Mārama o te Tuatua Mou

(Angaanga 6:15) Te tiroi matariki maira taua Sunederi katoa e noo ra kiaia, e akara atura i tona mata mei te mata o te angela ra.

bt 45 ¶2

Setephano—“Ki Akera ïa i te Akarongo e te Mana”

² E mea umere tikai teia i tupu kia Setephano. Te akaraanga te au akava iaia, kua kite ratou “i tona mata mei te mata o te angela ra.” (Angaanga 6:15) Te au angera e apai mai ana i te karere a te Atua, e tu maru tikai to ratou. Koia katoa a Setephano—e te kite katoa maira te au akava e riri ana iaia i te reira tu maru nona. Akapeea i rauka ai iaia te reira tu maru?

(Angaanga 8:26-30) Kua tuatua maira tetai angela a te Atu kia Philipa, na ko maira, Ka tu, e aere tika atu koe ki te pae i apatokerau ra, ki te arataa e aere tika atu ei ki Gaza na Ierusalema mai i te ngai medebara. ²⁷ Tu akera aia ki runga, aere atura: e i na, e eunuka, no Etiopia, e tangata mana ki o Kanedake i te ariki vaine no Etiopia ra, koia te tiaki i te apinga tini nona ra, i aere maira aia ki Ierusalema e akamori i te Atua; ²⁸ E te noo ra ki rungao i tana kariota, te oki ra, e te tatau ra oki i ta Isaia peroveta ra. ²⁹ Kua na ko maira te Vaerua kia Philipa, Ka aere koe e akapiri atu ki te pae i tera ra kariota. ³⁰ Oro aturā Philipa i reira, e akarongo atura iaia i te tatau anga i ta te peroveta ra i ta Isaia, e na ko atura, Te kite na koe i taau e tatau na?

bt 58 ¶16

Akakite “i te Tuatua no Iesu”

¹⁶ E tikaanga manea tikai no te au Kerititiano i teia tuatau kia rave i te angaanga mei ta Philipi rai i rave ana. Te maataanga o te taime, e akakite ana ratou i te tuatua meitaki no runga i te Patireia i te au ngai ua atu e tangata tetai. I tetai au taime, me aravei ratou i te au tangata tei tika te ngakau, kare te reira i te mea tupu ua. Akataka mai te Pipiria e te tauturu maira te au angera i teia angaanga kia rongo “te aronga e noo i te ao nei, ki te pa enua katoa, e te au kopu, e te au reo, e te au iti-tangata” i teia karere puapinga. (Apo. 14:6) Ko teia tikai ta Iesu i totou. I roto i tana akatutuanga no runga i te titona e te titania, karanga a Iesu e, a te tuatau kokotianga—te openga o teianei ao—“te aronga e kokoti ra, koia te au angela.” Karanga katoa aia “e na ratou e akaputuputu i te aronga ravarai i apaʼi ra, e tei rave i te tuatua kino, i roto i tona basileia.” (Mata. 13:37-41) I te reira tuatau katoa, ka akaputuputu katoa mai te au angera i te au ui ariki no te Patireia—e i muri mai ko te au “urupu maata” o te “mamoe ke atu”—ta Iehova i umuumu i te arataki mai ki tana putuputuanga.—Apo. 7:9; Ioa. 6:44, 65; 10:16.

Tatau Pipiria

(Angaanga 6:1-15) E i taua tuatau ra, kia maata te au pipi ra, kua tupu iora te urutoe a te Eleni ki te Ebera, no te mea kare ta ratou vaine takaua i akonoia i te tuanga apinga i te au rā katoa ra. ² E kua akaputuputu maira te ngauru ma rua ra i te au pipi katoa e manganui, kua na ko atura, Kare oki te mea tau ia matou kia kopae i te tuatua a te Atua, ka raverave ei i te kaingakai na. ³ E tenana, e te au taeake nei, e kimi io na kotou i e toko itu puke tangata rongo meitaki, e te ki i te Vaerua Tapu, e te karape, i roto ia kotou na, ko ta matou ïa e akono no te reira angaanga. ⁴ Kareka matou, ei te pure matou auraka e tukumoe, e ei te apii oki i te tuatua. ⁵ Mareka rava atura taua aronga maata ravarai i te reira tuatua; e kua iki iora ratou ia Setephano, e tangata ki i te Vaerua Tapu e te akarongo, e Philipa, e Porokoro, e Nikanora, e Timona, e Paremena, e Nikolao, e pipi akonoanga ngati Iuda aia no Anetioka; ⁶ Ko ta ratou ïa i tuku atu ki mua i te aroaro o te au aposetolo ra; e oti akera te pure, kua tuku maira to ratou rima ki rungao ia ratou ra. ⁷ Tupu atura te tuatua a te Atua; e maata rava atura oki te au pipi i Ierusalema; e manganui oki to te kau taunga i akarongo i te tuatua. ⁸ E ko Setephano ra, ki akera ïa i te akarongo e te mana, rave atura aia i te mea umere e te akairo maata i rotopu i te tangata. ⁹ Kua tu maira tetai pae o te sunago i tuatuaia ra e, no te Libetino, e to Kurene, e to Alekanederea, e to Kilikia, e to Asia, i te taumāro anga mai ia Setephano. ¹⁰ E kare atura i tika ia ratou kia patoi mai i te pakari e te vaerua i tuatuaʼi aia ra. ¹¹ Kua tiki atura ratou i te tangata ei tuatua e, Kua akarongo matou iaia i te tuatua anga i te tuatua akakino ia Mose e te Atua. ¹² E kua taori atura ratou i te tangata, e te aronga pakari, e te au tata tuatua ra; e tei runga rava maira ratou iaia, kua opu maira, kave atura ki te Sunederi ra. ¹³ E kua tuku atura oki i nga kite pikikaa, ko tei karanga e, Kare teianei tangata i tukumoe i te tuatua mai i te tuatua akakino i teianei ngai-tapu e te ture nei: ¹⁴ Kua kite oki matou iaia i te tuatua anga e, ka pou teianei ngai ia Iesu no Nazareta nei, e ka kore oki iaia te peu tini ta Mose i tuku mai kia tatou nei ra. ¹⁵ Te tiroi matariki maira taua Sunederi katoa e noo ra kiaia, e akara atura i tona mata mei te mata o te angela ra.