Te au Tokorua Akaipoipo Ou—Akariro i te Tavinianga ia Iehova ei Mea Maata i Roto i to Korua Oraanga

1-2. (a) Eaa ra te au tokorua akaipoipo ou ka irinaki ei ia Iehova? (Salamo 37:3, 4) (e) Eaa ta tatou ka uriuri i teia atikara?

TE MANAKO ra ainei koe i te akaipoipo me kore koi akaipoipo ainei koe? Me koia ïa, papu e te tapapa ra koe i te oraanga mataora ma toou akaperepere. Inara te tika, ka tupu te manamanata i roto i te oraanga akaipoipo, e ka anoanoia te au tokorua akaipoipo ou kia rave i te au ikianga puapinga. Ko taau ka rave me tupu te au manamanata e me rave i te ikianga, ka riro ei akakeu i to korua tu mataora no te tuatau ki mua. Me irinaki koe ia Iehova, ka rave koe i te au ikianga meitaki, ka matutu atu to korua pirianga akaipoipo e ka mataora atu koe. Inara, me kare koe e akarongo ki te Atua, ka tupu te au turanga ngata te ka riro ei manamanata i roto i toou oraanga akaipoipo e kare koe e mataora.—E tatau ia Salamo 37:3, 4.

² Noatu ka uriuri teia atikara i te au tokorua akaipoipo ou, ka tau rai te au manamanata ki te aronga akaipoipo katoatoa. Ka akara matatio te reira i ta tatou ka apii mei te akaraanga o te au tane e te au vaine akarongo i roto i te Pipiria. Ka tau te au apiianga mei teia au akaraanga Pipiria ki to tatou oraanga, pera katoa ki te oraanga akaipoipo. Ka akara katoa tatou i te au apiianga mei te au tokorua akaipoipo o teia tuatau.

EAA TE AU TURANGA NGATA TE KA TUPU KI TE AU TOKORUA AKAIPOIPO OU?

3-4. Eaa te au turanga ngata te ka tupu ki te au tokorua akaipoipo ou?

³ Penei ka akamaroiroi tetai pae i te aronga akaipoipo ou kia aruaru i te tu oraanga mātauia o teia tuatau. Ei akaraanga, penei ka māro mai te nga metua me kore te kopu tangata kia anau tamariki te nga tokorua i muri ua ake i to raua akaipoipo. Me kore, penei ka akakite mai tetai au oa e te ngutuare kia oko raua i tetai are ou e te au apinga e manganui kia maru ua to raua oraanga.

⁴ Me kare raua e matakite, penei ka rave te nga tokorua akaipoipo i te au ikianga te ka akatupu i te kaiou maata. Ka anoanoia i reira raua kia angaanga roa ei tutaki i ta raua kaiou. Penei ka riro te angaanga moni ei tamanata i te taime te ka akapouia no te apii Pipiria, te akamorianga ngutuare e te angaanga tutu aere. Penei ka topa tetai au uipaanga no te mea ka angaanga roa raua ei koʼi maata i te moni me kore kia tamou i to raua ngai angaanga. Me ka akapera raua, maata te au angaanga mataora i roto i te tavinianga ia Iehova kare e rauka ia raua i te rave.

5. Eaa ta tatou ka apii mei te akaraanga o Klaus raua ko Marisa?

⁵ E maata te au akaraanga te akapapu maira e me akariro i te apinga ei mea puapinga roa atu i roto i te oraanga, kare tatou e mataora. Akamanako ana i ta tetai nga tokorua ko Klaus raua ko Marisa i apii mai.b Te akaipoipo anga raua, kua angaanga roa raua kia rauka mai te moni e te apinga. Inara, kare raua i mataora ana. Akakite a Klaus: “E maata ta maua apinga materia i rauka mai, kare ra o maua akakoroanga pae vaerua. Te tika, kua kī to maua oraanga i te au manamanata e te apiapi.” Penei kua kite katoa koe e me aruaru i te apinga pae kopapa, kare koe e mataora. Me koia ïa, auraka e taitaia. Me akamanako koe i te au akaraanga meitaki o etai ke, ka tauturu ia koe kia rave i te au tauianga tei anoanoia. Mea mua, ka akamanako tatou eaa ta te au tane ka apii mai mei te Ariki ko Iehosaphata.

