Ebera 11:1—‘Ko te Akarongo te Tumu Tikai o te au Mea i Tatariia’

“Ko te akarongo e tatari anga papu ia i te au mea tei manakonakoia ra, te tumu akakite anga i te au mea tika tikai noatu e kare i akaraia.”—Ebera 11:1, New World Translation.

“Ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.”—Ebera 11:1, Te Bibilia Tapu Ra.

Aiteanga o Ebera 11:1

Te oronga maira teia irava i tetai akataka anga meitaki tikai no te akarongo e e maata atu te ō maira ki to te irinaki ua.

“Ko te akarongo e tatari anga papu ia i te au mea tei manakonakoia.” I roto i te Pipiria o Ebera 11:1, ko te tuatua Ereni i uriia e ko te “akarongo” te akakite maira i te manako irinaki anga papu, me kore akakeuanga pakari. Kare te akarongo i akatumuia ki runga i ta tatou e manako ua ra e ka tupu mai; mari ra e “tatari anga papu ia.” Te tuatua Ereni no te “tatari anga papu”a ka uri katoaia e e “pepa tikaanga,” no runga i tetai koreromotu ei akapapu anga ki te tangata nana te reira pepa.

“Ko te akarongo . . . te tumu akakite anga i te au mea tika tikai noatu e kare i akaraia.” Kua akatumuia te akarongo ki runga i te akapapu anga tikai. E akapapu anga pakari te reira noatu kare tetai i kite atu i tetai apinga, e mea tika ra te reira.

Aerenga manako o Ebera 11:1

Te puka Pipiria o Ebera e reta ia na te apotetoro ko Paulo i tata ki te au Kerititiano o te anere mataiti mua i Ierusalema. I roto i teia reta, te uriuri nei a Paulo i te puapinga o te akarongo. Ei akaraanga, kua tata aia: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) I muri ake te akataka anga i te akarongo i roto ia Ebera 11:1, kua akapapa mai a Paulo i te au akaraanga o te au tane e te au vaine tei akaari mai i teia tu. Kua akakite mai aia akapeea ratou te akarotai anga i to ratou akarongo ki te anoano o te Atua.—Ebera 11:4-38.