Akapeea te Pure me Tauturu ia Koe

Kua tuia a Pamela e te maki cancer e kua kimi aia i te tauturu a te au taote. Pera katoa kua pure aia ki te Atua no te maroiroi kia akakoromaki i tona turanga. Kua tauturu ainei te pure iaia?

“I te tuatau i raveia ai te au rapakau anga no toku maki cancer, kua mataku tikai au,” i karanga ai a Pamela. “Inara me pure au kia Iehova, kua marū mai au e kua rauka iaku i te akakoromaki e kare e mataku akaou. Te kite nei rai au i te mamae o teia maki, inara kua tauturu te pure iaku kia vai matutu ua rai. Me ui mai te tangata e te peea ra au, karanga au e, ‘Kare au e meitaki ana, inara te mataora ua nei au!’”

Ko te tika, auraka e tiaki kia tupu roa mai tetai maki i mua ake ka pure ei tatou. Ka tupu te au timataanga maata e te meangiti kia tatou pouroa, e ka anoano putuputuia te tauturu kia akakoromaki i te reira. Ka tauturu ainei te pure ia tatou?

Karanga te Pipiria: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 55:22) E manako pumaana tikai teia! No reira akapeea te pure me tauturu ia koe? Me pure koe ki te Atua na roto i te tu tau, ka oronga mai aia i taau e anoano ra kia akakoromaki i toou manamanata.—Akara i te pia “Ta te Pure ka Oronga Mai.”

Ta te Pure ka Oronga Mai

Manako ‘au

“E akakite ua ra ki te Atua i to kotou anoano . . . E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Me akakite koe i toou au manamanata ki te Atua, ka tauturu aia ia koe kia noo marū ua e te meitaki noatu te au taomianga.

Pakari no ko Mai i te Atua

“Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana.” (Iakobo 1:5) Me marōia tatou i tetai taime, kare tatou e rave ana i te au ikianga meitaki. Me pure tatou no te pakari, ka akamaara mai te Atua i te au kaveinga i roto i tana Tuatua, te Pipiria, ei tauturu ia tatou.

Akapumaana e te maroiroi

“E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) No te mea ko Iehova te Atua mana katoatoa, ka rauka iaia i te oronga mai i te maroiroi taau e anoano ra kia akakoromaki i te au manamanata me kore kia autu i te au timataanga. (Isaia 40:29) Akakite katoa te Pipiria ia Iehova e “ko te Atua nona anake te pumaana.” Ka rauka iaia i te akapumaana mai ia tatou “i to [tatou] au mate katoa nei.”—2 Korinetia 1:3, 4.

KA PUAPINGAIA AINEI KOE?

Kare a Iehova e marō ia koe kia pure kiaia. Mari ra, te pati aroa maira aia ia koe kia rave i te reira. (Ieremia 29:11, 12) Akapeea i reira me kua manako koe i mua ana e kare taau au pure i pauia mai? Auraka e taitaia me kore e tuku i te ‘au. Penei kare i rauka i te au metua aroa i te tauturu i ta ratou tamariki i te taime tikai e inangaro maira ratou i te tauturu. Penei e au ravenga meitaki atu ta te au metua. Inara okotai apinga tei papu: Ka tauturu te au metua aroa i ta ratou tamariki.

Ko Iehova—te metua aroa rava atu—te inangaro ra aia i te tauturu ia koe. Me akamanako meitaki koe i te au kaveinga ta tatou i uriuri akenei e kia tauta i te taangaanga i te reira, ka pau mai te Atua i taau au pure i te tuatau tau tikai!—Salamo 34:15; Mataio 7:7-11.