Kia Ngakau Toa Mei ia Zadoka

1-2. Koai a Zadoka? (1 Paraleipomeno 12:​22, 26-28)

AKAMANAKO ana i teia. Kua uipa mai tetai urupu tangata e 340,000 ki Heberona no te akariro ia Davida ei ariki no Iseraela. Kua mataora ratou i te pukapuka, te katakata e te imene ei akapaapaa ia Iehova e toru rā. (1 Para. 12:39) Tei roto i teia urupu tangata tetai mapu tane ko Zadoka e kare te tangata i kite e koai aia. Mari ra, kua kite a Iehova iaia e kua inangaro Aia kia kite tatou e tei reira a Zadoka. (E tatau ia 1 Paraleipomeno 12:​22, 26-28.) Koai a Zadoka?

² E taunga a Zadoka tei angaanga kapiti ki te Taunga Maata ko Abiatara. Kua oronga katoa te Atua i te pakari e te mārama kia Zadoka no te akamārama i tona anoano. (2 Samu. 15:27) Ka pati te tangata ia Zadoka no tana akoanga meitaki. E toa ririnui katoa aia e te ngakau toa. I teia atikara, ka uriuri tatou akapeea a Zadoka te akaari anga i te tu ngakau toa.

3. (a) Eaa ra te au tavini o Iehova ka anoano ei kia ngakau toa? (e) Eaa ta tatou ka uriuri i roto i teia atikara?

³ I teia au rā openga, te kino ua atura ta Satani tamaki anga i te iti tangata o te Atua. (1 Pete. 5:8) Ka anoanoia tatou kia ngakau toa e kia tiaki marie ia Iehova kia takore takiri ia Satani e tona akatereanga kino. (Sala. 31:24) I teianei, ka uriuri tatou e toru ravenga no te akaari i te tu ngakau toa mei ia Zadoka rai.

TURU I TE PATIREIA O TE ATUA

4. Eaa te iti tangata o Iehova i anoano ei i te tu ngakau toa kia turu i te Patireia o te Atua? (Akara katoa i te tutu.)

⁴ Ei iti tangata no Iehova, ka turu maroiroi tatou i te Patireia o te Atua, inara ka anoanoia te tu ngakau toa kia rave i te reira. (Mata. 6:33) Ei akaraanga, i roto i teia ao kino ka anoanoia te tu ngakau toa kia akono i ta Iehova au kaveinga e te tutu aere i te nuti meitaki o te Patireia. (1 Tesa. 2:2) Ka anoano katoaia te tu ngakau toa kia kore tatou e piri atu ki te au māroanga poritiki tei akatakake i te tangata o teianei ao. (Ioa. 18:36) No te mea kare to Iehova iti tangata e piri ana ki te angaanga poritiki e te tamaki, kua ngere ratou i te moni, kua takinokinoia e kua tapekaia i roto i te are auri.

5. Eaa a Zadoka i anoano ei i te tu ngakau toa no te turuturu ia Davida?

⁵ Kare a Zadoka i aere ua ki Heberona no te akaariki anga ia Davida. Mari ra, kua papa aia no te tamaki. (1 Para. 12:38) Kua puareinga ua aia i te aru ia Davida e te paruru ia Iseraela mei te au enemi. Noatu kare a Zadoka i tukatau i te tamaki, e toa ririnui ra aia e te ngakau toa.

6. Akapeea a Zadoka te apiianga i te tu ngakau toa o Davida? (Salamo 138:3)

⁶ Akapeea tetai taunga mei ia Zadoka rai i te riro anga mai ei tangata ngakau toa? E maata tana aronga maroiroi e te ngakau toa i kite. E mea papu kua apii aia mei to ratou akaraanga. Ko Davida tetai ia ratou “tei arataki ia Iseraela” ki te tamaki. (1 Para. 11:​1, 2) Kua irinaki ua rai a Davida ia Iehova no te tauturu i te tamaki atu i tona au enemi. (Sala. 28:7; e tatau ia Salamo 138:3.) Kua kite katoa a Zadoka i te akaraanga meitaki o te au tane ngakau toa mei ia Iehoiada e tana tamaiti toa uritumu ko Benaia, pera katoa te 22 rangatira o te au kopu tei turu ia Davida. (1 Para. 11:​22-25; 12:​26-28) Kua maroiroi teia aronga i te turuturu i to ratou Ariki ko Davida.

