AKAPEEA ME TAKORE I TE TU MAKITAKITA

2 | Auraka e Tutaki Atu i te Kino

Karanga te Pipiria:

“Auraka te kino e tutakiia atu ki te kino i te tangata ravarai nei. . . . Ko ta kotou ïa e aruaru e, kia noo au ua kotou i roto i te tangata katoa nei. . . . Auraka e akaoko, . . . ‘Te tuatua maira te Atu, ei iaku te akaoko, e naku e tutaki atu.’”—ROMA 12:17-19.

Te Aiteanga:

Noatu e mea natura ua kia riri me tamamae tetai tangata ia tatou, inara kare te Atua e inangaro ia tatou kia tutaki atu i te kino. Mari ra, te inangaro ra aia ia tatou kia tiaki iaia kia akatikatika i te au tu kino ravarai.—Salamo 37:7, 10.

Taau ka Rave:

Me tutaki atu te tangata i te kino, ka tupu maata atu te tu makitakita. No reira, me ka tamamae tetai tangata ia koe, auraka e tutaki atu i te kino ki te kino. E tauta i te akaari i te tu ’au e te marū. I tetai au atianga, penei e mea meitaki kia akangaropoina atu i te reira. (Maseli 19:11) Inara, i tetai au taime penei ka akakite koe i te reira ki tetai tangata. Ei akaraanga, me kua takinokinoia ana koe, penei ka akakite koe i te reira ki te akava me kore ki te aronga mana taoonga.

Kare i te mea meitaki kia tutaki atu i te kino

Akapeea i reira me kare e rauka i te akatikatika i te manamanata ma te tu ’au? Me kore, kua tauta ana koe i te rave i te reira? Auraka e tutaki atu i te kino ki te kino, ko te maata atu te manamanata. Mari ra, e takore i te tu makitakita. E tuku i te reira e na te Atua e akatikatika. “E irinaki iaia, e nana e akatupu i te reira.”—Salamo 37:3-5.

Tua Oraanga—ADRIÁN

Kare Aia i Tutaki Atu i te Kino

I tona mapuanga, e tangata makitakita a Adrián e te inangaro i te tā ua. Karanga aia: “Kua piri putuputu au ki roto i te tamaki pupui, te maataanga o te taime kua ki au i te toto vaitata atu te mate i runga i te mataara.”

E 16 o Adrián mataiti te apii anga aia i te Pipiria. Karanga aia: “Iaku e tere ra ki mua i taku apii Pipiria, kua kite au i te au taui anga i toku tu.” Kua anoanoia aia kia takore i te tu makitakita e te tā ua. Kua reka tikai aia i tana i tatau i roto ia Roma 12:17-19, e auraka e tutaki atu i te kino ki te kino. Karanga aia: “Kua kite mai au e na Iehova e akono i te au tu tika kore i tona tuatau. Aere ua rai, kua apii au i te akamutu i te oraanga tā ua.”

I tetai aiai, kua rokoia a Adrián e tetai pupu tā ua. Kua kapiki mai te arataki o teia pupu: “E paruru ia koe uaorai!” Karanga a Adrián: “E anoano pakari toku kia tamaki atu.” Inara kare aia i rave ana i te reira, mari ra kua pure aia kia Iehova e kua akaruke ia ratou.

Karanga katoa a Adrián: “I tera mai rā kua aravei au i te arataki o te pupu kino. Kua ōia au e te riri otooto, inara kua pati akatenga au ma te muteki kia Iehova kia tauturu mai iaku. I toku poitirere, kua aere tika mai te mapu kiaku te karanga anga: ‘E akakore mai koe iaku no tei tupu inapo. Te tika, ka inangaro au kia riro mai mei ia koe rai. Ka inangaro au i te apii i te Pipiria.’ Mei teaa atura toku rekareka e kua rauka iaku i te tāpū i toku riri! Ma te akameitaki, kua akamata maua i te apii kapiti i te Pipiria.”