IRINAKI IA IEHOVA MEI TE ARIKI KO IEHOSAPHATA

6. Akapeea te Ariki ko Iehosaphata te aru anga i te kaveinga ia Maseli 3:5, 6?

⁶ E te au tane, te manako ra ainei koe e e maata roa taau apainga? Ka puapingaia koe mei te akaraanga o te Ariki ko Iehosaphata. Ei ariki, na Iehosaphata te apainga kia paruru i te iti tangata! Akapeea aia te akono anga i teia apainga teiaa? Kua rave a Iehosaphata i tana i rauka ei paruru i tona iti tangata. Kua akaketaketa aia i te au oire o Iuda e kua akaputuputu i tetai nuku vaeau maatamaata e 1,160,000 tuma vaeau. (2 Para. 17:12-19) Muri mai, kua tupu tetai āka manamanata kia Iehosaphata. Kua akaputuputu mai te nuku vaeau o te ngati Amona, to Moabi, e te au tangata o te maunga Seira, e kua tamataku iaia, tona ngutuare tangata e tona iti tangata. (2 Para. 20:1, 2) Eaa ta Iehosaphata i rave? Kua pati aia ia Iehova no te tauturu e te maroiroi. Kua aru aia i te akoanga meitaki ia Maseli 3:5, 6. (E tatau.) Te akaari maira te pure akaaka a Iehosaphata tei tataia ia 2 Paraleipomeno 20:5-12, e kua irinaki pu tikai aia i tona Metua aroa i te rangi. Akapeea a Iehova te pauanga i te pure a Iehosaphata?

7. Akapeea a Iehova te pau anga i te pure a Iehosaphata?

⁷ Kua tuatua a Iehova kia Iehosaphata na roto i te tangata ngati Levi ko Iahaziela. Akakite a Iehova: “E akamou ua kotou, e tu ua mai kotou, e e akara i te ora a Iehova i o kotou na.” (2 Para. 20:13-17) Kare teia i te ravenga mātauia no te tamaki! Inara kare teia au ikuikuanga no ko mai i te tangata mari ra, no ko mai ia Iehova. Ma te irinaki pu tikai ki roto i tona Atua, kua aru a Iehosaphata i teia au ikuikuanga. Te aere anga aia e tona au tangata i te aravei atu i te au enemi, kare aia i tuku ana i te au vaeau ririnui e te karape na mua ia ratou, mari ra ko te aronga imene kare a ratou apinga tamaki. Kua rave a Iehova i tana i taputou kia Iehosaphata. Pou takiri rava te au enemi i te mate.—2 Para. 20:18-23.

8. Eaa ta te au tane ka apii mei te akaraanga o Iehosaphata?

⁸ E te au tane, e apiianga meitaki to te akaraanga o Iehosaphata. Naau te apainga kia akono i toou ngutuare, no reira ka angaanga pakari koe kia paruru e kia tiaki ia ratou. Me tupu te au manamanata kia koe, penei ka manako koe e ka rauka ia koe i te akatikatika i te reira. Inara auraka e irinaki ki toou uaorai maroiroi, mari ra e pure kia Iehova no te tauturu me ko koe anake ua. Pera katoa e pure kapiti korua ko taau vaine ma te ngakau tae. Kimi i te aratakianga no ko mai ia Iehova na te apii anga i te Pipiria e te au puka ta te akaaerenga a Iehova i oronga mai, e oti taangaanga i te ako taau i kite mai. Penei kare tetai pae e āriki i te au ikianga taau i rave tei akatumuia ki runga i te Pipiria e penei ka karanga ratou e kua nenevaia koe. Penei ka karanga ratou e ko te moni e ta te reira ka oko mai te paruruanga meitaki roa atu no toou ngutuare tangata. Inara, e akamaara i te akaraanga o Iehosaphata. Irinaki aia ia Iehova e kua akapapu i te reira na roto i tana i rave. Kare a Iehova i akaruke ana i tona tavini tiratiratu e kare katoa aia e akaruke ia koe. (Sala. 37:28; Ebe. 13:5) Eaa atu ta te au tokorua ka rave ei akapapu e ka mataora to raua oraanga akaipoipo?