7. (a) Eaa te au akaraanga no te tu ngakau toa i teia tuatau? (e) Eaa taau i apii mai mei te akaraanga o te Taeake Nsilu i roto i te vitio?

⁷ Ka rauka te tu ngakau toa me akamanako tatou i te akaraanga o te aronga tei turu maroiroi i ta Iehova tutaraanga. Kua patoi pakari to tatou Ariki, ko Iesu Karaiti i te māro anga a Satani iaia kia piri ki te angaanga poritiki o teianei ao. (Mata. 4:​8-11; Ioa. 6:​14, 15) Kua irinaki ua rai aia kia Iehova no te maroiroi. I teia tuatau, e maata te akaraanga o te au mapu tane tei patoi i te angaanga tamaki e te piri ki te angaanga poritiki. Ka rauka ia koe i te tatau i to ratou tua i runga i te jw.org.a

TAUTURU I TOOU AU TAEAKE

8. Eaa te tuatau ka anoanoia te aronga pakari kia ngakau toa i te tauturu i to ratou au taeake?

⁸ E inangaro ana te iti tangata o Iehova i te tauturu i tetai e tetai. (2 Kori. 8:4) Inara i tetai taime, ka anoanoia te tu ngakau toa no te rave i teia. Ei akaraanga me tupu te tamaki, ka anoanoia te aronga pakari kia akamaroiroi, turuturu e te oronga i te tauturu i te pae vaerua e te pae kopapa ki to ratou au taeake e te au tuaine. No to ratou inangaro i teia au mamoe, ka tuku te aronga pakari i to ratou oraanga ki roto i te kino no te oronga i te tauturu. (Ioa. 15:​12, 13) Me akapera ratou, te aru nei ratou i te tu ngakau toa o Zadoka.

9. Ia 2 Samuela 15:​27-29, eaa ta Davida i pati ia Zadoka kia rave? (Akara katoa i te tutu.)

⁹ Kua rokoia a Davida e te tumatetenga. Kua tauta tana tamaiti ko Abasaloma i te rave i te patireia nona uaorai. (2 Samu. 15:​12, 13) No reira, kua anoanoia a Davida kia akaruke viviki ia Ierusalema! Kua tuatua aia ki tona au tavini: “Ka tu, e oro tatou; kare oki e ora ia Abasaloma ra.” (2 Samu. 15:14) Ia ratou e akaruke ra i te oire, kua kite a Davida e ka anoanoia tetai tangata kia noo atu e kia akakite kiaia i te au parani a Abasaloma. No reira, kua tono aia ia Zadoka e tetai au taunga kia oki ki te oire ei aronga tari tuatua nana. (E tatau ia 2 Samuela 15:​27-29.) Inara, kia vai matakite ratou. Kua akaue a Davida ia ratou kia rave i tetai angaanga ngatā noatu te kino. E tangata rave kino a Abasaloma, te noinoi e te pikipikikaa. E akamanako ana i tana ka rave kia Zadoka e te au taunga me mou ratou iaia!

10. Akapeea a Zadoka e tetai ke te paruru anga ia Davida?

¹⁰ Kua pati a Davida i te tauturu a Zadoka e tetai atu taeake ko Husai kia aru i tana parani. (2 Samu. 15:​32-37) Na te rave anga i te reira, kua irinaki a Abasaloma ia Husai, e kua akakite a Husai i te au ravenga tamaki te ka tauturu ia Davida kia akateateamamao no te tamaki. Te akarongo anga a Abasaloma i te akoanga a Husai, kua akakite a Husai kia Zadoka e Abiatara i te ka tupu. (2 Samu. 17:​8-16) E oti, kua tuku raua i te karere kia Davida no te parani a Abasaloma. (2 Samu. 17:17) Ma te tauturu a Iehova, kua paruru a Zadoka e te au taunga i te oraanga o Davida.—2 Samu. 17:​21, 22.

