Papa Ainei Koe no te Akatapu ia Koe Kia Iehova?

1-2. Eaa ta tetai ka rave i mua ake ka papetitoia ai?

I TE rima mataiti i aereia mai, e mirioni tuma tangata tei papetitoia ei Au Kite no Iehova. E maata ratou kua aite mei ia Timoteo rai tei apii i te tuatua mou “mei to [ratou] tamariki anga mairai.” (2 Timo. 3:​14, 15) Ko tetai pae, kua apii ia Iehova ei aronga mamaata e tetai pae ei aronga pakarikari. Ei akaraanga, kua apii tetai vaine i te Pipiria ma te Au Kite o Iehova e kua papetitoia aia e 97 ona mataiti!

² Me te apii nei koe i te Pipiria me kore kua utuutuia i roto i te tuatua mou, te manako ra ainei koe kia papetitoia? E akakoroanga manea tena! Inara i mua ake ka papetito ei, ka anoanoia koe kia akatapu ia koe uaorai kia Iehova. Ka akamārama mai teia atikara eaa te ō maira me akatapu koe ia koe kia Iehova. E ka tauturu katoa te reira ia koe kia kite e kare e anoanoia te tu emiemi me akatapu i toou oraanga e kia papetito, me papa koe.

EAA TE AKATAPUANGA?

3. Akakite mai i te au akaraanga Pipiria o te aronga tei akatapuia kia Iehova.

³ I roto i te Pipiria, te aiteanga o te tuatua akatapuanga ko te akatakake anga i tetai kia akatupu i tetai akakoroanga puapinga. Ei akaraanga, kua akatapuia te iti tangata o Iseraela kia Iehova. Kareka ra tetai pae aronga o Iseraela kua akatapu ia ratou kia Iehova no te rave i tetai angaanga puapinga. Ei akaraanga, kua aao a Aarona i “te korona tapu”—e tarae auro tei tamouia ki mua i tona pare. Te akakite maira te tarae auro e kua ikiia aia ei taunga maata no Iseraela. (Levi. 8:9) Kua akatapu katoaia te au Nazira kia Iehova. Te tuatua “Nazira,” no roto mai i te reo Epera nazirʹ, te aiteanga kua “Akatakakeia no Tetai Angaanga Tapu.” Kua anoanoia te au Nazira kia akono i te au akauenga i roto i te Ture a Mose.—Nume. 6:​2-8.

4. (a) Akapeea tetai tei akatapuia kia Iehova me akatakakeia no tetai akakoroanga puapinga? (e) Eaa te aiteanga kia “akaruke” ia koe uaorai? (Akara katoa i te tutu.)

⁴ Me akatapu koe ia koe uaorai kia Iehova, te iki ra koe kia riro ei pipi na Iesu Karaiti e kia rave i te anoano o Iehova, ko te mea puapinga maata i roto i toou oraanga. Eaa te ka anoanoia noou me akatapu koe i toou oraanga? Karanga a Iesu: “Ko tei inangaro i te aru mai iaku, e akaruke aia iaia uaorai.” (Mata. 16:24) Te aerenga tuatua Ereni tei uriia “e akaruke aia iaia uaorai” ko tetai aiteanga “kia tuatua aia kare kiaia uaorai.” Ei tavini akatapuia kia Iehova, ka anoanoia koe kia tuatua kare ki tetai apinga tei patoi i to Iehova anoano. (2 Kori. 5:​14, 15) Ei akaraanga, ka kapiti mai i te tuatua anga kare ki “te au angaanga a te kopapa,” mei te peu ainga tau kore. (Gala. 5:​19-21; 1 Kori. 6:18) Ka ngatā ainei te rave i te reira? Me akaperepere koe ia Iehova e kua kite koe i tana ture e mea meitaki noou, te pauanga kare. (Sala. 119:97; Isa. 48:​17, 18) Karanga a Nicholas, “Penei ka akamanako koe i ta Iehova au ture mei te aua auri o te are tapekaanga tei tāpu ia koe kia kore e rave i toou anoano me kore mei te aua auri te ka paruru ia koe mei te au riona.”

