Akapeea Koe me Pure Kia Akarongoia Mai?

PURE KI TE ATUA KO IEHOVA NA ROTO I TE INGOA O IESU

“Ta kotou e pati atu i te Metua ma toku ingoa, nana ïa e o mai kia kotou na.”​—Ioane 16:23.

Akakite mai a Iesu e te inangaro ra a Iehova ia tatou kia pure kiaia, kare na roto i te au tiki, aronga tapu, te au angera, e te au tupuna, mari ra na roto i te ingoa o Iesu Mesia. Me pure tatou ki te Atua na roto i te ingoa o Iesu, te akaari ra tatou e kua mārama tatou i ta Iesu i rave no tatou. “Kare ua e tangata e tae ki te Metua ra, mari ra ei iaku,” i karanga ai a Iesu.​—Ioane 14:6.

TUATUA MEI TOOU NGAKAU

“E riringi i to kotou ngakau ki mua iaia!”​—Salamo 62:8.

Me pure tatou kia Iehova, ka tuatua tatou kiaia mei ta tatou ka tuatua ki tetai metua aroa. Kare tatou e tatau mei roto mai i tetai puka me kore e taokioki i te au tuatua tamou ngakau, inara ka tuatua akangateitei tatou kiaia.

PURE KIA ROTAI KI TO TE ATUA ANOANO

“Kia pati ua atu tatou i te au mea ravarai i tau iaia ra, te akarongo maira aia ia tatou.”​—1 Ioane 5:14.

I roto i te Pipiria, ka akakite mai te Atua ko Iehova i tana ka rave, e eaa tana e inangaro maira ia tatou kia rave. Kia ārikiia mai ta tatou au pure e te Atua, ka anoanoia tatou kia pure no “te au mea ravarai i tau iaia ra.” E rauka ai i te rave i te reira, ka anoanoia tatou kia kite meitaki iaia na te apii anga i te Pipiria e ka riro ta tatou au pure ei mea mareka kiaia.

EAA TA TATOU KA PURE?

Pure no te au Mea ka Anoanoia. Ka pure tatou ki te Atua no te au mea ka anoano tatou i te au rā ravarai—te kai, te kakau, e te ngai nooanga. Ka pure katoa tatou no te pakari i te rave i te au ikianga meitaki e te maroiroi kia akakoromaki i te au timataanga. Ka pure tatou no te akarongo, e kia akakoreia mai ta tatou ara, e no te tauturu a te Atua.​—Luka 11:3, 4, 13; Iakobo 1:5, 17.

Pure no Etai Ke. Ka mareka te au metua me aroa te au tamariki i tetai e tetai. Te inangaro katoa maira a Iehova i tana au tamariki i te enua nei kia akono i tetai e tetai. E mea meitaki kia pure no to tatou au tokorua, ta tatou tamariki, to tatou kopu tangata, e te au oa. “E pure oki tetai i tetai,” i tata ei te apotetoro ko Iakobo.​—Iakobo 5:16.

Akameitaki i te Atua. Karanga te Pipiria no runga i te Atua: “Koia i takinga-meitaki mai, i te oronga anga mai i te ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.” (Angaanga 14:17) Me akamanako tatou i te au mea pouroa ta te Atua i rave no tatou, ka akakeuia tatou kia akameitaki iaia na roto i te pure. E kia akaari katoa tatou i te tu akameitaki ki te Atua na te akarongo anga kiaia.​—Kolosa 3:15.

KIA AKAKOROMAKI E KIA PURE UA ATU RAI

I tetai au taime, ka maromaroa tatou no te mea kare e pau vivikiia mai ta tatou pure ngakau tae. Te aiteanga ainei e kare te Atua e inangaro ana ia tatou? Kare! Akamanako ana i teia au tupuanga te akaari maira e ka anoanoia tatou kia pure ua atu rai.

Akakite a Steve tei taikuia i mua ana, “Naringa au kare i pure ua atu rai, penei kare e rauka akaou iaku tetai oraanga mataora.” Eaa tana i rave? Kua akamata aia i te apii i te Pipiria e kua kite mai e ka anoanoia te pure e kia rave putuputu i te reira. “Ka pure au ma te akameitaki i te Atua no te au tauturu ta toku au oa i oronga mai,” i karanga ai a Steve. “Maata atu toku mataora i teianei i to mua ana.”

Akapeea a Jenny, tei manako ana e e vaine puapinga kore aia e kare e tau kia akarongoia mai e te Atua? Karanga aia, “I toku tu taitaia, kua pati au ki te Atua kia akamārama mai i te tumu i manako akapera ei au.” Akapeea te reira te tauturu anga iaia? “Me tuatua au ki te Atua, ka tauturu te reira iaku kia kite i tona manako no runga i taku i rave. Noatu te akaapa ra toku ngakau iaku, kare ra aia i manako akapera ana. Kua tauturu katoa te reira iaku kia kore e tuku i te ‘au, mari ra kia tauta ua atu rai.” Eaa tei tupu? “Kua tauturu te pure iaku kia kite ia Iehova ei Atua, ei Metua, ei Oa tika tikai, aroa e te akono meitaki, ka tauturu ua mai aia iaku me tauta ua rai au i te rave i tana e inangaro maira.”

Akamanako katoa i tei tupu kia Isabel. I tona nui anga, akakite tona taote e me anau aia, ka riro mai tana pepe ei pakipakitai. Kua taitaia tona ngakau. Akamaroiroi tetai pae iaia kia titiri i tana pepe. “Mei te mea atura, te mate nei au no toku mamae ngakau.” Eaa tana i rave? “Kua pure ua rai au ki te Atua no te tauturu,” i karanga ai aia. I muri mai, kua anau mai aia i tana tamaiti ko Gerard, e e maki pakipakitai rai tona. Kua papu ainei ia Isabel e kua pau mai te Atua i tana au pure? Ae! Na teea tu? “Me kite au i taku tamaiti i teianei, e 14 ona mataiti, te mataora ra tona oraanga noatu te maki pakipakitai,” i karanga ai a Isabel, “Kua kite au e kua pauia taku pure na roto iaia, te akameitakianga maata rava atu ta Iehova i oronga mai.”

Kua riro teia au tupuanga i te akamaara mai i te tuatua a te tata salamo: “Kua akarongo mai koe, e Iehova, i te anoano o tei akaaka ra: kua akatinamou koe i to ratou ngakau, kua akarongo to taringa.” (Salamo 10:17) E au tumu meitaki teia no tatou kia pure ua atu rai ki te Atua!

E maata te au pure a Iesu tei tataia i roto i te Pipiria. Ko te mea kitea matauia e te tangata, ko tana pure i apii atu ki tana au pipi. Eaa ta tatou ka apii mai mei te reira?