11. Akapeea tatou me aru i te tu ngakau toa o Zadoka me tauturu i to tatou au taeake?

¹¹ Me patiia tatou kia tauturu i to tatou au taeake i te tuatau tumatetenga, akapeea tatou me akaari i te tu ngakau toa mei ia Zadoka rai? (1) E aru i te aratakianga. Me tupu te tumatetenga, e mea puapinga kia akarongo tatou e kia vai taokotai ua. E aru tatou i te au ikuikuanga no ko mai i te opati Betela. (Ebe. 13:17) E mea meitaki kia tatau putuputu te aronga pakari i te au ikuikuanga akapeea me akateateamamao e eaa te ka rave me tupu te kino. (1 Kori. 14:​33, 40) (2) Kia ngakau toa e kia matakite. (Mase. 22:3) E akamanako i mua ake ka rave ei koe i tetai angaanga. E paruru ia koe uaorai e tetai ke. (3) Irinaki ia Iehova. E akamaara, ka inangaro a Iehova i te paruru ia koe e toou au taeake. No reira, ka tauturu aia ia koe kia rave i te reira na roto i te tu mako.

12-13. Eaa taau i apii mai mei te akaraanga o Viktor e Vitalii? (Akara katoa i te tutu.)

¹² Akamanako ana ia Viktor e Vitalii, e nga tangata pakari tei tari atu i te kai e te vai ki to raua au taeake irinaki i Ukraine. Karanga a Viktor, “Kua kimi maua i te kai i te au ngai katoa. Maata te taime, kua rongo maua i te au aruru o te pupui takapini ia maua. Kua oronga mai tetai taeake i te kai no roto mai i tona are toa. E maata te au papuritia tana i tauturu kia ora i tetai tuatau. Te akakī anga maua i te toroka ki te kai, kua aruru tetai pomu mei te 20 mita te mamao mei ia maua. I tera rā katoa, kua pure akatenga au kia Iehova no te tu ngakau toa kia tauturu au i te au papuritia.”

¹³ Karanga a Vitalii, “Kua anoanoia maua kia ngakau toa. Kua pou e 12 ora i toku tere mua e kua pure putuputu au kia Iehova.” E tu ngakau toa to Vitalii, inara kua matakite katoa aia. Karanga aia: “Kua pati ua au kia Iehova no te tu pakari e te tau. Kua akaoro au na runga i te au mataara tei akatikaia e te aronga mana. Kua akamaroiroi katoaia au e te au taeake e te au tuaine e angaanga kapiti ra. Kua akaatea ratou i te au araianga i runga i te mataara, kua akaputu e kua tari i te au apinga ki roto i te toroka e kua oronga mai i te kai e te ngai akaruruanga no maua.”

KIA VAI TIRATIRATU KIA IEHOVA

14. Eaa te ka tupu me akaruke to tatou akaperepere ia Iehova?

¹⁴ Me akaruke tetai mema ngutuare me kore tetai oa ia Iehova, e turanga ngatā tikai tera i te akakoromaki. (Sala. 78:40; Mase. 24:10) Te maata i toou inangaro i tera tangata, ka ngatā i te āriki i tera turanga. Me kua tupu teia turanga taitaia kia koe, ka akamaroiroi te akaraanga tiratiratu o Zadoka ia koe.

15. Eaa a Zadoka i anoano ei i te tu ngakau toa kia vai tiratiratu kia Iehova? (1 Ariki 1:​5-8)

¹⁵ Kua vai tiratiratu a Zadoka kia Iehova, inara kua tiratiratu kore tona oa piri mou ko Abiatara. Kua tupu teia i te openga o ta Davida tutaraanga. Te vaitata anga a Davida i te mate, kua tauta tana tamaiti ko Adonia i te akaariki iaia uaorai. Inara kua iki a Iehova ia Solomona kia tutara ei ariki. (1 Para. 22:​9, 10) Kua turu a Abiatara ia Adonia. (E tatau ia 1 Ariki 1:​5-8.) No teia, kua tiratiratu kore a Abiatara kia Davida e kia Iehova! E akamanako ana i te tu maromaroa e te taitaia o Zadoka. No tetai 40 tuma mataiti, kua angaanga kapiti raua ko Abiatara ei nga taunga. (2 Samu. 8:17) Kua akono raua i “te aruna a te Atua.” (2 Samu. 15:29) I te akamata anga, kua turu raua i te taoonga ariki o Davida e e maata ta raua angaanga i rave i roto i te angaanga a Iehova.—2 Samu. 19:​11-14.