MEI TE PEROVETA KO ISAIA E TANA VAINE, AKARIRO I TE TAVINIANGA IA IEHOVA EI MEA PUAPINGA ROA ATU

9. Eaa ta tatou i kite mei te peroveta ko Isaia e tana vaine?

⁹ Te mea puapinga roa atu kia Isaia e tana vaine, koia oki kia tavini ia Iehova. E peroveta a Isaia, e penei kua orongaia te angaanga totou ki tana vaine, no te mea kua kapikiia aia e ko “te peroveta vaine.” (Isa. 8:1-4) Kua tuku a Isaia e tana vaine i ta raua akamori anga ia Iehova ei mea mua i roto i to raua oraanga. E akaraanga meitaki tikai raua no te au tokorua akaipoipo i teia tuatau!

10. Akapeea te apii anga i te totou Pipiria me tauturu i te nga tokorua akaipoipo kia inangaro i te tavini maroiroi ia Iehova?

¹⁰ Ka rauka i te au tokorua akaipoipo i teia tuatau i te aru ia Isaia e tana vaine me rave maroiroi i te angaanga a Iehova. Ka akaketaketa raua i to raua irinaki kia Iehova me apii kapiti i te au totou Pipiria e te akara akapeea te reira me akatupuia. (Tito 1:2) Ka akamanako katoa raua e eaa ta raua ka rave kia akatupu i te au totou Pipiria. Ei akaraanga, penei ka akamanako raua e te tauturu ra raua i te akatupu i ta Iesu totou e ka tutu aereia te nuti meitaki takapini i teianei ao, i mua ake ka tae mai te openga. (Mata. 24:14) Me papu i te nga tokorua e ka akatupuia te au totou a te Pipiria, ka tavini maroiroi atu raua ia Iehova.

MEI IA PERESILA E AKUILA, E TUKU I TE PATIREIA NA MUA

11. Eaa ta Peresila e Akuila i rave, e no teaa ra?

¹¹ Ka apii te nga tokorua akaipoipo mapu mei ia Peresila e Akuila, e nga tokorua ngati Iuda tei noo i te oire ko Roma. Kua akarongo raua ki te nuti meitaki no Iesu e kua riro mai ei nga Kerititiano. E mea papu, e mataora to raua oraanga. Inara, kua taui takiri to raua oraanga te akaue anga te Tutara ko Kalaudio kia akaruke te aronga ngati Iuda katoatoa ia Roma. Akamanako ana eaa tei tupu kia Akuila e Peresila. Ka akaruke raua i te ngai ta raua i mātau, ka kimi i tetai kainga ou e ka akamata akaou i ta raua angaanga maani kakau puakapa. Ka riro ainei teia tauianga maata ei arai ia raua kia kore e tuku i te angaanga Patireia na mua? Papu, kua kite koe i te pauanga ki tera uianga. I to raua kainga ou i Korinetia, kua tauturu a Akuila e Peresila i te putuputuanga e kua angaanga kapiti ki te apotetoro ko Paulo i te akamaroiroi i te au taeake i reira. Muri mai, kua neke raua ki te au oire ke te anoano ra i te tauturu a te aronga tutu aere. (Anga. 18:18-21; Roma 16:3-5) E maata ta raua angaanga i rave, e e oraanga mataora tikai to raua!

