Ta Iehova Akakoreanga Ara​—Akapeea Tatou me Aru Iaia?

1-2. (a) Eaa tetai atianga ka ngatā ia tatou i te akakore i te ara a tetai ke? (e) Akapeea a Denise te akakoreanga i te ara?

KA NGATĀ ainei ia koe i te akakore i te ara a tetai ke? Ka ngatā rai ia tatou, me tuatua riri me kore me tamamae tetai tangata ia tatou. Inara, e au ravenga tetai te ka tauturu ia tatou kia kore e akamoupuku e te akakore i te ara a tetai ke. Ei akaraanga, e akamanako i tei tupu ki te tuaine ko Denise,a tei akakore i te ara kino a tetai tangata. I te 2017, te atoro ra a Denise e tona ngutuare tangata i te Opati Maata o te Au Kite o Iehova. Ia ratou e oki ra ki te kainga, kua akaūia ratou e tetai tangata. Kua ngaro te ao o Denise. Tona ara mai anga, kua kinokino tana nga tamariki e kua mate tana tane ko Brian. Karanga a Denise, “Kua taitaia tikai au e te mamae ngakau.” I muri mai, kua rongo au e kare te tangata akaū i pakia ana, no reira kua pure au kia Iehova no te ngakau marū.

² Kua akaapaia te tangata akaoro no te tamate i ta Denise tane. Me akautungaia aia, ka tiriaia aia ki roto i te are auri. Inara, kua akakite tetai akava kia Denise e ko tana tukuanga tika, ka riro ei akautunga i te tangata akaū. Karanga a Denise: “Kua aite rai mei tetai tangata tei pakoti i te kati mei toku motu e kua akakīia ki te miti, no te mea ka akakite akaou au i toku tumatetenga.” I te nga epetoma i muri mai, kua aere a Denise ki te akavaanga e kua akapapa i tana ka tuatua. Te mea umere, kua pati a Denise ki te akava kia aroa mai i te reira tangata.b Te akaoti anga tana tuatua, kua aue te akava. Karanga aia: “E 25 mataiti i toku akava anga, kare rava au i akarongo ana i tetai akakiteanga mei teia rai, kua pati te ngutuare tangata kia aroaia te tangata apa. Ka tai nei au ka akarongo ei i te au tuatua akaaroa e te akakoreanga ara.”

3. Eaa tei tauturu ia Denise kia akakore i te ara a tetai ke?

³ Eaa tei tauturu ia Denise kia akakore i te ara a tetai ke? Kua akamanako aia i ta Iehova akakoreanga ara. (Mika 7:18) Me akaperepere tatou i to Iehova tu, ka akakeuia tatou kia akakore i te ara a tetai ke.

4. Eaa ta Iehova e inangaro maira ia tatou kia rave? (Ephesia 4:32)

⁴ Ka inangaro a Iehova ia tatou kia akakore i te ara a tetai ke mei Iaia rai. (E tatau ia Ephesia 4:32.) Te tapapa maira aia ia tatou kia akakore i te ara a te aronga tei akatupu i te mamae kia tatou. (Sala. 86:5; Luka 17:4) I teia atikara, ka uriuri tatou e toru ravenga kia akakore ua rai tatou i te ara a tetai ke.

EIAA E KOPAE I TOOU MAMAE NGAKAU

5. Ia Maseli 12:​18, eaa to tatou manako me akakino mai tetai ia tatou?

⁵ Penei ka mamae tatou me akakinoia tatou e te au oa e to tatou ngutuare tangata. (Sala. 55:​12-14) Kua aite te reira mamae mei te koputaputa koke rai te tu. (E tatau ia Maseli 12:18.) Penei ka kopae tatou i to tatou mamae ngakau. Ka aite te reira mei te koputaputa koke e te vai ua ra te matipi ki roto. No reira, ka anoanoia tatou kia kimi i te tauturu e marū ei to tatou mamae ngakau.

6. Eaa te ka tupu me akakinoia mai tatou?

⁶ Me akakino mai tetai ia tatou, ka viviki tatou i te riri. Akakite te Pipiria e ka tupu ua te riri kia tatou. Inara te akamatakite maira te reira, e auraka e riri ua atu. (Sala. 4:4; Ephe. 4:26) No teaa ra? Ka akakeu to tatou ngakau ia tatou kia rave i tetai angaanga. Inara, ka akatupu te riri i te kino. (Iako. 1:20) E akamaara, ka tupu rai te riri inara naau te ikianga me ka riri ua atu koe.