16. Eaa tei tauturu ia Zadoka kia vai tiratiratu?

¹⁶ Kua vai tiratiratu a Zadoka kia Iehova noatu te ikianga tarevake a Abiatara. Kua irinaki katoa a Davida ia Zadoka. Te kiteaia anga ta Adonia i rave, kua iki a Davida ia Zadoka, Natana e Benaia kia akatainu ia Solomona ei ariki. (1 Ari. 1:​32-34) E mea papu e kua akamaroiroiia a Zadoka e te akaraanga o te au tavini tiratiratu o Iehova, mei ia Natana e te aronga tei turu i te Ariki ko Davida. (1 Ari. 1:​38, 39) Te riro anga mai a Solomona ei ariki, kua “tupauia akera oki a Abiatara e te ariki ia Zadoka taunga.”—1 Ari. 2:35.

17. Akapeea koe me aru i te akaraanga o Zadoka me akaruke tetai akaperepere ia Iehova?

¹⁷ Akapeea koe me aru i te akaraanga o Zadoka? Me iki tetai akaperepere i te akaruke ia Iehova, e akaari kia Iehova e ka vai tiratiratu koe kiaia. (Iosu. 24:15) Ka oronga mai a Iehova i te maroiroi e te tu ngakau toa kia rave koe i te tika. E irinaki kiaia na roto i te pure e kia piri vaitata ki te au oa tiratiratu. Akaperepere a Iehova ia koe no toou tu tiratiratu e ka tutaki aia ia koe no te reira.—2 Samu. 22:26.

18. Eaa taau i apii mai mei tei tupu kia Marco e Sidse?

¹⁸ Akamanako ana i te akaraanga o Marco e tana vaine ko Sidse, kua akaruke ta raua nga tamaine mapu i te tuatua mou. Karanga a Marco: “Mei te rā i anauia mai ei ta maua nga tamaine, kua akaperepere tikai maua ia raua. Kua rave maua i tetai ua atu mea no te paruru ia raua mei te kino. No reira, te akaruke anga raua ia Iehova, kua mamae tikai toku ngakau.” Karanga katoa aia: “Noatu ra, kua tauturu a Iehova ia maua kia akakoromaki. Kua akapapu aia e me paruparu au, kua maroiroi taku vaine, e me paruparu taku vaine, kua maroiroi au.” Karanga a Sidse: “Naringa kare a Iehova i akamaroiroi ia maua, kare e rauka ia maua i te akakoromaki i teia turanga ngatā. Kua maromaroa tikai au e kua manako e noku te apa. No reira, kua akakite au i toku manako kia Iehova. I muri ake i te reira, kua aravei au i tetai tuaine kare au i kite ana no tetai tuatau roa, kua tuku aia i tona rima ki runga i toku pakuivi, kua akara mai iaku e kua tuatua: ‘E akamaara e Sidse, kare noou te apa!’ Ma te tauturu a Iehova, kua tavini ua rai au iaia ma te mataora.”

19. Eaa taau ka tauta i te rave?

¹⁹ Ka inangaro a Iehova i tona au tavini pouroa kia ngakau toa mei ia Zadoka rai. (2 Timo. 1:7) Inara, kare Aia e inangaro ia tatou kia irinaki i to tatou uaorai maroiroi. Mari ra, kia irinaki tatou iaia. No reira, me rokoia koe e tetai turanga ka anoano koe i te tu ngakau toa, e uri koe kia Iehova. E mea papu ka tauturu aia ia koe kia ngakau toa mei ia Zadoka rai!—1 Pete. 5:10.