5. (a) Akapeea koe me akatapu ia koe uaorai kia Iehova? (e) Eaa te tuke i rotopu i te akatapuanga e te papetitoanga? (Akara katoa i te tutu.)

⁵ Akapeea koe me akatapu ia koe uaorai kia Iehova? Ka taputou koe kiaia na roto i te pure no te akamori iaia e te tuku i tona anoano na mua i toou. Tera te aiteanga, te taputou ra koe e ka akaperepere ua rai koe ia Iehova “ma to ngakau katoa, e ma to vaerua katoa, e ma to manako katoa, e ma to ririnui katoa.” (Mare. 12:30) Ka rave koe i taau akatapuanga i rotopu ia korua ko Iehova. Kareka ra te papetitoanga, ka rave koe ki mua i te katoatoa i te akaari e kua akatapu koe i toou oraanga kia Iehova. Taau akatapuanga, e tia puapinga tikai e te anoano maira a Iehova ia koe kia akono i te reira, e ka inangaro koe i te akatupu katoa i taau tia.—Kohe. 5:​4, 5.

EAA RA KA AKATAPU IA KOE UAORAI KIA IEHOVA?

6. Eaa tei akakeu i tetai kia akatapu iaia uaorai kia Iehova?

⁶ Ko te tumu maata i akatapu ei koe ia koe uaorai kia Iehova, no toou akaperepere iaia. Kare te reira i akatumuia ki runga i te manako ngakau mari ra ki runga i “te kite” mou—koia oki ko taau i apii mai no Iehova tei akatupu i toou inangaro iaia. (Kolo. 1:9) Mei taau apii Pipiria, kua akakeuia koe kia irinaki e (1) e Atua tika tikai a Iehova, (2) ko te Pipiria tana Tuatua akauruia, e te (3) te taangaanga ra aia i tana akaaerenga no te akatupu i tona anoano.

7. Eaa ta tatou ka rave i mua ake ka akatapu ia tatou uaorai ki te Atua?

⁷ Ko te aronga tei akatapu ia ratou uaorai kia Iehova, kua apii i te au apiianga puapinga i roto i ta te Atua Tuatua e kua akono i te reira i roto i to ratou oraanga. Ka akakite aere ratou i ta ratou i apii mai ki tetai ua atu tangata. (Mata. 28:​19, 20) Kua tupu to ratou inangaro no Iehova, e ka akamori ratou iaia anake. Ko tera ainei toou manako? No toou inangaro ia Iehova, kare koe e akatapu ia koe uaorai e kia papetito no te akamareka i toou puapii, i toou nga metua, e toou au oa.

8. Akapeea te tu āriki rekareka me tauturu ia koe kia akatapu ia koe kia Iehova? (Salamo 116:​12-14)

⁸ Me akamanako koe i ta Iehova i rave noou, ka riro te akatapu ia koe uaorai kiaia ei mea natura ua. (E tatau ia Salamo 116:​12-14.) No te mea karanga te Pipiria e ko “te au mea memeitaki i o maiia ra, e te au mea tika ravarai,” no ko mai ia Iehova. (Iako. 1:17) Ko te apinga aroa maata rava atu tana i oronga mai, ko te atinga o tana Tamaiti akaperepere ko Iesu. Akamanako ana! Na roto i te oko, kua rauka ia koe tetai pirianga vaitata kia Iehova. Pera katoa, tei ia koe te manakonakoanga no te oraanga mutu kore. (1 Ioa. 4:​9, 10, 19) Na te akatapuanga ia koe kia Iehova, te akaari ra koe i toou tu akaperepere no tana apinga aroa maata rava atu, e pera te au akameitakianga ta Iehova i oronga mai naau. (Deu. 16:17; 2 Kori. 5:15) Ka kite maata atu koe no runga i teia i roto i te apii 46 tumu manako 4 o te puka Oraanga Mataora e Tuatau Ua Atu!, e pera katoa te vitio e toru miniti Oronga Anga i Taau Apinga Aroa ki te Atua.