7. Eaa atu te ka tupu me akakino mai tetai ia tatou?

⁷ Me akakinoia mai tatou, ka maata atu te mamae. Ei akaraanga, kua karanga te tuaine ko Ann: “I toku tamariki anga, kua akaruke toku tati ia mami e kua akaipoipo atu i te vaine tei akono iaku. Kua kopaeia au. Te anau tamariki anga raua, mei te mea atura e kua kopaeia au e tati e kare au e inangaroia.” Akakite a Georgette i tona mamae te akaturi anga tana tane: “E oa maua mei to maua tamariki anga e kua painia kapiti maua! Mamae tikai toku ngakau.” Karanga te tuaine ko Naomi: “Kare rava au i manako ana e ka rave taku tane i teia peu kino. No reira, te akakite anga mai aia e kua akara ana aia i te au teata ainga viivii, kua mamae tikai au no te mea kua pikikaaia au.”

8. (a) Eaa te tumu ka akakore tatou i te ara a tetai ke? (e) Eaa te puapinga me akakore tatou i te ara a tetai ke? (Akara i te pia “Eaa Taau ka Rave me Akakinoia Koe e Tetai Tangata?”)

⁸ Kare e rauka ia tatou i te akatere i ta tetai ke ka tuatua e ka rave kia tatou. Inara, ka rauka ia tatou i te akatere i to tatou tu. Ko te ravenga meitaki te reira no te akakore i te ara a tetai ke. No teaa ra? Akaperepere tatou ia Iehova e te inangaro maira aia ia tatou kia akakore i te ara a tetai ke. Me riri ua atu tatou e kare e akakore i te ara a tetai ke, e mea papu ka rave tatou i te au angaanga neneva e ka tupu te kino ki to tatou oraanga kopapa. (Mase. 14:​17, 29, 30) Akamanako ana i te akaraanga o tetai tuaine ko Christine. Karanga aia: “Me riri au, kare au e katakata e te kaikai meitaki. Kare katoa au e moe meitaki e ka ngatā i te akakoromaki i toku tu. Ka riro teia ei takino i toku oraanga akaipoipo e toku pirianga ki tetai ke.”

9. Eaa tatou ka akakore ei i te riri?

⁹ Noatu me kare te tangata tei akatupu i te mamae e tataraara, ka rauka rai ia tatou i te tamarū i to tatou mamae. Akapeea ra? Karanga a Georgette: “Kua roa te tuatau, inara kua rauka iaku i te akakore i toku riri no taku tane tei akaruke iaku. Tei tupu mai, kua marū toku ngakau.” Me akakore tatou i te riri, ka marū to tatou ngakau e ka akono meitaki tatou i tetai ke. Ka puapinga katoaia tatou e ka mataora te oraanga me kare tatou e akamanako ua i te kino tei tupu. (Mase. 11:17) Inara, eaa ta tatou ka rave me kare tatou i papa ake no te akakore i te ara a tetai ke?

AKAPEEA KOE ME AKAKORE I TE RIRI

10. Eaa tatou ka anoano ei i te tuatau kia marū te ngakau? (Akara katoa i te au tutu.)

¹⁰ Akapeea koe me akakore i toou riri no tetai ke? Na te tiaki anga kia marū koe. Me va’iia tetai tangata, ka anoanoia te tuatau kia meitaki tona maki. Mei te reira katoa, ka anoanoia te tuatau kia marū to tatou mamae ngakau i mua ake ka akakore ei tatou i te ara a tetai tangata.—Kohe. 3:3; 1 Pete. 1:22.

11. Akapeea te pure me tauturu ia koe kia akakore i te ara a tetai ke?

¹¹ E pure e te pati ia Iehova no te tauturu kia akakore i te ara a tetai ke.c Kua akamārama mai a Ann, tei taikuia i mua ana, akapeea te pure te tauturu anga iaia. Karanga aia: “Kua pati au kia Iehova kia akakore mai i te ara a toku ngutuare tangata. E oti, kua tata au i tetai reta ki toku tati e tana vaine ou i te akakite kia raua e kua akakore au i ta raua ara.” Karanga a Ann e kare te reira i te mea māmā. Inara akakite aia: “Na te aru anga i to Iehova tu akakoreanga ara, penei ka akakeuia a tati e tana vaine i te apii no runga ia Iehova.”