12. Eaa ra te nga tokorua akaipoipo ka akanoo ei i te au akakoroanga pae vaerua?

¹² Ka rauka i te au tokorua akaipoipo i teia tuatau i te aru ia Peresila e Akuila me tuku i te Patireia na mua. Te taime meitaki kia uriuri tetai nga tokorua i to raua akakoroanga, ko te tuatau i mua ake ka akaipoipo ei. Me akanoo te nga tokorua i te au akakoroanga no te tavini anga ia Iehova e me angaanga kapiti i te itae i tera au akakoroanga, ka kite maata atu raua i ta Iehova tauturu anga ia raua. (Kohe. 4:9, 12) Akamanako ana i tei tupu kia Russell e Elizabeth. Karanga a Russell, “I mua ake ka akaipoipo ei, kua uriuri kapiti maua eaa to maua akakoroanga pae vaerua.” Karanga a Elizabeth, “Kua uriuri maua i te reira no te mea me anoanoia maua kia rave i te au ikianga i muri mai, ka akapapu maua e kare te reira au ikianga e tamanata i to maua au akakoroanga.” Kua riro te au ikianga ta Russell e Elizabeth i rave ei tauturu ia raua kia neke ki Micronesia e kia tavini i te ngai ka anoanoia te au papuritia.

13. Ia Salamo 28:7, eaa te ka tupu me irinaki tatou kia Iehova?

¹³ Mei ia Russell e Elizabeth, e maata te au tokorua akaipoipo tei akamāmā mai i to ratou oraanga kia rauka ia ratou i te akapou maata i te taime no te tutu aere e te apii i te tangata. Me akanoo te au tokorua i te au akakoroanga meitaki no te tavini ia Iehova e me angaanga kapiti raua i te akatupu i te reira, e maata te au akameitakianga ta raua ka kite mai. Ka kite raua akapeea a Iehova me akono ia raua, ka maata atu to raua irinaki iaia, e ka mataora tikai raua.—E tatau ia Salamo 28:7.

MEI TE APOTETORO KO PETERO E TANA VAINE, E IRINAKI I TA IEHOVA I TAPUTOU

14. Akapeea te apotetoro ko Petero e tana vaine te akaari anga e kua irinaki raua i te taputou ia Mataio 6:25, 31-34?

¹⁴ Ka apii katoa te au tokorua akaipoipo mei te akaraanga o te apotetoro ko Petero e tana vaine. Mei te ono marama ki te okotai mataiti i muri ake i te aravei anga te apotetoro ko Petero ia Iesu, kua anoanoia aia kia rave i tetai ikianga puapinga. Kua angaanga a Petero ei ravakai no te akono i tona ngutuare tangata. No reira te pati anga a Iesu ia Petero kia aru iaia, kua anoanoia aia kia akamanako i tana vaine i mua ake ka rave ei i tana ikianga. (Luka 5:1-11) Kua iki a Petero i te aru ia Iesu e te rave i te angaanga tutu aere. E ikianga meitaki tana i rave! Pera katoa, e tumu meitaki to tatou kia irinaki e kua turu te vaine a Petero i tana ikianga. Te akaari maira te Pipiria e i muri ake i to Iesu tuakaouanga, kua aru te vaine a Petero i tana tane i tetai au taime. (1 Kori. 9:5) Mea papu, kua akanoo tana vaine i tetai akaraanga meitaki no te au vaine Kerititiano, no reira kua rauka ua ia Petero i te ako i te au tane e au vaine Kerititiano. (1 Pete. 3:1-7) Taka meitaki, kua irinaki a Petero e tana vaine i ta Iehova taputou, me tuku i te Patireia na mua i roto i to raua oraanga, ka akono Aia ia raua.—E tatau ia Mataio 6:25, 31-34.