KUA PAPA AINEI KOE NO TE AKATAPUANGA E TE PAPETITOANGA?

9. Eaa ra tetai kare e māroia kia akatapu iaia uaorai?

⁹ Penei ka manako koe kare koe i papa no te akatapuanga e te papetitoanga. Ka anoanoia koe kia taui i toou oraanga kia tau ki ta Iehova au kaveinga. E penei ka anoano koe i te tuatau kia akaketaketa i toou akarongo. (Kolo. 2:​6, 7) Ka tuke te turanga apii o tetai ki tetai, e kare e aiteite te mataiti o te au mapu kia akatapu e kia papetito ia ratou. E akamanako meitaki i toou turanga pae vaerua e tei tau ia koe i te rave, auraka e akaaite ki tetai ke.—Gala. 6:​4, 5.

10. Eaa taau ka rave me kare koe i papa ake no te akatapuanga e te papetitoanga? (Akara katoa i te pia “Me Utuutuia Koe i Roto i te Tuatua Mou.”)

¹⁰ Me kite koe e kare koe i papa ake no te akatapu ia koe uaorai kia Iehova, e akariro i te reira ei akakoroanga naau. E pure kia Iehova no tana tauturu kia rauka ia koe i te rave i te au tauianga tei anoanoia. (Phili. 2:13; 3:16) Papu e te akarongo maira aia i taau pure e ka ariu mai ki te reira.—1 Ioa. 5:14.

EAA RA TETAI PAE I EMIEMI EI?

11. Akapeea a Iehova te tauturu anga ia tatou kia vai tiratiratu kiaia?

¹¹ Kua emiemi tetai pae no te akatapuanga e te papetitoanga noatu kua papa ratou. Penei ka manako ratou, ‘Akapeea me ka rave au i te kino e ka akaateaia au ki vao i te putuputuanga?’ Me ko tera toou manako, e irinaki e ka oronga mai a Iehova i te au mea tei anoanoia “kia tau [toou] aerenga i te Atu i te au mea katoa e mareka mai ei ra.” (Kolo. 1:10) Ka oronga katoa mai aia i te maroiroi kia koe kia rave i te tika. Kua akapapu mai aia i te reira na roto i tana akono anga i te au taeake. (1 Kori. 10:13) Ko te reira tetai tumu i iti ei te numero o te aronga tei akaateaia ki vao i te putuputuanga. Ka tauturu a Iehova i tona iti tangata kia vai tiratiratu kiaia.

12. Akapeea tatou me kopae i te rave i te au mea kino?

¹² Pouroa tatou ka timataia kia rave i te kino. (Iako. 1:14) Inara, naau te ikianga me ka rave koe i te kino. Tei ia koe te tikaanga kia akatere i toou uaorai oraanga. Noatu e ka patoi mai tetai aronga, ka rauka ia koe i te akatere i toou au anoano. E me tupu mai tetai au anoano tau kore, e patoi i te reira. Ei tauturu ia koe, e pure putuputu. E apii tamou i te Tuatua a te Atua. E aere ki te au uipaanga. E rave putuputu i te angaanga tutu aere. Na roto i teia takainga e ā, ka akamaroiroiia koe kia akono i taau tia akatapuanga. E auraka e ngaropoina ka tauturu ua rai a Iehova ia koe.—Gala. 5:16.