12. Eaa tatou ka irinaki ei kia Iehova e kare i to tatou manako? (Maseli 3:​5, 6)

¹² E irinaki kia Iehova, kare i toou uaorai manako. (E tatau ia Maseli 3:​5, 6.) Kua kite ua a Iehova i te mea meitaki no tatou. (Isa. 55:​8, 9) E kare aia e pati ia tatou kia rave i te kino. No reira, me akamaroiroi aia ia tatou kia akakore i te ara a tetai ke, e mea papu e ka puapingaia tatou. (Sala. 40:4; Isa. 48:​17, 18) Inara, me ka irinaki ua tatou ki to tatou manako, kare tatou e akakore i te ara a tetai ke. (Mase. 14:12; Iere. 17:9) Karanga a Naomi: “Kua manako au e kare au e akakore i te ara a taku tane no tana i rave. Kua mataku au e ka akatupu akaou aia i te mamae kiaku. Irinaki au e kua kite a Iehova i toku turanga. Inara, kare te aiteanga e kua āriki aia i taku e rave ra noatu kua mārama aia i toku turanga. Te anoano ra au i tetai tuatau kia marū toku ngakau e te inangaro katoa maira a Iehova kia akakore au i te ara a taku tane.”d

E AKATUPU I TE MANAKO PAPU

13. Ia Roma 12:​18-21, eaa ta tatou ka anoanoia i te rave?

¹³ Me akakore tatou i te ara a tetai tei akatupu i te mamae kia tatou, e maata ta tatou ka anoanoia kia rave. Me e taeake me e tuaine Kerititiano aia, kia akatupu tatou i te ’au kiaia. (Mata. 5:​23, 24) Ka aroa e ka akakore ua tatou i te ara a tetai ke, kare kia riri ua atu. (E tatau ia Roma 12:​18-21; 1 Pete. 3:9) Eaa te ka tauturu ia tatou kia rave i te reira?

14. Eaa ta tatou ka tauta i te rave, e no teaa ra?

¹⁴ E tauta i te akara i te tangata tei akariri ia tatou mei ia Iehova rai. Kua akara a Iehova i te tu meitaki o te tangata. (2 Para. 16:9; Sala. 130:3) Ka kite tatou i te tu meitaki e te tu kino o te tangata. Me akamou tatou ki te tu meitaki o tetai ke, ka māmā ua i te akakore i tana ara. Ei akaraanga, karanga te taeake ko Jarrod, “E mea māmā iaku i te akakore i te ara a tetai taeake tei akariri mai iaku me akamanako au i tona au tu meitaki.”

15. Eaa i meitaki ei i te akakite ki tetai e kua akakore koe i tana ara?

¹⁵ E akakite ki tei akakino mai ia koe e kua akakore koe i tana ara. Eaa te tumu? Karanga a Naomi: “Kua ui mai taku tane, ‘Kua akakore koe i taku ara?’ Kua inangaro au i te pau, ‘Ae, kua akakore au i taau ara,’ inara kare i tae toku ngakau. Kite mai au e kare au i akakore tikai i tana ara. I te openga, kua rauka iaku i te tuatua kiaia, ‘Kua akakore au i taau ara.’ Pakia tikai te ngakau o taku tane e kua marū katoa au. Mei reira mai, kua irinaki au iaia e kua oaoa akaou maua.”

16. Eaa taau i kite mai no te akakore i te ara?

¹⁶ Te inangaro maira a Iehova ia tatou kia akakore i te ara a tetai ke. (Kolo. 3:13) Noatu ka ngatā i te rave i te reira, ka rauka rai ia tatou. Auraka tatou e kopae i to tatou mamae ngakau e kia akakore i te riri. E oti e akatupu i te au manako papu.—Akara i te pia “E Toru Ravenga no te Akakore i te Ara.”

TE AU PUAPINGA ME AKAKORE I TE ARA

17. Eaa te au puapinga me akakore tatou i te ara a tetai ke?

¹⁷ E maata te au tumu kia akakore tatou i te ara a tetai ke. Te mea mua, ka akamareka tatou i to tatou Metua aroa ko Iehova. (Luka 6:36) Te rua, ka akameitaki tatou ia Iehova no tana akakoreanga ara. (Mata. 6:12) E te toru, ka meitaki atu to tatou oraanga kopapa e to tatou pirianga oa ki tetai ke.

18-19. Eaa te ka tupu me akakore tatou i te ara a tetai ke?

¹⁸ Me akakore tatou i te ara a tetai ke, ka rauka te au akameitakianga. Akamanako ana i tei tupu kia Denise. Kare aia i kite i te reira taime, kua inangaro te tangata tei akaū i tona ngutuare i te tamate iaia uaorai i muri ake i te akavaanga. Inara, kua pakia tona ngakau te akakoreanga a Denise i tana ara, e kua akakeuia aia kia apii i te Pipiria ma te Au Kite o Iehova.

¹⁹ Penei ka ngatā ia tatou i te akakore i te ara a tetai ke. Inara, ka puapingaia tatou me rave i teia. (Mata. 5:7) No reira, e tauta pakari tatou i te aru i to Iehova tu akakoreanga ara.