15. Eaa ta tatou ka apii mei tei tupu kia Tiago e Esther?

¹⁵ Me kua akaipoipo korua no tetai nga mataiti, akapeea koe me akatupu i te inangaro kia akamaata atu i taau angaanga tutu aere? Tetai ravenga, kia apii eaa ta tetai au tokorua i rave. Ei akaraanga, penei ka tatau koe i te au atikara “Kua Oronga Puareinga Ratou ia Ratou Uaorai.” Kua tauturu teia au atikara ia Tiago e Esther, e tokorua akaipoipo i Brazil, kia inangaro i te tavini i tetai ngai te anoanoia ra te tauturu. Akamārama a Tiago: “Te tatau anga maua akapeea a Iehova te tauturu anga i tona au tavini i teia tuatau, kua inangaro katoa maua kia aru i ta Iehova akoanga e kia kite i tana tauturu.” I muri mai, kua neke raua ki Paraguay, te ngai e tavini ra raua i te reo Portugal mei te 2014 mai. Karanga a Esther: “Tetai irava ta maua i reka tikai ko Ephesia 3:20. Maata te taime kua kite maua i teia au tuatua te tupu anga i roto i ta maua tavini anga ia Iehova.” I roto i tana reta ki to Ephesia, taputou mai a Paulo e e maata ua atu ta Iehova ka rave i ta tatou e pati ra. Ka tupu ua rai teia taputou!

16. Koai ma ta te au tokorua mapu ka ui atu me akamanako raua i to raua au akakoroanga?

¹⁶ Ka puapinga katoa te au tokorua mapu i teia tuatau mei tei tupu ki te aronga tei irinaki ia Iehova. Penei kua akapou tetai au tokorua i te tuatau roa i roto i te angaanga tavinianga tamou. Pati i ta ratou tauturu me te manako ra koe no runga i toou au akakoroanga. E ravenga ke teia no te akaari e te irinaki ra koe ia Iehova. (Mase. 22:17, 19) Ka tauturu katoa te aronga pakari i te au tokorua akaipoipo ou kia akanoo e kia akatupu i te au akakoroanga pae vaerua.

17. Eaa tei tupu kia Klaus e Marisa, e eaa ta tatou ka apii mei to raua akaraanga?

¹⁷ Tetai taime, ka inangaro tatou i te rave i tetai angaanga kia tavini ia Iehova inara, ka arataki aia ia tatou kia rave i tetai angaanga ke. Akamanako ana i tei tupu kia Klaus e Marisa, tei taikuia i mua atu ana. E toru mataiti i muri ake i to raua akaipoipo, kua akaruke raua i to raua kainga e kua rave i te angaanga pātu are i ko i te opati Betela i Finland. Inara, kua apii mai raua e kare raua e akatikaia kia noo i te reira enua e tere atu i te ono marama. I te akamataanga, kua taitaia raua. Inara aere ua rai, kua patiia raua kia aere ki tetai apii no te tamou i te reo Arapia, e i teianei te tavini mataora nei raua i tetai enua ke i te ngai reo Arapia. Me akamanako a Marisa i tei tupu kia raua: “E mea mataku tikai i te rave i tetai mea kare koe i rave i mua ana, e ka anoanoia koe kia irinaki pu tikai ia Iehova. Inara kua kite au akapeea a Iehova te tauturu anga ia maua na roto i te au mataara umere tikai. Te kite anga au i te reira, kua ketaketa roa atu toku irinaki ia Iehova.” Mei ta tatou i kite mai mei teia akaraanga, ka papu ia tatou e ka akameitaki ua rai a Iehova ia tatou me irinaki pu tikai iaia.

18. Eaa ta te au tokorua akaipoipo ka rave kia irinaki ua rai raua ia Iehova?

¹⁸ E apinga aroa te akaipoipo no ko mai ia Iehova. (Mata. 19:5, 6) Ka inangaro aia i te au tokorua akaipoipo kia rekareka i teia mea aroa. (Mase. 5:18) E te au tokorua mapu, e akara meitaki eaa ta korua e rave ra i roto i to korua oraanga. Te rave ra ainei koe i taau ka rauka i te akaari kia Iehova e te akaperepere ra koe i tana au apinga aroa i oronga mai? Tuatua kia Iehova na roto i te pure. Kimi i roto i tana Tuatua te au kaveinga te ka tau ki toou turanga. E oti e akarongo ki te akoanga ta Iehova ka oronga mai. Papu e ka rauka mai ia koe te oraanga mataora e te manuia me akariro koe i te tavini anga ia Iehova ei mea maata i roto i to korua oraanga akaipoipo.