13. Eaa te akaraanga meitaki ta Iosepha i akanoo no tatou?

¹³ Ka ngoie ua ia koe i te akono i toou akatapuanga me iki koe na mua eaa taau ka rave me rokoia koe e te timataanga. Te oronga maira te Pipiria i te au akaraanga o te aronga tei rave i te reira noatu e aronga apa ua ratou. Ei akaraanga, kua timata putuputu te vaine a Potiphara i te mapu tane ko Iosepha. Inara kua iki tinamou a Iosepha kia kore e ara. Akakite mai te irava “kare ra aia i akatika atu,” e kua tuatua e: “Eaa oki au e tika’i kia rave i tenana kino maata, e te ara i te Atua?” (Gene. 39:​8-10) Taka meitaki ta Iosepha ikianga i mua ake ka timataia ai aia e kua ngoie ua iaia i te patoi i te timataanga.

14. Akapeea tatou me patoi i te kino?

¹⁴ Akapeea koe me aru i te akaraanga o Iosepha? E iki i teianei eaa taau ka rave me tupu te timataanga. E patoi viviki i te au mea ta Iehova e rikarika ra e auraka e akamanako i te reira. (Sala. 97:10; 119:165) Me rave koe i teia, kare koe e ngaueue. Kua kite takere koe i taau ka rave e kua tinamou toou manako.

15. Akapeea tetai me akaari e te “kimi tikai” ra aia ia Iehova? (Ebera 11:6)

¹⁵ Penei kua kite koe i te tuatua mou e kua inangaro koe i te tavini ia Iehova ma te ngakau katoa. Inara, e apinga tetai te tāpupu ra ia koe kia kore e akatapu ia koe e kia papetito. E akamanako i te akaraanga o te Ariki ko Davida. Kua pati akatenga aia kia Iehova: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako: E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.” (Sala. 139:​23, 24) Ka akameitaki a Iehova i “te aronga i kimi tikai iaia.” No te mea te aruaru ra koe kia akatapuia e kia papetitoia, te akaari ra koe e te kimi ra koe iaia.—E tatau ia Ebera 11:6.

AKAVAITATA UA ATU KIA IEHOVA

16-17. Akapeea te au mapu tei utuutuia i roto i te tuatua mou me akavaitata kia Iehova? (Ioane 6:44)

¹⁶ Karanga a Iesu e na Iehova e akavaitata mai i te tangata kiaia. (E tatau ia Ioane 6:44.) Mea umere tikai i te kite akapeea te reira me tupu kia koe. E akara ana a Iehova i te meitaki i roto i te tangata e kua akavaitata ia ratou kiaia. Kua manako Aia iaia e “nona uaorai,” e ei tangata akaperepereia. (Deu. 7:6) Aite rai kia koe.

¹⁷ Penei e mapu koe tei utuutuia ki roto i te tuatua mou e kua manako koe te aru ua ra koe i toou nga metua. Inara te karanga ra te Pipiria: “E akavaitata atu ki te Atua, e nana e akavaitata mai kia kotou.” (Iako. 4:8; 1 Para. 28:9) Me iki koe i te akavaitata kia Iehova, ka ariu mai aia na te akavaitata anga kia koe. Kare a Iehova e manako ana ia koe ei tuanga no tetai pupu aronga. Mari ra ka akavaitata mai aia ia tatou tataki tai kiaia e pera te aronga tei utuutuia i roto i te tuatua mou. Me akavaitata mai tetai kia Iehova, ka ariu mai Aia mei tei taikuia ia Iakobo 4:8.—Akaaite kia 2 Tesalonia 2:13.

18. Eaa ta tatou ka uriuri i te atikara ka aru mai? (Salamo 40:8)

¹⁸ Me akatapu koe ia koe uaorai kia Iehova e kia papetitoia, te aru ra koe i to Iesu tu. Kua oronga puareinga ua aia iaia ki tona Metua kia rave i tona anoano. (E tatau ia Salamo 40:8; Ebe. 10:7) I te atikara ka aru mai, ka uriuri tatou eaa te ka tauturu ia koe kia tavini ua atu ia Iehova i muri mai i toou papetitoanga.